གཅེར་བུ་པའི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 298 བཀླགས་འདུག

དེ་ཉིད་དེ་ལྟར་བྲིས་པ་ཞེས་བྱ་བ།

རི་དེ་སྨུག་པ་ལང་ལོང་།།
ཆུ་བོ་དེ་འདྲ་མགྱོགས་པ།།
ལམ་ཐུག་མི་དེ་རྡུལ་བཞིན།།
ཡལ་རྒྱུ་མེད་པ་འདི་ཅི།།
ཚོར་བ་འདང་གི་རི་མོ།།
གོས་སུ་གཙགས་ཀྱང་མི་ཆོག།།
ལུས་ལ་རྐོ་དགོས་འདྲ་ལེ།།

ལམ་དེ་ཆེ་ཡང་མི་ཆེ།།
མི་གཉིས་ཤོང་བ་ཙམ་རེད།།
དེ་ལ་ཆུང་ཞེས་སུས་ཟེར།།
དགོས་རྒྱུ་འཕྲོད་རྒྱུ་གཉིས་ཆ།།
དེ་ནས་དེ་ལྟར་བྱུང་སོང་།།
རྨི་ལམ་འཇའ་རིས་ཁྲ་མོ།།
སུ་ཡིས་ཞེ་ལ་བྲིས་སོང་།།

གནས་སྤོ་ངེས་མེད་བྱས་པའི།།
འཚོ་བ་ཟུངས་ཟད་ལྷམ་ཀོག།
ཁྱེད་ལ་ཆ་ཞིག་ཡོད་འདུག།
ང་ལའང་དེ་བཞིན་ཡོད་མོད།།
འགྲོ་ས་གནའ་བའི་ལམ་ལ།།
གོམ་པ་ཐེབས་ཚོད་དཀའ་ཡང་།།
སྐད་ཆའི་མགུར་དབྱངས་འཐེན་ནས།།
སེམས་ལ་འཛུམ་ཞིག་འཁོར་བཅུག།

ཆར་ལ་ཆར་ཞིག་བཏགས་ནས།།
མེ་ཏོག་དེ་ལ་བབས་ཀྱང་།།
སྦྲང་མ་ཞེ་འཁོན་ཡོད་ན།།
གུར་ཆུང་ཕུབ་ན་ཆོག་མོད།།
གནམ་ས་འདི་ལ་དབང་བའི།།
ལས་ལ་ཁ་མཆུ་མ་གཏུགས།།
འདུན་མ་ཤར་ལྷོ་ནོར་བ།།
ཆུ་ལོག་བཞིན་དུ་རྒྱུག་སོང་།།

རབ་གསལ་མཐའ་མའི་ཁ་ནས།།
ཐོ་རངས་ལྐོག་བརྡ་བཏང་སོང་།།
ལྐོག་བརྡ་སྣང་བའི་ཞལ་ངོ་།།
ཉི་འོད་བསུ་མཁན་ཡིན་ན།།
ཨ་ཇོ་མགུ་ཐག་ཆོད་ཀྱང་།།
གནམ་ངོ་རོག་པོའི་ནམ་ཟླ།།
ཁ་སང་དེ་རིང་དུས་རེད།།
བརྩེ་བ་མེ་ཏོག་དཀར་པོ།།
བཞད་ནས་ཡལ་དགོས་ཨེ་རེད།།