དྲན་པ་དབྱངས་ལ་བཏགས་པ། སྙིང་མིག རྡ་ས། ད་ལོ་ཨ་མ་ཧ་ཅང་དྲན་པ་ཡིན། །གནམ་ངོ་རྨུག་པ་ཨེ་རེད་གང་རེད་གོ། ཆར་དུས་ཟད་མཐའ་མེད་པ་ཅི་རེད་གོ །ཁང་པ་གོག་པོས་གློ་བ་ཨན་ཙམ་བརླན།།

ཉི་ཟླའི་པང་གི་སྐར་ཚོམ། རས་གཟན་དམར་པོ། རྔ་བ། ལང་ཚོ་གསར་བའི་དབུ་ཁྱུད་ཡག་མེ་ཏོག་འདྲ་ལ་ལོ་འདབ་འདྲ།། སྐྱེས་ཡག་ལུས་ཀྱི་བཀོད་པ་མཛེས་བྲིས་ཐང་འདྲ་ལ་སྤྲིན་སྐར་འདྲ།།

མཚན་མོར་འགུལ་བ། སློབ་དཔོན་དགའ་དགའ། རྣམ་གྲོལ་གླིང་། སྤྲིན་གྱི་གསེབ་ཏུ་སྐར་མའི་ལན་བུ་བསླས།། སྨུག་པའི་ཀློང་ན་སྡེར་ཆགས་ཐར་ཐོར་བྱིང་།། ལུང་པའི་མདའ་རུ་རྟ་ཕོ་ཆུ་འཐུང་རྒྱུག། འཚེར་སྐད་ལྷང་ལྷང་སྐྱོ་བ་དབྱངས་དང་འདྲེས།།

སྨུག་པར་རོལ་བ། ཨ་འཇམ། ས་རཱ་མཐོ་སློབ། གསེར་ཏོག་གནམ་ངོ་མོག་པོར་ཟུག །ཁྲོམ་སྲང་བོད་ཀྱི་ཡིན་ཚུལ་བྲིས།། མི་ལོ་མང་བོའི་རྐང་རྗེས་དག །གཅིག་གིས་སྲུང་ཞིང་གཅིག་གིས་གློད།།

ཡོང་ཕྱིར་དགོས། དགོས་ཕྱིར་ཤོག སློབ་དཔོན་ཚུལ་ཁྲིམས་ནོར་བུ། རྣམ་གྲོལ་གླིང་། རང་བྱུང་ཡུལ་ལྗོངས་ཀྱི་ས་ཁད་གཤགས་ནས་ཡོང་།། ཆུ་ཆེན་འགྲོ་ལམ་གྱི་བཞི་མདོ་བཀག་ནས་ཡོང་།། མུ་མེད་རྩྭ་ཐང་གི་བྱང་ཁོག་བགོས་ནས་ཡོང་།།

རེ་བས་གསོན་པ། ཨོ་གླིང་། རྫ་ཚེ་རིང་བཀྲ་ཤིས། ཉི་མའི་འོད་ཀྱིས་འཁྲི་ཤིང་འདབ་མ་སྒུལ།། སེམས་ཀྱི་མེ་ཏོག་གསོན་པའི་ཕྱོགས་སུ་བཞད།། རེ་བའི་མཁའ་དབུགས་རྩྭ་ཡན་གསེང་ནས་སད།། མི་ཡི་ཡུལ་དེར་བདག་གི་རྨི་ལམ་མཆིས།།

སྙིང་རུས་བཅག་པ། ལྗང་གསར། ཁམས་པ་སྒར། ངས་ནི་སྔར་བཞིན་ཁྱོད་ཅག་ཉག་ཅིག་ལ།། སེམས་པ་གླན་ན་འདོད་སོང་ཉེ་བའི་མི།། ཡུད་ཙམ་ལྷན་དུ་མོལ་མཆིད་འདོད་པ་ཡང་།། གྲིབ་མའི་རྒྱབ་ན་འཆར་གཞི་ཅི་ཡང་མེད།། ངེད་ཅག་འཛུམ་ཆུང་ལྷོད་པའི་མདང་ད་ནངས།། སྙིང་ལ་གཅོང་ནད་མུན་ཁ་འཚུབ་པ་ལས།། ཡུས་དང་ངོ་ཆེན་བཤམ་པའི་སྒོ་དྲུང་ནས།། ད་ནི་ང་རང་གཏན་དུ་རྒྱང་བཀྱེད་བྱ།། སྣང་བ་ཐམས་ཅད་འགྱུར་སོང་བརྗེས་སོང་བ།། འབྱོར་བས་གཤོག་པ་ཅུང་ཟད་ཐོགས་པའི་ཁྱེད།། དོ་ཞག་རང་གཤིས་ཤོག་བུའི་རླུང་རྟ་ལྟར།། རི་ཐང་གང་སར་སྤུར་སོང་འཕྱན་སོང་ཨང་།། འོ་སྐོལ་ཨུ་ཚུགས་ཀུ་རེ་རྩེད་མི་དགོས།། རྨི་ལམ་རེ་རེའི་ཆེད་དུ་གྱེས་པས་ཆོག། ཞེན་ཆགས་ས་བོན་རུལ་བའི་སྐད་ཅིག་མར།། རེ་དོགས་རླུང་བུ་དག་ཀྱང་ལྡང་མི་འོང་།། ༢༠༡༦-༨-༢༧