མཁན་འཆི་མེད་རིག་འཛིན་གསུང་རྩོམ་གསར་པ་ཞིག

རྩོམ་ཡིག་འདི་ཐེངས་ 226 བཀླགས་འདུག

༄༅།།ཆོས་རྗེ་བླ་མ་ཡིད་བཞིན་ནོར་བུའི་བཀའ་དྲིན་རྗེས་སུ་དྲན་པའི་གསོལ་འདེབས་ཉུང་ངུ་འཁོར་འདས་བར་གྱི་རྒྱང་འབོད་ཅེས་བྱ་བ།

རྩོམ་གསར།
མཛད་པ་པོ། མཁན་འཆི་མེད་རིག་འཛིན།

བླ་མ་མཁྱེན། བླ་མ་མཁྱེན། བླ་མ་མཁྱེན་ནོ།།

འཇིགས་མེད་རྩོད་འཆད་རྩོམ་པའི་གཏེར་ལ་དབང་།།
ཕུན་ཚོགས་བསླབ་པ་གསུམ་གྱི་ཡོན་ཏན་རྫོགས།།
དཔག་ཡས་ཕན་བདེའི་འབྱུང་གནས་རིན་པོ་ཆེ།།
འདྲེན་མཆོག་དཔལ་ལྡན་བླ་མར་གསོལ་བ་འདེབས།།

སྔོན་བྱས་ལས་དང་རྐྱེན་གྱི་གཞན་དབང་གིས།།
མཐོ་དམན་འགྲོ་བ་མང་བའི་འཇིག་རྟེན་འདིར།།
སྐྱེ་བའི་ལུས་རེ་བླངས་པའི་ལམ་ཁ་ལ།།
ཕྱིར་འདང་དྲན་པས་ཡང་ཡང་བསམ་པ་ན།།

མཐོན་པོ་ལྷ་ཡི་སྐས་མགོར་མ་སླེབས་ཀྱང་།།
དམའ་མོའི་སྐྱེ་བོ་འགའ་རྗེས་མ་སོང་བ།།
ཉི་མའི་འོད་དང་འབྲེལ་བའི་མེ་ཏོག་བཞིན།།
དམ་པའི་མགོན་གྱིས་ཟིན་པའི་དྲིན་དུ་གོ།

ས་སྟེང་མི་ཡི་ཡུལ་དུ་སྐྱེས་ན་ཡང་།།
ཐར་པའི་ལམ་ལ་དགའ་གུས་མོས་པ་མེད།།
དམ་ཆོས་ཉི་མའི་འོད་ལ་རྒྱབ་ཀྱིས་ཕྱོགས།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

མཐོ་རིས་ཡུལ་གྱི་དབུས་སུ་གནས་ན་ཡང་།།
སྲོག་གཅོད་རྐུ་འཕྲོག་སྡིག་པའི་ལས་ལ་སྤྱོད།།
ཐར་མེད་ལོག་པའི་ལམ་དུ་གོམ་ཁ་བཞག།
དེ་འདྲ་བ་རེར་མ་སོང་ཁྱེད་ཀྱི་དྲིན།།

སྨྲ་ཤེས་དོན་གོའི་ལུས་རེ་རྙེད་ན་ཡང་།།
ཁ་མཁས་ལྕེ་བདེས་མིང་འདོགས་འཕྱ་སྨོད་བྱེད།།
དོན་མེད་སྡིག་པས་ངན་འགྲོའི་སྒོ་འཕར་ཕྱེས།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

དམ་པའི་ལྷ་གྲལ་ཞིག་ཏུ་སླེབས་ན་ཡང་། །
དགེ་འདུན་དཀོར་ལ་བག་མེད་ཧབ་ཐོབ་བྱས།།
ཉེས་པའི་རྣམ་སྨིན་རི་རབ་ལས་ཀྱང་ལྕི།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

ཤེས་བྱ་རིག་པའི་གནས་ལུགས་སྦྱངས་ན་ཡང་།།
མཆོག་གསུམ་སྐྱབས་ལ་ཐེ་ཚོམ་སྒྲོ་སྐུར་སྨྲ།།
དཀར་པོ་དགེ་བའི་ས་བོན་གཏིང་ནས་བཅོམ།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

གངས་ལྗོངས་གསུང་རབ་གཞུང་མང་བསླབས་ན་ཡང་།།
གྲུབ་མཐའི་ཁ་འཛིན་ཆགས་སྡང་ཕྱོགས་རིས་རྩོད།།
ཆོས་སྤོང་ལས་ཀྱིས་རང་གཞན་ཕུང་ལ་སྦྱོར།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

དབང་ཁྲིད་གདམས་ངག་མང་དུ་ཞུས་ན་ཡང་།།
བླ་མ་མཆེད་ལ་ལོག་ལྟ་སྐུར་འདེབས་ཤོར།།
མཆོག་ཐུན་དངོས་གྲུབ་ཀུན་ཀྱི་རྨང་རྡོ་འཆུག།
དེ་འདྲ་བ་རེར་མ་སོང་ཁྱེད་ཀྱི་དྲིན།།

གཅིག་པུར་དབེན་པའི་རི་ལ་བསྡད་ན་ཡང་།།
རྒྱུས་མེད་ལམ་ལ་ཁེར་རྐྱང་ཆས་པ་བཞིན།།
ཉམས་ལེན་གནད་གསང་འདེད་ཚུལ་མི་ཤེས་པ།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

མང་པོའི་གསེབ་ཏུ་མི་དང་འགྲོགས་ན་ཡང་།།
ཚེར་མའི་ཐང་ཤིང་འཕྲེད་དུ་འགྱེལ་བ་བཞིན།།
རང་ཚུགས་མི་ཟིན་གཞན་གྱི་སེམས་རྒྱུད་དཀྲུགས།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

མི་ཚེ་སྐྱིད་ཀྱིས་འཚོ་བར་འདོད་ན་ཡང་།།
ཉེས་ཆེན་ཁྲིམས་པ་བཙོན་དུ་ཚུད་པ་བཞིན།།
གུ་ཡངས་བག་ཕེབས་བདེ་བའི་གོ་སྐབས་མེད།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

ལས་དང་རྐྱེན་ངན་དབང་དུ་གྱུར་ན་ཡང་།།
དྭ་ཕྲུག་བྱིས་པ་ཐང་དཀྱིལ་ལུས་པ་བཞིན།།
རེ་བའི་འབོད་ཡུལ་སེམས་ཀྱི་སྐྱབས་གནས་མེད།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

གློ་བུར་འཆི་བ་ཐོག་ཏུ་བབས་ན་ཡང་།།
ཉེན་ཁའི་འཕྲང་ནས་ཆོམ་པོས་བཅོམ་པ་བཞིན།།
མདུན་གྱི་སྣ་འདྲེན་རྒྱབ་ཀྱི་སྐྱེལ་མ་མེད།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

འཇིགས་རུང་བར་དོའི་གནས་སུ་འཁྱམས་ན་ཡང་།།
རྒྱུས་མེད་གྲོང་ལ་གསར་དུ་འགྲོ་བ་བཞིན།།
གར་འགྲོའི་གནས་ལ་འདུན་མའི་གཏད་སོ་མེད།།
དེ་འདྲ་བ་རེར་མ་སོང་ཁྱེད་ཀྱི་དྲིན།།

གྲི་སོའི་སྒང་དུ་ཡོད་པའི་ནས་འབྲུ་བཞིན།།
གཡས་གཡོན་གང་དུ་ལྷུང་ཡང་ཆོག་པ་བདག།
བརྩེ་ཆེན་ཐུགས་རྗེའི་ཕྱག་གིས་བཟུང་བ་ཡི།།
བཀའ་དྲིན་བརྗེད་ཐབས་མེད་དོ་ཡིད་བཞིན་ནོར།།

མཐོན་པོའི་དཔོན་གྱི་ཆབ་སྲིད་སྐྱོང་ལུགས་ནས།།
གཉོམ་ཆུང་ཆོས་པའི་ཁེར་འདུག་བྱེད་ཚུལ་བར།།
ཞལ་གདམས་མ་གསུངས་བསམ་པ་བདག་ལ་མེད།།
བཀའ་དྲིན་ཡིད་ལ་དྲན་བཞིན་གསོལ་བ་འདེབས།།

ཐུན་མོང་སྨན་རྩིས་དབུ་ཚད་རིག་པ་ནས།།
བཀའ་གཏེར་རྒྱུད་སྡེའི་གཞུང་ལུགས་དུ་མ་ཡི།།
འཆད་ཁྲིད་མ་གནང་བསམ་པ་བདག་ལ་མེད།།
བཀའ་དྲིན་ཡིད་ལ་དྲན་བཞིན་གསོལ་བ་འདེབས།།

གསང་ཆེན་སྔགས་ཀྱི་གདམས་པ་རྒྱ་མཚོ་ཡི།།
སྨིན་བྱེད་ཆུ་བོས་རྒྱུད་འདི་ཡང་ཡང་བཀྲུས།།
དབང་བཞི་མ་ཐོབ་བསམ་པ་བདག་ལ་མེད།།
བཀའ་དྲིན་ཡིད་ལ་དྲན་བཞིན་གསོལ་བ་འདེབས།།

སེམས་ཀྱི་གནས་ལུགས་མཛུབ་ཚུགས་སྟོན་པ་དང་།།
གདོད་མའི་རྒྱལ་སྲིད་ལག་ཏུ་སྟེར་ཐབས་ཀྱི།།
མན་ངག་མ་བསྟན་བསམ་པ་བདག་ལ་མེད།།
བཀའ་དྲིན་ཡིད་ལ་དྲན་བཞིན་གསོལ་བ་འདེབས།།

ཟས་གོས་ཡོ་བྱད་ཉེར་མཁོ་ཕྲན་བུ་ནས།།
སྐུ་གསུང་ཐུགས་ཀྱི་རྟེན་མཆོག་དུ་མ་ཡི།།
གནང་སྦྱིན་མ་བྱས་བསམ་པ་བདག་ལ་མེད།།
བཀའ་དྲིན་ཡིད་ལ་དྲན་བཞིན་གསོལ་བ་འདེབས།།

མཐོང་གྲོལ་མཚན་དཔེའི་ཞལ་བཟང་མཇལ་བ་ནས།།
དག་པའི་ཞིང་ལ་ཐུགས་འདུན་མ་གཏད་བར།།
བརྩེ་བས་མ་བསྐྱངས་བསམ་པ་བདག་ལ་མེད།།
བཀའ་དྲིན་ཡིད་ལ་དྲན་བཞིན་གསོལ་བ་འདེབས།།

མཐོ་བ་ལྷ་ཡི་ཡུལ་ནས་བསྡད་པ་འམ།།
དམའ་བ་ངན་འགྲོའི་གནས་སུ་ལྷུང་བ་སྟེ།།
གང་དུ་འཁྱམས་པ་རང་གིས་མ་ཤེས་ཀྱང་།།
དམ་པའི་མགོན་གྱིས་ཟིན་པ་ད་རེས་ཙམ།།

ཀུན་ཏུ་བཟང་པོ་རྒྱལ་བ་རྡོ་རྗེ་འཆང་།།
དོན་གཉིས་མཐའ་རུ་ཕྱིན་པའི་སངས་རྒྱས་མང་།།
ང་ལ་ཁྱེད་ལས་ལྷག་ཅིག་མ་བྱུང་བས།།
སྐྱབས་གནས་ཀུན་ཀྱི་མཆོག་དེར་གསོལ་བ་འདེབས།།

ནམ་མཁའི་སྙིང་པོ་སྒྲིབ་པ་རྣམ་པར་སེལ།།
ས་བཅུའི་ལམ་ལ་གནས་པའི་སེམས་དཔའ་མང་།།
ང་ལ་ཁྱེད་ལས་ལྷག་ཅིག་མ་བྱུང་བས།།
འདོད་དགུའི་འབྱུང་གནས་དམ་པར་གསོལ་བ་འདེབས།།

ཁྲི་སྲོང་ལྡེ་བཙན་པདྨ་སམྦྷ་བ།།
བོད་ལ་བཀའ་དྲིན་ཆེ་བའི་རིག་འཛིན་མང་།།
ང་ལ་ཁྱེད་ལས་ལྷག་ཅིག་མ་བྱུང་བས།།
ཐར་བའི་དེད་དཔོན་ཆེན་པོར་གསོལ་བ་འདེབས།།

ཉི་མ་འོད་ཟེར་རྒོད་ཀྱི་ལྡེམ་འཕྲུ་ཅན།།
པདྨའི་རྒྱལ་ཚབ་སྤྲུལ་པའི་གཏེར་སྟོན་མང་།།
ང་ལ་ཁྱེད་ལས་ལྷག་ཅིག་མ་བྱུང་བས།།
འདི་ཕྱིའི་སྐྱབས་གནས་མཆོག་ལ་གསོལ་བ་འདེབས།།

མི་ལ་རས་པ་ཐང་སྟོང་རྒྱལ་པོ་སོགས།།
སྣང་སེམས་དབང་དུ་འདུས་པའི་གྲུབ་ཐོབ་མང་།།
ང་ལ་ཁྱེད་ལས་ལྷག་ཅིག་མ་བྱུང་བས།།
བྱིན་རླབས་རྒྱ་མཚོའི་གཏེར་ལ་གསོལ་བ་འདེབས།།

ས་སྐྱ་པཎ་ཆེན་ཀུན་མཁྱེན་ཀློང་ཆེན་པ།།
གཞུང་ལུགས་རབ་འབྱམས་མཁྱེན་པའི་མཁས་པ་མང་།།
ང་ལ་ཁྱེད་ལས་ལྷག་ཅིག་མ་བྱུང་བས།།
གཙུག་གི་རྒྱན་བཟང་དམ་པར་གསོལ་བ་འདེབས།།

དེ་ལྟར་སྐྱབས་གནས་ཀུན་ལས་ལྷག་པའི་མགོན།།
མཚུངས་མེད་བླ་མའི་བཀའ་དྲིན་རྗེས་དྲན་ཏེ།།
དད་གུས་གདུང་བའི་དབྱངས་ཀྱིས་རྒྱང་འབོད་ན།།
དོན་བརྒྱུད་རྟོགས་པའི་དངོས་གྲུབ་མྱུར་ཐོབ་ཤོག།

བསོད་ནམས་ལས་འཕྲོས་འཕྲད་པའི་བླ་མ་ཡི།།
ཡོན་ཏན་མ་བསམས་ལམ་གྱི་གནད་གསང་སྟོར།།
སངས་རྒྱས་དངོས་སུ་རྟོགས་པའི་ཡིད་ཆེས་ཀྱིས།།
ས་ལམ་རྟོགས་པ་ཁྲེགས་ཆོད་རྫོགས་པར་ཤོག།

ཀུན་རྟོག་རླབས་ཀྱིས་དཀྲུགས་པའི་རང་སེམས་ཀྱི།།
ཡིན་ལུགས་མ་གོ་འཁོར་བའི་གནས་སུ་ལྷུང་།།
གང་ཤར་བླ་མའི་ཐུགས་སུ་ངོ་འཕྲོད་དེ།།
ཡེ་ཤེས་ལྔ་ཡི་རང་རྩལ་རྒྱས་པར་ཤོག།

སྲ་འཐས་ཚོགས་དྲུག་ཡུལ་གྱི་ཤར་ཆ་ཡི།།
རང་ངོ་མ་ཤེས་ཆགས་སྡང་སྡུག་བསྔལ་མྱོང་།།
སྣང་སྲིད་བླ་མའི་རོལ་བར་ངེས་རྙེད་དེ།།
སྟོང་གཟུགས་དག་པའི་ཞིང་དུ་འཆར་བར་ཤོག།

ཅེས་པ་འདི་སྐྱབས་མཆོག་མཚུངས་མེད་ཆོས་རྗེ་བླ་མ་ཡིད་བཞིན་ནོར་བུའི་ཚད་མེད་པའི་བཀའ་དྲིན་དག་རང་གི་ཡིད་ལ་གསལ་འདེབས་པའི་དམིགས་རྟེན་རེར་བསམས་ནས་བླ་རུང་ཆོས་སྡེ་ཆེན་མོའི་དཔོན་སློབ་འདུས་པ་རྒྱ་མཚོའི་སྐྱབས་འོག་པ་འཆི་མེད་རིག་འཛིན་གྱིས་མདོ་རྡོ་རྗེ་བྲག་ཏུ་བོད་ཤིང་སྦྲུལ་ལོའི་ཟླ་བཅུ་པའི་ཚེས་བཅུ་ལ་སྨྲས་པ་བཞིན་སྦྱིན་པ་བཀྲ་ཤིས་ཀྱིས་ཡི་གེར་ཕབ་པ་ཡིན་ལ། ཉེ་བའི་ཆར་བླ་མ་དུ་མ་ལ་རྗེས་དྲན་གསོལ་འདེབས་རེ་འབྲི་དགོས་ཞེས་བསྐུལ་མ་བྱེད་མཁན་མང་། དེ་ལྟར་རེ་རེ་བཞིན་འབྲི་བར་མ་ལྕོགས་ནའང་ཉེར་མཁོ་ཡོད་ན་གསོལ་འདེབས་འདིའི་མགོར་རང་རང་གི་རྩ་བའི་བླ་མ་རྣམས་ཀྱི་གསོལ་འདེབས་རེ་སྦྱར་ཞིང་། གལ་ཏེ་སྐུ་བཞུགས་པ་ཡིན་ན་གོང་གི། མཐོང་གྲོལ་མཚན་དཔེའི་ཞལ་བཟང་མཇལ་བ་ནས།། དད་འདུན་སེམས་ཀྱིས་རིང་དུ་འགྲོགས་པའི་བར།། ཞེས་སོགས་དགོས་ངེས་ཀྱི་ཚིག་འགའ་རེ་ཁ་བསྒྱུར་བྱས་ཏེ་བཀའ་དྲིན་རྗེས་དྲན་གྱི་གསལ་འདེབས་སུ་བཀླགས་ནའང་རུང་ངོ་།། དགེ།