ཨ་རིག་འཇིགས་མེད་ཀྱི་སྙན་ངག་གསར་པ།

རྩོམ་ཡིག་འདི་ཐེངས་ 548 བཀླགས་འདུག

ཁ་བ་མེད་པའི་དགུན་ཁ།

རྫ་ཆུ་ཁ། ཨ་རིག་འཇིགས་མེད།

དགུན་གྱི་ཙག་རླུང་རི་ལུང་གཞུང་དུ་​རྒྱུག །
དལ་འབབ་ཆུ་བོའི་ངག་གི་དབྱངས་རྟ་འགག།
གོས་དཀར་གྱོན་པའི་དགུན་གྱི་བུ་མོ་ནི། །
གྲང་ངར་ལྷགས་རླུང་ཁྲོད་ན་ལྟོགས་ཀྱང་འཁྱགས། །

ཁ་བའི་འདབ་མ་སྒེའུ་ཁུང་མགྲོན་པོར་ཕེབས། །
ཡིད་ཀྱི་གསང་གཏམ་མ་གསང་དྲང་པོར་སྨྲས། །
ལྐོག་ཏུ་ཉན་པའི་ཁེར་རྐྱང་རླུང་བུ་ཡིས། །
བདག་གི་གསང་ཚིག་ཁྱེར་ཏེ་ཡིབ་ཅིང་བྲོས། །

འཇིག་རྟེན་མི་ཚེ་དབྱངས་ཀྱི་རྒྱུད་སྐུད་ཅིག །
དབྱངས་ཀྱི་རྒྱུན་ལ་རྣམ་རྟོག་ས་བོན་མང་། །
དགའ་སྐྱོ་འབུམ་གྱི་སྣང་བརྙན་འཆར་བའི་གཞི། །
སེམས་ཀྱི་མེ་ལོང་ངོས་ལ་ལྟ་ཙམ་བྱས། །

ཁ་བའི་མེ་ཏོག་ཉི་ཟེར་མདངས་ལྡན་ཅན། །
ལས་ཀྱི་རྨི་ལམ་ཞིང་དུ་བག་ཀྱང་ལྷོད། །
གྲང་རེག་འཁུར་བའི་སྒེའུ་འགྲམ་ལྷགས་རླུང་གིས། །
རི་ངོགས་རྩྭ་སྐྱ་འཇགས་མར་སྐྱོ་རོགས་བྱས། །

ལྷིང་འཇགས་འཇིག་རྟེན་སེམས་ཀྱི་དབེན་གནས་སུ། །
རྣམ་རྟོག་རུ་གྲོང་ཀློང་ནས་དགོད་ཅིང་འོང་། །
ལས་ཀྱིས་གོམ་ཁ་སྒྱུར་བའི་ཡུལ་སྡེ་ནས། །
གནའ་བོའི་མེས་པོའི་ངག་དེ་ཡིད་ལ་བཏེགས། །

སྨྲེང་བ་འབུམ་ཕྲག་འཐུ་བའི་འཇགས་མ་ལ། །
བདག་སེམས་དགའ་སྡུག་ཁྲི་ཡི་རྟོག་འགྱུ་བསྙད། །
ཡང་ཡང་བརྗོད་ན་སྐྱོ་བའི་གཞི་རུ་འགྱུར། །
ཚིག་གི་མུ་ཏིག་ཚོམས་ལ་གློད་ན་ཆོག །