འགར་ཐང་དཀར་འབོལ་རྩོམ་གསར་པ།

རྩོམ་ཡིག་འདི་ཐེངས་ 1803 བཀླགས་འདུག

རང་གཤིས་ཀྱི་གདུང་འབོད་ལས་འཕྲོས་པའི་གཏམ་ཐོར་བུ།

མགར་ཐང་དཀར། མཚོ་ལྷོ།

དང་པོ་ནས་ངས་རང་གཤིས་དང་སྦྱར་ཏེ་སྐད་ཆ་བསྡུས་མ་ཞིག་བཤད་རྒྱུ་ཡིན། སྤྱིར་མི་བུ་སུ་དང་གང་ཡིན་ཡང་ནར་སོན་གྱི་གོ་རིམ་ཁྲོད་ནས་ཏག་ཏག་རང་གཤིས་ཟེར་བའི་མིང་ཡིག་འདི་གཙིགས་སུ་འཛིན་པ་མ་ཟད་རྩིས་ཆེ་ལ། མིང་ཡིག་འདིའི་འཚར་སྐྱེའི་གོ་རིམ་ཁྲོད་དུ་མི་སྒེར་སོ་སོ་སུ་ཡིན་ཡང་དཀའ་ལས་ཁག་པོ་འདྲ་རྒྱག་གི་ཡོད་སྲིད། ཇི་ལྟར་བཤད་ཀྱང་མི་གཤིས་ཟེར་བ་འདིས་མི་བུ་གང་དེའི་འཚོ་བའི་གོ་རིམ་ཁྲོད་ནག་ཉེས་བཟོ་བཞིན་ཡོད་ལ་ཕན་པ་འང་སྒྲུབ་བཞིན་མཆིས། ངས་རང་གཤིས་ལ་གདུང་འབོད་བྱེད་ན་ངེས་པར་མི་གཤིས་གླེང་དགོས་དོན་སྤྱིར་ན་མེད་སྙམ་ཡང་དེ་ནི་དེ་ཙམ་མིན་པར་ཆུ་དང་ཉ་མོ་བཞིན་དེ་གཉིས་ཁ་ཁར་དབྱེ་རུ་མི་ནུས་སོ། ཡིན་ཕྱིར་ངས་མི་གཤིས་ནི་བསམ་སྤྱོད་ཀྱི་འཕྲོས་དོན་འབའ་ཞིག་ཏུ་བརྩིས་ཏེ་རགས་ཙམ་གླེང་བར་བྱ། སྤྱིར་མི་གཤིས་ཟེར་ན་དྲང་བདེན་གྱི་སྨྲ་ལྕེ་ལས་སྤད་ཐག་ཆོད་པའི་སྒོ་ནས་བཤད་ན་དེ་ནི་ཁ་བཤད་དང་ལག་ལེན་གཉིས་ཁ་འཕྲོད་མི་ཐུབ་པ་ཞིག་ཏུ་ཆགས་ཀྱི་ཡོད། རྒྱུ་མཚན་ཅིའི་ཕྱིར་ཡིན་ཟེར་ན། སྤྱིར་སྤྱི་ཚོགས་སུ་མི་ཞེས་པ་སྣ་གཅིག་ཏུ་ཆགས་ཡོད་ན་འང་སོ་སོ་མི་ཡུལ་ལ་བསླེབས་རྗེས་ནས་ཐུན་མོངས་མ་ཡིན་པའི་གཤིས་ལུགས་རེ་དྲུངས་ནས་ཡོད་སྐད། དཔེར་ན་བྱིས་པ་ལ་ལ་བཙས་མ་ཐག་ནས་ངུ་ལ་དགའ་བ་དང་། ཡང་བྱིས་པ་ལ་ལ་ལྷིང་འཇགས་ལ་དགའ་བ་ལྟ་བུ། དེ་ཡང་མདོར་དེད་ནས་བཤད་ན་མིའི་གཤིས་ལུགས་ཤིག་ཏུ་མི་བརྩི་རང་བརྩི་ཆགས་ཡོད། དེ་ལ་གཞིག་ད་གཟོད་མིའི་བཟང་ངན་དང་མཐོ་དམན་དབྱེ་དགོས་པ་རེད། འོ་ན་མི་གཤིས་ག་འདྲ་ཞིག་ཆགས་ཡོད་ན་དེ་ལ་མི་བཟང་ངམ་ཡ་རབས་ཞེས་སྒྲེང་ཆོག་གི་རེད་ཟེར་ན་འདི་ལྟ་སྟེ། མཁས་པའི་ཞལ་ནས”བླུན་པོའི་ཡོན་ཏན་ཁར་འབྱིན་ཏེ།།མཁས་པའི་ཡོན་ཏན་ཁོང་དུ་སྦེད།།སོག་མ་ཆུ་ཡི་སྟེང་དུ་འཕྱོ།།ནོར་བུ་སྟེང་དུ་བཞག་ཀྱང་འབྱིང་།།”ཞེས་པ་ལས་གསལ་ཁ་ཆོད་པོ་བྱས་འདུག སྤྱིར་མི་ཡ་རབས་ཚུལ་དང་ལྡན་པ་ཞིག་ཡིན་ན་བཤད་ལ་མི་དགའ་ཞིང་ལག་ལེན་ལ་དགའ་བ། རྩོད་པར་མི་མགུ་ཞིང་བརྩོན་པར་དགའ་བ། འཁོན་ལ་མི་དུང་ཞིང་ཞི་བར་དགའ་བ་ཞིག་ཡིན་དགོས། དེ་བས་བོད་མིའི་ཁ་དཔེ་ལས་ཁུ་ཚུར་རྡོག་རྡོག་གི་མྱི་མི་ཐུབ་ཟེར་བ་ནང་བཞིན། སེམས་ནག་རྐྱང་རྐྱང་ལ་རེམ་ན་ནམ་ཞིག་རང་ཉིད་བརླག་སྤྱད་དུ་འགྲོ་ངེས་པས་དེར་མནོ་བསམ་རེ་བཏང་ན་ཨེ་ལེགས་སྙམ།
འོན་ཀྱང་ཁྱོད་ཀྱི་བཤད་པ་དེར་བདེན་པའི་སྣེ་དོག་ཙམ་ཡང་མི་འདུག་ཟེར་ན་ང་ཡང་དེ་ལས་ལྷག་པ་ཞིག་ཡེ་ནས་འདྲེན་རྒྱུ་མེད་དོ་ཟེར་འདོད་སོང་། ཡང་མི་བུ་རེ་འགའ་ཞིག་གིས་འདི་ལྟར་ཡང་བསམ་སྲིད་དེ། དཔེར་ན། ཀུན་མཐུན་གྱི་མི་ག་གེ་མོ་ཞིག་ལ་སློབ་སྦྱོང་བྱས་ན་འགྲིག་གོ་སྙམ་སྲིད་མོད་ཚོར་ཤེས་ཀྱི་གཞུ་རྒྱུད་ལ་དཔྱོད་ཤེས་ཀྱི་མདའ་བཞག་ན་དེ་ནི་ཅུང་ནོར་འཁྲུལ་གྱི་ཕྱོགས་སུ་ཤས་ཨེ་ཆེ་སྙམ། ཅི་ལ་ཟེར་ན་སྤྱི་ཚོགས་དང་འཚོ་བའི་དགོས་ངེས་བླངས་བྱ་ལྟར་རང་སོ་སོའི་རང་གཤིས་ལ་སྲེག་བཅད་བརྡར་གསུམ་མ་བྱས་ན། ང་ཡང་གན་ནང་བཞིན་འགྱུར་དགོས་ཞེས་བློ་ཐག་སྤད་དེ་བཅད་ན་མཁས་པའི་ཞལ་ནས”ཀུན་དང་མཐུན་པ་རྩ་བ་ཡིན་མོད་ཀྱང་།།མཐོང་ཚུལ་ལད་མོ་བྱས་ན་ཀླད་མེད་ཡིན།།སྐད་རིགས་ཐམས་ཅད་ཤེས་ན་བཟང་མོད་ཀྱང་།།རང་གི་ཕ་སྐད་བརྗེད་ན་ངོ་ཚ་ཡིན།།”ཞེས་པ་ནང་བཞིན་ནོ། དེ་ཡིན་ཕྱིར་ནམ་རྒྱུན་རང་ལ་ཞུ་དག་དང་དགག་སྒྲུབ་བཏང་སྟེ་མདུན་གྱི་ལམ་ལ་གོམ་པ་སྤོས་ན་ནི་བཟང་ངོ་མ་གཏོགས། གྱང་ཁའི་རྩྭ་ནང་བཞིན་ཡར་གྱི་ལྟ་བར་བལྟས་ཏེ་ཡར་ལ་རྒྱུག་པ་དང་མར་གྱི་བྱ་ལས་ལ་བལྟས་ཏེ་མར་ལ་བརྒྱུག་ན་རེ་ཞིག་རི་བོང་ཅལ་འདྲོགས་ཀྱི་དཔེ་རུ་འགྲོ་ངེས་པས་དེ་ཡང་མནོ་བསམ་གཏོང་དགོས་ས་ཞིག་ཨེ་ཡིན་འདོད།
འོ་ན་གཞན་གྱི་མིག་ལམ་ནས་མི་བུ་འོས་མཐུན་ཡ་རབས་ཤིག་ཏུ་ཆགས་དགོས་ན་བྱ་ཐབས་བྲལ་སོང་བ་ཨེ་རེད་ཟེར་ན་མིན་ཏེ། རང་སོ་སོའི་སློབ་གསོ་མྱོང་བའི་གོ་རིམ་ཁྲོད་ནས་རང་ལ་སྲེག་བཅད་བརྡར་གསུམ་བྱས་ན་རང་གཤིས་གཙང་མ་ཞིག་ཆགས་ཐུབ་གི་རེད་སྙམ། མ་གཏོགས་ཨུ་ཚུགས་ཀྱི་ཁུ་ཚུར་རྡོ་ལ་བརྒྱབ་ན་དྲུངས་ནས་མི་བུ་ཡ་རབས་ཚུལ་མཐུན་ཞིག་ཏུ་ཆགས་ཐུབ་གི་མ་རེད། བོད་མིའི་དཔེ་ལ༼གཡག་སྣ་ཁུ་ཚུར༽ཟེར་བ་འང་དེ་ལ་ཤུགས་སུ་འབྱིན་པ་ཨེ་ཡིན་སྙམ། དེ་ཡིན་ཙང་རྟོགས་པ་མཐོ་རུ་བཏེག་སྟེ་རིག་གཞུང་གང་ཡིན་ལ་འཇུག་ན་ནི་བཟང་ལས་ངན་མེད་དོ་སྙམ། སྤྱིར་ན་ང་རང་ཉིད་ལ་ཚད་ལྡན་གྱི་རང་གཤིས་གཙང་མ་ཞིག་མེད་བཞིན་ད་དུང་གཞན་ལ་རང་གཤིས་གླེང་ན་ཚད་བརྒལ་རང་བཞིན་གྱི་རྟོགས་སད་པ་ཞིག་གི་ཚུགས་ཀ་འཛིན་པ་དང་གཉིས་སུ་མེད་ན་འང་། ངས་ཀྱང་བསམ་པ་ཡར་སེམས་དང་སྐུལ་པ་ཡར་འཁེལ་གྱི་དཔེ་ནང་བཞིན་འདི་ལྟར་མི་ལབ་ཐབས་མེད་དུ་ཆགས་སོང་། སློབ་གསོའི་གཞུང་དང་ཆོས་གཞུང་ལ་སྦྱར་ན་ནི་རང་གཤིས་ཟེར་རྒྱུ་དེ་ང་ལྟ་བུའི་རིག་གཞུང་གང་དེའི་ཚིག་དོན་གྱི་ཆ་ལ་དབེན་དྲགས་པའི་མི་བུ་ཞིག་གི་གླེང་ན་ཅུང་ཐོལ་བརྒལ་རང་བཞིན་གྱི་ཁ་བརྡ་ཞིག་ཡིན་ན་ཐང་མོད། གང་ལྟར་ང་རང་ཉིད་ཡང་སློབ་གྲྭ་ཆེ་འབྲིང་ཆུང་གསུམ་འགྲིམས་ཁུལ་བྱས་པས་སྟབས་ཀྱིས་མྱོང་བ་རགས་ཙམ་གླེང་བ་ཡིན། འཕྲོར་ཡང་ལུང་རྒྱས་པ་ཞིག་དྲུད་ཡོང་ན་རྒྱལ་སྲས་ལག་ལེན་ཞེས་བྱ་བའི་གཞུང་ལས་ཀྱང་སྐྱེས་བུ་ཆུང་ངུ་ཞེས་པ་འདི་སྐད་གསུངས་ཡོད་དེ
“ཤིན་དུ་བཟོད་དཀའི་ངན་སོང་སྡུག་བསྔལ་རྣམས།།
སྡིག་པའི་ལས་ཀྱི་འབྲས་བུར་ཐུབ་པས་གསུངས།།
དེ་ཕྱིར་སྲོག་ལ་བབས་ཀྱང་སྡིག་པའི་ལས།།
ནམ་ཡང་མི་བྱེད་རྒྱལ་སྲས་ལག་ལེན་ཡིན།།”
ཞེས་པ་ལས་ཀྱང་སྐྱེས་བུ་ཆུང་ངུར་ཆ་མཚོན་ན་འང་ཅི་མི་ནུས་ཀྱང་སྡིག་ལས་བྱེད་མི་རུང་བ་གསུངས་ཡོད་སྐད། ངས་ཀྱང་དེ་ལས་འཕྲོས་ཏེ་གོམ་པ་གང་སྔོན་ལ་སྤོས་ཏེ་མིའི་རིགས་ལ་དགེ་ལས་ཀྱི་འབྲས་བུ་དོག་ཙམ་སྦྱིན་ཨེ་ཐུབ་བརྩོན་གྱི་ཡོད། དེ་ལས་འཕྲོས་ཏེ་བཤད་ན་མིའི་མཚན་ཉིད་ལ་འང་འདི་སྐད་སྦྱར་ཡོད་དེ༼སྨྲ་ཤེས་ཤིང་དོན་གོ་བ༽ཞེས་བཤད་ཡོད་ཙང་ངས་ཀྱང་རང་ཉིད་ཕོ་ལོ་ཉི་ཤུར་་སོན་ཏེ་དོན་ཡང་དག་དང་བདེན་ལུགས་ཕྲན་ཙམ་གོ་ཡོད་པ་དག་མིའི་རིགས་ལ་ཟས་ཞིམ་པོ་ཙམ་གྱི་དོད་དུ་ཕུལ་འདོད་པ་ཙམ་མོ། མ་གཏོགས་ང་ནི་མཁས་འོ། ཁྱོད་ཚོ་ནི་གླེན་ནོ་ཞེས་བཤད་ཀྱི་མེད་ལ་བཤད་ཡང་མི་ཕོད། རྒྱུ་མཚན་ང་སྐྱེས་བུ་ཆུང་ངུའི་ཁོངས་གཏོགས་ཏུ་ཚུད་ཡོད་ཕྱིར་གཞན་སེམས་ལ་རྨ་ཁ་བཟོ་བའི་སྡིག་ལས་དེའི་རིགས་མི་བྱེད་དོ། གལ་སྲིད་ངས་འཇོན་ནུས་རགས་ཙམ་ལ་གཞིགས་ཏེ་སྐད་ཆ་ལབ་པ་དག་སྐྱེས་བུ་ཆེ་འབྲིང་ཆུང་གསུམ་ཀུན་པོའི་སེམས་ལ་གནོད་ན་ནི་སྙིག་དོར་བཅུད་ལེན་དྲུངས་ནས་བྱས་ཆོག་གོ་༵ཞེས་བློ་ཐག་སྤད་དེ་བཅད་ནས་ལབ་རྒྱུ་ཡིན། མ་གཏོགས་སྡིག་པ་ཅི་ཡང་མི་བྱ༵་ཞིང་། དགེ་བའི་ལས་ལ་བརྩོན་པ་ནི་ཐམས་ཅད་མཁྱེན་པའི་རང་གཤིས་ཡིན་པས་ཕྲན་ནས་མི་ནུས་སོ། མཇུག་ཏུ་རང་གཤིས་གདུང་འབོད་ལས་འཕྲོས་པའི་གཏམ་ཐོར་བུ་འམ་གསལ་ཁ་བཅོལ་ནས་བཤད་ན་མི་གཤིས་ལེགས་པོ་ཞིག་གསོ་སྐྱོང་བྱེད་རྒྱུའི་རྩ་བའི་རྩ་བ་འམ་ཡང་སྙིང་དེ་གང་ཡིན་ཟེར་ན། གཞན་ལ་མི་གནོད་ཅིང་རང་ཉིད་མི་སྡུག་པའི་མི་ཞིག་བཅའ་རྒྱུ་དེ་མཐར་ཐུག་གི་རེ་འདུན་ནམ་སློབ་སྦྱོང་བྱེད་དགོས་སའི་དམིགས་བྱ་གལ་པོ་ཆེ་ཉག་ཅིག་རེད་ཅེས་གོ་བདེར་ཕབ་སྟེ་ལབ་པའོ།།

༢༠༢༠/༣/༡ ཉིན་རང་གཞན་ཀུན་གྱི་སེམས་ལ་རྨ་མི་བཟོ་བའི་མི་འོས་མཐུན་ཞིག་ཇི་ལྟར་བྱེད་དགོས་པའི་ཐད་དུ༼རང་གཤིས་ཀྱི་གདུང་འབོད་ལས་འཕྲོས་པའི་གཏམ་ཐོར་བུ༽ཞེས་པའི་བརྗོད་བྱ་དང་སྦྲགས་ཚིག་རྐང་རྡབ་རྡིབ་རེ་སྒྲིག་སྟེ་གླེང་བ་ཡིན་པས་དགེ་གྱུར་ཅིག