ཆང་སྐྱེས་སྙན་ངག་གསར་པ་ཞིག

རྩོམ་ཡིག་འདི་ཐེངས་ 786 བཀླགས་འདུག

ཆུ་ལེན་བུ་མོ།
རི་འགོ་སྨུག་་གིས་བཟུང་བའི་ཞོགས་པ་ཞིག་སྟེ།།
རྫ་ཆུ་ཤག་ཤག་འབབ་པའི་འགྲམ་ངོགས་དེ་ནས།།

གསོམ་དཀར་ཆུ་བཟོ་འཁུར་བའི་ན་ཆུང་མོ།།
གནམ་མཁའི་ལྷ་མོ་ས་ལ་བབས་པ་འདྲ་བྱུང་།།

ངོ་གདོང་འཛུམ་གྱིས་ཕྱུག་པའི་ཞལ་རས་དཀར་པོ།།
འགྲོ་ཞོར་ཟུར་མིག་གཡོ་བའི་ནུ་ཟུངའབུར་མ།།
རྩྭ་འགོའི་མུ་ཏིག་ཕྲེང་བ་རྡོག་པས་གཏོར་བའི།།
བུ་མོའི་འཇོ་སྒེག་རྨ་བྱ་སྔོན་མོ་འདྲ་བྱུང་།།

གཡུ་བྱུར་ཁྲ་རྒྱན་ཅན་གྱི་སྐྲ་ལོ་སྣུམ་པོ།།
གོས་ལྭ་སྔོ་སྐྱ་གོན་པའི་ཡིད་དུ་འོང་མ།།
སྐེ་རགས་ལྗང་ཁུ་ཞོཊ་གསར་རླུང་གིས་བསྐྱོད་དུས།།
ཕྱེ་ལེབ་སྒེག་མོའི་གཤོག་ཟུང་གར་ལ་རོལ་འདྲ།།

གཟུགས་དང་ལང་ཚོ་ཡག་པའི་གཞོན་ཤ་དར་མ།།
མཆུ་སྒྲོས་སྲབ་མཐུག་རན་པའི་སྙིང་དུ་སྡུག་མ།།
ག་ནས་བལྟས་ཀྱང་ཀུན་གྱི་ཡིད་དབང་འཕྲོག་མ།།
དེ་རིང་བདག་གིས་ཁྱེད་ལ་སྙན་ངག་བྲིས་ཡོད།།

དྲིན་ཆེན་ཕ་མ་གཉི་གའི་སྙིང་གི་ནོར་བུ།།
ན་ཆུང་བུ་མོ་ཁྲོད་ཀྱི་གཙུག་གི་རྒྱན་མ།།
རུ་སྡེ་ཕྱི་ནང་བར་ན་ཀུན་གྱིས་བསྟོད་མ།།
ཁོ་བོའི་གངས་དཀར་སེམས་ཀྱི་མེ་ཏོག་རྐང་གཅིག།

སེང་ལྕམ་འབྲུག་མོར་ཕུལ་བའི་མཛེས་མའི་དབུ་རྒྱན།།
ད་ལྟའི་དུས་ལ་ཁྱེད་རང་གཅིག་པོར་མ་གཏོགས།།
གཞན་རྣམས་སུ་དང་གང་ལ་འོས་ཤིང་འཚམས་པའི།།
རྒྱུ་མཚན་ཡོད་པ་མ་མཐོང་ཆུ་ལེན་བུ་མོ།།
ཆང་སྐྱེས།