ཨ་འཇམ་གྱི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 307 བཀླགས་འདུག

བསམ་གཏན་ལྷ་མོ།

ཆུ་མོ་འཁྱག་པ་དགུན་གྱི་ཁོག་ཏུ་བཞུར།། ཁ་བ་གྲང་མོ་རླུང་གི་གཟན་དུ་གྱུར།།

སྡོང་ལོ་མེད་པའི་ཡུལ་ཁམས་སྐྱ་ཐལ་ལེ།། རྣ་བ་བཀབ་ནས་མཚན་ཡང་འཁྱོལ་ཐབས་བྱས།།

གང་ལ་ཐུག་ན་མཆུ་འདི་སྲ་ཞིང་འཐས།། ཅི་ལ་བསམ་ན་ལག་འདི་འཁོབ་ཅིང་འདར།།
རྦབ་རྡོ་འདྲིལ་བ་མ་ཤེས་ཚུལ་དུ་ཉལ།། སྙིང་གི་ཤ་ལོག་འཕག་པ་མནན་ནས་ཡོད།།

མ་བསམ་ས་ནས་དྲོད་ཀྱི་མེ་སྟག་བྱུང་།། མིག་ཤེལ་ནང་གི་མིག་ཆུ་དྭངས་མོ་མཐོང་།།
གྲོང་ཁྱེར་ནང་གི་བུ་མོའི་སེམས་པ་རྙེད།། རི་དང་ཆུ་བོས་ངག་ཀྱང་འཁྲོལ་བ་འདྲ།།

ཚིག་གི་རྗེས་ལ་ཚིག་ཅིག་ཐོགས་ནས་འདུག། ཚོར་བའི་ཕྱི་ན་གདུང་བ་འཐབ་ནས་འདུག།
གངས་རིའི་ར་བར་སྐོར་བ་དཀྲིས་ནས་ཐལ།། ན་བུན་ནང་གི་མི་རྣམས་དཀྲོགས་ནས་ཐལ།།

ངག་གི་མདུད་པ་ཞིག་པའི་རྭ་ཞིག་རྙེད།། ལྕགས་ཀྱི་སྒོ་མོ་འབྱེད་པའི་ལྡེ་མིག་རྙེད།།
རྨ་ཁ་བཀབ་པའི་རུ་སྡེ་ཁྲ་མོ་ནས།། འུར་མགོ་མཐོ་བའི་མགྲིན་པ་བསང་བར་བྱས།།

སྐད་ཡིག་སྐར་མའི་ལྕི་ཚད་གླེང་བར་བྱས།། ཚེ་སྲོག་ཆུ་བོའི་འགོ་ཁུངས་འཚོལ་བར་བྱས།།
གང་ནས་བོར་བའི་ལམ་ལ་ཕྱིར་མིག་བལྟས།། གང་དུ་འགྲོ་བའི་ལམ་ལ་སྐྱ་ཐིག་བཏབ།།

ངུས་ན་བུ་མོ་ཁྱོད་ཀྱི་ངུ་སྟངས་ཡག། བཤད་ན་བུ་མོ་ཁྱོད་ཀྱི་དཔྱོད་ཤེས་ཡངས།།
དྲ་ལམ་ཞིག་ནས་སྐེ་སོ་ཐེངས་ཤིག་གིས།། སྡེ་བ་བརྒྱ་བོ་ཨ་ཚ་འུར་དིར་བྱས།།

བརྗེད་ཆུ་བཏུང་བའི་གཞོན་པ་དུམ་སྐོར་ཞིག། ཕ་ས་མ་མོའི་བྲང་ཡང་དྲན་ཞིག་གསོས།།
མགོ་ཡང་འཕྲུག་ཞོར་ལྕེ་ཡང་བསྣར་ཞོར་དུ།། ངོ་ཤ་ཚ་བཞིན་རང་ཉིད་འཚོལ་བར་བྱས།།

གདུགས་ནག་ཕུབ་པའི་གྲིབ་མ་མ་ཁོག་ཀྱང་།། ཡུ་བ་སྲ་བའི་བསམ་གཏན་ལྷ་མོ་ཁྱོད།།
ཐང་ག་ཞིག་གི་ངོས་ལ་དཔར་སོང་ངོ་།། པཎ་ཆེན་བླ་མའི་ཕྱག་ལ་འཕྲོད་སོང་ངོ་།།

ཟླ་ཆུ་ཁ་བའི་འབྲོག་པས་དར་ཞིག་འཐེན།། པོ་ཏཱ་ལ་ཡི་དབུ་ཞྭ་ཡང་ཙམ་བྱུང་།།
ཡར་ལུང་གཙང་བོའི་འཁུན་སྒྲ་དམའ་ཙམ་བྱུང་།། ཨ་མྱེས་བླ་གསང་བོ་ཡང་བདེ་ཙམ་བྱུང་།།

གློག་ཀླད་ནང་གི་བསམ་གཏན་ལྷ་མོ་ཁྱོད།། རང་དབང་ལྷ་མོ་ཞིག་གི་ཚབ་ཏུ་བཞེངས།།
ཁྱོད་ཀྱང་ངུས་པས་རི་ལུང་དཀྲོགས་བྱུང་ན།། འུ་ཚང་དུ་བ་ཆད་པར་ཅུང་ཞིག་བཀྱེད།།

སེན་རྩི་གློ་ཁ་ཅན་པོའི་སེམས་ཀྱང་སྒུལ།། གླང་རྫིའི་དོར་མ་ཅན་པོའི་བློ་ཡང་བསྒྱུར།།
པགས་སློག་དྲན་པའི་ན་ཟླ་སྐོར་ཞིག་གིས།། ཡིག་དཀར་ཡིག་ནག་ཅེས་པའི་རྩོད་པ་རྙེད།།

ད་དུང་ཇ་ཞིག་ཁོལ་མིན་དཀའ་ན་ཡང་།། མེ་ཁ་བུས་པའི་བུ་མོ་ཡ་རབས་པོ།།
གོང་ན་ལྷ་ཞིག་ཡོད་པ་རིག་སོང་བས།། ལྷམ་འདི་འཇོག་ས་མི་ནོར་བརྡ་ཞིག་ཐེབས།།

མ་རབས་དུ་འཐེན་ཚང་གིས་མ་ཤེས་ན།། ཨ་ཁུ་རུབ་རྡུང་མཁན་པོ་ལངས་ནས་བྱུང་།།
ཚོར་བར་གཏུས་པའི་ལྟིག་སྒྲ་མི་ཆད་པས།། དབུགས་མཐུད་བརྒྱབ་ནས་ཇག་ལ་ཆས་སོང་ངོ་།།

ག་ཤེད་ཅིག་ནས་ཁྱོད་རང་རྙེད་པ་ནས།། གསེར་རྡོག་སོ་བཞི་བོ་ཡང་རྩིས་ཤིག་འཕྲོད།།
ཞིང་བ་འགོང་བོ་ཞིག་གིས་མ་འཁྲབ་ན།། ཨ་ཕོ་ང་ཡང་ཤེད་ཀྱིས་ཁེངས་ནས་འདུག།

དུས་ཚོད་ངོ་གཉིས་མ་འདིར་ཁོ་ཆད་ཀྱང་།། གློ་བུར་མེ་རྟ་རེ་ཡིས་ཁ་ཞིག་གསོ།།
མིག་ཆུ་ཁྱོར་བ་གང་ལ་དཔེ་བླངས་ནས།། ཁ་ལག་བཀྲུས་ནས་ཡག་ངོ་ཡང་བསྐྱར་བཏོད།།

ཨ་ལ་ཐ་ལའི་རྔ་མའི་རྟ་ལྕག་དེ།། རྟ་ནག་སྒྲོག་འགྲོས་ཤིག་གི་དྲུག་ཤ་བབས།།
བསམ་གཏན་ལྷ་མོའི་གྱི་ལིང་གཡང་ལྷ་བོ།། རླུང་རྟ་འཕུར་ཤེས་ཤིག་གི་ཚད་དུ་བྱས།།

དུས་རབས་ཉེར་གཅིག་སད་མར་ཀར་མ་ཁྱེད།། གཡུ་རྙིང་སུམ་ཅུ་བོ་ཡང་བསྟན་སོང་བས།།
ལམ་ལ་ཆས་མིན་ཨ་ཕོ་ཁ་སྟབས་ཅན།། རང་རང་ས་ན་རྩིས་ཤིག་ཡོད་པར་ངེས།།

ཁྱོད་ཀྱང་ངུས་པས་ཀུན་ཀྱང་ངུ་བ་འདི།། འཁྲབ་གཞུང་ཞིག་དང་འདྲ་ལེ་ཨེ་ཡིན་ན།།
ཁྱོད་ཀྱི་སྙིང་གི་རུས་པ་མཐོང་སོང་ན།། མ་ཁ་སོ་ཞིག་བཏབ་ན་ཤི་རེ་ཁོ།།

དགུན་འདི་ཚར་རྒྱུ་ཅང་ཞིག་མེད་པ་འདྲ།། གཡུ་འབྲུག་ཚང་ཉལ་ཨེ་ཤར་དཀྱིལ་ནས་བུད།།
ཁུ་བྱུག་མིད་ཐག་བསང་ལ་བྲེལ་བ་འདི།། རྡུལ་མགོ་ཡང་བའི་རྟགས་ཤིག་ཨེ་ཡིན་འདོད།།

དྲིན་ཅན་བུ་མོས་ཁ་ཞིག་མ་གྲག་ན།། སྐྱག་པའི་སྟེང་གི་དཀྱིལ་ཀྲུང་མ་ཞིག་ཐལ།།
མགོ་རུལ་རྣ་བས་ཚོར་བའི་བརྡ་རྟགས་འདིས།། ཆུ་ལེན་བུ་མོས་ངག་རྟ་ཁུག་པར་ངེས།།

ཅི་ཙམ་བཤད་ན་དེ་ཙམ་མི་སུན་པ།། ཁྱོད་ཀྱི་མིག་ཆུ་ཞིམ་པོའི་བཀའ་དྲིན་ཡིན།།
ཚེ་སྲོག་སོ་མ་ཞིག་གི་ཤེད་ཤུགས་འདིས།། སྐྱ་རེངས་འདབ་ཀ་ཡར་ལ་བཀྱགས་སོང་ངོ་།།

༢༠༢༦ ༡ ༡༤ ཨ་འཇམ་གྱིས།