གཅེར་བུ་པའི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 169 བཀླགས་འདུག

རེ་སྨོན་གྱི་མཁྲེགས་ཚད།

དཔྱིད་ཀའི་སྨུག་པས་རྫི་མར་ཟེིལ་བ་སྨིན།།
ཐག་རིང་ཅེར་དྲགས་མིག་གི་རྒྱང་ཐག་ཆད།།
ཉེ་འགྱངས་བསྡུར་ནས་རི་ཚོགས་གཡོ་འགུལ་བཏང་།།
སྐྱིད་སྡུག་འདི་ཙམ་ཁུར་བར་འཚོ་བ་ཟེར།།
ཆར་རྗེས་གནམ་ས་དྭངས་བའི་མཛེས་སྡུག་གིས།།
ཁྱེད་ཀྱི་མགུར་དུ་ལན་བརྒྱར་འཁྱུད་ན་སྙམ།།
འགྲུལ་བའི་ས་ཚུགས་རེ་རེ་བརྟོལ་རྗེས་སུ།།
རྨི་ལམ་གྲངས་མེད་དབྱར་ཀ་ཁོ་ནར་བཞག།
གནས་མལ་འདི་རང་སྐྱིད་སྙམ་ཞེན་པའི་བློས།།
སྨིག་རྒྱུས་བསླུས་ལྟར་སྐྱེ་བོ་གྲངས་མེད་འཁྲིད།།
སྒེའུ་ཁུང་རེ་རེར་ཡོལ་བ་འདྲ་མིན་རེ།།
ཡོལ་བའི་མཚོན་མདངས་སོ་སོའི་བློ་དང་འདྲེས།།
སྨོན་ཚིག་སྤུངས་པའི་ཤོག་བྱ་སྣ་ཚོགས་ཤིག།
ཤག་གི་ཀླད་ནས་ཡང་ཡང་བཏང་ན་ཡང་།།
སྐུད་སྣེ་གློད་རྗེས་བྱིས་པ་ངུ་བ་ལྟར།།
རེ་འདུན་སྣ་ཚོགས་རྗེས་མེད་བྱ་བཞིན་འཕུར།།
མཛའ་བའི་གཏམ་གློད་གདོང་གི་འཛུམ་གྲོལ་བའི།།
ཡུད་ཀྱི་སྐྱིད་སྣང་ཚེ་ཡི་བཅུད་དུ་སྒོམ།།
འཁྲེང་ཞེན་བར་དོ་སུམ་རྩེག་བརྒལ་བའི་མཐར།།
ད་ལྟའི་བློ་ནི་ཅི་ལའང་ཡིད་རྟོན་བྲལ།།
དེ་ལྟ་མོད་ཀྱང་དཔྱིད་ཀ་འདི་རང་གི།།
ང་རང་ཆར་དང་མེ་ཏོག་སྤང་ལྗོངས་སོགས།།
ཡིད་དུ་འོང་བའི་དཔལ་དུ་གྱུར་ནས་སུ།།
ཚེ་གཅིག་རེ་བས་ཕོངས་པར་མ་གྱུར་ཅིག།