གཅེར་བུ་པའི་སྙན་ངག་ཁག་བཞི།

རྩོམ་ཡིག་འདི་ཐེངས་ 822 བཀླགས་འདུག

ཚེ་གཅིག་གི་དགུན་ཁ།

དགུན་ཁ་ཞིག་བསླེབ་རན
ཨ་ཆུ་ཟེར་ས་མི་འདུག
དགུན་ཁ་ཞིག་བུད་སོང་
གྲང་ངར་ཁོ་ན་དཔྱིད་ཀར་བཞག

དུས་ཚིགས་འདི་ཚོ་ཤ་དང་རུས་པ་ཡིན་འདྲ
བརྗེ་བར་ཚོར་སླ་ཞིང་འགྱུར་ལྡོག་སེམས་དང་མིག་ལ་ལྷུང་
སྐད་ཆ་ཡང་འཁྱགས་པའི་དགུན་ཁ་ཞིག་ལ
གྲམ་ཐང་གི་རྡོ་བ་བཀད་པའི་མེ་ཏོག་རྐང་གཅིག
ཐོག་ཁང་སྟེང་མ་འདི་ནས་མཐོང་ཐབས་མི་འདུག

མི་མངོན་པའི་མྱ་ངན་གྱི་གཙང་བོ་རེ་རེ་བཞིན་བརྒལ་ཏེ
ངར་ལྕགས་དང་འདྲ་བའི་དུས་ཚིགས་ཀྱི་སོ་མཚམས་སུ
ཀྲོང་ངེར་འགྲེང་བའི་སྐྱོ་གདུང་ཁུར་བའི་སྡོང་པོ་ཡི
ཤིན་ཏུ་ཕྲ་བའི་ཡལ་ག་ལས་གྱེས་པའི་སྐྱོ་སྣང་གི་མཛེས་སྡུག་དག
སྟོན་ཁས་ཀྱང་མཚོན་མི་ཐུབ་པའི་མིག་ཆུ་ཞིག་ཡིན་ཨང་

2019.10.9
མནར་གཅོད།

ང་ཤི་ཟིན་ཀྱང་ཁྱོས་ཤི་མི་འདུག་ཟེར་བ་ནི་སྡུག་བསྔལ་ཞིག་རེད
སྡུག་བསྔལ་གྱི་རབ་ཁ་རེ་རེ་ནས་ཐོན་པའི་རླུང་སྔོན་པོས
དྲན་འཛིན་གྱི་རྒྱུན་ལ་འཇགས་པའི་མེ་ཏོག་དག་བཀོག་པར་བརྩམས

ང་རང་གཏན་དུ་སུ་ལ་དགའ་འམ
དགའ་བ་ཁོ་ནའི་སླུ་བྲིད་ཀྱིས་དུས་ཚོད་ཀྱི་རྩིབ་མ་བཅག་དུས
དེབ་ནང་གི་ཡི་འབྲུ་དག་ཀྱང་སིལ་བུར་ཐོར་ཏེ
སྔར་བཞིན་ལམ་ཆེན་སྟེང་གི་འགྲུལ་བ་གཉིས་སུ་གྱུར

འཁྲུལ་བར་དགའ་བ།

གཏན་དུ་མི་དབང་བའི་དུས་ཚོད་དག་གིས
རྒྱུན་ལྡན་བཞིན་ང་རང་ཁང་སྟོང་ཞིག་ཏུ་འཁྲིད
སྒེའུ་ཁུང་ཞིག་ཡོད་ན་སྙམ་པའི་འཁྲུལ་སྣང་དེ
ཚ་ཕོག་ཅིག་གི་རྗེས་ཀྱི་འགྲུལ་བ་ལྟར
ཕྱོགས་སོ་སོར་གྱེས

དེ་རྗེས
ངས་མེ་ལོང་ཞིག་གཙང་མ་ཡང་ཡང་བྱས་ཀྱང་
འདུག་སྟེགས་འདིས་ང་རང་གཡུག་དྲགས་པས
ང་གདོང་ནི་སུ་ལའང་གསལ་ཐབས་མ་བྱུང་
འཁྱོལ་དཀའ་བའི་ནམ་ཟླ་དག་རྩྭ་ལྡུམ་བཞིན་སྐྱེས་ཀྱང་
ང་རང་སྔར་བཞིན་ཁྱེད་ལ་འཁྲེང་ངེས
གཙང་བོ།

ཤིན་ཏུ་གཙང་བའི་ཞོགས་པ་ཞིག་གི
ང་རང་ག་བར་འཐིམ་སོང་
བརྩེ་བས་མི་གློད་པའི་མི
ཁྱེད་ནི་དལ་འབབ་གྱི་གཙང་བོ་ཞིག་ཡིན

གཟུགས་སྒྲ་ཡོད་ཚད་རྒྱུད་གཅིག་ལ་འབྱམ་སྟེ
གནམ་ས་རེ་རེར་ཁྱེད་རང་སྤྲུལ
སྔར་བཞིན་མིན་པའི་ཚེ་སྲོག་གི་དཔྱིད་ཀ
མེ་ཏོག་ཅིག་གི་དབུ་འཁྱུད་དུ་ཕུལ

ཆགས་སྡང་གི་ཁ་རླངས་ཧ་ཅང་གསལ་བོ
མཐའ་མེད་པའི་གཙང་བོར་འདྲེས
གཙང་བོ་དེ་ནི་སྨོན་འདུན་ཁོ་ནས་འབབ་ཅིང་
མི་སེམས་ཀྱི་རྦ་རླབས་རེ་རེ
མངོན་མངོན་རྗེན་རྗེན་དུ་ཕྱི་རུ་བཏོན
ཚེ་སྲོག་གི་རི་མོ་སྣ་ཚོགས་ཁྱེད་ཀྱི་ལང་ཚོ་རུ་གྲུབ