གོ་འཇོ་བསོད་སྟོབས་ཀྱི་རྩོམ་གསར།

རྩོམ་ཡིག་འདི་ཐེངས་ 230 བཀླགས་འདུག

སྐྱབས་གཅིག་འཇིགས་མེད་བླ་མར་འབོད་པའི་གསོལ་འདེབས་བློ་གཏད་ལིང་བསྐྱུར་མ།

རྩོམ་པ་པོ། གོ་འཇོ་བསོད་སྟོབས།

ནང་གསལ་རིག་པ་དེ་མཚོ་མོ་རླབས་བྲལ། ། 
ཕྱི་གསལ་མཚན་དཔེ་དེ་ཆུ་རིས་སུམ་བསྐོར། །
བྱ་བྱེད་རྣམ་གཞག་གི་བརྩི་ལུགས་མེད་པས། ། 
ཡེ་ཤེས་སྐུ་གཅིག་གི་འཇིགས་མེད་ཆོས་རྗེ། །
འཛུམ་པའི་ཞལ་རས་དེས་ཕྱོགས་ཙམ་མཛད་ན། ། 
རེ་དོགས་རྣམ་རྟོག་འདི་དེ་ཀས་ཁེགས་པས། །
དངོས་གྲུབ་ལྷག་མ་ཞིག་ཨེ་གནང་མི་ཞུ། ། 
བྱིན་རླབས་གཞན་མ་ཞིག་ཨེ་ཐོབ་མི་ལྟ། །

གཉུག་མ་ངེས་དོན་གྱི་འཇམ་དཔལ་ཡབ་ཡུམ། ། 
མཉམ་ཉིད་རིག་སྟོང་གི་མལ་ན་གཟིམས་པ། །
མ་བཅོས་རང་སྣང་ལ་འཇུག་ལྡང་དབེན་རུང་། ། 
ངོ་མཚར་རྩལ་སྣང་གི་འཇིགས་མེད་ཆོས་རྗེ། །
གདུང་བའི་བུ་ཆུང་གི་འབོད་པ་གསན་ན། ། 
རེ་བའི་འདོད་བློ་འདི་དེ་ཀས་ཚིམ་པས། །
ཐུགས་རྒྱུད་བྱིན་རླབས་ལ་ཧམ་པ་མི་བྱེད། ། 
དགོངས་བརྒྱུད་རྟོགས་པ་ལ་འཕོ་རེ་མི་ཕོད། །

འོག་མིན་རྔ་ཡབ་ཀྱི་མཚོ་སྐྱེས་རྒྱལ་བ། ། 
རིག་འཛིན་ལྕམ་དྲལ་གྱི་ཚོམ་བུས་བསྐོར་བ། །
གཤིས་ཀྱི་འདུ་བ་ལ་འཕོ་འགྱུ་མེད་རུང་། ། 
སྒྱུ་མ་རྣམ་རོལ་གྱི་འཇིགས་མེད་ཆོས་རྗེ། །
དད་ལྡན་བུ་ཆུང་གི་སྐྱིད་སྡུག་གཟིགས་ན། ། 
གསོལ་བཏབ་འབྲས་བུ་ལ་དེ་ཀས་ཆོག་པས། །
སངས་རྒྱས་ཐོབ་འདོད་ཀྱི་རེ་བ་མི་ཞུ། ། 
དམྱལ་བར་མ་གཏོང་གི་སྐུ་ལས་མི་བཅོལ། །

བཀའ་གཏེར་ཟབ་ཆོས་ཀྱི་བདུད་རྩི་ཞུན་མ། ། 
འོད་གསལ་ཐུགས་མཆོག་གི་བུམ་པར་བསྐྱིལ་བ། །
མཁའ་འགྲོའི་ཞལ་ཆབ་ལ་བྲི་གང་མེད་པས། ། 
སྨིན་གྲོལ་མཛོད་འཆང་གི་འཇིགས་མེད་ཆོས་རྗེ། །
མོས་ལྡན་བུ་ཆུང་ལ་དགོངས་ཙམ་གནང་ན། ། 
ཡིད་ཀྱི་མགུ་ཁ་འདི་དེ་ཡིས་ཁེངས་པས། །
བློ་གཏད་ལིང་བསྐྱུར་གྱིས་ཁོ་ཐག་བཅད་དེ། ། 
ཅི་མཛད་ཁྱེད་ཤེས་ཀྱིས་གསོལ་བ་འདེབས་སོ། །

འཁོར་འདས་སྣང་བ་ཡི་འཇུར་བུ་རིང་མོ། ། 
བྱ་གྲུབ་ཡེ་ཤེས་ཀྱི་དཔྱ་རུ་བཤིགས་པས། །
རྟོག་ཚོགས་ཕྲིན་ལས་ཀྱི་རོལ་མོ་རྨད་བྱུང་། ། 
སྣང་སེམས་དབང་སྡུད་ཀྱི་འཇིགས་མེད་ཆོས་རྗེ། །
བརྩེ་བའི་སྤྱན་ཟུར་དེ་གཡོ་ཙམ་ཁོམ་ན། ། 
སྟན་འདིར་འཆི་ན་ཡང་འགྱོད་པ་མེད་པས། །
བཟང་ངན་ལེགས་ཉེས་ཀྱི་སྐལ་བ་ཅི་གནང་། ། 
ཐུགས་རྗེ་མཚུངས་མེད་ཀྱི་མཛད་པར་ཤེས་སོ། །