ཞི་བའི་གོམ་བགྲོད།

རྩོམ་ཡིག་འདི་ཐེངས་ 282 བཀླགས་འདུག

ཞི་བའི་གོམ་བགྲོད།

རྩོམ་པ་པོ།—— སྤྲུལ་སྐུ་འཆི་མེེད་ཚེ་དབང་།

ངུར་སྨྲིག་རྒྱལ་མཚན་འཆང་བའི་བཅུ་དགུའི་སྡེ།།
དབུ་ཟླུམ་ཞབས་རྗེན་ཞི་བའི་གོམ་པའི་འགྲོས།།
ངང་མོའི་ལྡེམ་དང་གླང་ཆེན་དྲེགས་པའི་ཚུལ།།
དལ་གྱིས་གཤེགས་ཀྱང་ས་ཆེན་ཡུད་ཀྱིས་གཅོད།།

སྟོན་པ་འཇིག་རྟེན་མིག་གཅིག་ཟུམ་གྱུར་ཅིང་།།
དགྲ་བཅོམ་འཕགས་པའི་ཚོགས་ཀྱང་གཤེགས་པའི་རྗེས།།
དུས་ཀྱི་མཐའ་འདིར་དགེ་སྦྱོང་འདི་དག་གིས།།
སྟོན་མཆོག་དྲན་པའི་ན་ཟུག་ལྷག་ཏུ་བསྐྲུན།།

སྔོན་ཚེ་འཕགས་ཡུལ་དབུས་གྱུར་མ་གྷ་དྷ།།
རྒྱལ་པོའི་ཁབ་ཀྱི་བྱ་རྒོད་ཕུང་རི་ནས།།
མཉན་ཡོད་རྒྱལ་བུ་རྒྱལ་བྱེད་སྐྱེད་ཚལ་བར།།
ཐུབ་དབང་འཁོར་བཅས་འདི་ལྟར་ཕེབས་སམ་སྙམ།།

ལུས་པོས་ས་གྱོང་རྡུང་བའི་སྙིང་མཁྲེགས་ཀྱང་།།
སྙི་མོ་ཤ་ཁྲག་རྡོ་བའི་རིགས་མིན་པས།།
རྣག་དང་ཁྲག་གིས་ཚོས་པའི་ཞབས་ཟུང་ལ།།
རྨ་རས་དཀར་པོ་གྲོགས་སུ་བསྟེན་པའང་མཇལ།།

དེ་ལྟ་ན་ཡང་གོམ་པའི་འདེགས་འཇོག་རེས།།
འཇིག་རྟེན་ཡོམ་ཡོམ་སྒུལ་བ་མངོན་སུམ་སྟེ།།
ཀུན་ལས་སྤྱང་ཞིང་ཀུན་ལས་མགོ་མཁྲེགས་པའི།།
མགོ་སེར་གྲངས་མེད་དགའ་ངུ་ཤོར་ལ་ལྟོས།།

ཞབས་རྗེན་མནའ་མ་གསར་པའི་གོམ་འགྲོས་བཞིན།།
དལ་བུས་མི་སེམས་གཡོས་པའི་ཚུལ་མཐོང་ཚེ།།
ཀོ་ལམ་སྨུག་པོས་གཡོགས་པའི་བདག་གི་རྐང་།།
རྡག་སྒྲ་རྡིག་སྒྲ་མི་སེམས་དཀྲུག་བྱེད་ཙམ།།

ཞི་བའི་སྟོན་པས་ཞི་བའི་ནགས་ཁྲོད་དུ།།
ཞི་བའི་ཆོས་ཀྱི་འཁོར་ལོ་བསྐོར་ཏོ་ཞེས།།
གནའ་གཏམ་འདི་དག་རྫུན་དུ་མི་འགྱུར་བར།།
སྟོབས་ལྡན་ཨ་རི་ཡུལ་ནས་བདེན་དཔང་བསྟན།།

ཐོད་ལ་བྱམས་བརྩེའི་རྟགས་ཀྱི་མདོངས་ཅན་ཁྱི།།
འཕགས་པའི་ཡུལ་ནས་འོངས་པའི་ཨ་ལོ་ཀ།
ཀུན་གྱིས་ཡིད་དབང་ལྷག་པར་འཕྲོག་པ་དེས།།
འགྲུལ་བཞུད་འདི་ཉིད་དེ་བས་མཛེས་པར་བྱས།།

རྒྱ་མཚོའི་འགྲམ་གྱི་གནས་བརྟན་སྡེ་པ་དང་།།
གངས་རིའི་ཁྲོད་ཀྱི་ཡོད་པར་སྨྲ་བ་གཉིས།།
སྟོན་པ་གཅིག་གིས་བསྐྱངས་པའི་རྗེས་འཇུག་སྟེ།།
བཅོ་བརྒྱད་སྡེ་པ་ནུབ་པའི་ལྷག་མ་ཉིད།།

སུ་ཞིག་དར་ན་བསྟན་པའི་གསོ་སྨན་དང་།།
གང་ཞིག་རྒུད་ན་ནང་པའི་ཆག་སྒོ་སྟེ།།
མཐོ་དམན་གླེང་བའི་སྙིང་ཁམས་བདག་ལ་མེད།།
ཁྱེད་ཀྱི་མཛད་སྤྱོད་བདག་གི་ངོ་སོ་ཡིན།།

ངུར་སྨྲིག་ཆོས་གོས་ཧྲུལ་པོའི་བསིལ་གྲིབ་འོག།
གོ་ལ་ཧྲིལ་པོ་ཞི་བདེས་ཁྱབ་པ་དང་།།
སྐྱབས་སྦྱིན་ཕྱག་རྒྱ་གདེངས་པའི་སྐྱབས་འོག་ཏུ།།
འགྲོ་དྲུག་སེམས་ཅན་བདེ་དགས་འཚོ་བར་ཤོག།

ཚིགས་བཅད་དགུ་པ་དེ་མཁས་དབང་དགེ་འདུན་ཆོས་འཕེལ་གྱིས་མཛད་པའི་སིངྒ་ལའི་ལམ་ཡིག་ནང་ཁོད་འདིར་གཡར་བ་ཡིན།

2026/01 /12 ཉིན།