གཅན་རང་སད་ཀྱིས་རྨེ་སྤྲུལ་མཆོག་ལ་ཕུལ་བའི་འཕྲིན།
རྩོམ་ཡིག་འདི་ཐེངས་ 287 བཀླགས་འདུག
ཐུབ་པ་ཚོགས་གཉིས་འོ་མ་དཀར་པོའི་མཚོ།།ཕྱིན་དྲུག་རླུང་གིས་བསྲུབས་པའི་རྩེ་དགའ་ལས།།སྐུ་བཞི་ཟླ་བ་ནོར་བུའི་མེ་ལོང་ནི།།སྐྱེ་རྒུའི་བསོད་ནམས་མཁའ་རུ་འཕགས་པས་སྐྱོངས།།
སྒྱུ་ལུས་མི་ཤིགས་རྡོ་རྗེའི་ཉག་ཕྲན་འོད་གསལ་སྟོང་པའི་གཞུ་དང་རབ་འགྲོགས་སྟོབས་བཅུའི་མཐེབ་ལོང་སྦྱར་བ་ལས།།འཇིགས་རུང་ཕྱི་ནང་གསང་བའི་དགྲ་བགེགས་རལ་གྲིའི་གདེངས་ཀ་གཡོ་བའི་དཔུང་ཚོགས་དམིགས་མེད་དབྱིངས་སུ་བཅོམ་དང་ལྷན།།གདོད་ནས་མཁའ་ཁྱབ་བརྟན་གཡོའི་བཀོད་པ་སྣང་སྲིད་དག་པའི་འཁོར་ལོར་ཡོངས་སྡོམ་གྲུབ་པའི་གཙུག་རྒྱན་པད་མ་འབྱུང་།།ལྷ་སྔགས་ཏིང་འཛིན་འཕྲུལ་ལ་དབང་འབྱོར་བཅོམ་ལྡན་རྟ་མཆོག་རོལ་བའི་སྒྱུ་འཕྲུལ་རིག་འཛིན་དཔའ་བོ་གང་དེར་འདུད།།
མཚན་དཔེའི་ཟླ་ཤེལ་བཞད་པའི་སྙེ་མ་ལི་ཁྲིའི་དྲ་བ་གཅིག་ལ་བཟླུམས།།ཟབ་མོ་རྟེན་འབྱུང་གཏམ་གྱི་ང་རོ་དབྱར་སྐྱེས་རོལ་མོའི་ཟོལ་གྱིས་ལྡིར།།བློ༵་ཆེན་ཀུན་བཟ༵ང་མཁྱེན་པའི་སྣང་བ་ཉི་མ་བྱེ་བའི་དཔལ་ལ་བསྡེབས།།འཇམ་མགོན་གྲ༵གས་པ༵འི་བ་དན་དཀར་པོ་སྲིད་ཞིའི་མཐོངས་ལ་འཕུར་དེ་མཆོད།།
འཁོར་འདས་དབྱངས་ཀྱི་ཟིལ་དངར་འབུམ་སྡེའི་རྒྱུན།།སྐྱེ་མེད་འཕང་འགྲོའི་སྙིང་བོར་བསྐྱིལ་བའི་བཅུད།།སྐལ་ལྡན་མགྲིན་པའི་གསོས་སུ་འགྲེམ་པ་མོ།།རླུང་སེམས་འོད་ལྔའི་ཁབ་ཏུ་འདིར་ཡང་བསུ།།
འཇིག༷ས་མེ༷ད་དག་པ་མཁྱེན་བརྩེའི་རང་མདངས་ཐུན་མཚམས་སྤྲིན་གྱི་དྲ་བར་རྗེས་ཆགས་ཕུ༷ན་ཚོག༷ས་དོན་གཉིས་སྣང་བའི་གཏེར།།ལུང༵་རྟོག༵ས་ཆོས་ཚུལ་འོད་བརྒྱའི་འབྱུང༷་གནས༷་ཁམས་གསུམ་འགྲོ་བའི་སྒྲིབ་གཉིས་མུན་སེལ་ཀུན་རིག་ཉི་མའི་ཞབས་བསྟེན་པས།།བགྲང་ཡས་སྐྱེ་དགུའི་ཕན་བདེའི་རྩ་ལག་ཐུབ་བསྟ༵ན་ས་ཆེན་དཀྱིལ་འཁོར་འཛི༵ན་ལ་བསྙེངས་པ་མེད་པའི་དཔལ་བརྙེས་ཤིང་།།ཐར་འདོད་གདུལ་བྱ་བུང་བའི་གསོས་སུ་རྣམ་དག་བཤད་སྒྲུབ་པདྨའི་ཟིལ་དངར་རྒྱ༵་མཚོ༵འི་ཕ་མཐར་སྤྲོ་དེའི་དྲུང་།།
འཁོར་ཁྱིམ་འདམ་གྱི་རྫིང་བུར་གནས་བཅས་བག་མེད་གོམ་སྟབས་བརླིང་པོར་སྐྱོད།།རྙེད་བཀུར་གླང་མོའི་རྗེས་ལ་ཆགས་ཤིང་དཀར་མིན་སྡིག་པའི་སྣ་ཞགས་ཀྱིས།།དགེ་བའི་ལྗོན་པ་དྲུངས་ནས་འབྱིན་པའི་ཉོན་མོངས་ལུས་སྟོབས་རྒྱས་པ་ཅན།།ར༵ང་ས༵ད་མིང་གི་གདོང་ཁེབས་འཆང་བའི་གཏི་མུག་དབང་གྱུར་གླང་པོ་དེས།།
ཟླ་སྟོང་འོད་ཀྱི་ཟེར་མ་ལ།།བཞད་གད་འཁྲུངས་པའི་ལྷག་བསམ་མཚོ།།མཛའ་གཅུགས་རླུང་གིས་གཡོས་པ་ལས།།སྙན་འཕྲིན་རླབས་ཀྱི་མཆོད་ཡོན་སྦྲེངས།།
རབ་རྒྱན་ཡིད་བཞིན་ལྗོན་པའི་གདེངས་ཀ་རུ།།ནོར་ལྡན་ལྟོ་འགྲོས་འཁྲིལ་བའི་དུས་ཀྱི་ཆར།།གང་སྐུ་ཤེལ་དཀར་རྡུལ་མང་བརྩེགས་པའི་ལྷུན།།འགལ་རྐྱེན་དྲི་བཞོན་ཤུགས་ཀྱིས་གཡོ་མེད་ངོས།།
བསླབ་གསུམ་དག་པའི་གཟི་འོད་འབར་བའི་འཛུམ།།ཁོར་ཡུག་གླིང་བཞིའི་རྒྱན་དུ་སྤྲོ་བའི་མུར།།མདོ་སྔགས་ཟབ་ཆོས་ཁ་འབབ་རྣམ་བཞིའི་ཀླུང་།།ཕྱོགས་ཀུན་འགྱེད་པའི་རྩེ་དགས་བྲེལ་ལགས་སམ།།
འདི་ན་མི་ཁོམ་སྲིད་པའི་ཐལ་དོང་དུ༵།།དུ༵་མའི་འཁོར་ཚོགས་སྐྱོང་བའི་ཚུར་མཐོང་བདག༵།བདག༵་གཞན་དོན་གཉིས་གང་ཡང་མ་ནུས་བ༵ར།།བ༵ར་མེད་སྐྱོ་བའི་སྨྲེ་ངག་ཟློ་བཞིན་མཆིས། །
གང༵་གང༵་སྐྱེ་སྲིད་སྔ་མའི་བག་ཆགས་སམ།།ཏ༵ག་ཏ༵ག་དགའ་ཁ་འཁྱེར་སོའི་གཞན་དབང་གིས།།མཆོ༵ག་མཆོ༵ག་སྙན་ངག་གཞུང་ལ་དུངས་དྲགས་པས།།ཡ༵ང་ཡ༵ང་འཚོ་བའི་འདུན་མ་མ་བོར་ཙམ།།
མཁས་རྒུའི་རྣམ་དཔྱོད་ཁྱབ་འཇུག་ལྟོ་བ་ལས།།འཁྲུངས་པའི་ཆ༵བ་ཤོ༵ག་ལམ་སྲོལ་པད་མ་དཀར།།དུས་ཀྱིས་ཉམས་པ་གསོ་བའི་རྩ་ལག་ཏུ།།དབྱངས་ཅན་རིག་པའི་གྲུ་ཆར་དགུང་ནས་འབེབས།།
སྔོན་ཚེ་ལུང་སྟོང་བྱིས་པའི་ཟློས་གར་གྱིས།།གཙུག་ལག་ནགས་མཐར་ཡན་པའི་སྐབས་ཉིད་ན།།མཆོག་གི་ངག་རིག་བདུད་རྩིའི་བསང་གཏོར་གྱིས།།ཁོ་བོའི་སྐོམ་གདུང་སེལ་བ་ཐེངས་གཅིག་མིན།།
སྙིགས་མའི་དུས་ཀྱི་ས་ཡིས་ཐེག་མིན་པ།།ཉིད་ཀྱི་ཕྱག་སོར་རྩེ་མོས་བསྐྲུན་པའི་སྐྱེས།།རྟོག༵ས་བརྗོ༵ད་མུ༵་ཏིག༵་དཀ༵ར་པོ༵འི་འཁྲི༵་ཤིང༵་གིས།།མིག་དང་ཡིད་ལ་རབ་དགའི་དུས་སྟོན་བསྒྲུབས།།
ཁྱད་པར་རིགས་གསུམ་སྒྱུ་འཕྲུལ་ཚོམ་བུ་འཇི༵གས་མེ༵ད་མཚན་དཔེའི་འདབ་མར་སྨིན་པ་ཕུ༵ན་ཚོག༵ས་མདོ་སྔགས་བདུད་རྩིའི་འབྱུ༵ང་གན༵ས་དཔལ་ལྡན་དུས་ཀྱི་རྡོ་རྗེ་འཆང་།།རྗེ་བཙུན་བརྟན་པའི་འཁོར་ལོའི་ཞིང་ཁམས་ས་འཛིན་རྩེ་མོ་ལྔ་བའི་མགུལ་དུ་ཐུགས་བསྐྱེད་སྨོན་ལམ་ཤིང་རྟའི་འཕྲུལ་གྱིས་ཉེ་བར་དྲངས་ལས་གསང་གསུམ་གྱི།།བསུང་ངད་ཕྱོགས་ཀྱི་འཁོར་ལོར་རབ་རྫོགས་དོན་གཉེར་རྐང་དྲུག་རེ་བ་ཀུན་སྐོང་ཆོས་སྦྱིན་སྦྲང་རྩི་མངར་བོའི་མཆོད་ཡོན་གཏན་པ་མེད་པར་བཀྱེས་པའི་ཚུལ།།རྟོག༵ས་བརྗོ༵ད་མནྡ༵་ར༵་ཡི༵་ཆུ༵ན་པོ༵་ཚིག་དོན་ལོ་འབྲས་ཁུར་གྱིས་དུད་པ་སྐལ་བཟང་ལྷ་བརྒྱའི་རལ་བའི་རྒྱན་གཅིག་སྙིམ་པའི་མཐིལ་ལ་སོན་པས་མྱོས།།
བདག་སྔོན་དྲང་སྲོང་མཆོག་གི་རྗེས་ཞུགས་ངུར་སྨྲིག་རྒྱལ་མཚན་ཟླུམ་པོར་བགོས་ཏེ་རྒྱལ་ཁམས་ཉུལ་བའི་སྐབས་ཉིད་ན།།ཕྱག་ན་པདྨོའི་སྤྲུལ་བའི་གནས་མཆོག་ལྷོ་མཚོའི་རླབས་ཀྱི་རྩེ་དགའ་རྒོད་པའི་གྲུ་འཛིན་རི་བོའི་ཞིང་ཁམས་ནས།།རྒྱལ་ཀུན་མཁྱེན་བརྩེ་ནུས་པའི་རང་གཟུགས་ཆོས་རྗེ་ཡིད་བཞིན་ནོར་བུའི་གསེར་ཞལ་མཇལ་བའི་སྐལ་བ་མངོན་གྱུར་ཏེ།།འཇམ་དབྱངས་གང་བློའི་རྗེས་གནང་དང་བཅས་སྐྱབས་སྦྱིན་ཕྱག་དབང་དངོས་གྲུབ་བསྩལ་ཅིང་ཆོས་འབྲེལ་གཡུང་དྲུང་ཐག་པ་སྦྲེལ།།
དུས་དེ་ནས་བཟུང་ལུས་ཀྱི་རི་དྭགས་བས་མཐའི་ནགས་སུ་ཡན་ན་ཡ༵ང་།།ཡ༵ང་དག་སྐྱབས་གནས་བླ་མ་གང་ལ་དད་གསུམ་རེ་ཁཱ་མ་རྙིང་ཞི༵ང་།།ཞི༵ང་ཁམས་རྒྱ་མཚོའི་མེ་ཏོག་ཚོམ་བུའི་དཀྱིལ་འཁོར་གཅིག་ཏུ་སྨོན་པ་ཡི༵ས།།ཡི༵་རངས་དང་བཅས་མ་འདྲིས་རྒྱང་གི་མཛའ་བཤེས་ཁྱེད་ལ་གློ་བ་ཉེ།།
དུས་བཞིའི་འཁོར་ལོ་བགྲོད་པའི་མཐོངས་ལ་ནགས་མའི་སྐྲ་ཚོགས་གཡོ་བའི་ལན་བུར་མཁའ་འགྲོའི་རྩེ་ཕྲན་རོལ་བའི་དུས།།གངས་ལྗོངས་གཙུག་ལག་རྒྱ་མཚོའི་མངའ་བདག་མི་འཇིགས་དབྱངས་ཅན་སྒེག་པའི་བློ་གྲོས་ཞིང་གཞན་གཤེགས་ནས་ལོ་འཁོར་བཅུ།།ལོན་པའི་མྱ་ངན་རྗེས་དྲན་ཚོགས་འདུ<<གུར་ཀུམ་ཆུན་པོའི>>བགྲོ་གླེང་དང་བཅས་འབར་ཁམས་ལྷ་ཡི་གྲོང་ཁྱེར་ནས།།རེ་ཞིག་འཚོགས་པའི་དཀྱིལ་འཁོར་དབུས་སུ་མཆོག་གི་དངོས་ཞལ་ཟླ་ཤེལ་མེ་ཏོག་མིག་གི་བདུད་རྩིར་སྨིན་པས་སྤྲོ།།
མཐོང་ན་རབ་དགའ་སྦྱིན་པའི་ངོ་མཚར་གྱི།།མཚན་བཟང་མནྡ་ར་བའི་མྱུ་གུ་གསར།།ཚུལ་གནས་དུལ་བའི་འཛུམ་གྱིས་རྣམ་སྒེག་པས།།ལྷར་བཅས་སྐྱེ་དགུའི་གཙུག་ལ་མངོན་པར་འཕགས།།
དབྱངས་ཅན་འཕང་འགྲོའི་རྒྱུད་ལས་ཉེར་དྲངས་པའི།།སྙན་འགྱུར་འབུམ་ལྡན་ལེགས་གསུང་བདུད་རྩིའི་ཆང་།།ཟེགས་མ་ཕྲ་མོ་རེས་ཀྱང་རྣ་བ་དང་།།ཡིད་ལ་ཀུན་དགའི་ཚོར་བ་ཆར་དུ་བསྙིལ།།
བྱས་བསགས་ལས་སྨོན་ག་བུར་དྲི་ཆབ་ཀྱིས།།བསྒོས་པའི་མཛའ་གཅུགས་རྡོ་ལེབ་དཀར་པོའི་གཞིར།།མཉེས་གཤིན་བརྩེ་བའི་འཛུམ་གྱིས་བཏབ་པ་ཡི།།བག་ཆགས་རི་མོ་བསྐལ་བར་བསུབ་ཏུ་མེད།།
དེའི་ཚེ་རིག་བྱེད་ངག་གི་གླིང་བུ་སྙན་དགུར་འཁྲོལ་ལ་དབང་འབྱོར་བའི།།དྲན་དབང་ལྷ་བརྒྱའི་དཀྱིལ་འཁོར་དབུས་ནས་དགྱེས་པའི་གཟིགས་པ་ལྷུང་གྱུར་ཏེ།།མཆོག་གི་མཚན་དཔེའི་ཉི་མའི་འཛུམ་དང་ལྷན་ཅིག་པར་གྱི་རི་མོ་ནི།།མི་བརྗེད་དྲན་པའི་རྟེན་དུ་བསྐྱོན་པ་བདག་ནི་ཚེ་ཡི་ནོམ་དུ་འཛིན།།
མི་ལོ་ཉི་ཤུའི་རེ་སྨོན་མངོན་དུ་གྱུར།།མི་ལོ་ཉི་ཤུའི་སྔོན་ནས་ལས་འབྲེལ་བྱུང་།།མི་ལོ་ཉི་ཤུ་སྐད་ཅིག་ཙམ་གྱིས་འདས།།མི་ལོ་ཉི་ཤུའི་དགའ་སྐྱོ་བརྗོད་ལས་འདས།།
ཨོཽ་ཌི་ཡ་ནའི་ཕུན་ཚོགས་ཁྱམས།།མདོ་ཁམས་འཛིན་མའི་ཐོད་ཀོར་ལ།།རི་མོར་བྲིས་པའི་མཛའ་བསྡེབས་པ།།གསེར་ལྗོངས་བླ་རུང་ཆོས་སྡེ་རྨད།།
ས་ལ་གནས་ཀྱང་ཡོན་ཏན་གྱིས།།མཁའ་སྤྱོད་ཞིང་དུ་བརྟག་བྱ་བ།།འཁོར་ལོ་གསུམ་གྱི་ཡོ་ལང་གིས།།འཛིན་མ་ཏིལ་གྱི་གང་བུར་བསྒྲུབས།།
བཤད་སྒྲུབ་རླབས་ཀྱི་ཕྲེང་ལྡན་པའི།།སྡོམ་བརྩོན་ལི་ཁྲིའི་ཆུ་གཏེར་ནི།།དུས་ཀྱི་མཐའ་ན་ལུད་པ་ཡིས།།ཡིད་སྲུབས་སྙིང་ལ་འདར་བ་སྦྱིན།།
སྣ༵་ཚོག༵ས་ཁམས་དབང་མོས་པ་བཞིན།།སྣ༵་ཚོག༵ས་གྲུབ་མཐའི་སྲོལ་འཛིན་པའི།།སྣ༵་ཚོག༵ས་ཆོས་མིག་གཡོ་བ་དག།སྣ༵་ཚོག༵ས་གཙུག་ལག་ཀློང་ལ་འབྱམས།།
ཉག་གཅི༵ག་ནང་རྒྱུད་ཐེམ་སྐས་ལས།།རིམ་གཉི༵ས་ཕོ་བྲང་ལ་འཛེགས་ཏེ།།སྐུ་གསུ༵མ་ནོར་བུའི་ཁྲི་འཕང་ཆེ།།སྣང་བཞི༵འི་རྐང་རྩེས་ཟིན་པ་མང་།།
འཇི༵གས་མེ༵ད་ཆོས་ཀྱི་ཡང་རྫོང་དེར།།ཕུ༵ན་ཚོག༵ས་ཟུང་འཇུག་གྲུབ་པའི་དབང་།།རྣམ་གྲོལ་དགོས་འདོད་འབྱུང༵་བའི་གན༵ས།།རིག་འཛིན་དཔག་བསམ་སྙེ་མ་ལྡེམ།།
དེ་ཡི་སྲས་ཀྱི་མེ་ཏོག་ར།།རབ་རྒྱས་ཀུན་དགའི་ཚལ་ཡངས་པོར།།ཉམས་རྟོགས་དྲི་ལྡན་པདྨ་དཀར།།འཛུམ་རིས་གཡོ་བའི་གྲངས་མ་རིག།
ཁྱབ་བདག་རིགས་བརྒྱའི་བྱེད་པོ་མཆོག།།སྒྱུ་འཕྲུལ་དྲ་བར་རྩེན་པ་ཡིས།།བུ་སློབ་ས་ཡི་རྒྱུ་སྐར་ཚོགས།།ཐུབ་པའི་སྲས་ཀྱི་ཁེངས་པ་འཛིན།།
གངས་ཅན་མཁས་མང་རལ་བའི་མེ་ཏོག་གིས།།ཞབས་སེན་མཆོད་པ་འཇིགས་མེད་སྨྲ་བའི་དབང་།།ཕུན་ཚོགས་བདུད་རྩི་འཇོ་བའི་འབྱུང་གནས་གང་།།ཡུལ་དབུས་ལྷ་ཡི་ལམ་ལ་དར་གཅིག་བྱོན།།
ཀུན༵་འཕགས་ཐུགས་བསྐྱེད་མཚུངས་པ་མེད་པའི་སྡེ།།ཀུན༵་ཁྱབ་རིགས་དྲུག་འགྲོ་བའི་འདྲེན་པ་ཆེས།།ཀུན༵་མཁྱེན་ཆོས་ཀྱི་རྒྱལ་པོར་དབང་བསྐུར་བ།།ཀུན༵་རིག་གྲུབ་བརྒྱའི་གཙུག་རྒྱན་མཆོག་དེ་དྲན།།
འཇིགས་མེད་གསང་གསུམ་ཟླ་བའི་ཟ་མ་ཏོག།ཕུན་ཚོགས་ག་བུར་འཛུམ་པའི་དྲ་བ་ལ།།བསྙེན་པས་ལུང༵་རྟོག༵ས་ནོར་བུའི་འབྱུང་གནས་སུ།།བསྟ༵ན་འཛི༵ན་རྒྱ༵་མཚོ༵་སྲིད་པའི་མཐའ་རུ་ལུད།།
ཡབ་གཅིག་འཇམ་དཔལ་མི་ཡི་ཉིན་མོར་བྱེད།།འཕྲིན་ལས་ཀུན་ཏུ་བཟང་པ་ནམ་མཁའི་མཐར།།རྩེན་པའི་ལུགས་གཉིས་ཤིང་རྟའི་ཁ་ལོ་བ།།ཆོས་ཀྱི་དགུང་བློན་ཆེན་པོ་ཁྱོད་དུ་ངེས།།
སྐྱབས་གཅི༵ག་རིགས་བདག་འཁོར་ལོའི་མགོན་པོར་ལན་གཅི༵ག་མིན་པར་གཙུག་གིས་གཏུགས་ཤིང་རྩེ་གཅི༵ག་བསམ་སྦྱོར་དག་པས་བསྟེན།།ལུགས་གཉི༵ས་གདམས་པའི་བདུད་རྩི་ལ་འཐུངས་བདེན་གཉི༵ས་ཤེས་བྱའི་དེ་ཉིད་གཟིགས་ཤིང་རིམ་གཉི༵ས་བགྲོད་པ་མཐའ་རུ་ཕྱིན།།དུས་གསུམ༵་སྙིང་རྗེའི་གཞན་དབང་གྱུར་བས་སྒོ་གསུམ༵་གཞན་ཕན་ལས་ལ་གཞོལ་ཞིང་ཆོལ་གསུམ༵་བདེ་སྡུག་ཐུགས་ལ་བརྣགས།།སྦྱོར་བཞི༵འི་ཉམས་ལེན་སྙིང་བོར་མཛད་པས་བདུད་བཞི༵འི་ཉོན་མོངས་གཡུལ་ལས་རྣམ་རྒྱལ་ཆོས་བཞི༵་དབང་འབྱོར་གང་ལ་འདུད།།
མཁས་མང་ལམ་སྲོལ་གངས་རི་ལས་འོངས་མདོ་སྔགས་ཆོས་ཚུལ་ཟླ་བའི་མ་མ་མཁྱེན་དཔྱོད་རྩལ་གྱིས་དབང་བསྒྱུར་ཞིང་།།བརྩེ་ཆེན་ནོར་བུ་པདྨའི་འཇོ་སྒེག་མང་ཐོས་གཙུག་གི་གདེངས་ཀར་རབ་བཅིངས་ཐར་འདོད་བློ་ཡི་དབུལ་བ་སེལ།།ལུང་དང་རིགས་པའི་གྲུ་ཆར་གྱིས་བརླན་སྔོན་མེད་ལེགས་བཤད་སྤྲིན་སྔོན་དྲ་བ་སྙིགས་མའི་མཁའ་ལ་བྲེས་དང་ལྷན།།རྒྱན་གསུམ་གློག་གི་རྩེ་དགའ་དང་འགྲོགས་ངག་རིག་དབྱར་རྔའི་རོལ་མོ་དཀྲོལ་མཁས་དུས་ཀྱི་ཀླུ་དབང་གཉིས་པར་འཁུམས།།
དཔལ་ལྡན་སྔ་འགྱུར་འོད་གསལ་རྡོ་རྗེ་ཐེག།མཐའ་ཡས་དཔག་པར་དཀའ་བའི་རོལ་མཚོ་ཆེ།།ཐོས་བསམ་ཧུབ་ཀྱིས་ཁོང་དུ་གཞིབས་པ་ཡིས།།དྲང་སྲོང་བུམ་སྐྱེས་སྙེམས་པ་ཕྲོགས་ཀྱིས་དོགས།།
ཆེར་སྙིགས་ལྔ་བདོའི་སྨག་ཆེན་གཡོ་བའི་དུས།།འདིར་ཡང་རྒྱལ་བསྟན་སྤྱི་དང་ཁྱད་པར་དུ།།སྔ་འགྱུར་རིང་ལུགས་པད་མ་དཀར་པོའི་མཚོ།།ཐུགས་བསྐྱེད་འཕྲུལ་གྱིས་སྐྱོང་མཁས་ཁྱོད་ཉིད་ཙམ།།
ཡང་སྒོས་གསེར་ལྗོངས་བླ་རུང་དགའ་ཚལ་ལ།།བརྒྱུད་གསུམ་མན་ངག་ཟད་པ་མེད་པའི་ཆར།།འཇོ་བའི་དཔལ་སྟུག་ཆོས་སྤྲིན་གཅིག་པུ་བ།།ཡབ་རྗེ་རྣམ་པར་རྒྱལ་བའི་གདུང་འཚོབ་ཉིད།།
གྲངས་མེད་སྐྱེ་བར་གོམས་པའི་ས་བོན་ཚོགས།།རབ་སྨིན་གནས་ལྔར་སྦྱངས་སྟོབས་ཡོངས་འདུའི་ལྗོན།།ཆེས་ཆེར་རྒྱས་པས་ཉི་ཟླའི་ར་བ་ཡིས།།རང་གི་ཆུ་ཞེང་དག་ལ་སོམ་ཉི་འཛིན།།
རང་བཞིན་རྐྱེན་དང་རྣམ་འགྱུར་རླབས་ཕྲེང་ཅན།།གནས་བརྒྱད་བརྡ་སྤྲོད་ལམ་གསུམ་འབབ་པའི་ཆབ།།རྣམ་དཔྱོད་རལ་བར་བསྐྱིལ་བས་ཛ་ཧཱུ་ན།།རི་རབ་ཁོངས་གསེང་ཉུལ་བའི་ཟོལ་ལ་བརྟེན།།
བརྗོད་དོན་སྡེ་བཞིའི་སྲོག་འཆང་རི་དྭགས་མིག།བཅད་ལྷུག་སྤེལ་མའི་ལང་ཚོ་ཆེས་གསལ་བར།།ཚིག་རྒྱན་ནོར་བུའི་རྒྱན་གྱིས་སྤུད་པའི་ཟིལ།།མ་བཟོད་ཐིག་ལེ་མཆོག་མ་གླིང་གཞན་བྲོས།།
ལོག་རྟོག་གཡའ་བྲལ་མཁྱེན་པའི་མེ་ལོང་ནང་།།རྒྱལ་རབས་ཆོས་འབྱུང་ལོ་རྒྱུས་རི་མོ་ཀུན།།དྭངས་པའི་མཚོ་ལ་ཟླ་གཟུགས་བཞིན་བཟུང་བས།།གཞོན་ནུ་དཔལ་བ་སླར་ཡང་བྱོན་ནམ་སྙམ།།
ངེས་དོན་ལམ་གྱི་མཐར་ཐུག་རྫོགས་པ་ཆེ༵།།ཆེ༵་བ་དྲུག་ལྡན་འོད་གསལ་སྙིང་བོའི་བསྟ༵ན།།བསྟ༵ན་འཛིན་བྱེ་བ་བགྲོད་པའི་འཇུག་ངོགས་མཆོ༵ག།མཆོ༵ག་ཐུན་དངོས་གྲུབ་འབྱུང་བའི་སྒོ་གཅིག་པུ།།
སྒྲིབ་གཉིས་མུན་པ་ཀུན་འཇོམས་སྣང་བཞིའི་ལམ།།ཚེ་གཅིག་རྒྱལ་བའི་སར་འགོད་རྡོ་རྗེའི་ཐེག།མྱུར་ལམ་ཟབ་མོ་ནམ་མཁའི་རྣལ་འབྱོར་མཆོག།ཉམས་བཞེས་ཚད་དུ་འཁྱོལ་བར་སྙིང་ནས་གུས།།
ཉམས་འགྱུར་རླབས་ཀྱི་འཁོར་ལོར་དབང་འབྱོར་ཞིང་།།ཤར་ལྷོའི་སྒྲ་དོན་རྐང་གདུབ་འཁྲོལ་བ་ཡི།།སྙན་འཇེབས་ངག་རིག་མཁའ་འགྲོ་དཀར་པོའི་གླུ།།འདོད་དགུར་ལེན་པས་སྒྲ་དབྱངས་སྲས་པོར་བསྔགས།།
སྤྲོས་བྲལ་དེ་བཞིན་ཉིད་དང་རོ་གཅིག་པའི།།ལྷན་སྐྱེས་ཡེ་ཤེས་མཆོག་གི་རྡོ་རྗེ་ཡིས།།ཀུན་རྟོག་དབུ་མའི་ལམ་དུ་བཅོམ་དང་ལྷན།།ཁ་སྦྱོར་བདུན་ལྡན་རྒྱལ་ཐབས་ཟིན་པར་ངེས།།
མང་དུ་ཐོས་པའི་ཕ་མཐར་སོན་ཀྱང་ལེགས་བཤད་རིན་ཆེན་འཚོལ་ལ་བྲེལ།།གྲུབ་པ་མཆོག་གི་གོ་འཕང་བརྙེས་ཀྱང་ད་དུང་སྒྲུབ་ལ་བརྩོན་ཞེས་ཐོས།།མཆོག་གི་ངོ་མཚར་མཛད་པའི་ཟེར་བརྒྱས་བདག་བློའི་པད་མཚོ་གཡོས་གྱུར་པས།།མ་འདྲིས་རྒྱང་གི་མཛའ་བཤེས་གང་ལ་མོས་གུས་རླབས་ཀྱི་མེ་ཏོག་བརྩེགས།།
རིང་ནས་གཞན་ཕན་བརླན་དང་མ་བྲལ་བའི།།བྱང་ཆུབ་སྤྱོད་མཆོག་ཛམྦུའི་སྙེ་མ་ནི།།ལྷོ་གླིང་མ་དྲོས་འཇིངས་སུ་རྩེན་པའི་མོད།།ཕན་བདེའི་འཕྲིན་ལས་རླབས་ཕྲེང་འཕྱུར་ཞེས་ཐོས།།
མཐའ་མེད་སྲི༵ད་པ༵འི་གྲོ༵ང་ཁྱེ༵ར་ན༵ས་རྙེ༵ད་པ༵འི།།གཞ༵ས་ཆུང༵༵་སྒྱུ༵་མ༵འི་གླིང༵་བུ༵ས་འདི་སྣང་གི།།སྨིག་རྒྱུའི་ཆུ་ཀླུང་སྙེག་པའི་རི་སྐྱེས་ཁྱུར།།ཡང་དག་ཐར་ལམ་བགྲོད་པའི་གསང་བརྡ་སྦྲོན།།
ཟ༵བ་ཟ༵བ་མདོ་སྔགས་གནད་ལས་དྲངས་པ་དང་།།སྙ༵ན་སྙ༵ན་རིག་བྱེད་ཚིག་གི་མཆོད་ཡོན་སོགས།།མ༵ང་མ༵ང་བརྗོད་བྱའི་རིན་ཆེན་སྤུངས་པ་ཡི།།མཆོ༵ག་མཆོ༵ག་གསུང་རྩོམ་ནོར་བུའི་ཟ་མ་ཏོག།།
ལེག༵ས་ལེག༵ས་ཚེ་རིང་རྣམ་དྲུག་བདག་ཉིད་ཅན།།ལྷག༵་ལྷག༵་ཚིག་དོན་གཟི་འོད་འབར་བའི་ཕྲེང་།།ཡ༵ང་ཡ༵ང་མཇལ་བས་ཉམ་ཆུང་རྨོངས་པའི་བུར།།མཚ༵ར་མཚ༵ར་བློ་སྐྱེད་སྦྱིན་པ་ཐེངས་གཅིག་མིན།།
བདེ་གཤེགས་ཞབས་སྐྱེས་གསེར་གྱི་ཁུ་བའི་རྡུལ།།གང་དུ་ལྷུང་བས་ལེགས་ཚོགས་སྦྲང་རྩིའི་མཚོ།།རབ་རྒྱས་བྷང༵་ག༵་ལ༵་ཡི༵་པདྨའི་ནགས།།ཉུལ་བའི་ལ༵མ་ཡི༵ག་ཀུན་དགའི་གསོས་སུ་སྤེལ།།
བཀྲ༵་ཤིས༵་བརྒྱད་པའི་རྣམ༵་བཤ༵ད་རི༵ན་པོ༵་ཆེ༵འི།།ཟ༵་མ༵་ཏོ༵ག་དང་གནས་ཆེན་སི༵ང་ག༵་ལ༵ར།།བསྐྱོད་པའི་ཟི༵ན་ཐོ༵་འཕྲུལ༵་གྱི༵་མེ༵་ལོ༵ང་སོགས།།གཅིག་ལས་གཅིག་ལྷག་རིན་ཐང་གཞལ་ཡོད་མིན།།
ཁྱད་པར་ཏུང༵་ཧོང༵་ཆོ༵ས་གཞུ༵ང་གཅེ༵ས་བཏུ༵ས་ཀྱི།།ངོ་མཚར་གླེགས་བམ་ཆུ་ཀླུང་རྣམ་པ་བཞི།།གོ་སླའི་བརྡ་ཡི་ཞིང་སར་ལེགས་དྲངས་པས།།ཕན་བདེའི་མྱུ་གུ་བསྐྲུན་པའི་མཐའ་མི་དཔོག།
གཟུགས་འཛིན་མཐུ་ནུས་རབ་ཉམས་ནད་པའི་ཁྱུར།།ཆུ་བུར་མིག་འབྲས་སྦྱིན་པ་མཚར་ཆེ་སྟེ།།བླང་དོར་རྣམ་གཞག་རྨོངས་པའི་གྲངས་མེད་འགྲོར།།བསླབ་སྟོན་འདྲེན་བྱེད་སྦྱིན་པ་དེ་བས་སྟོབས།།
ནོར་སྐྱོང་གློ་བ་མེད་པའི་ཁྲེལ་མེད་འགས།།སྲང་མདོར་གཡུགས་པའི་དྭ་ཕྲུག་བགྲང་ཡས་པར།།ཚེ་སྲོག་གཉིས་པའི་སྐྱབས་སྦྱིན་མཛད་པ་ཡི།།བྱང་ཆེན་སྤྱོད་ལ་མཐོ་རིས་ལྷ་ཡང་མཉེས།།
རིགས་བདག་བླ་མའི་དགོངས་བཅུད་རྒྱ་མཚོའི་མར།།བསམ་སྒོམ་རལ་བའི་གདེངས་ཀར་ལེགས་མཆོད་ནས།།གཏན་བདེའི་བདུད་རྩི་འཇོ་མཁས་གང་ཉིད་ལ།།ཕ་རྗེས་བུ་ཡིས་ཟིན་པའི་གཏམ་འདི་མཛའ།།
པད་འབྱུང་གཉིས་པ་རིགས་བརྒྱའི་ཁྱབ་བདག་གི།།རྣམ་ཐར་ཉེས་པའི་དྲི་བྲལ་བདུད་རྩིའི་ཀླུང་།།དགེ་ལེགས་རླབས་ཀྱི་རེ་ཁཱ་སྟོང་གཡོ་བ།།རབ་སྙན་ཚིག་གི་ཡུར་བར་དྲངས་པ་རྨད།།
ལྔ་རིག་དོན་བཟང་འདབ་མ་སྟོང་ཕྲག་ཏུ།།བརྩེགས་པ་བློ་ལྡན་བུང་བའི་ཉེར་འཚོའི་གཞི།།ཚིག་སྦྱོར་སྦྲང་རྩིའི་ཟེ་བས་དུད་པ་ཅན།།ངག་རིག་ཨུཏྤལ་རྣ་ལོང་འགྲོ་ལ་བྱིན།
གཞོན་ནུ་ཉིད་ནས་དབྱངས་ལྡན་རིག་པའི་ཆབ།།འགྲེམ་པའི་ལེགས་མཛད་དར་བ་འདི་མཐོང་ནས།།རིག་བྱེད་མེས་པོ་སྐྱེངས་པའི་རྔུལ་ཆུ་ནི།།ས་ལ་ཟླ་ཀླུང་སྔོན་མོའི་ཟོལ་གྱིས་རྒྱུ།།
འཕགས་ནོར་འཛད་པ་མེད་པའི་ནམ་མཁའི་མཛོད།།ལྷན་སྐྱེས་ཉིད་ནས་བདག་གིར་བཟུང་བ་ཡི།།གྲགས་དཀར་མྱ་ངན་མེད་པའི་མེ་ཏོག་ཕོན།།ལྷར་བཅས་སྐྱེ་དགུའི་རྒྱན་དུ་རིང་ནས་འཕུར།།
ཀྱེ་མ་ཐུབ་བསྟན་སྣང་བའི་གཏེར།།ནུབ་རིའི་མཁའ་ལ་འོད་དམར་འཛིན།།འགྲོ་བའི་བདེ་སྐྱིད་པདྨོའི་ནགས།།ལོག་སྨོན་ཟླ་བའི་ཟེར་གྱིས་ཟུམ།།
བསྟན་འཛིན་རྒྱུ་སྐར་སྒྲོན་མའི་ཚོགས།།མྱང་འདས་ཆུ་སྤྲིན་ཕང་བར་གཟིམས།།མཁས་རློམ་འབྱུང་བོའི་གཉིས་སྐྱེས་ཁྱུས།།ལོག་བཤད་ཐན་སྐད་སྒྲོག་པར་རྩོམ།།
ལས་འབྲས་ཚད་མའི་མེ་ལོང་ཡང་།།རྐང་པས་རབ་རྫི་མི་བསྲུན་དཔུང་།།ས་སྟེང་ཁེབས་པའི་སྐྱོ་གར་གྱིས།།སྙིང་བོའི་རང་མཚང་རྦད་དེ་སྟོན།།
ཆོས་དང་ཕྱི་མའི་གནས་ལུགས་དག།བོར་ནས་ནོར་ཕྱིར་རྒྱུགས་པའི་ཚོགས།།ནམ་ཞིག་ཕ་མའི་དོན་སྣོད་ཀྱང་།།ཚོང་དུ་བྱེད་ལ་སུ་ཞིག་ཚོམ།།
གདོང་དམར་བ་ཡི་གཤིས་བཟང་ཡང་།།དབྱར་རྩྭ་དགུན་འབུར་བསྡེབས་ནས་འགྱུར།།དངུལ་ལོར་མཛེས་མའི་བསླུ་བྲིད་འོག།རང་ཚུགས་སྐ་རགས་ལྷོད་པ་མང་།།
གངས་ཀྱི་བདག་པོར་རློམ་པ་དག།ནེ་ཙོའི་རོ་འཛིན་རྒྱན་དུ་བསྲེལ།།གཟིག་ལྤགས་གྱོན་པའི་མགྲིན་བཟང་བུ།།དཀོར་ཟས་སྙེ་མའི་བཅུད་ཀྱིས་སྙེམས།།
སྐྱེས་སྤྲུལ་ནོར་གྱི་ཕྱགས་མ་ཕལ།།གྲོང་ཁྱེར་འདུ་འཛིའི་ཀློང་ན་ངལ།།ངུར་ཚོས་ཅན་ཡང་ཚངས་སྤྱོད་ལ།།སྡང་བ་བཞིན་དུ་ཁྱིམ་ན་རྒྱུ།།
ཆོས་དཀར་བསྟན་པ་སྣུབ་པའི་གཤེད།།ཆོས་དཔོན་མཁན་པོར་བརྫུས་པའི་རིགས།།ཆོས་འཚོང་ལོག་འཚོའི་འདམ་རྫབ་ཏུ།།ཆོས་མིན་སྨྱོན་པའི་གར་གྱིས་བྲེལ།།
སློབ་གསོའི་སྟེགས་བུར་འགྱིང་རྣམས་ཀྱང་།།རང་དོན་ཁུག་མའི་ལས་ལ་རེམས།།གཞུང་ཞབས་ལས་སྣ་འཛིན་པ་དག།ཤོ་དང་ཆང་གི་རྒྱ་མཚོར་རོལ།།
ཕ་སྐད་མ་ཡིག་ཉམས་པ་ལ།།སྡོང་ལོ་བྲུལ་བའི་རྩིས་མི་འཇོག།ཁང་བརྩེགས་རླངས་འཁོར་རྫིག་པོ་ཡི།།འགྲན་རྩོད་དུག་གི་ན་བུན་ལྡང་།།
བསྟན་འཛིན་ཆེན་པོར་རློམ་པ་ཡི།།མིག་སེར་སྦལ་བ་རྨ་ཅན་འགས།།ཕྱོགས་འཛིན་དུག་ཁུས་བསྟན་པའི་རྫིང་།།ཀུན་ནས་བསླད་པས་ཤེས་པ་འཕྱོ།།
ཡུལ་ལུང་ཤོག་ཁའི་འཐེན་འཁྱེར་གྱི།།འཚུབ་མ་རྡུལ་གྱི་ཁ་ལོ་བས།།ཆོལ་གསུམ་མཐུན་ལམ་འོ་མའི་མཚོ།།དཀྲུགས་ཤིང་སྦགས་པའི་ཚུལ་འདིས་སྐྱོ།།
རིགས་ཞེན་ལྷག་བསམ་ལྡན་པར་ཁས་འཆེས་གཡོ་ཅན་དྲ་དཔོན་ཕོ་མོ་མ་ལུས་ཉོ་ཚོང་སྒྱུ་མའི་སེང་རས་ཕག་ནས་གཞན་མགོ་གདུགས་ལྟར་སྐོར་བར་གོམས།།གཞན་ལུགས་ཁྲོན་པའི་ཟླ་གཟུགས་སྙེག་པའི་གདོང་དམར་གཞོན་སྐྱེས་སྤྲེའུའི་དཔུང་ཚོགས་ཁ་པར་མཛའ་མོར་གཏན་དུ་འཐམས་ནས་སྐད་དང་ཡི་གེའི་བླ་སྲོག་བོར།།ལས་བྱེད་མཚན་སྙན་འཆང་བ་ཕལ་ཆེར་དམངས་དོན་ཁ་གཡང་འབྲུག་ལྟར་སྒྲོག་བཞིན་མགོ་བདེ་སྤྲེལ་ལད་རྒྱུན་མར་འཁྲབ་ནས་དབང་གི་རྐུབ་སྟེགས་སྲུང་བར་བརྩོན།།ཀྱེ་མ་ཆེས་ཆེར་སྙིགས་མའི་རང་རྟགས་ནང་སྙིང་རུལ་བའི་ཚུལ་འདི་མཐོང་བས་གངས་ལྗོངས་ཆོས་རིག་གསེར་གྱི་རྨུ་ཐག་ཆད་པར་ངེས་སྙམ་ཡིད་རབ་སྐྱོ།།
རྡོ་རྗེའི་ཚེར་མ་རྣོན་པོའི་རྒྱ།།སྙིང་ལ་བཏབ་པའི་ན་ཟུག་ལས།།ཕ་ནོར་མཆོད་སྡོང་སྙིགས་མའི་མཚོར།།ཉིན་བཞིན་ནུབ་པའི་ཚུལ་འདི་ཐུ།།
རྡོག་སྣེའི་གངས་ལས་རྒྱང་རིང་གི།།འཆི་བདག་འཛུམ་ཟེར་མི་མཐོང་བའི།།རིགས་མཐུན་ནང་དམེའི་སྦྱོར་བ་ཡིས།།ཕུ་ནུའི་དཔུང་རྡང་སྟོར་བ་འཇིགས།།
གདོད་ནས་དཔྱིད་དང་ཐིག་ལེ་མི་ཕྱེད་པའི།།བདེ་ཆེན་རྡོ་རྗེའི་དབྱིངས་སུ་སྙོམས་ཞུགས་ཀྱང་།།འཕོ་འཇིག་བློ་ལས་འདས་པའི་སྒྱུ་མའི་སྐུ།།འཚོ་གཞེས་བརྟན་པའི་ཐབས་ཚུལ་སྙིང་བོར་དགོངས།།
གངས་ལྗོངས་རྒྱལ་བསྟན་སྤྱི་དང་ཁྱད་པར་དུ།།ངེས་གསང་དཔལ་ལྡན་སྔ་འགྱུར་རྙིང་མའི་ལུགས།།ཕྱོགས་མཐར་སྤེལ་བའི་རྩ་ལག་གཅིག་པུ་རུ།།རྡོ་རྗེའི་ཆོས་བདུན་ཕྱག་རྒྱར་འཚོ་གཞེས་གསོལ།།
སྒྲུབ་བརྒྱུད་བཀའ་བབས་ཆུ་བོ་རྣམ་བཞིའི་རྒྱུན།།གཅིག་ཏུ་འཁྱིལ་བའི་གསང་གསུམ་སིནྟུའི་བདག།འཛམ་གླིང་ཤར་ལྷོའི་ལྟོས་བཅས་ནཱ་གའི་ཚོགས།།ཉེར་འཚོའི་བདག་རྐྱེན་དམ་པར་རྟག་བརྟན་ཞུ།།
གཟུང་འཛིན་རྩ་ཡི་མདུད་པ་ཇི་སྙེད་རྡོ་རྗེ་ངྷི་ཏིར་བསྡམས་པའི་སྐུ༵།།ཟླ་ཉིའི་རྒྱུ་བ་སྒྲ་གཅན་གྱིས་ཟོས་བྱེད་རྩོལ་བརྗོད་པ་བྲལ་བའི་གསུ༵ང་།།ཤེས་དང་ཤེས་བྱ་རོ་གཅིག་ཉིད་གྱུར་འོད་གསལ་རྣམ་ཀུན་མཆོག་ལྡན་ཐུག༵ས།།མི་ཟད་རྒྱན་གྱི་འཁོར་ལོར་རོལ་བའི་སྒྱུ་འཕྲུལ་བསྐལ་བའི་མཐའ་རུ་སྲོངས།།
ཐབས་ཤེས་ཟུང་འཇུག་འཕྲུལ་ལ་གོམས་པའི་ཐུགས།།སྨོན་འཇུག་གློག་གི་རོལ་བ་དང་འགྲོགས་བཞིན།།གཞན་ཕན་བསྡུ་བཞིའི་གྲུ་ཆར་འབུམ་འཇོ་བས།།གླིང་གཞན་འགྲོ་ལའང་རྫོགས་ལྡན་དཔྱིད་དཔལ་བསྐྲུན།།
རྩོལ་མིན་ཉམས་འགྱུར་གླུ་དབྱངས་ཤུགས་འབྱུང་དུ།།མགྲིན་པའི་འཁོར་ལོར་རོལ་བ་དྲི་ཟའི་གདངས།།ཡི་གེའི་གཟུགས་སུ་སྤྲུལ་བའི་ངག་རིག་རྩོམ།།གཅིག་ལས་གཅིག་ལྷག་ཡིད་འགུགས་སྐྱེས་ཀྱི་མཆོག།
ཁ་བ་འཕུར་བ་བས་མཐའི་ཞིང་ཁམས་འདིར།།ཤཱཀྱའི་རིང་ལུགས་ཉི་མའི་འཁོར་ལོ་ཆེའི།།ཕན་བདེའི་དྲོད་ཀྱིས་འཚོ་བའི་ལུས་ཅན་རྣམས།།སིམ་པའི་ཚོར་བ་མྱོང་བའི་ཐབས་ལ་དགོངས།།
སྐྱེ་མང་གོམས་པའི་ས་བོན་གྲུང་བོའི་ཁམས།།རབ་སྨིན་གནས་ལྔར་སྦྱངས་སྟོབས་ཨ་མྲའི་ལྗོན།།ལེགས་བྱང་འབྲས་བུས་དུད་པའི་དཔྱོད་ལྡན་ཁྱོད།།རྒྱལ་བསྟན་དབུགས་རྔ་མཐུད་པའི་ལྷ་རྗེ་ཉིད།།
མཐའ་བྲལ་གྲུབ་མཐའི་ཆུ་བོ་སྣ་ཚོགས་པ།ཆོས་དབྱིངས་རྒྱ་མཚོའི་ཀློང་དུ་རོ་གཅིག་པའི།།གནས་ལུགས་དོན་གྱི་རང་ངོ་འཕྲོད་གྱུར་ཏེ།།རིས་མེད་རྣམ་ཐར་ཕྱག་བཞེས་ཡི་གར་འོང་།།
རིག་བྱེད་གླིང་བུ་བསྒྱུར་མཁས་མི་ཕམ་ཞབས།།རྔ་ཡབ་དཔལ་གྱི་རི་བོར་གཤེགས་པ་རྫུན།།བདེན་ན་མགོན་དེའི་རྩོམ་པའི་ཡོན་ཏན་ཆ།།རྫོགས་པའི་ཟླ་བ་རྨེ་ཁོག་འཛུམ་འདི་ཅི།།
ཁྱོད་ནི་མཚོ་བྱུང་འཛུམ་པའི་མེ་ཏོག་ཅེས།།གངས་རིའི་ལྗོངས་སུ་གྲགས་པ་བདེན་ནམ་ཅི།།ངག་རིག་མགྲིན་པའི་རོལ་མཚོ་རྒྱས་དྲགས་པས།།ལུས་ཅན་འདི་དག་དགེ་དབང་དཔའ་བོར་དོགས།།
གསལ་སྟོང་དག་པའི་རང་བཞིན་བདེ་ཆེན་དབྱིངས།།ལྷུན་གྲུབ་སྣང་བའི་འཆར་སྒོ་འཇའ་ཚོན་ལྟར།།འགགས་མེད་ཤར་བ་ཀུན་བཟང་གདོད་མའི་ཞལ།།མངོན་གྱུར་རྟོགས་རིགས་ཕལ་བའི་བློ་ལས་འགོངས།།
ཨ་ཧཾ་འབར་འཛག་དགའ་བཞི་བདེ་བའི་ཉམས།།འཁོར་འདས་དབྱེར་མེད་སྟོང་བའི་ངོ་བོ་རུ།།བརྗོད་བྲལ་རོ་གཅིག་གྱུར་བའི་འཕོ་མེད་སྐུ།།བཅུ་གསུམ་རྡོ་རྗེའི་ས་ལ་གོམ་པ་འགོད། །
རྣལ་འབྱོར་དབང་ཕྱུག་བཞེད་སྲོལ་མ་འདྲེས་པ།།རྒྱུ་དང་འབྲས་བུར་བཅས་པའི་ལམ་གྱི་མཆོག།སྣོད་ལྡན་སློབ་མར་བཤད་བྱ་བདུད་རྩིའི་ཆོས།།ཐོབ་པའི་རྣམ་སད་གཙོ་བོ་ཁྱོད་མིན་སུ།།
ངེས་གསང་ཐེག་པའི་ཡང་རྩེ་འདུས་པའི་ལམ།།དབེན་གསུམ་སྒྱུ་ལུས་འོད་གསལ་ཟུང་འཇུག་བར།།རྡོ་རྗེའི་སློབ་དཔོན་མཆོག་གིས་མཛུབ་ཚུགས་སུ།།ཁྲིད་པའི་བླ་མེད་བགོ་སྐལ་ཁྱོད་ཀྱིས་མྱངས།།
འགྲོ་བའི་མོས་ངོར་འཚམ་པའི་ཐེག་པའི་ཆོས།།མཐའ་མེད་བརྒྱད་ཁྲི་བཞི་སྟོང་གྲངས་ངེས་ཀྱང་།།སྙིང་བོའི་མཐར་ཐུག་ངེས་གསང་རྡོ་རྗེ་ཐེག།མྱུར་ལམ་ཟབ་མོའི་མཆོག་ཏུ་སུ་ཡིས་བསྙོན།།
གསང་ཆེན་ཆོས་ཀྱི་བཟའ་ཤིང་ར་བ་ན།།རིག་འཛིན་རྣམ་བཞིའི་ལམ་གྱི་འབྲས་བུའི་བཅུད།།རབ་སྨིན་འོད་གསལ་རྫོགས་པ་ཆེན་པོ་ཡི།།ས་ཧཱ་ཀ་རའི་ལྗོན་པ་བླ་ན་མེད།།
ངོ་མཚར་ཀ་དག་རིག་པའི་མཁའ་དབྱིངས་སུ།།ལྷུན་གྲུབ་ཞི་ཁྲོ་རབ་འབྱམས་ཆུ་འཛིན་དབུས།།རྣམ་བཞིའི་འཕྲིན་ལས་འཇའ་འོད་མདངས་བཀྲ་བ།།གང་ཤར་རིག་པའི་རྩལ་དུ་རྫོགས་པ་མཚར། །
རྣམ་པ་ཀུན་ལྡན་འོད་གསལ་རྡོ་རྗེའི་སྤྲིན།།སྐུ་གསུམ་དག་པ་གནམ་ལྕགས་འཁོར་ལོའི་མཛོད།།སྲིད་པའི་ནགས་ཀླུང་སྟུག་པོ་སྲེག་པའི་མཚོན།།སྙིགས་མའི་མཐོངས་སུ་ད་དུང་གཡོ་བས་སྤྲོ།།
སྐྱེ་དགུའི་མིག་ལ་བདུད་རྩི་སྨིན་པའི་ཞིང་།།རྣ་བར་ཆོས་ཀྱི་དབྱངས་སྙན་ལྡིར་བའི་རྔ།།ཡིད་ལ་བྱིན་རླབས་སྦྲང་ཆར་འབེབས་པའི་སྤྲིན།།ཁྱོད་ལས་གཉིས་པ་སྲིད་ཞིར་བཙལ་དུ་མེད།།
ལུས་ཅན་ཡོངས་ཀྱི་བདེ་སྡུག་བར་མའི་གྲུ།།བྱིང་འདེགས་ལས་ཀྱི་དལ་འགྲོའི་ཀླུང་ཆེན་ནང་།།མི་རྟག་རླབས་ཀྱིས་བསྐྱོད་པའི་ཆོས་ཉིད་གླུ།།བདག་འཛིན་གཉིད་ཆེན་དཀྲོགས་པའི་དཔྱིད་དུ་གྱེར།།
འཁོ༵ར་གཡོག་ལོངས་སྤྱོད་སྙིང་སྡུག་དགའ་མ་སོགས།།འཁོ༵ར་རྩ་སྡུག་བསྔལ་རྒྱུ་རུ་ངེས་རྙེད་ནས།།འཁོ༵ར་འདས་བར་གྱི་རྟོག་འགྱུའི་ཚོར་བའི་རླབས།།འཁོ༵ར་བའི་མཆི་མ་སློང་བའི་གཉེན་དུ་བརྩམས།།
ཁྱོད་མགྲིན་མ་དྲོས་མཚོ་ལས་ཉེར་འོངས་པའི།།སྙན་ཚིག་དབྱངས་ལྡན་ངག་གི་བདུད་རྩིའི་རླབས།།ཆ་ཤས་རེ་ཡང་འཕྱུར་བ་གྲགས་སྙན་གྱི།།མེ་ཏོག་ཕྱོགས་སུ་བསྟར་བའི་ཕོ་ཉར་གྱུར།།
དེང་དུས་རྒྱལ་བསྟན་ཡིད་བཞིན་འདོད་འཇོའི་སྤྲིན།།སྙིགས་མའི་ས་ཆེན་ཁྱོན་ལ་གནས་པ་ཡི།།ཐབས་ཚུལ་ཀླུ་དབང་གང་ལ་རག་ལས་པས།།ཐུགས་བསྐྱེད་འཇུག་པ་གཞར་ཡང་ལྷོད་མེད་མཛོད།།
གང་གི་ཉེར་ལེན་ཙན་དན་ནགས་མའི་ཀློང་།།མི་མཐུན་གྲང་རེག་དགྲ་ལས་རྣམ་རྒྱལ་ཞིང་།།སྔ་འགྱུར་བསྟན་པའི་དྲི་བསུང་རབ་སྤྲོ་བའི།།གྲགས་སྙན་ལྷོ་རླུང་ཕྱོགས་འདིར་རིང་ནས་ལྡང་།།
དེང་ཡང་གསང་གསུམ་མི་ཤིགས་གཡུང་དྲུང་མདུད།།ལྷུན་གྲུབ་བདུད་བཞིའི་སོར་མོས་མ་བཀྲོལ་བར།།ཐེག་གསུམ་ཆོས་ཀྱིས་འགྲོ་ཀུན་རྣམ་གྲོལ་ལ།།འགོད་པའི་གཏམ་སྙན་རོལ་མོ་རྣ་བར་སིམ།།
མང་ཐོས་བཅུ་དྲུག་ཆ་ཤས་ཡོངས་གང་ཞིང་།།བསམ་བྱུང་རི་དྭགས་མཚན་མས་ཉེར་མཛེས་པ།།སྒོམ་པའི་འོད་དཀར་སྤྲོ་བའི་ཟླ་བ་ཁྱོད།།མཇལ་འདོད་རེ་བའི་འོ་མཚོ་དྲག་ཏུ་འཕྱོ།།
རིང་མིན་ཁྱོད་ཞབས་ཨུ་དུམ་ཝ་རའི་ལྗོན།།འདྲེན་བྱེད་ར་ཡིག་གཉིས་པས་ལོངས་བྱས་ཏེ།།ལུགས་གཉིས་བསླབ་བྱ་ཟིལ་དངར་དམ་པའི་རོ།།ལོངས་སུ་སྤྱོད་པའི་སྐལ་བ་མི་དམན་ཞུ།།
སྒྲ་ཚད་གཞུང་གི་མདའ་གཞུ་བསྣམས་ཤིང་བཟོ་དང་གསོ་བའི་ཡ་ལད་འཛིན།།ནང་དོན་རིག་པའི་རྟ་མཆོག་ལ་བཅིབས་སྙན་ངག་སྲབ་ཀྱི་ཁ་ལོ་སྒྱུར།།པྲྀཏྟ་ཛཱ་ཏིའི་རལ་གྲི་འཆང་ཞིང་དཀར་ནག་རྩིས་ཀྱི་མདུང་མོ་ཡིས།།ལྐོག་གྱུར་རྨོངས་པའི་དགྲ་བོ་མཐར་མཛད་རིག་པའི་དཔའ་བོ་ཁྱེད་མིན་སུ།།
འབྲུ་ཞིང་རལ་ཁུར་ལྡེམ་པའི་དུས་ཀྱི་ཆར།།ཉིད་ཀྱི་གནང་སྐྱེས་རིན་བྲལ་བདོག་པའི་ཚོགས།།གངས་སྲས་ཟླ་འོད་མིང་ཅན་བྱ་མ་རྟས།།གཏམ་སྙན་དང་བཅས་བདག་མདུན་བསྐྱལ་ནས་སླེབས།།
བརྩེ་ཆེན་རླབས་ཀྱི་ཤིང་རྟའི་ཁ་ལོ་ནི།།ཕྱོགས་འདིར་བསྒྱུར་ལས་སྐྱེས་བཟང་ནོར་བུའི་ཚོམ།།བྱིན་རླབས་འོད་ཀྱི་ཚན་ཁ་མ་ཉམས་པ།།ཕྲན་ཆུང་སྙིམ་པར་སོན་པ་འདི་ལྟ་སྟེ།།
ལྷ་མིའི་སྟོན༵་པ་ཤཱཀྱ་སེང་གེ་མཆོ༷ག།མཆོ༷ག་ཟུང་འཁོར་དང་བཅས་པ༵འི་སྣང་བརྙན་མཆོ༷ག།མཆོ༷ག་ཏུ་བྱོན་ལེགས་ཚོག༵ས་ཞི༵ང་ཐ༵ང་ག༵་མཆོ༷ག།མཆོ༷ག་གསུམ་རྟེན་གྱི་དྭངས་མ་བདེ་བར་སོན།།
སྣང་སྲིད་ལྷ་འདྲེའི་སྙེམས་པའི་དོ་ཀེར་རྩེར།།ཞབས་སྐྱེས་རྡོ་རྗེ་གཟེགས་མའི་གར་རྩེན་པ།།གྲུབ་པའི་འཁོར་སྒྱུར་པ༵ད་མ༵་ས༵ཾ་བྷ༵་ཝ༵འི།།ངོ་མཚར་སྐུ༵༵་བརྙ༵ན་བྱིན་ཅན་དུ་མའང་འབྱོར།།
དོན་ལྡན་བརྗོད་བྱའི་འདབ་སྟོང་གྲོལ་བའི་ཕོན།།ངྷི༔ཡིག་དམར་སེར་ཞུན་མ་འཁྱིལ་བའི་ལྕེས།།སྣང་སྲིད་རྗོད་བྱེད་ཚིག་གི་ཉམས་འགྱུར་དུ།།སྤེལ་བའི་བཀ༵འ་རྩོམ༵་གསེར་གླེགས་བསྟར་མ་འཕྲོད།།
གདོང་དམར་རྩམ་གཟན་མི་ཡི་བཏུང་བའི་སྣོ༷ད།།སྣོ༷ད་ཀྱི་མཆོག་གྱུར་དར༵་ཚེ༵འི་གསོ༵ལ་ཕོ༵ར་རིག༷ས།།རིག༷ས་ཀྱི་ཡི་གེ་རི་མོས་མཚན་པ་གང༷་།།གང༷་དགར་རྙེད་མིན་དེའང་བསྩལ་བས་སྤྲོ།།
དབང་སྔོན་བྱེ་མར་དྲུད་པའི་མཐིང་ཤོག་ལ།།བཞད་གད་འཁྲུངས་པའི་ཡིད་བཞིན་ནོ༵ར་བུ༵འི་སྐྱེས།།སྲིད་ཞིའི་དགེ་ལེགས་འདོད་པ་འཇོ་བའི་དབྱིག།རྟེན་འབྲེལ་དར་གྱི་རྒྱ་འཕྱོར་དང་བཅས་རག།
བཀྲ༷་ཤིས༷་དགེ་ལེགས་སྦྱིན་པའི་རྫས་ཀྱི་ཕུལ།།བཀྲ༷་ཤིས༷་ཁ༵་ཆེ༵འི་གུར༵་ཀུམ༵་མེ་ཏོག་ཕོན།།བཀྲ༷་ཤིས༷་ཤེལ་དཀར་སྙིང་བོར་བསྒྲིལ་བའི་སྐྱེས།།བཀྲ༷་ཤིས༷་རི་མོས་མཚན་པ་དེ་ཡང་ཐོབ།།
དེ་ལྟར་གང་གི་ཐུགས་བརྩེ་ནམ་མཁའི་སྒོ།།ཡངས་པོར་གྲོལ་ལས་བདོག་དངོས་གཟའ་སྐར་ཚོམ།།ཕངས་མེད་བཀྱེས་པས་དགའ་དད་སྤྲོ་བའི་རོ།།ཁྱབ་འཇུག་གནས་ལ་ཆུ་རྒྱུན་བཞིན་དུ་འཕྱུར།།
ཨེ་མ་ཆོས་སྤྱན་དྲི་མས་དག་པའི་བཤེས།།གང་གིས་ཟླ་ལྟར་དཀར་བའི་ལྷག་བསམ་གདུགས།།བདག་ཉིད་ལ་ནི་དམིགས་ཀྱིས་བསྒྲེངས་པ་འདིས།།རྨི་ལམ་མིན་ནམ་སྙམ་པའི་སིམ་ཚོར་བརྟས།།
དགྱེས་བརྩེའི་གཟིགས་པ་རབ་ཡངས་པའི།།དྲིན་ལ་དྲིན་དུ་ཚོར་གྱུར་ཏེ།།ཉིན་དང་མཚན་གྱི་གནས་སྐབས་ཀུན།།ཁྱོད་མཚན་ངག་གི་བཟླས་བུར་བརྩོན།
འོན་ཏང་གདུལ་དཀའི་སེམས་ཀྱི་ཐིག་ལེ་ཅན།།སྒྱིད་ལུག་ལྕགས་ཀྱི་གོ་རར་ཚུད་པ་ཡིས།།འབྱོར་ལན་སྤོས་དཀར་རྔ་ཡབ་སྤྲུགས་པའི་གར།།དུས་ལྟར་བསྒྱུར་ལ་ལས་བཤོལ་ཐེབས་པས་ནོངས།།
ད་དུང་རང་དོན་གེ་སར་གྱི།།རལ་བ་གཡོ་ལྡན་པདྨ་དཀར།།ཚིག་གི་སྲད་བུར་བརྒྱུས་བྱས་ནས།།སླར་ཡང་འདོད་གསོལ་འདི་སྐད་ཞུ།།
འདི་ན་རིགས་མཐུན་ཁྲུས་ཀྱི་རྫིང་།།གཅིག་ལས་སྐྱེས་པའི་ཡིད་འོང་སྤུན།།གློ་བུར་འཆི་བདག་ཞགས་པ་ཡིས།།བཏབ་པས་མྱ་ངན་ཁུར་དུ་ལྕི།།
བྱས་བསགས་ལས་རླུང་དྲག་པོའི་འཕྲུལ་གྱིས་སྲིད་པ་ཉམ་ངའི་གཅོང་རོང་དུ། །དབང་མེད་དེད་པའི་རྣམ་ཤེས་འཇོལ་མོ་འཁྲུལ་སྣང་སྨུག་སྤྲིན་ལས་ཐར་ཏེ།།ཞི་བ་ཉམས་དགའི་ནགས་ཀྱི་ལོ་མར་བདེ་ཆེན་ངལ་གསོ་རེག་པ་ཡི།།གསོལ་སྨོན་སྐྱབས་འཇུག་དག་པའི་བ་དན་གཡོ་བ་མེད་པར་ཁྱོད་ལ་འཛུགས།།
གཞན་དུ་རྒས་འཁོགས་ནུབ་རིའི་མལ་སྟན་རྩེར།།ཞབས་སེན་འདར་བའི་ཡབ་ཡུམ་ཉི་ཟླ་ཟུང་།།ཐུགས་དམ་མཁའ་དབྱིངས་རྡོ་རྗེའི་ར་བ་ལས།།འདོར་མེད་རྗེས་སུ་འཛིན་པའི་སྐྱབས་འཇུག་ཞུ།།
ཁྱད་པར་འདི་སྣང་དུག་སྦྲུལ་མཆེ་བར་ན།།བག་མེད་གྱི་ནར་འཚོ་བའི་ཕྱེ་ལེབ་བདག།ངེས་ལེགས་ཐར་བ་དམ་པའི་ཚལ་ཡངས་སུ།།བདེ་བླག་བཀྲི་བའི་ཐབས་མཁས་ལྷུར་ལེན་འཚལ།།
དུས་མཐར་སྣ་ཚོགས་རིག་པ་སློབ༵་པའི་གྲྭ༵ར།།གངས་ལྡན་རིགས་ཀྱི་མྱུ་གུ་སྐྱོང་བ་ཡི།།དགེ་མིང་གསོབ་གཟུགས་འཆང་བའི་ཀློག་པ་མཁན།།དོན་ལྡན་བྱ་བའི་སྣེ་མོར་གཟུད་པར་རེ།།
སྣ་ཚོགས་ནད་ཀྱི་ལྕེ་གཉིས་པས།།ཡོངས་འཁྲིལ་དམན་ལུས་ཆུ་ཤིང་ལྗོན།།ལྔ་པའི་སོག་ལེས་མ་བསྒྱེལ་བར།།ཕྱོགས་དེར་སྨོན་པའི་ཡལ་འདབ་གཡོ།།
མཁྱེན་རབ་ཚངས་པའི་མཚོ་ཆེན་ལས་བལྟམས་དབྱངས་ཀྱི་ཡན་ལག་ཀུན་རྫོགས་པ།།རྒྱན་གསུམ་ཉམས་ཀྱི་སོར་གདུབ་དང་བཅས་སྙན་ཚིག་རྒྱུད་མངས་གླུར་ལེན་པའི།།དོན་བཟང་ནོར་བུའི་ཟུར་ཕུད་རབ་གཡོ་བཀའ་མཆིད་སཱ་ལའི་ཕོ་ཉ་མོ།།འདི་ན་ཁེར་རྐྱང་གདུངས་པའི་བུ་ལ་ངག་གི་བག་མར་སྦྲོན་པར་རིགས།།
སླད་མར་ལུ༵ང་རྟོག༵ས་བསྟ༵ན་པའི་གདུག༷ས་དཀ༷ར་ཆེ།།ཕན་བདེའི་གྲིབ་བསིལ་སྣུམ་པོའི་ཁོར་ཡུག་ཅན།།ཐུགས་བསྐྱེད་དཔུང་བས་འཛི༵ན་པའི་ཆོ་ག་མཁན།།གསང་གསུམ་བསྐལ་བ་རྒྱ༵་མཚོ༵ར་ཞབས་བརྟན་གསོལ།།
སྐྱེས་བཟང་བློ་གྲོས་གཤོག་པའི་འཕྲུལ་འཁོར་གྱིས།།ལྔ་རིག་ཤེས་བྱའི་ཆུ་གཏེར་ཡངས་པའི་འཇིངས།།ཐོགས་རྡུགས་མེད་པར་གཞལ་བའི་གསེ༷ར་གྱི་ཉ༷།།དོན་གཉིས་འཁྱུག་འགྲོས་ལྷོད་པ་མེད་པ་མེད་པར་མཛོད།།
རིགས་བརྒྱའི་གསང་བ་མེ་ཏོག་བཀྲ་བའི་བཅུད།།གུར་ཀུམ་བུམ༵་པ༵འི་སྙིང་བོར་ཡོངས་འཐུང་བ།།དགེ་ལེགས་སྦྲང་རྩི་ཟད་པ་མེད་པའི་མཛོད།།ཐར་འདོད་བུང་བའི་གསོས་སུ་རྟག་བཞུགས་གསོལ།།
རང་དོན་ཡིད་བྱེད་དྲི་མས་མ་གོས་པའི།།སྨོན་འཇུག་བྱང་ཆུབ་སེམས་ཀྱི་བསུང་ཞིམ་ངད།།ཅི་དགར་ལྡང་བའི་ཐུགས་དམ་པ༵ད་མ༵་དཀར།།སྙིགས་མའི་ས་ཆེན་རྒྱན་དུ་ཉམས་མེད་ཞུ།།
གསང་རྒྱུད་ཡིད་བཞིན་མཚོ་ལས་འོངས་པའི་སྐྱེས།།མ་རིག་རྨོངས་པའི་གཉིད་སྟུག་དཀྲོགས་པའི་གཉེན།།སྨིན་གྲོལ་དབྱངས་སྙན་སྒྲོག་པའི་གཡས་འཁྱིལ་དུང༵་།།འགགས་མེད་རྡོ་རྗེའི་གདངས་སུ་རྒྱུན་འཚེར་གསོལ།།
གཟུང་འཛིན་སྤྲོས་པ་བྲལ་བའི་ཡེ་ཤེས་རྡུལ།།སྙིང་རྗེའི་ཆབ་ཀྱིས་བརླན་པའི་སྒྱུ་འཕྲུལ་གར།།ཟུང་འཇུག་ཐུགས་ལ་སིམ་པའི་དཔ༵ལ་བེ༵འི་རིས།།མི་ཤིགས་གཡུང་དྲུང་ངོ་བོར་རྟག་བརྟན་ཞུ།།
གཞན་ཕན་ཡིད་བཞིན་ནོར་བུའི་ཏོག་འབར་ཞིང་།།ཕྱིན་དྲུག་རི་མོ་བསྡུ་བཞིའི་ཤམ་བུ་ཅན།།སྙིང་སྟོབས་ཕྱོགས་ལས་རྒྱལ་བའི་རྒྱལ༵་མཚ༵ན་ཆེ།།དུས་ཀྱི་མཐར་ཡང་བསྙལ་བ་མེད་གྱུར་ཅིག།
རྟེན་འབྱུང་ལྟ་བའི་མུ་ཁྱུད་ཟླུམ་པོར་བཅིངས།།ཐབས་མཁས་ཐུགས་རྗེའི་རྩིབས་མ་སྟོང་གིས་སྦྲེལ།།དོན་གཉིས་འཕྲིན་ལས་གསེར་གྱི་འཁོ༵ར་ལོ༵འི་འགྲོས།།ཡངས་པའི་ས་ཆེན་བདག་གིར་བཟུང་གྱུར་ཅིག།།
མདོར་ན་དགུ་ཚིགས་འཕྲུལ་གྱི་རྩིབས་མ་རྒྱུ་སྐར་གནས་སུ་མཛེས་པ་དེ་སྲིད་འགྲོ་རྣམས་སྒྲོལ་བའི་ཐུགས་བསྐྱེད་ལྷུན་པོ་ཆ་ཙམ་གཡོ་བ་མི་མངའ་ཞིང་།།སྐྱེ་རྒ་ན་འཆིའི་རྦ་ཀློང་རབ་འཁྲིགས་འཇིགས་རུང་འཁོར་བ་ཆུ་སྲིན་སྡུམ་པ་སྡུག་བསྔལ་རླབས་ཕྲེང་གཡོ་བའི་མཚོ་ལས་སྒྲོལ་བའི་ཟམ་སྟེགས་བླ་ན་མེད།།ཡབ་གཅིག་རིགས་བདག་འཁོར་ལོའི་མགོན་པོའི་འཕྲིན་ལས་ནོར་བུའི་བང་མཛོད་འཛིན་ལ་གནམ་གྱི་མཐོངས་ནས་དབང་རབ་བསྐུར་བའི་རྒྱལ་ཚབ་མཚུངས་པ་མེད་པའི་སྡེ།།ཐུགས་རྗེ་ཟླ་སྟོང་འོད་ཀྱི་འཛུམ་རིས་ངོ་མཚར་དོན་ཡོད་ཞགས་པའི་ཀྱོ་བ་སྨོན་ལམ་རླུང་གིས་བསྐྱོད་དང་ལྷན་ཅིག་མོས་ལྡན་ཀུན་དའི་བུ་ལ་རྐྱོངས།།
སྐྱེས་སྦྱངས་རྣམ་དཔྱོད་རླུང་གི་ཟས་ཅན་སྤྱི་གཙུག་གདེངས་ཀ་ལས་འོངས་པ།།སྙན་འཕྲིན་ཙིནྟ་མ་ཎིའི་དོ་ཤལ་ཚིག་སྦྱོར་སྲད་བུར་བརྒྱུས་པའི་སྐྱེས།།རིག་བྱེད་འོད་ཟེར་རྩེ་དགས་རྣམ་བརྒྱན་དོན་བཟང་རིན་ཐང་མི་དམན་པ།།ལྷག་བསམ་ཤེལ་དཀར་ཐལ་མོའི་མེ་ཏོག་ཟུམ་པའི་གར་དང་ཆབས་ཅིག་བཏེགས།།
ལེགས་བྱས་འབྲས་བུས་མ་འོངས་ཚེ་རབས་ཀུ༵ན།།ཀུ༵ན་མཁྱེན་བླ་མས་རྗེས་སུ་བཟུང་དང་ལྷ༵ན།།ལྷ༵ན་ཅིག་དགེ་དབང་ཡབ་སྲས་ངག་གི་སྲི༵ད།།སྲི༵ད་མཐར་འཛིན་པའི་འཕྲིན་ལས་རྒྱས་པར་སྨོན།།
ཞེས་པ་ཡང་དུས་ཀྱི་མཐའ་འདིར་མདོ་སྔགས་རིག་གནས་དང་བཅས་པའི་གཙུག་ལག་ཤེས་བྱའི་ཐང་ཆེན་དུ་བསྙེངས་པ་མེད་པའི་རྣམ་དཔྱོད་ཀྱི་གོམ་སྟབས་བག་ཡངས་སུ་བསྒྱུར་བའི་ངེས་དོན་གྱི་ལྔ་རིག་སྨྲ་བ། སྒོམ་སྒྲུབ་ཉམས་ལེན་དང་གཞན་ཕན་བསྡུ་བཞིས་མཚོན་པའི་ཆོས་སྤྱོད་ཀྱི་མཛད་པ་མཐའ་དག་ཡ་མ་བྲལ་བར་གྲུ་བཞི་ལམ་དུ་ཁྱེར་བའི་དྲང་སྲོང་བསམ་གཏན་པ་ཆེན་པོ།བརྟན་མཁས་ཡོན་ཏན་གྱི་བང་མཛོད་བདག་གིར་བཟུང་བའི་མཆོག་སྤྲུལ་འགྲོ་བའི་སྒྲོན་མེ།རྨེ་སྤྲུལ་ལུང་རྟོགས་བསྟན་འཛིན་རྒྱ་མཚོ་མཆོག་གི་ཞལ་སྔ་ནས།ཕྲན་ལ་བོང་བ་གསེར་གཟིགས་ཀྱི་ཚུལ་དུ་སྐུ་རྟེན་བདེ་བར་གཤེགས་པའི་ཚོགས་ཞིང་ཆེ་ལེགས་ཡུག་གཅིག་དང་།གུ་རུའི་ཞལ་ཐང་ཁྱད་མཚར་དུ་མ།གསུང་རྟེན་དུ་སྐུ་ཉིད་ཀྱི་བཀའ་རྩོམ་དེབ་གཟུགས་སུ་བསྐྲུན་པ་ཁག་ཅིག དེ་མིན་བོད་ཀྱི་གནའ་བོའི་དཀར་ཡོལ་ཐོག་མ་དར་ཚེ་སྤུས་ལེགས་གཅིག་དང་།ཁ་ཆེའི་གུར་ཀུམ་གྱི་རྟེན་མཚོན།ཡིད་བཞིན་ནོར་བུའི་དོད་ཐུབ་བཅས་རྗེས་བརྩེའི་གཟིགས་པ་ཚད་མེད་པའི་བདག་རྐྱེན་དུ་བསྐུར་གནང་གི་བཀའ་དྲིན་བསྐྱངས་པའི་འབྱོར་ལན་ནམ།མི་ཕྱེད་གཏང་རག་གི་སེམས་ངོ་མཚོན་བྱེད་ཙམ་དུ།རེ་དོགས་རླུང་དམར་གྱིས་ཅི་དགར་སྐྱོམ་པའི་སྲིད་པའི་ནགས་ཀློང་ཡངས་པོར་ཆོས་བརྒྱད་དུག་ཤིང་གི་ཡལ་གར་འཐམས་ཏེ།ཐ་སྙད་ལོ་མའི་མལ་སྟན་ལ་རྐང་མལ་གསོ་བཞིན་སྣང་བ་གདོང་འདེད་ཀྱིས་མི་ཚེ་འཁྱོལ་བའི་བག་མེད་སྙོམས་ལས་པ་ཨ་སྐྱེས་བྱམས་པ་དགེ་ལེགས་སམ་བླ་དྭགས་ཀྱི་མིང་གཅན་རང་སད་དུ་འབོད་པས།གུས་པའི་རྣམ་པར་འགྱུར་བ་མཐའ་དག་གི་རྒྱན་མངོན་དུ་བྱས།མཛའ་གཅུགས་དར་དཀར་གྱི་མདུད་ཆིངས་མི་ཤིགས་གཡུང་དྲུང་གི་ངོ་བོར་སྦྲེལ་བ་ལ་མོས་པས་ནི་གདུངས།ཟང་ཟིང་གི་དངོས་པོའི་མཆོད་རྫས་ཡོངས་སུ་ཕོངས་པས་ནི་ཉམ་ཐག ཡིན་ཡང་རང་ཉིད་ལ་སྐྱེས་སྦྱངས་ཀྱི་མཛོད་ཕུགས་ན་ངག་རིག་གི་ཁྱད་ནོར་ཕྲན་བུ་ཙམ་ཞིག་ནི་ཡོད་པར་རིག་སྟེ།དེའི་སྒོ་ནས་བསོད་ནམས་དང་བྱིན་རླབས་ཀྱི་དངོས་གྲུབ་ཞུ་བ་ལ།སྒོ་གསུམ་བསྡམ་པར་མ་ནུས་པའི་དབང་གིས་ལྷག་བསམ་གྱི་སོར་མོ་ཅི་ཡང་བསྐྱོད་དེ།ཐུན་མོང་མ་ཡིན་པའི་རྟེན་འབྱུང་གི་རྒྱུ་ཚོགས་ལས་བརྩམས་པའི་ཞུ་འཕྲིན་ཙིནྟ་མ་ཎིའི་དོ་ཤལ་ཞེས་བྱ་བ་འདི་ཉིད་མངོན་པར་འདུ་བྱས།དྲི་མས་མ་བཏང་བའི་སྙིམ་པ་འཕང་མཐོར་བཏེགས་ནས་ཕུལ་བ་དགེ་ལེགས་སུ་གྱུར་ཅིག། །།
སྤྱི་ལོ༢༠༢༥ལོའི་ལུགས་རྙིང་ཟླ༩ཚེས༢༢ཉིན།
བསམ་ཚུལ་ཕྲིས།