གཅེར་བུ་པའི་སྙན་ངག་གསར་པ།

རྩོམ་ཡིག་འདི་ཐེངས་ 180 བཀླགས་འདུག

དེ་ཙམ་འདི་ཙམ།
གཅེར་བུ་པ།
ཉི་མའི་འཁོར་ཕྱོགས་ག་བར་བརྗེས་ན་ཡང་།།
ང་ཡིས་གྱོན་པ་སྔར་བཞིན་མཐུག་སེ་གྱོན།།
སྲང་མདོ་འགྲིམ་བཞིན་ཇ་ལ་རོལ་བཞིན་དུ།།
ཀུ་རེ་སྣ་ཚོགས་འབེལ་འབེལ་ལྷུག་ལྷུག་བྱེད།།

ཞག་ཡ་ཞིག་ནས་དགུན་ཁ་འབུད་འགྲོ་ཟེར།།
ཉི་འགའི་གོང་ནས་དབྱར་ཁ་གྲོངས་སོང་ཟེར།།
ཉི་མ་ལྡེ་བའི་གྲོང་མི་ཁ་སྒོ་ལ།།
ཡག་ཉེས་ཅི་ཞིག་བཏགས་ཀྱང་འདོགས་སུ་ཆུགས།།

རླུང་ཚུབ་འདི་ཚོ་ཞྭ་མོ་ཡིན་སྙམ་བྱེད།།
ཁ་བ་འདི་ཡང་འཆི་ཁའི་སེམས་གསོ་འདྲ།།
སྤོ་ལོ་བརྡབ་ཡག་བྱས་ཏེ་སྒང་ཁ་དེར།།
ལང་གཅིན་བྱེད་ཞོར་ཐུ་ལུད་འཕེན་ཞོར་བྱས།།

ཁ་བཤད་ཆུ་ཡི་ལྦུ་བ་མཆིལ་མས་བཟོས།།
མཆིལ་མ་ཟད་ལོ་མོ་ལ་འགྱོད་པ་སྐྱེས།།
ཏིང་ཤགས་རྡུང་ནས་གཤིན་ཆོག་འདོན་སྒང་ལ།།
སུ་ཡི་རླུང་རྟ་འཕར་ནའང་ཁེ་བཟང་བྱོས།།

གློག་ཀླད་ནང་གི་འབུ་ལ་ཡང་ཡང་སྐྱེས།།
བུ་མོ་ཞིག་ལ་འཕྲིན་ཐུང་ཚོད་མེད་བསྐུར།།
བརྩེ་བ་དཀར་དམར་སྡེབ་པའི་ཕྱི་དྲོ་དེར།།
འདོད་ཆགས་ཞེ་སྡང་ལྷ་ཚོགས་རང་འཁོར་བྱུང་།།

གཞས་ཤིག་ཉན་ནས་སྐྱོ་བ་རུམ་གང་སྐྱེས།།
སྙན་ངག་བཀླགས་ནས་འཇིག་རྟེན་གཞན་དུ་འཁྲིད།།
ཆ་ཤས་རེ་རེས་ང་རང་གང་སར་གཏོར།།
ཚུར་ལ་བསྡུ་ཐབས་མེད་ཀྱང་ཆོག་པར་བྱས།།

གསོན་མི་བཏུབ་པའི་སྐད་ཆ་ཡ་མ་ཟུང་།།
རི་ངོགས་འདི་ཡི་སྨུག་པའི་ཟས་སུ་བསྟབས།།
ཕར་ལ་སྤུར་དུས་ཚོར་བས་ཟིན་ལ་ལ།།
ཡང་གཅིག་བལྟས་ན་འབག་བཙོག་ལྷན་དུ་བཞུར།།