དད་པའི་དབྱངས།

རྩོམ་ཡིག་འདི་ཐེངས་ 514 བཀླགས་འདུག

དད་པའི་དབྱངས།

ལམ་བཟང་པོ། རྡ་ས།

སངས་རྒྱས་ཤིག་གི་འོད་མདའ་ཕོག་མིན་བདག་ལ་གསལ་ཆ་མེད་ན་ཡང་།།
མཐོང་བའི་གཤིས་ལ་ད་ཆ་ཁྱེད་ནི་སངས་རྒྱས་སྐུ་ཤ་རློན་པ་དངོས།།
མཁྱེན་དང་རྟོགས་པ་རིམ་ནས་རིམ་བརྒྱུད་འཕོ་བ་ཡིན་མིན་མི་ཤེས་ཏེ།།
དཀའ་སྤྱད་བརྩོན་པའི་འབྲས་བུ་བཟང་པོས་མཁས་པའི་གོ་འཕང་ཁྱེད་ཉིད་ཐོབ།།

དམ་པའི་གསུང་གི་ཉིང་ཁུ་མཆོད་དེ་མཁྱེན་པའི་ཐུགས་ཀྱི་དཀྱིལ་འཁོར་རྒྱས།།
སྟོང་ཉིད་ཟབ་མོའི་གནས་ལུགས་ཟིན་པས་སྙིང་རྗེའི་པདྨོ་རབ་ཏུ་བཀྲ།།
ལྟར་སྣང་བདག་གཞན་བཏགས་དོན་རྟོགས་པས་བརྩེ་བའི་སྤྱན་ཟུང་འགྲོ་ལ་ཕྱོགས།།
དུས་གསུམ་དུས་ཀྱི་ཁོ་ར་ཡུག་ཏུ་ཞི་བའི་ཕྱག་གཉིས་གླིང་འདིར་བརྐྱངས།།

ཤར་གྱི་རླུང་བུ་འཚུབ་མ་འཚུབ་བསྐོར་ཁ་བའི་རིག་གཞུང་གཏོར་བར་བརྩམས།།
ལ་ཁའི་དར་ལྕེ་ཧྲུལ་པོ་དེ་ཡང་གསོན་པའི་ཚད་ནས་ལྷུང་བའི་དུས།།
སྨག་གི་སེང་ལྭ་སྒྲ་གཅན་དབྱིབས་ཀྱིས་རྒྱལ་བསྟན་ཟླ་དཀར་སྒྲིབ་ལ་ཉེ།།
དེ་དུས་ཉིད་ཀྱི་ཐབས་ཤེས་རལ་གྲིས་ཀུན་གསལ་མཁའ་ལ་འོད་ཀྱིས་བཀང་།།

དབུགས་ཀྱི་རྒྱུ་ཐག་ཕྲ་མོ་ཅན་རྣམས་དུག་གསུམ་བྲན་གཡོག་ཁོ་ནར་གྱུར།།
མི་འདོད་གཅོང་རོང་གཟར་པོར་མཆོང་ལ་སོམ་ཉིའི་སྒོ་གླེགས་ཆག་པ་ཡིས།།
ཧཱུཾ་ཤི་ཕཊ་འགྱེལ་སྔགས་སྒྲ་སྒྲོག་པའི་སྨྱོན་པ་ཡ་མེད་ཁྱུ་གཅིག་བྱུང་།།
ཕྱོགས་ཀྱི་གཙང་པོའི་ཆུ་ཁ་ཤོར་དུས་མཐུན་སྒྲིལ་ལྕགས་ཟམ་ཁྱེད་ཀྱིས་དཔྱངས།།

ཚན་རྩལ་རིག་པའི་བང་ཁ་མགྱོགས་སོང་ནང་བསྟན་རྟ་ཕོ་བསྐྱུར་ལ་ཁད།།
རྗེས་དཔག་རིགས་པའི་བསྡུས་གཟུགས་མ་ལུས་མངོན་སུམ་མིག་གི་མདུན་དུ་བཀྲམ།།
ཕྲེང་ཐོགས་བན་རྒན་གོག་པོ་ཚོ་ཡང་ལྐུགས་པའི་བརྟུལ་བཞུགས་སྐྱོང་བའི་ཚེ།།
མཁྱེན་པའི་ཆིབས་པར་ཁྱེད་ཀྱིས་བཅིབས་ཏེ་རིགས་པས་ལྕག་གིས་བསྐུལ་ནས་ཐོན།།

ལྟ་བའི་ནང་གི་ཁྱེད་ཀྱི་ལྟ་བ་རིང་ལུགས་གཞན་ལས་སྲ་ཞིང་བརྟན།།
སྤྱོད་པའི་ནང་གི་ཁྱེད་ཀྱི་སྤྱོད་པ་ཚངས་སྤྱོད་གཞན་ལས་རྣམ་པར་མཛེས།།
སྒོམ་པའི་ནང་གི་ཁྱེད་ཀྱི་སྒོམ་པ་རྣལ་འབྱོར་གཞན་ལས་ཁྱད་དུ་འཕགས།།
སྨྲ་བའི་ནང་གི་ཁྱེད་ཀྱི་སྨྲ་བ་མཁས་པ་གཞན་ལས་ཀུན་ཏུ་འགངས།།

སྐུ་ཚེ་མི་འགྱུར་གཡུང་དྲུང་རིས་ཀྱིས་པོ་ཏ་ལ་ཡི་རྒྱན་དུ་ཤོག།
གསུང་དབྱངས་མི་འགག་ཚངས་པའི་གདངས་ཀྱིས་སྐྱེ་དགུའི་རྣ་བའི་བཅུད་དུ་ཤོག།
ཐུགས་དགོངས་མི་ཕྱེད་ཉ་གང་ཟླ་ཡིས་ཡ་ཐོག་བསྐལ་པའི་དཔལ་དུ་ཤོག།
ཉམས་མེད་བརྩེ་བའི་དབྱར་མཚོའི་རླབས་ཀྱིས་འགྲོ་བའི་བུ་རྣམས་སྐྱིད་པར་ཤོག།