རེ་བས་གསོན་པ། ཨོ་གླིང་། རྫ་ཚེ་རིང་བཀྲ་ཤིས། ཉི་མའི་འོད་ཀྱིས་འཁྲི་ཤིང་འདབ་མ་སྒུལ།། སེམས་ཀྱི་མེ་ཏོག་གསོན་པའི་ཕྱོགས་སུ་བཞད།། རེ་བའི་མཁའ་དབུགས་རྩྭ་ཡན་གསེང་ནས་སད།། མི་ཡི་ཡུལ་དེར་བདག་གི་རྨི་ལམ་མཆིས།།

སྙིང་རུས་བཅག་པ། ལྗང་གསར། ཁམས་པ་སྒར། ངས་ནི་སྔར་བཞིན་ཁྱོད་ཅག་ཉག་ཅིག་ལ།། སེམས་པ་གླན་ན་འདོད་སོང་ཉེ་བའི་མི།། ཡུད་ཙམ་ལྷན་དུ་མོལ་མཆིད་འདོད་པ་ཡང་།། གྲིབ་མའི་རྒྱབ་ན་འཆར་གཞི་ཅི་ཡང་མེད།། ངེད་ཅག་འཛུམ་ཆུང་ལྷོད་པའི་མདང་ད་ནངས།། སྙིང་ལ་གཅོང་ནད་མུན་ཁ་འཚུབ་པ་ལས།། ཡུས་དང་ངོ་ཆེན་བཤམ་པའི་སྒོ་དྲུང་ནས།། ད་ནི་ང་རང་གཏན་དུ་རྒྱང་བཀྱེད་བྱ།། སྣང་བ་ཐམས་ཅད་འགྱུར་སོང་བརྗེས་སོང་བ།། འབྱོར་བས་གཤོག་པ་ཅུང་ཟད་ཐོགས་པའི་ཁྱེད།། དོ་ཞག་རང་གཤིས་ཤོག་བུའི་རླུང་རྟ་ལྟར།། རི་ཐང་གང་སར་སྤུར་སོང་འཕྱན་སོང་ཨང་།། འོ་སྐོལ་ཨུ་ཚུགས་ཀུ་རེ་རྩེད་མི་དགོས།། རྨི་ལམ་རེ་རེའི་ཆེད་དུ་གྱེས་པས་ཆོག། ཞེན་ཆགས་ས་བོན་རུལ་བའི་སྐད་ཅིག་མར།། རེ་དོགས་རླུང་བུ་དག་ཀྱང་ལྡང་མི་འོང་།། ༢༠༡༦-༨-༢༧

ཡུལ་གྱར་བའི་གདུང་གླུ། གཟི་མིག་གསུམ་པ། བོད། སྐྱེ་དུས་ལྟེ་ཁྲག་ས་རུ་འཐོར་བའི་གནས།། རྒ་དུས་རྣམ་ཤེས་ཞི་བར་གཟིམས་པའི་ཞིང་།། གཞོན་དུས་སྣང་བ་འཁོར་སའི་འཇིག་རྟེན་ཏེ།། རྣམ་ཀུན་སྙིང་ན་འཕག་པའི་ཕ་ཡུལ་ལགས།།

མཚན་མོའི་སྐྱོ་མགུར། སྒོམ་སྐལ། བོད། མི་ཚེ་འདི་འོ་སྙམ་པའི་ངེས་གཏན་ནི་མ་མཆིས།། བྱ་བ་དེ་སྒྲུབ་བསམ་པའི་འཆར་ཅན་ནི་མི་འདུག། གཏད་སོ་གང་ཡང་མེད་པར་ཉིན་གང་ལ་བྲེལ་རྗེས།།

རྒྱ་མཚོའི་ཆུ་ཐིགས། བདག་མེད། ས་རཱ་མཐོ་སློབ། ཕས་རྒོལ་བདུད་ཀྱིས་ཀླན་ཀ་བརྩད་ཀྱང་བརྟུལ་ཞུགས་སྤྱོད་པའི་མཆོག་ལ་རོལ།། འདོད་ལྷའི་མཚོན་གྱི་གོ་ཆ་དག་ལ་བྱམས་པའི་མེ་ཏོག་ལན་དུ་སྦྱིན།། ལྷས་བྱིན་བདུད་ཀྱི་གཡོ་སྒྱུས་བསླུས་ཀྱང་སྤྱན་མིག་ཙམ་ཡང་བགྲད་མ་ནུས།།

རུལ་སུངས་ཀྱི་གཡའ་གོས་པའི་ང་རང་། ཐོད་རྒལ་སློབ་བུ། རྣམ་གྲོལ་གླིང་། ཕྲ་རྒྱས་གདོན་ཆེན་བཞུགས་པའི། །སྨྱོ་སྨན་སྙིང་ལ་འཐིམ་འདྲའི།། སེམས་ཀྱི་འཆར་ཡན་མང་བའི། །དགེ་སློང་ང་རང་ཅི་ཞིག།

ལོ་ཟླ་ནག་པོའི་བཙན་ཤེད། དིང་སྨྱུག རྣམ་གྲོལ་གླིང་། སྐྱོ་གདུང་དམྱལ་བའི་གྲོང་གི་སྲང་ལམ་དུ།། སྡུག་གི་ངུ་སྐད་གནམ་དུ་ཀེར་ན་ཡང་།། དྭངས་གཙང་མིག་ཆུའི་གཙང་པོ་མ་བཞུད་པའི།། ལོ་ཟླ་ནག་པོའི་ནག་ཉེས་གླེང་ན་འདོད།། དཔྱིད་གསུམ་ངེས་སྲེག་དུས་ཀྱི་སྟོན་མོ་རུ།། མ་ཕྱིས་དགུང་གི་བཞིན་ངོ་ཧ་ཅང་དྭངས།། དྲི་བཞོན་བསིལ་བུའི་མགྲིན་གླུ་རྒྱང་ལ་བུད།། མ་བོས་ཚངས་དབང་སྲས་པོ་མགྲོན་དུ་ཕེབས།། ར་ཞོན་བཙན་པོས་འཁྱོག་འབར་དམར་པོ་སྦར།། ཚ་བའི་མེ་རླབས་བར་སྣང་དབྱིངས་སུ་འཕྱུར།། ཚ་བའི་ཟེགས་མ་སྐྱེ་རྒུའི་ལུས་ལ་ཐིམ།། ཉམ་ཐག་འགའ་རེ་ལྔ་པའི་ལམ་དུ་བརྫངས།། ཚ་གདུང་གཟེར་བོས་སྙིང་ལ་རྨ་ཁ་གཏོད།། རྔུལ་ཆུའི་ཐིག་པས་ལུས་ཀྱི་འབྱུང་བ་དཀྲུགས།། མི་བཟོད་སྡུག་སྐད་འཛེར་བོའི་དབྱར་རྔ་སྟེ།། དཔྱིད་དུས་ལོ་ཟླ་ནག་པོའི་རྣམ་ཐར་ལགས།། སྔོ་ལྗང་གཡུ་ཡི་སྤང་ཐང་ཡངས་མོའི་སྟེང་།། ཁྲ་ཆིལ་སྤང་རྒྱན་མེ་ཏོག་ལང་ཚོ་སྨིན།། རྐང་དྲུག་གཞོན་ནུས་ཕྱོགས་བཞིར་མགྲིན་གླུ་གྱེར།། དབྱར་གསུམ་མཛེས་སྡུག་བཀྲ་བའི་དུས་ཚིགས་སུ།། གནམ་རྒན་མ་ཡི་མིག་ཆུའི་གཙང་པོ་བོར།། ལ་དང་ལུང་པའི་གཞོང་པ་ཤག་སྒྲས་བཀང་།། རབ་མཛེས་ནོར་འཛིན་བུ་མོའི་བཞིན་རས་བཤུས།། བགྲོད་བྱ་སྣུམ་ནག་ཅན་པོའི་ལྟོ་བ་གཤགས།། མེ་ཏོག་སད་ཀྱིས་བཅོམ་དང་གཉིས་མེད་པར།། ཞིང་པ་རྒད་པོའི་རྔུལ་ཁྲག་ལས་གྲུབ་པའི།། རེ་སྒུག་སྟོན་ཀའི་ལོ་ཏོག་དམིགས་མེད་བཟོས།། ཉེས་མེད་ཞིང་ཐང་གྲུ་བཞི་གཅེར་བུར་སྟོན།། ཀུན་གྱི་མིག་ཏུ་འོང་བའི་རྩི་ཤིང་དག། ཤག་སེ་རྦ་རླབས་གཅིག་གིས་མེད་པར་བྱས།། ཨ་ཅེ་འབྲོག་མོའི་བག་ཕེབས་སེམས་ཀྱི་ཁམས།། ལོ་ཟླ་ནག་པོའི་དབྱར་གཞུང་འདི་རུ་འཁྲུགས།། ལུས་ཅན་ཀུན་པོ་སྐྱོ་གདུང་ཀློང་ལ་ཐིམ།། མཆི་རྡོག་མཚོ་མོ་འདྲེན་བྱེད་ཀོང་དུ་སྐམ།། སྙིང་ཆུང་དམར་པོར་གཅོང་གི་ནད་འབུ་འཁོར།། ལོ་ནག་འདི་ཡིས་བཅད་པའི་བཙན་ཁྲིམས་ལགས།།