འཆི་བ་དང་བོད་རིགས།

རྩོམ་ཡིག་འདི་ཐེངས་ 71 བཀླགས་འདུག

འཆི་བ་དང་བོད་རིགས།
མཛད་པ་པོ། མཁན་འཆི་མེད་རིག་འཛིན།

རང་རིགས་བོད་ཀྱི་མགོ་རྣ་མི་སེམས་ཤིང་། །
ཤུལ་ལུས་ཕ་མའི་སྡུག་ལ་མི་དཔྱོད་པར། །
རྣོན་པོའི་གྲི་རྩེ་ནང་ལ་གཏོད་པ་ཡི། །
རང་ཅག་བོད་མིའི་གཤིས་འདི་སྐྱོ་བ་ལ། །

འཇམ་པོའི་རི་སྡེ་རྩུབ་མོའི་གྱོད་ཀྱིས་དཀྲུགས། །
མཐུན་པའི་གཉེན་ལ་སྡང་བའི་དགྲ་བོ་སྐོར། །
ད་དུང་དཔའ་བོ་ཡིན་ཞེས་བསྟོད་ར་བྱེད། །
རང་ཅག་བོད་པའི་གཤིས་འདི་གླེན་པ་ལ། །

ཕ་རྒན་བགྲེས་པོའི་བརྒྱད་ཅུའི་ལག་རྟེན་བཅག །
ཁྱོད་ནི་ཅི་འདྲའི་དགྲ་བོ་བསམ་མེད་ཅིག །
བརྩེ་བའི་གྲོགས་ཀྱི་མི་ཚེ་སྡུག་ལ་སྦྱར། །
ཁྱོད་ནི་ཅི་འདྲའི་དགྲ་བོ་འདང་མེད་ཅིག །

དར་བབས་ན་ཆུང་སྣང་བ་སྐྱིད་པའི་དུས། །
ལང་ཚོའི་མེ་ཏོག་བཀྲག་དར་འཛོམས་པའི་དུས། །
ན་མཉམ་གྲོགས་ཀྱིས་ཡིད་སྨོན་བྱེད་པའི་དུས། །
གཅེས་པའི་ཚེ་སྲོག་རྣོན་པོའི་གྲི་རྩེར་ཤོར། །

ཡ་རབས་བུ་ཆུང་ཟེར་ནས་བསྟོད་པའི་དུས། །
རྒན་ལ་བརྩི་བཀུར་ཆེ་ཞེས་བསྔགས་པའི་དུས། །
སྐྱེ་གཟུགས་ཁ་འབྲས་གཙང་ཞེས་སྨོན་པའི་དུས། །
ཁྱེད་ཀྱིས་ལང་ཚོ་དམར་པོའི་ཁྲག་ལ་བསྣུབས། །

འཇིགས་པའི་རྨི་ལམ་ཞིག་གི་བསུ་མའི་སྣེར། །
ངམ་ནག་དགྲ་བོ་ཞིག་གི་དཔུང་ཤེད་འོག །
སུམ་མདོའི་སྲང་ལམ་ཞིག་ནས་བུ་ཆུང་འདིའི། །
ཐ་མའི་གོམ་བགྲོད་འཇོག་དགོས་སུ་ཡིས་ཤེས། །

བསགས་པའི་ནོར་རྫས་ཁྱོད་དང་མ་འགྲོགས་ལ། །
བརྩེ་བའི་བཤེས་ཀྱིས་ཁྱོད་ཉིད་མ་བསྐྱལ་ཡང་། །
འབྲེལ་མེད་གྲོང་མཐའི་ཧ་པ་འཁྱམ་པོ་ཞིག །
ཁྱོད་དང་མཉམ་དུ་སོང་བ་ཅི་ཡི་ལས། །

སྔ་མའི་བཙན་པོའི་ལས་ཀྱིས་བསྐོས་ཐང་གིས། །
འདྲ་མིན་སྲིད་པའི་གནས་སུ་འཁྱམས་ན་ཡང་། །
སྙིང་ལ་བཏབ་པའི་བག་ཆགས་ཟབ་མོ་ཡིས། །
སྐྱེ་ཤིའི་ཕྲེང་བར་ཁྱེད་གཉིས་མཉམ་དུ་འབྲེལ། །

གཞོན་པའི་བུ་གཅིག་འདྲ་སྡེའི་ཡུལ་ན་ཡོད། །
ཉམ་ཆུང་གྲོགས་གཅིག་གྲོང་སྡེའི་མཐའ་ན་འཁྱམས། །
གསོན་དུས་མཉམ་དུ་འགྲོགས་པའི་ཐབས་མེད་ཀྱང་། །
ཤི་བའི་རྣམ་ཤེས་སླར་ཡང་མཉམ་དུ་སོང་། །

བརྩེ་མེད་ལག་དམར་བསམ་ན་སྙིང་རེ་ན། །
གློ་བུར་ཆག་སྒོ་བསམས་ན་ཞེ་རེ་ཕངས། །
འདྲ་མིན་ལས་དབང་བསམས་ན་ངོ་རེ་མཚར། །
བརྩེ་བའི་ཞེ་འདང་བསམས་ན་སྙིང་རེ་རྗེ། །

ནང་གི་འདུན་པ་གླེང་བའི་མཐུ་མེད་ཀྱང་། །
སྲོག་གི་འདུ་བྱེད་གཏོང་བའི་དུང་བ་འདིས། །
ཡུན་ཐུང་མ་ཡིན་རིང་པོའི་དུས་ཤིག་ནས། །
སྙིང་ལ་བཅགས་པའི་འདང་ཞིག་ད་གདོད་ཤེས། །

ཁྱེད་གཉིས་སྔ་མའི་སྐྱེ་བ་གང་ཞིག་ན། །
མཉམ་དུ་འབྲེལ་བའི་ལས་ཚུལ་ཅི་ཞིག་གིས། །
མི་དང་དུད་འགྲོའི་གཟུགས་སུ་ཕྱེས་ན་ཡང་། །
ད་དུང་བརྗེད་དུ་མེད་པའི་བསྐོས་ཐང་ཅི། །

མི་རྟག་གཤིན་རྗེའི་ཁྲིམས་ཀྱི་མཐེབ་མཛུབ་བར། །
སྐྱེ་འགྲོ་ཀུན་ཀྱང་ཕྲེང་བ་འདྲེན་པ་བཞིན། །
གཅིག་རྗེས་གཅིག་གིས་མཐུད་དེ་འགྲོ་བ་ལས། །
མ་ཤི་ལུས་པར་གྱུར་པ་འགའ་ཡང་མེད། །

མིག་ཟུང་གཏན་དུ་ཟུམ་པའི་ཉིན་མོ་ནས། །
གང་དུ་སོང་ཞེས་འདྲི་བའི་མི་མེད་ཅིང་། །
འདི་ན་འདུག་ཅེས་འཕྲད་པའི་གཏམ་མེད་པ། །
དབྱར་ཁའི་མེ་ཏོག་ཡལ་བ་བཞིན་དུ་འགྱུར། །

ཇི་སྲིད་སེམས་ཀྱི་བག་ཆགས་མ་ཟད་པར། །
སྐྱེ་འཆིའི་རིམ་པ་ཅི་ཙམ་བརྗེས་ན་ཡང་། །
སླར་ཡང་འཁོར་བའི་གནས་འདིར་སྐྱེ་བ་ལས། །
ང་ཅག་སོ་སྐྱེ་འགྲོ་བའི་ཡུལ་གཞན་མེད། །

འོན་ཀྱང་སྐྱེ་བའི་ལུས་འདི་བོར་བའི་རྗེས། །
གདོང་གི་མདོག་བསྒྱུར་ཕ་མའི་རིགས་རུས་བརྗེས། །
ཅི་ཙམ་བརྩེ་ཞིང་འགྲོགས་པའི་གྲོགས་ཡིན་ཡང་། །
ཕན་ཚུན་སྔར་བཞིན་ཤེས་པ་ཉིན་སྐར་ཙམ། །

འཆི་བ་འདི་ནི་ཀུན་གྱིས་མི་འདོད་པའི། །
ལུས་སེམས་ཟུག་རྫུས་མནར་བའི་ལས་སྣང་ཞིག །
འཆི་བ་འདི་ནི་ཀུན་གྱིས་མི་ཤེས་པའི། །
སྐྱེ་འགྲོ་ཐམས་ཅད་སྐྱེལ་སའི་མུན་དོང་ཞིག །

འཆི་བའི་ཚེ་ན་སྐྱེལ་བའི་གྲོགས་མེད་ཅིང་། །
སྐྱེ་བའི་དུས་སུ་བསུ་བའི་གཉེན་མེད་པར། །
འཇིགས་རུང་འཕྲང་འདི་རང་ཉིད་གཅིག་པུ་ཡིས། །
བརྒལ་འདི་གནམ་བསྐོས་ལས་ཀྱི་བཀོད་པ་ཡིན། །
ཞེས་ཀྱང་སྨྲས་སོ། །