ཨ་འཇམ་སྙན་ངག་གསར་པ་ཞིག

རྩོམ་ཡིག་འདི་ཐེངས་ 210 བཀླགས་འདུག

ཆར།
ཁང་བ་ཡི་ཁྱམས་འོག་ཏུ་ནམ་མཁའ་ཡང་ངུས་པར་ཅེར།།
རྩྭ་རྩེ་ཡི་ཟིལ་བ་ལ་སྨུག་པ་ཡི་ཁ་དཀྲིས་འཐེན།།
གཞུང་ལམ་གྱི་སྐུད་པ་ཡང་གནམ་ས་ཡི་མཐའ་རུ་ཟད།།
རྒྱང་རིང་གི་རྟ་ཕོ་ཞིག་བང་ཁ་ཡང་སེམས་ལ་གཤར།།
ཞིང་གྲོང་གི་སྒེའུ་ཁུང་ལ་ཆར་ཐིགས་ཀྱི་ཁ་རླངས་འཛིན།།
བྱི་ལ་ནི་ལྡོམ་པོ་ཡིས་ཁེར་རྐྱང་གི་རྣམ་ཤེས་སྒུལ།།
སྙན་ངག་ནི་རློན་པ་ཞིག་ཕྱི་རོལ་གྱི་རྡང་ལ་བཀལ།།
ཚ་བ་ཞིག་འཇགས་ཤུལ་གྱི་ས་གཞི་ཡིས་ཁ་ངོ་བཀྲུས།།
ཨ་རི་ཡི་དབུས་མ་རུ་ཕུར་ཟེལ་ཞེས་མིང་ཞིག་འགུལ།།
བོད་གླུ་ལ་སྲོག་བཞག་པའི་ཁང་མིག་ཅིག་མཐོ་རུ་གཡེང་།།
ནུབ་ཕྱོགས་ཀྱི་ཞོགས་ཟས་ལ་ཨམ་སྐད་ཀྱི་རྒྱན་ཞིག་བཏགས།།
ཕར་ལ་ནི་བཀྱེད་གྱུར་ཀྱང་རིག་གནས་ནི་ཚུར་ལ་འབྱམས།།
ཧི་མ་ལའི་ཕྲག་ཁ་རུ་རྣ་བ་འདི་སོ་ལ་བུད།།
ཁྱིམ་མཚེས་ཀྱི་མགོ་སེར་ཞིག་སྐྱི་ལྤགས་ཀྱང་བཞད་ཙམ་བྱས།།
གད་སྙིགས་ཀྱི་རླངས་འཁོར་ཡང་རེ་ཞིག་ལ་ཚོམ་ཙམ་བྱུང་།།
ང་རང་གི་ལུས་སྟེང་ནས་གླེགས་བམ་གྱི་བསུང་ཡོད་སྐད།།
བ་མོ་ནི་འགའ་ཞིག་ཀྱང་ཐང་ཆེན་གྱི་ནག་ཐིག་ཅིག།
བན་བུན་གྱི་ནམ་མཁའ་དང་ཐག་རིང་ནས་ཐག་རིང་འབྱར།།
རྒྱུས་མེད་ཀྱི་ཅ་ལག་གིས་གཡས་གཡོན་ལ་བཙིར་ཏེ་ཡོད།།
ཡར་ལུང་གི་མི་ཆོས་ཀྱང་ལུས་སེམས་ལ་གློད་དེ་བཞུར།།
ཁུ་སིམ་གྱི་ཐང་གཞུང་ནས་ཚིག་རྐང་ལ་ཁ་ངོ་འཕྲད།།
ནང་སེམས་ཀྱི་ཀུ་ཅོ་ཡིས་སྤྲིན་པ་ལ་ཙོར་ཞིག་བཏགས།།
ས་ཐིག་ནི་བསྲེས་ན་ཡང་རྟོག་པ་ཡི་སྐྱ་དེ་འཕྲལ།།
ཤར་ཕྱོགས་ཀྱི་སྐྱིལ་དཀྲུང་ཡང་ཨ་རི་ཡི་ཁྱིམ་ལ་བཞག།
རླུང་བུ་ནི་བསིལ་བསིལ་དུ་ཆར་ཤ་ནི་རེ་རེ་ཤད།།
བོད་ཡིག་གི་གློག་ཀླད་འདི་གནམ་མཐའ་ལ་ཕྱོགས་ནས་འགུལ།།
འཚོ་བ་ནི་རེས་མོས་བརྗེས་རང་ལམ་ནི་སྔར་བཞིན་མཐོང་།།
ཤ་ཚ་བའི་སྙན་ངག་གིས་ང་རང་ནི་བསྲུངས་ནས་ཡོད།།
༢༠༢༡ ༦ ༢༦ ལ། ཨ་འཇམ།