བསམ་བློའི་གནད་དོན་འགའ་ཞིག་གླེང་བ།

རྩོམ་ཡིག་འདི་ཐེངས་ 893 བཀླགས་འདུག

སེ་ར། ཏྲེ་ནེ་ཙོ། དང་པོ། ནང་བསམ་བློའི་ཚད་བཀག་བསམ་གཞིག་རྣལ་ཏུ་ཕབ་ནས་བསྙད་ན།འཇིག་རྟེན་འདི་དང་ཁྱད་པར་དུ་གོ་ལ་ཟླུམ་པོ་འདིའི་སྟེང་དུ་ལྟ་བ་མི་གཅིག་པ་དང་དད་མོས་མི་འདྲ་བ། མདོར་ན་བསམ་བློའི་འཁྱེར་ཕྱོགས་ཀྱི་སྟེང་ནས་མི་རེ་རེ་ནས་རྩིས་པའི་སྤྱི་ཚོགས་ཤིག་དང་རྒྱལ་ཁབ་སོ་སོ་ལ་ཡང་འཚོ་སྟངས་མ་འདྲ་བ་སྣ་ཚོགས་ཤིག་ཡོད་པ་ནི་ཟུར་བལྟས་ལེབ་མཐོང་ཞིག་རེད།རེད་དེ་འགྲོ་བ་མི་སུ་ཞིག་ཡིན་ན་ཡང་མཐའ་གཅིག་ཏུ་འཚོ་སྟངས་འདི་འདྲ་ཞིག་བསྙེག་དགོས་ཟེར་བའི་ཐག་གཅོད་ཅིག་ནི་སུས་ཀྱང་དཀའ་ལ།གལ་ཏེ་ཐག་གཅོད་ཅིག་བཟོས་པའི་དབང་དུ་བཏང་ན་ཡང་མི་རེའི་ངོ་ན་དག་སྣང་རེ་ཡོད་པས་དག་སྣང་དེ་དང་འབྲེལ་བའི་རྒྱུ་མཚན་མང་དག་ཅིག་འདྲེན་འོང་བ་ནི་བསྙོན་དུ་མེད།དེའི་ཕྱིར།<མཁས་པའི་དབང་པོ་དགེ་འདུན་ཆོས་འཕེལ་གྱིས་> “སྤྱང་ཀི་ཤ་ཟན་རི་བོང་རྩྭ་ཟན་གཉིས།། ཟས་ཀྱི་དོན་དུ་གྲོས་ཁ་བསྡུར་བ་ལས།།རེ་ཞིག་རང་རིགས་མཐུན་པའི་འཁོར་ནང་དུ།། རང་རང་སོ་སོའི་སྤྱོད་པ་བསྐྱངས་ན་ལེགས།། ” ཞེས་གསུངས་པ་བཞིན་རི་བོང་གིས་སྤྱང་ཀི་ལ་ཤ་བཟས་ན་ཡག་པོ་མིན་པ་དང་རྩྭ་བཟས་ན་ཡག་པོ་ཡིན་པའི་གཏན་ཚིགས་ཅི་ཙམ་བཀོད་ན་ཡང་སྤྱང་ཀིས་ཉིན་གཅིག་ཀྱང་རྩྭ་ཟ་མི་སྲིད་ལ།སྤྱང་ཀིས་ཀྱང་རི་བོང་ལ་དེ་ལྟར་བསྙད་ན་རི་བོང་གིས་ཀྱང་ཤ་གཏན་ནས་ཟ་མི་སྲིད།རྒྱུ་མཚན་འདིའི་སྟེང་ནས་ཀྱང་རིགས་དང་དད་མོས་མི་འདྲ་བའི་དབང་གིས་སོ་སོ་ལ་འཚོ་སྟངས་རེ་ཡོད་པས་མཐའ་གཅིག་ཏུ་འཚོ་སྟངས་འདི་འདྲ་ཞིག་བསྙེག་དགོས་ཟེར་བ་ནི་བཤད་པ་ཐོབ་ཐང་ཙམ་ཞིག་ཡིན་ཆོག་ཀྱང་དོན་དངོས་ལ་གནས་པའི་གཏམ་ཞིག་ནི་གཏན་ནས་མ་རེད་ཟེར་ན་ཡང་ཐལ་ག་ལ་ཆེ།

གཉིས་པ།

ནང་བསམ་བློའི་ཐག་གཅོད། ནུབ་ཕྱོགས་ཀྱི་མཁས་པ་ཆེན་པོ<རྗེ་ ཀིར་ཤུ་ན་མུར་ཏེས>འདི་ལྟར་གསུངས་འདུག་སྟེ། “ངས་ཁྱེད་ཚོ་ལ་གཏམ་བཤད་སྤེལ་བ་ནི་ཁྱེད་ཚོ་ཁོ་བའི་རྗེས་སུ་འཇུག་པའི་ཕྱིར་ཏུ་གཏན་ནས་མིན་ལ།གང་ལྟར་ངས་གང་བཤད་ཀྱི་ཡོད་མེད་དེ་ལ་ཁྱེད་ཚོས་གོ་བ་ཞིག་རག་ན་འགྲིག་པ་ཡིན་”ཞེས་གསུངས་འདུག། སྤྱི་ཚོགས་གང་འདྲ་ཞིག་ཡིན་ན་ཡང་བཟང་ཕྱོགས་དང་ངན་ཕྱོགས་ཀྱི་ལབ་གླེང་སྣ་ཚོགས་ཤིག་འབྱུང་སྲིད་ལ་འབྱུང་དགོས་པ་ཞིག་ཀྱང་ཡིན་པར་ངེས། རེད་དེ་གནས་སྟངས་གང་ཞིག་གི་རྗེས་སུ་འགྲོ་མིན་ནི་རང་ཉིད་ཀྱིས་གོ་བ་རྣལ་མ་རེ་དང་ངེས་ཤེས་ཡང་དག་ཅིག་རྙེད་ན་ད་གཟོད་སོ་སོའི་དད་མོས་དང་ནང་བསམ་བློས་ཐག་གཅོད་བྱེད་དགོས་པ་ཞིག་ལས།གང་ཟག་དང་གྲགས་སྙན་གཙོ་བོར་བྱེད་པ་ནི་གཏན་ནས་མི་འོས་པ་ཞིག་སྟེ།<བདག་ཅག་གི་སྟོན་པས་ཀྱང་།>”བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན།།” ཞེས་གསུངས་མྱོང་བ་ལས་མཐའ་གཅིག་ཏུ་ངས་བཤད་པ་དེ་ཉན་དགོས་པའི་སྐུལ་མ་བྱེད་མ་མྱོང་ལ།མཐའ་གཅིག་ཏུ་དད་མོས་འདི་འདྲ་ཞིག་དང་འཚོལ་སྙེགས་འདི་ལྟར་ཞིག་བྱེད་དགོས་པའི་སྐད་ཆ་ཟུར་ཙམ་ཡང་མ་བྱུང་བས་ཀྱང་།མཐའ་གཅིག་ཏུ་དད་མོས་དང་ལྟ་བ་འདི་འདྲ་ཞིག་དགོས་ཟེར་བ་ནི་ཧམ་བཤད་ཅིག་དང་བྱིས་པའི་རྨི་ལམ་ཞིག་ཀྱང་ཅི་ལ་མིན། དབང་ཆ་གཅིག་བསྡུས་ཀྱི་དུས་རབས་འདི་ལ་ཟ་སེམས་ཁོ་ན་བརྣག་པའི་མི་ཚོགས་ནི་ཧ་ཅང་མང་ལ། ཐ་ན་ཆོས་ལུགས་ཀྱི་སྟེང་ནས་བཤད་ན་ཡང་ཆོས་ལུགས་ཡོད་ཚད་རང་ཉིད་ཀྱི་དབང་དུ་བསྡུ་བར་འདོད་པའི་ཆོས་པ་ཡང་ཤིན་ཏུ་ནས་མང་།འདིས་ཅི་ཞིག་མཚོན་པ་རེད་བསྙད་ན་ཆོས་དང་འཇིག་རྟེན་གང་ཐད་ནས་བལྟས་ཀྱང་ཡོད་ཚད་རང་ཉིད་ཀྱི་རྗེས་སུ་འཇུག་པ་དང་རང་ཉིད་ནི་སུས་ཀྱང་དོ་མི་ནུས་པའི་སྟོབས་ཆེན་ཞིག་ཏུ་ཆགས་འདོད་པ་མ་ཡིན་ནམ། དངོས་གཙང་སྨྲ་བ་ལྟར་ན་འདི་ནི་སྒེར་གཅོད་ཀྱི་བསམ་བློ་ལས་བྱུང་བ་ཞིག་ལས་གུ་ཡངས་ཀྱི་བསམ་མནོ་ཞིག་ནི་གཏན་ནས་མིན་པར་འདོད་དེ།ནམ་ཞིག་གི་ཚེ་བསམ་བློ་འདིས་འགྲོ་བ་མིའི་རིགས་ཡོངས་ཀྱི་བསམ་བློའི་ཐོབ་ཐང་ལ་བཀག་སྡོམ་བྱེད་པར་ངེས་པས་སོ། །དེའི་ཕྱིར་འདི་ལྟ་བུའི་བསམ་བློ་ནི་རྒས་ཡོལ་ཐོན་ཟིན་པའི་བསམ་བློ་རྙིང་ཧྲུལ་ཅན་ཞིག་སྟེ།<བདག་གི་བླ་མ་༧གོང་ས་ཏཱ་ལའི་བླ་མས>”ཆོས་ལུགས་ཡོད་ཚད་ཆོས་ལུགས་གཅིག་གི་འོག་བསྡུ་འདོད་པའི་བསམ་བློ་ནི་རྒས་ཡོལ་ཐོན་ཟིན་པའི་བསམ་བློ་ཞིག་ཡིན་པའི་རྒྱུ་མཚན་ཡང་དང་བསྐྱར་ཏུ་གསུངས་པ་ལྟ་བུའོ།།

གསུམ་པ།

ནང་བསམ་བློའི་རང་དབང་། དེས་ན་ད་ལྟའི་དུས་ཚོད་འདིར་མི་རིགས་དང་རྒྱལ་ཁབ་གང་ཞིག་ཡིན་རུང་སྣ་མང་རང་བཞིན་ཅན་གྱི་སྤྱི་ཚོགས་ཤིག་བསྐྲུན་དགོས་པ་ནི་ང་ཚོའི་འོས་འགན་ཞིག་རེད་ལ། ནུབ་ཕྱོགས་ཀྱི་མཁས་པ་ཞིག་གིས ་”ང་ཡི་ལྟ་བ་ཁྱེད་དང་མི་མཐུན་ན་ཡང་ངས་ཁྱེད་ཀྱི་ལྟ་བ་ལ་རྒྱབ་སྐྱོང་བྱེད་ཀྱི་ཡོད་”ཅེས་གསུངས་མྱོང་བའི་བརྗོད་སྙིང་དེ་འདིར་ང་ཚོའི་བསྒྲུབ་བྱ་གཙོ་བོ་དེ་རེད་བསམ་ཡོད ། དཔེར་ན་ཆོས་ཕྱོགས་ནས་བལྟས་ཚེ་བདག་ཡོད་པ་སྨྲ་བ་དང་མེད་པ་སྨྲ་བ ། ཡང་ན་འཇིག་རྟེན་བཀོད་པ་པོ་ཁས་ལེན་པ་དང་ཁས་མི་ལེན་པ་ལྟ་བུའི་གཞི་རྩའི་ལྟ་གྲུབ་མི་འདྲ་བ་གཉིས་པོ་དེ་སུ་ཞིག་གིས་ཀྱང་གཅིག་ཏུ་བྱ་ཐུབ་པར་དཀའ་པས ། དེ་བས་གཅིག་གི་བསམ་ཕྱོགས་ལ་གཞན་གྱིས་རྒྱབ་སྐྱོར་བྱེད་པའི་བསམ་བློའི་སྙིང་སྟོབས་ཤིག་རྙེད་ན།ད་གཟོད་རང་ཉིད་ཀྱི་ལྟ་བ་དང་མི་མཐུན་པའི་རྒྱུ་མཚན་དུ་བྱས་ནས་རང་གཞན་གཉིས་ཀ་འཕུང་བའི་ལས་སུ་འཇུག་མི་དགོས་ལ། ཡོད་ཚད་རང་ཉིད་ཀྱི་དབང་དུ་བསྡུ་འདོད་བའི་བསམ་པ་དང་།ཡང་ན་མི་ཞིག་གི་ལུས་པོའི་ཆ་ཤས་ཙམ་ལ་ནག་ཐིག་ཅིག་ཡོད་པའི་རྒྱུ་མཚན་དུ་བྱས་ནས་མི་དེའི་ལུས་ཧྲུལ་པོ་ནག་པོ་ཡིན་པའི་གཏམ་རྒྱུད་ཀྱང་གཏན་ནས་འབྲི་མི་དགོས་པ་ཞིག་རེད།འདི་ལྟར་གཞིགས་ན་ད་གཟོད་གུ་ཡངས་ཀྱི་བསམ་བློའི་ནང་ན་ལྟ་བ་སྣ་ཚོགས་གནས་ཆོག་པའི་སའི་རྒྱ་ཁྱོན་དང་ལྡན་པས་སྣ་མང་ཅན་གྱི་སྤྱི་ཚོགས་ཟེར་ན་ཡང་འདི་ལས་ཟུར་ཞིག་ཏུ་གཏན་ནས་མེད་པར་འདོད། འདི་ནི་མི་རེའི་བཟང་ཕྱོགས་ཀྱི་འཚོ་གནས་ལ་འབྲེལ་བ་དམ་ཟབ་མཆིས་པས་ཤིན་ཏུ་ནས་གལ་འགངས་ཆེན་པོ་ཞིག་ཏུ་འཛིན་དགོས་པས་མི་ཚད།འདི་ལྟ་བུའི་བསམ་བློ་སྒམ་དཀྱེལ་ཡངས་པོ་ཞིག་དང་ལྡན་ན་ད་གཟོད་ལྟ་བ་མཉམ་གནས་དང་དང་རིགས་གནས་མཉམ་གནས་ཀྱི་མཁའ་དབུགས་གསར་པ་ཞིག་བསྐྲུན་ཟིན་པ་དང་།དེ་ནས་བཟུང་རང་ཉིད་ཀྱིས་མིག་ཤེལ་སེར་པོ་ཞིག་བརྒྱུད་ནས་འཇིག་རྟེན་ཡོད་དོ་ཅོག་སེར་པོ་ཡིན་པའི་སེམས་ཁྲལ་ཡང་གཏན་ནས་བྱེད་མི་དགོས། མདོར་ན་ངས་ཅི་ཞིག་བཤད་ཀྱི་ཡོད་མེད་དེ་ཀློག་པ་པོ་ཁྱེད་ཀྱིས་གོ་བ་རྙེད་ཡོད་པའི་རེ་བ་བྱེད་བཞིན་ཡོད། གང་ལྟར་ཀྱང་འཇིག་རྟེན་མི་ཆོས་ཡིན་ནའང་རེད་དམ་པ་ལྷ་ཆོས་ཡིན་ནའང་འདྲ། གཞི་རྩའི་རྙོག་འཛིང་གི་རང་བཞིན་ནི་ལྟ་བ་མ་འདྲ་བའི་དབང་གིས་ཡིན་ལ། ལྟ་བ་དང་ལངས་ཕྱོགས་མི་འདྲ་བ་དེའི་སྟེང་ནས་སྤྱི་ཚོགས་གང་ཞིག་ཏུ་ཡང་ཚབས་ཆེ་བའི་གཏོར་བཤིག་སྣ་ཚོགས་ཤིག་བྱུང་བ་ཡིན་ན།སྣ་མང་རང་བཞིན་ཅན་གྱི་བསམ་བློ་ནི་རང་ཤུགས་ཀྱིས་འདི་དག་གི་ཁ་གཏད་དུ་འགྲེང་ཡོད་པས་བསམ་བློ་འདི་ནི་ཇི་འདྲའི་གལ་ཆེན་ཞིག་ཏུ་བརྩི་འོས་པ་དང་བསྒྲུབ་དགོས་ངེས་ཤིག་རེད་ཅེས་ལབ་པ་ཡིན། ངས་འདི་ལྟར་གླེང་དུས་ཁྱེད་ཚོའི་སེམས་ན་ཕྱོགས་གཅིག་ནས་གོ་བ་ལོག་སྟངས་ཤིག་གིས་སྣ་མང་རང་བཞིན་ཅན་གྱི་སྤྱི་ཚོགས་ཟེར་བ་ནི་ར་ལང་ཆ་ལང་བྱེད་ཆོག་པའི་འཁོར་ཡུག་ཅིག་ཏུ་འདོད་སྲིད་མོད།དོན་དམ་གྱི་སྤྱི་ཚོགས་གང་ཞིག་ཡིན་རུང་སྒྲིག་འཛུགས་དང་བསྟུན་དགོས་ཤིང་།ཚོགས་པ་དང་མི་སྒེར་ནས་བཟུང་སྟེ་རྒྱལ་ཁབ་དང་མི་རིགས་གང་འདྲ་ཞིག་ཡིན་རུང་སྒྲིག་འཛུགས་ནི་བཟང་ངན་ལ་ལེགས་ཉེས་འབྱེད་པའི་ཐབས་ཇུས་བཟང་པོ་ཞིག་དང་།འགྲོ་བ་མི་ཞིག་ཡིན་ཕྱིན་ནང་བསམ་བློའི་སྟེང་ནས་ཡར་སྐུལ་གྱི་དུང་བརྡ་རྣལ་མ་ཞིག་ཏུ་གནས་ན།སུས་ཀྱང་ཚོགས་པ་དེ་དང་དེའི་སྒྲིག་འཛུགས་ལ་བརྩི་མཐོང་བྱེད་པ་ནི་ཚོགས་པ་དེ་དང་དེ་ཡར་རྒྱས་འགྲོ་བའི་སྔ་ལྟས་ཤིག་ཏུ་འཁུམས།སྤྱི་ཚོགས་གང་ཞིག་ཏུ་མི་ཆོས་ལས་བརྒལ་བའི་བྱ་སྤྱོད་མང་སོང་བ་ནི་སྒྲིག་འཛུགས་ཀྱི་སྟངས་འཛིན་ཡག་པོ་ཞིག་མེད་སོང་བས་ཡིན་ལ། གལ་ཏེ་སྒྲིག་འཛུགས་ཤིག་ཡོད་པའི་དབང་དུ་བཏང་རུང་སྒེར་སོ་སོ་ནས་ནང་བསམ་བློའི་ན་ཚོད་མ་སྨིན་པ་དང་གུ་ཡངས་ཀྱི་བསམ་བློས་སྟོངས་སོང་བའི་རྐྱེན་གྱིས་འཆམ་མཐུན་དང་མཉམ་གནས་ལས་ཐག་རིང་ས་ཞིག་ནས་རང་ཉིད་གཅིག་པུ་ཞིག་རྒྱལ་འདོད་པ་དང་།རང་ཉིད་ཀྱི་ཆེད་དུ་རང་ཉིད་མདའ་ཁ་ནས་ཤི་བའི་སྐྱོ་གར་སྣ་ཚོགས་ཤིག་འཁྲབ་དགོས་བྱུང་བ་རེད།འདི་ལྟར་བསམས་ན་ཡར་ཐོན་ཅན་གྱི་སྤྱི་ཚོགས་ཟེར་བ་ཡང་སྒྲིག་འཛུགས་ཤིག་གི་འོག་ནས་འཚོ་དགོས་ཤིང་།སྒྲིག་འཛུགས་ཟེར་བ་འདི་ཡང་ནང་བསམ་བློའི་ནུས་སྟོབས་ལས་འབྱུང་དགོས་པའི་གནས་སྟངས་ཤིག་ཆགས་པ་ཡིན་དུས།བསམ་བློ་གུ་དོག་ཅིང་ཁ་རུབ་པའི་སྤྱི་ཚོགས་གང་ཞིག་ཡིན་རུང་དེ་ལ་མི་ཆོས་ལས་བརྒལ་བའི་བྱ་སྤྱོད་སྣ་ཚོགས་བྱུང་བ་དང་།དམག་འཁྲུག་རྒྱབ་པ་སོགས་ཀྱི་གཏོར་བཤིག་ཟམ་མ་ཆད་པར་བྱུང་བ་རེད།དེས་ན་ཆོས་པ་ཆོས་ས་ནས་གནས་སྟངས་ཤིག་དང་འཇིག་རྟེན་པ་རང་ས་ནས་འཚོ་སྟངས་རེ་ཡོད་ལ།དེ་བཞིན་རང་རྒྱལ་རང་ས་ནས་འཚོ་སྟངས་ཤིག་དང་གཞན་ཡང་རང་རང་ས་ནས་འགྲོ་སྟངས་རེ་ཡོད་ངེས་པས།ཡུལ་དུས་དང་གནས་བབ།དགོས་མཁོ་སོ་སོ་དང་བསྟུན་ནས་སྒྲིག་འཛུགས་ཤིག་གཏན་ལ་འབེབས་རྒྱུ་དང་།སྟངས་འཛིན་དེའི་འོག་ཏུ་མི་རིགས་ཕན་ཚུན་བརྩི་གུས་ཀྱི་ཐོག་ནས་ཕྱོགས་ཡོངས་ལ་མིག་གིས་བལྟས་ཤིང་རྣ་བ་བླགས་ཏེ་བཟང་ཕྱོགས་ཀྱི་འགྱུར་ལྡོག་ལ་བརྩོན་པའི་རླུང་གཡོར་གྱིས་བསྐྱོད་དགོས་པ་ནི་དུས་ལ་བབས་པའི་བྱ་བ་གལ་ཆེན་ཞིག་ཏུ་བསམ།འདི་ནི་རང་ཉིད་གཅིག་པོ་ཞིག་གི་དོན་དུ་མིན་པར་གོ་ལ་འདིའི་འཆམས་མཐུན་དང་མཉམ་གནས་ལ་འབྲེལ་བ་གཏིང་ཟབ་ཡོད་པས་སུས་ཀྱང་སྒྲུབ་འོས་པ་ཞིག་དང་བྱེད་དགོས་ངེས་ཤིག་རེད་ཅེས་ལབས་པ་ཡིན །

བཞི་པ།

དོན་དམ་པའི་མིའི་ཁྱད་ཆོས་རགས་ཙམ་གླེང་བ། ང་ཚོ་ནི་མི་ཞིག་ཡིན་ཕྱིར་ལེགས་ཉེས་ཀྱི་རྣམ་དབྱེ་འབྱེད་ཤེས་པ་ནི་དུད་འགྲོ་ལས་ཁྱད་པར་འབྱེད་ཆོས་ཤིག་ཡིན་དགོས་ངེས་རེད།གཞན་ལྟོགས་ཡོང་དུས་ཟས་འཚོལ་བ་དང་འཁྱགས་ཡོང་དུས་དྲོད་གཉེར་བ་ཙམ་ནི་སེམས་ཅན་དུད་འགྲོ་ལ་ཡང་མངོན་སུམ་དུ་མཐོང་ཞིང་། རང་ཉིད་ཀྱི་ཆེད་དུ་མཆེ་བ་སྟོན་པ་དང་སྦར་མོ་བསྒྲད་པ་སོགས་དམག་འཐབ་ཀྱི་བྱ་བ་ཡང་བྱེད་ནུས་པ་ནི་མིག་མཐོང་ལག་ཟིན་ཅིག་རེད། དེས་ན་ཁོང་ཁྲོའི་དབང་གིས་ཕན་ཚུན་དམག་འཁྲུག་རྒྱག་པ་དང་འདོད་ཆགས་དབང་གིས་རང་ཉིད་ཀྱི་ལུས་འཚོ་བ་ཙམ་ནི་དུད་འགྲོ་ལ་ཡང་འདུག་ན།ང་ཚོ་མི་ཞིག་ཡིན་ཕྱིར་དེ་ལས་ཁྱད་པར་ཏུ་འཕགས་པའི་ནུས་པ་ཅི་ཞིག་ཡོད་མེད་དེ་རང་ཉིད་ལ་འདོན་འོས་པའི་དྲི་རྟགས་གལ་ཆེན་ཞིག་ཏུ་བསམ། སྐར་མས་ཕྱག་ཚོད་འདེད་ཅིང་ཞག་མས་ལོ་ཟླ་འདེད་ཀྱིན་ང་ཚོ་ནི་དེང་རབས་ཉེར་གཅིག་འདིའི་དཀྱིལ་ལ་སླེབ་ཀྱིན་ཡོད། ཚན་རིག་གི་ལག་རྩལ་དང་དཔལ་འབྱོར་གྱི་མཁོ་སྒྲུབ་སོགས་ཧ་ཅང་ཚད་མཐོན་པོར་ཕྱིན་ཡོད་པ་ནི་སྨྲོས་མི་དགོས་མོད།འོན་ཏེ་ད་དུང་ཕྱོགས་གཞན་ནས་བསམ་གཞིག་ནན་མོ་ཞིག་བྱས་ན་དཔལ་འབྱོར་གྱི་མཁོ་སྒྲུབ་ཅི་ཙམ་བཟང་བ་དེའི་ཚད་ཀྱིས་སེམས་ལ་སྡུག་བསྔལ་དང་དངངས་སྐྲག་མང་བ་དང་།ཚན་རྩལ་རིག་པ་ཅི་ཙམ་གྱིས་ཡར་རྒྱས་འགྲོ་བ་དེའི་ཚད་ཀྱིས་དམག་འཁྲུག་དང་འཐབ་འཛིང་མང་དུ་ཕྱིན་ཡོད་པ་ནི་སུ་ལ་ཡང་འགྲེལ་མི་དགོས།གནས་སྟངས་འདིས་ནི་མི་ཆེས་མང་པོ་ཞིག་ཧོན་འཐོར་བཅུག་ཡོད་པ་ནི་བཤད་མི་དགོས་ཏེ།རྒྱུ་མཚན་ནི་གནའ་སྔ་མོ་ནས་བཟུང་ད་ལྟར་ཐུག་གི་བར་ཏུ་མི་མང་པོ་ཞིག་གིས་དཔལ་འབྱོར་མཁོ་སྒྲུབ་གཅིག་པུའི་སྟེང་ནས་རང་ཉིད་ཀྱི་དཀའ་ངལ་ཐམས་ཅད་སེལ་ཐུབ་པའི་རེ་བ་བྱས་ཡོད་པས་རེད། ད་དུང་ཡིན་ན་ཡང་མི་ཕལ་ཆེ་བ་ཞིག་གི་སེམས་ན་བསམ་བློ་འདི་དང་ཆོད་སེམས་འདི་བརྟན་པོ་ཡོད་པ་དེས།ཡོད་ཚད་དཔལ་འབྱོར་གྱི་ཆེད་དུ་སྨྱོ་བཞིན་ཡོད་པ་དང་།རང་ཉིད་ནམ་ཡང་དཔལ་འབྱོར་གྱི་བྲན་གཡོག་ཅིག་ཏུ་གྱུར་པ་རེད། འདི་དག་ཀྱང་བསམ་བློ་ཡག་པོ་ཞིག་བཏང་ན་ང་ཚོ་ནང་པ་སངས་རྒྱས་པའི་གཞུང་ལུགས་དག་ལས་གསུངས་པ་བཞིན།གསོན་པའི་རྐྱེན་འཆི་བའི་རྐྱེན་དུ་འགྲོ་བ་དང་།བདེ་བའི་རྒྱུ་སྡུག་བསྔལ་གྱི་རྒྱུར་འགྲོ་བཞིན་ཡོད་པ་ནི་སྨོས་མ་དགོས་ལ།དེ་བས་ཀྱང་གལ་ཆེ་བ་ཞིག་ནི་འདོད་རྔམས་ནི་རྒུད་པ་ཀུན་གྱི་རྩ་བ་ཡིན་ཞེས་གསུངས་པ་དེ་ཡང་ཇི་འདྲའི་སྡོམ་ཚིག་ཆེན་པོ་ཞིག་རེད་བསམ་ཡོད ། སྤྱིར་ན་མི་ཞིག་ཡིན་ཕྱིར་ཕྱི་ཡི་འཚོ་བའི་ཡོ་བྱད་སོགས་གང་ཐད་ནས་མི་ཕངས་པ་ཞིག་དགོས་པ་ནི་ཧ་ཅང་གི་གལ་ཆེན་ཞིག་རེད་མོད། དེ་དང་མཉམ་དུ་ཚད་འཛིན་གྱི་བསམ་བློ་ཞིག་དང་རྣམ་པར་རྟོག་པའི་ཤེས་རབ་གང་ཞིག་གིས་ནང་བསམ་བློའི་བདེ་སྡུག་ལ་ཡང་རྟོག་ཞིབ་ནན་མོ་ཞིག་བགྱི་དགོས་པ་གཏན་ཏུ་བརྗེད་མི་རུང་། ཕྱི་དངོས་པོའི་ཡོ་བྱེད་དང་ནང་བསམ་བློའི་བདེ་སྡུག་ལ་འབྲེལ་བ་མེད་པ་ཞིག་ནི་གཏན་ནས་མིན་ཡང་། ཕྱི་དངོས་པོའི་ཡོ་བྱད་ཀྱི་སྟེང་ནས་ནང་བསམ་བློའི་བདེ་བ་ཆ་ཚང་བ་ཞིག་ཡོང་གི་མེད་པ་དེ་གོང་དུ་བཤད་པ་བཞིན་རེད། དེ་ལས་ཚབས་ཆེ་བ་ཞིག་ནི<་གོང་ས་མཆོག་གིས་རྒྱུན་དུ་གསུང་པ་བཞིན>ཕྱི་དངོས་པོའི་ཡོ་བྱད་འཚོ་སྒྲུབ་ཀྱི་ཕྱིར་ཏུ་ནང་བསམ་བློའི་གནད་དོན་མང་པོ་ཞིག་སྣང་མེད་དུ་འཇོག་གིན་ཡོད་པ་འདི་རེད། དཔལ་འབྱོར་ཅི་ཙམ་གྱིས་ཚད་མཐོ་རུ་ཕྱིན་པ་དེའི་ཚད་ཀྱིས་སུ་ལ་ཡང་ལྟོས་མི་དགོས་པར་རང་ཚུགས་ཐུབ་ཀྱི་ཡོད་སྙམ་པའི་ང་རྒྱལ་མཐོ་རུ་འགྲོ་བ་དང་།དེའི་རྐྱེན་གྱིས་གཞན་ལ་ཕན་སེམས་དང་།བརྩེ་བ། གཞན་བརྟེན་གྱི་བསམ་པ་ལ་ཉམས་ཆག་འགྲོ་བཞིན་ཡོད་པ་གསལ་པོ་རེད། དེ་བས་ཀྱང་རང་ཉིད་ཁོ་ནའི་ཆེད་དུ་གཞན་གྱི་ཚེ་སྲོག་ལ་ཡང་འཛེམ་ཟོན་མེད་པའི་མཚམས་ཤིག་ཏུ་སླེབ་ཀྱི་ཡོད་པ་དང་།མི་ཆོས་ལས་བརྒལ་བའི་བྱ་སྤྱོད་སྣ་ཚོགས་ཤིག་གིས་མཐར་རང་ཉིད་ཀྱང་འཕུང་བར་བྱེད་ཀྱི་ཡོད་ན།དེ་དུས་ཀྱི་རྒྱུ་ནོར་དག་གིས་རང་ཉིད་ལ་ཅི་ཞིག་ཕན་ནམ །འདི་ནི་ཆོས་ཕྱོགས་ཀྱི་སྐད་ཆ་ཙམ་ཞིག་མིན་པར་ཚན་རིག་དང་དངོས་ཡོད་བདེན་པའི་དྲི་རྟགས་གལ་ཆེན་ཞིག་ཏུ་འཁུམས། ཡང་ན་ཆོས་ཕྱོགས་ནས་བསམས་ན་ཡང་སྔར་ནས་ཕན་སེམས་ཀྱིས་ཀུན་ནས་བསླངས་ཏེ་གཞན་ལ་སྦྱིན་པའི་བྱ་བ་ཞིག་བྱས་ཡོད་ན།བུ་ལོན་གྱི་དཔང་རྒྱ་དང་འདྲ་བར་རྗེས་ཕྱོགས་སུ་ཁྱེད་ལ་རྣམ་སྨིན་ཡག་པོ་ཞིག་སྨིན་སྲིད་ཀྱང་། ཕན་སེམས་དང་གཞན་བརྟེན་གྱི་བསམ་པ་བྲལ་བའི་མི་ཞིག་ལ་མཚོན་ན་ཚེ་འདི་ལ་དཔལ་འབྱོར་ཁོ་ནའི་ཆེད་དུ་སྐུ་ངལ་བསྐྱོན་པ་དེ་འབྲས་མེད་དང་ཆ་རེད། དེ་ལས་ལྡོག་སྟེ་ཚེ་འདི་ལ་བསམས་ན་ཡང་། རང་ཉིད་ཀྱི་གྲོགས་པོ་ཚུད་པའི་མི་མང་དག་ཅིག་ལ་དོགས་ཟོན་དང་རྣམ་རྟོག་གང་ཞིག་གིས་རྐྱེན་པས་རང་ཉིད་ལ་བདེ་བ་སྐད་གཅིག་ཙམ་ཡང་སྟེར་ཡོད་མེད་ནི་ཐེ་ཚོམ་གྱི་གནས་ཤིག་རེད། འདི་ལྟར་བསམ་བློ་ཞིབ་ཏུ་གཏོང་ཚེ་མིག་སྔར་གྱི་ཁྲ་ཁྲ་ཟིང་ཟིང་དག་གིས་རང་ཉིད་ལ་བདེ་བ་སྟེར་བའི་ཚབ་ཏུ་སྡུག་བསྔལ་སྟེར་གྱི་ཡོད་པ་རེད ། རྒྱུ་མཚན་འདི་དག་ལ་བརྟེན་ནས་ང་ཚོའི་ནང་པའི་མཁས་དབང་ཚོས་”ཆོག་ཤེས་”ནི་རྒྱུ་ནོར་ཀུན་གྱི་མཆོག་ཡིན་ཞེས་གསུངས་པ་ལ་ཡང་གནས་ལུགས་ཤིག་མེད་པ་གང་ན་ཡིན ། འགའ་རེས་བསྙད་ན་འཇིག་རྟེན་ནི་འགྲན་རྩོད་ཀྱི་ངོ་བོར་གྲུབ་ཅིང་།འགྲན་སེམས་མེད་ན་འཇིག་རྟེན་འདི་ཤི་སོང་བ་དང་འདྲ་ཟེར། ངས་བསམ་པར་གལ་ཏེ་འཇིག་རྟེན་འདི་འགྲན་རྩོད་ཀྱི་ཆུ་འོབས་ཆེན་པོ་ཞིག་ཡིན་ན། མི་རྣམས་ནི་དེའི་ནང་དུ་མིག་ཡོད་ཡོད་ལ་མཆོང་མཁན་དག་རེད ། སུ་ཞིག་ཆུ་རླབས་ཀྱིས་ཁྱེར་ཏེ་སྡུག་སྐད་ཀྱིས་གནམ་ས་གང་ཡོང་དུས། མི་རྣམས་ད་དུང་དེ་བས་འོབས་མཐུག་ས་ཞིག་ནས་མཆོང་རྩིས་བྱེད་ཀྱི་ཡོད་པ་རེད། དེས་ན་འཇིག་རྟེན་ནི་གདོད་མ་ནས་འགྲན་རྩོད་ཅིག་གི་ངོ་བོར་གྲུབ་མེད་པར། མིས་འགྲན་རྩོད་ཀྱི་ངོ་བོར་བཟོས་པ་དེ་ཤེས་གལ་ཆེ ། འདི་ལྟར་བསམ་གཞིག་གི་སྣེ་མོར་བསམ་གཞིག་མཐུད་དུས་རྒྱུན་ལྡན་དང་རྒྱུན་ལྡན་མིན་པའི་ཚོར་བ་སྣ་ཚོགས་ཤིག་འདྲེན་འོང་བ་ནི་བསྙོན་དུ་མེད་ལ།དེ་བས་ཀྱང་ང་ཚོ་ནི་དོན་དམ་གྱི་འཚོ་བ་དངོས་དང་བདེ་སྐྱིད་ཀྱི་ལྡོག་ཕྱོགས་ནས་འགྲེང་ཡོད་པ་ཡང་གསལ་པོར་མཐོང་འོང་བ་ཞིག་རེད ། མདོར་ན་མི་ཞིག་ཡིན་ཕྱིར་འབུ་སྲིན་ཞིག་བསད་པ་ཚུན་ཆད་རང་ཉིད་ཀྱི་བདེ་སྐྱིད་ཅིག་གི་ཆེད་དུ་ཡིན་ན། བྱ་ཐབས་དེ་དོན་དམ་གྱི་བདེ་བའི་རྒྱུ་རུ་འགྲོ་མིན་དེ་ཤིན་ཏུ་ནས་རྟོགས་གལ་ཆེ་ཞེས་སྨྲ་འདོད་པ་དེ་རེད།

2015/3/18/ཉིན་མཇུག་རྫོགས་པར་བྱས །