དིང་རི་ལ་ཕུལ་བའི་སྙན་ངག

རྩོམ་ཡིག་འདི་ཐེངས་ 5 བཀླགས་འདུག

སེམས་གསོ་ཚིག་གཅིག
~~~~~~~~~ཚུལ་ཁྲིམས་ནོར་བུ།

མེ་ཤིང་བཏུས་ནས་བསྒྲུགས་སོང་།།
ལྕགས་ཐབ་བཙུག་ནས་བུད་སོང་།།
མེས་པོའི་ཁང་རྒན་བརྡིབས་ཀྱང་།།
སྐྱོ་གདུང་ཕྱིར་ལ་མ་འཁྲེང་།།

གཡག་ཤ་འཁྱག་པ་འབྱོར་སོང་།།
རྒྱ་ཐུག་བརྔོས་མ་བསླེབས་སོང་།།
དྲན་གདུང་ཞེ་ལ་གནག་ཀྱང་།།
མུན་པ་སྔ་ཙམ་སངས་རོགས།།

དངུལ་གྱི་ཆར་ཆེན་བབས་སོང་།།
བརྩེ་བའི་རྒྱ་མཚོ་འཁྱིལ་སོང་།།
ཁ་སང་ཐལ་རྡུལ་འཁྲིགས་ཀྱང་།།
ད་ནི་གནམ་འདི་དྭངས་རོགས།།

ས་ལ་འབོལ་གདན་རྒྱབ་སོང་།།
ལུས་ལ་ཞྭ་ལྷམ་གཡོག་སོང་།།
དགུན་གྱི་གནམ་གཤིས་གྲང་རུང་།།
ཡ་ཁོག་དྲོད་ལ་བཅར་རོགས།།

མཆོད་མའི་ཕྲེང་ཐག་རིང་སོང་།།
ཐུགས་སྨོན་དབྱངས་ཀྱང་སྙན་སོང་།།
ལས་དབང་ཤུགས་དྲག་ཆེ་རུང་།།
ས་མཐའི་༸སྟོན་པར་འབོད་རོགས།།

སེམས་རྩ་སྡུག་གིས་ཁོལ་ཀྱང་།།
སྡུག་ལ་མཐའ་ཞིག་ལོས་ཡོད།།
མིག་ཆུར་ཞེན་ཆུང་བྱོས་དང་།།
སང་ལོར་སྐྱིད་ཀྱིས་གང་ཡོང་།།
11/1/2024 ཉིན།