མཁན་ཆེན་འཆི་མེད་རིག་འཛིན་གྱི་གསུང་རྩོམ་གསར་པ།

རྩོམ་ཡིག་འདི་ཐེངས་ 169 བཀླགས་འདུག

བཀའ་དྲིན་རྗེས་དྲན་བསྟོད་ཚིག་གསོལ་འདེབས།

སྙིགས་མའི་སྐྱབས་གཅིག་བླ་མ་ཨོ་རྒྱན་ཆེན་པོའི་ཚད་མེད་པའི་ཡོན་ཏན་དང་བཀའ་དྲིན་རྗེས་སུ་དྲན་པའི་བསྟོད་ཚིག་གསོལ་འདེབས་ཆེན་མོ་རིག་འཛིན་མཁའ་འགྲོ་འབུམ་གྱི་རྣ་རྒྱན་ཞེས་བྱ་བ།

མཛད་པ་པོ། མཁན་ཆེན་འཆི་མེད་རིག་འཛིན། བླ་མ་དང་ངག་གི་དབང་ཕྱུག་ལྷ་མོ་དབྱངས་ཅན་མ་ལ་ཕྱག་འཚལ་ལོ།།

བཀའ་དྲིན་ཅན་གྱི་འདྲེན་མཆོག་བླ་མ་དང་།།
དངོས་གྲུབ་རྒྱ་མཚོའི་གཏེར་མཛོད་ཡི་དམ་ལྷ།།
གནས་གསུམ་མཁའ་འགྲོ་བྱེ་བའི་བྱིན་རླབས་ཀྱིས།།
དགེ་ལེགས་སྣང་བའི་དཔལ་ཡོན་རིང་དུ་སྩོལ།།

ཉི་མ་ཟླ་བ་ཕྲག་པའི་ཐད་ནས་ཤར།།
སྤྲིན་དང་ན་བུན་སྐྲ་ལོའི་མཚམས་ན་རྒྱུ།།
མཐོ་སྒང་གངས་དཀར་བྷོ་ཊའི་ཡུལ་ལྗོངས་འདི།།
ཕྱག་ན་པདྨོའི་ཐུགས་རྗེའི་གདུལ་ཞིང་གཅིག།

འཕགས་པའི་སྤྱན་ཟུར་ཕྱོགས་འདིར་མ་གཡོས་ཤིང་།།
ཤུགས་འབྱུང་འཕྲིན་ལས་དུས་སུ་མ་བབས་གོང་།།
གངས་དཀར་ལྷུན་པོའི་གསེབ་ཀྱི་གླིང་ཆུང་འདི།།
ཤ་ཁྲག་ཟས་ལ་སྤྱོད་པའི་སྲིན་ཡུལ་ཞིག།

དཔལ་ཆེན་པདྨ་བཞད་པའི་རྔམ་སྒྲ་ཡིས།།
ཡངས་པའི་ས་ཆེན་ཕྱེད་ལ་དབང་བསྒྱུར་བ།།
སྲོང་བཙན་དཔའ་བོའི་མཛད་པའི་ཡུར་བ་ལས།།
ཐུབ་བསྟན་གང་གའི་ཆུ་རྒྱུན་གནས་འདིར་བབས།།

རིན་ཆེན་གསུམ་གྱི་གྲགས་པའི་སྒྲ་དབྱངས་དེ།།
གདོང་དམར་སྐྱེ་འགྲོའི་རྣ་བར་ལྷུང་བའི་མོད།།
ཐ་རྒོད་སེམས་ཀྱི་ཞིང་སའི་གཏིང་རུམ་ནས།།
རྣམ་དཀར་མྱུ་གུའི་འཕེལ་ཁ་ཡར་ཡར་རྒྱས།།

མཐོན་པོའི་རི་ལ་རང་བྱུང་ཡིག་འབྲུ་དོད།།
དམའ་མོའི་མཚོ་ལ་ལྷ་ཡི་གཟུགས་བརྙན་ཤར།།
དཀར་ཕྱོགས་དམ་ཅན་རྒྱ་མཚོའི་དགྱེས་ཞལ་ཀུན།།
ཆོས་མེད་མཐའ་འཁོབ་མུན་པའི་གླིང་འདིར་ཕྱོགས།།

ཁྱད་པར་འོད་མཚན་སྟོང་འབར་ཐུགས་ཀའི་ཧྲི།།
རྒྱལ་ཀུན་མཁྱེན་བརྩེ་ནུས་པའི་ངོ་བོ་དེའི།།
རབ་དཀར་འོད་ཀྱི་འཇའ་སྣེ་ཕྲ་མོ་ཞིག།
ལྷོ་ནུབ་འོ་མའི་མཚོ་མོ་དེ་རུ་ཟུག།

མི་ནག་སྐྱེ་བོའི་ཁང་ཁྱིམ་མ་འགྲིམས་པར།།
ཨོ་རྒྱན་མཁའ་འགྲོ་འདུ་བའི་གླིང་ཕྲན་དེར།།
ངོ་མཚར་འདབ་སྟོང་རྒྱས་པའི་མེ་ཏོག་ཁར།།
མཚོ་སྐྱེས་རྡོ་རྗེའི་ཟློས་གར་ཐོག་མར་བསྒྱུར།།

སྲོག་གཅོད་དུག་གི་ལོ་མའི་ཁ་ཟས་ཀྱིས།།
ལྗང་སྨུག་སྒྲོ་མདངས་རྒྱས་པའི་རྨ་བྱ་བཞིན།།
འབྱོར་ཕྱུག་རྒྱལ་པོའི་སྲིད་ཀྱི་འདོད་ཡོན་ཀུན།།
ལོངས་སྐུའི་མཛེས་སྡུག་རྒྱས་པའི་གྲོགས་སུ་སྨིན།།

གཅེར་རྒྱུག་རོ་ལངས་བརྟུལ་ཞུགས་གར་གྱིས་ཞོན།།
གཏུམ་དྲག་གཅན་གཟན་ཐུགས་རྗེས་བྲན་དུ་བཀོལ།།
སྟོན་མཚན་མུན་པའི་ནང་གི་ཟླ་བ་བཞིན།།
ཀུན་བཟང་ཕྱོགས་ལས་རྣམ་རྒྱལ་སྤྱོད་པས་མཛེས།།

སོར་གསུམ་གཙུག་ཕུད་མཁན་པོར་ཕུལ་ན་ཡང་།།
གནས་བརྟན་ཆེན་པོ་གཞན་དང་མི་མཚུངས་པར།།
རལ་བའི་ལྕང་ལོ་ལྡེམ་པའི་ཟར་བུ་རེར།།
རིག་འཛིན་མཁའ་འགྲོ་འབུམ་གྱིས་བརྡ་གླུ་ལེན།།

ངུར་སྨྲིག་ན་བཟའ་སྐུ་ལ་གསོལ་ན་ཡང་།།
ཕྱགས་དར་ཁྲོད་ཀྱི་གོས་ལ་མི་རེ་བར།།
དར་ཟབ་རིན་ཆེན་རྒྱལ་པོའི་ཆ་བྱད་ལ།།
དཀར་ཕྱོགས་དམ་ཅན་རྒྱ་མཚོའི་འདུ་བ་འཁོར།།

ཉིས་བརྒྱ་ལྔ་བཅུའི་འདུལ་ཁྲིམས་གཙང་ན་ཡང་།།
ཞི་དུལ་བཙུན་པའི་སྤྱོད་ལ་མི་ལྟོས་པར།།
ཧེ་རུ་ཀ་དཔལ་ལྷ་ཡི་བརྟུལ་ཞུགས་ལ།།
སྡོམ་གསུམ་བསྟན་པའི་མཛེས་པ་ཀུན་ནས་རྫོགས།།

སྲིད་ལ་སྐྱོ་ནས་ངེས་པར་འབྱུང་ན་ཡང་།།
འདོད་ཡོན་སྤོང་བའི་དཀའ་བ་མི་དགོས་པར།།
བདེ་སྟོང་ཐུགས་ཀྱི་འཆར་སྒོ་རེ་རེ་ལ།།
མཁྱེན་བརྩེ་ཉི་མ་བརྒྱ་ཡི་འོད་ཟེར་འབར།།

ལྷོ་གླིང་སྐྱེ་འགྲོའི་མགོན་དུ་བྱོན་ན་ཡང་།།
ཉི་ཚེའི་གདུལ་བྱ་ཕྱོགས་རེ་མི་སྐྱོང་བར།།
མཁའ་སྤྱོད་རིག་པ་འཛིན་པའི་གྲོང་ཁྱེར་ན།།
དཔའ་བོ་མཁའ་འགྲོ་བྱེ་བའི་རྒྱན་དུ་བཞུགས།།

མཐའ་དག་འགྲོ་ལ་བུ་བཞིན་བརྩེ་ན་ཡང་།།
ཀུན་ལ་ཐུགས་ཀྱི་འཇམ་ས་མི་སྟོན་པར།།
ལང་ཤོར་བདུད་སྲིན་དམ་སྲིའི་སྲོག་སྙིང་ལ།།
གནམ་ལྕགས་རྡོ་རྗེ་འབར་བའི་རྩེ་མོ་གཏད།།

ཨོ་རྒྱན་རྒྱ་གར་ཟངས་གླིང་ལ་སོགས་པའི།།
ལས་སྨོན་དུས་བབས་གདུལ་བྱ་རྒྱ་མཚོའི་ངོར།།
མ་ངེས་སྤྲུལ་བསྒྱུར་བཀོད་པའི་འོད་ཟེར་གྱིས།།
ཐར་བའི་ལམ་བཟང་སྣང་མཛད་པདྨ་འབྱུང་།།

མེ་ཆུ་གཅན་གཟན་རྒྱལ་པོའི་བཟློག་མེད་ཁྲིམས།།
འཇིགས་པ་བརྒྱད་ཀྱི་ར་བར་མི་ཐོགས་པའི།།
སྟོང་གཟུགས་འཇའ་དང་འོད་ཀྱི་ལང་ཚོ་གྲུབ།།
འཕོ་ཆེན་རྡོ་རྗེའི་སྐུ་བརྙེས་པདྨ་འབྱུང་།།

ཡུན་ནས་ཡུན་དུ་གནས་པར་དཀའ་བ་ཡི།།
ཆུ་ཡི་ཆུ་བུར་འདྲ་བའི་ཚེ་སྲོག་རྒྱུན།།
འཆི་མེད་ཉི་མ་ཟླ་བའི་ངོ་བོར་བསྲིངས།།
ཚེ་མཐའ་ཡས་པའི་མགོན་པོ་པདྨ་འབྱུང་།།

བསྐལ་བ་དུ་མའི་དུས་ཀྱིས་ཡིད་སྐྱོ་ནས།།
རྡོ་རྗེ་ཐེག་པའི་གསེབ་ལམ་གཅོད་འདོད་ལ།།
ཟབ་གསང་སྔགས་ཀྱི་ཆེ་བ་གསལ་མཛད་པ།།
ལོངས་སྐུའི་བསྟན་པའི་བདག་པོ་པདྨ་འབྱུང་།།

མཐོང་གྲོལ་ཤྭ་བའི་མཉེན་ཞྭའི་རྒོད་སྒྲོ་ལྡེམ།།
རབ་དཀར་དུང་གི་རྣ་ཆས་སིལ་སྒྲ་སྒྲོག།
སྣང་སྲིད་ཟིལ་གྱིས་གནོན་པའི་ཕྱག་རྒྱ་ཡིས།།
ལྷ་མིའི་གཙུག་ན་མཛེས་པའི་པདྨ་འབྱུང་།།

མས་སྦྱངས་ལམ་གྱིས་ཤེས་རྒྱུད་སྨིན་པ་ཡི།།
གྲུབ་པའི་རིག་འཛིན་ཕལ་དང་མཚུངས་པ་མིན།།
འཛམ་གླིང་བྱེ་བ་ཕྲག་བརྒྱའི་རྫིང་བུ་ན།།
ཡ་མཚན་སྐུ་ཡི་སྤྲུལ་བའི་ཟླ་གཟུགས་རེ།།

ཡོན་ཤཱཀ་རྣམ་གཉིས་འདྲ་བར་རྒྱལ་བའི་གསུང་།།
ཕྱོགས་རེའི་ལམ་སྲོལ་རྩལ་དུ་མ་བཏོན་པར།།
མདོ་སྔགས་དགོངས་པ་འགལ་མེད་གཅིག་ཏུ་བསྲེས།།
བརྟུལ་ཞུགས་སྤྱོད་པས་ཁམས་གསུམ་དབང་དུ་བསྡུས།།

མཁས་མཆོག་དབྱིག་གཉེན་ལྟ་བུར་ཤེས་བྱའི་གཞུང་།།
རིམ་གྱིས་བསླབ་པའི་དུས་ལ་མ་ལྟོས་པར།།
གཟུངས་སྤོབས་ཤེས་རབ་ནམ་མཁའི་མཐའ་དང་མཉམ།།
བློ་ལྡན་མཆོག་སྲེད་འཇམ་དབྱངས་མཁྱེན་པའི་གཏེར།།

ཕྱོགས་གླང་ཆོས་གྲགས་བཞིན་དུ་མུ་སྟེགས་སྡེ།།
ཚུལ་གསུམ་ཚད་མ་ཙམ་ལ་མ་ལྟོས་པར།།
ཟིལ་གནོན་རིག་སྔགས་དྲག་པོའི་མཐུ་སྟོབས་ཀྱིས།།
ཕྱོགས་ལས་རྣམ་རྒྱལ་སེང་གེའི་སྒྲ་ཆེན་བསྒྲགས།།

སྨྲ་བཅད་བསྙུང་གནས་དཀའ་ཐུབ་འཚོ་བ་ཡིས།།
ལོ་ཟླའི་ཁ་གྲངས་རི་ནས་མ་བསྐྱལ་བར།།
སྣང་སེམས་དབང་བསྒྱུར་རྫུ་འཕྲུལ་ཐོགས་མེད་གྲུབ།།
ཉི་མ་འོད་ཟེར་བསྟན་འགྲོའི་དཔལ་དུ་ཤར།།

ཆོས་རྒྱལ་ཆེན་པོའི་ཐུགས་བསྐྱེད་སྨོན་ལམ་གྱིས།།
མཐོ་བརྗིད་གངས་ཀྱི་རི་བོའི་སྐེད་ལམ་ནས།།
མཚོ་སྐྱེས་རྒྱལ་བའི་འཕྲིན་ལས་ཤིང་རྟ་ཆེའི།།
རྨད་བྱུང་མཛད་པའི་ཁ་ལོ་ཕྱོགས་འདིར་དྲངས།།

བསྟན་ལ་འཚེ་བའི་སྡེ་བརྒྱད་འབྱུང་པོའི་རིགས།།
དཀར་ཕྱོགས་སྐྱོང་བའི་དགེ་བསྙེན་ཉིད་དུ་བྱས།།
ངོ་མཚར་རིན་ཆེན་གཏེར་ཁ་བྱེ་བ་བརྒྱས།།
མུན་པའི་ཡུལ་གླིང་ས་སྤྱོད་ཞིང་དུ་བསྒྱུར།།

ལུགས་གསུམ་མི་འགྱུར་ལྷ་ཡི་ཁང་བཟང་དུ།།
མི་མིན་མཁའ་འགྲོའི་གདམས་ངག་གསེར་གྱི་ཆོས།།
གངས་ཅན་དབྱངས་གསལ་གཟུགས་སུ་གཏན་ལ་ཕབ།།
བྱིན་རླབས་ཁ་རླངས་མ་ཡལ་ད་དུང་ཆགས།།

ལས་ཅན་སློབ་མ་ཐུགས་ཀྱི་བུ་དགུ་སོགས།།
འབྲེལ་ཚད་སྐྱེ་འགྲོའི་སེམས་ཀྱི་ཞིང་ས་རུ།།
སྨིན་གྲོལ་ཆོས་ཀྱི་ཆར་རྒྱུན་ཕབ་པ་ལས།།
གྲུབ་བརྙེས་ལོ་ལེགས་སྙེ་མས་གནས་འདི་གང་།།

མཚོ་བྱུང་པདྨའི་དགྱེས་ཞལ་ཟླ་བའི་འགྲོས།།
དད་པའི་ཡིད་མཁར་རྟག་ཏུ་འགྲོགས་པ་ཡི།།
རྐུན་པོ་ཤན་པ་ཡུགས་མོ་ཡན་ཆད་ཀྱི།།
འཁོར་བའི་ཕྱི་མཐའ་རིག་འཛིན་གྲལ་ལ་གཏད།།

ཆོས་ཀྱི་རྒྱལ་པོ་གདུང་རྒྱུད་ཆུ་བོའི་རྒྱུན།།
རང་བྱུང་ས་རྡོའི་གསེབ་ཏུ་མ་ཐིམ་བར།།
ཐུགས་རྗེའི་དར་སྐུད་ནམ་ཡང་མི་ཆད་པའི།།
བསླུ་མེད་ཞལ་ཆེམས་ཕྱི་རབས་བོད་ལ་བཞག།

གུང་ཐང་ལ་རྩེའི་ཉག་ཁ་ཕྲ་ས་བརྒྱུད།།
སྐུ་ཡི་ཉི་མ་ནུབ་རིར་བྱོན་ན་ཡང་།།
ཕོ་བྲང་པདྨ་འོད་ཀྱི་གཞལ་ཡས་ནས།།
བརྩེ་ཆེན་ཐུགས་རྗེའི་སྤྱན་རས་ཕྱོགས་འདིར་གཏད།།

གནས་ཡུལ་མཁའ་འགྲོའི་ཆོས་མཛོད་དུ་མ་ལས།།
བརྡ་ཡིག་གསེར་གྱི་ཤོག་སེར་དང་པོ་དྲངས།།
སྤྲུལ་བའི་གཏེར་ཆེན་སངས་རྒྱས་བླ་མ་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

ལས་སྨོན་དུས་སུ་བབ་པའི་ལྡེ་མིག་གིས།།
བཀའ་བརྒྱད་ལྷ་ཡི་ཁང་པའི་སྒོ་བརྒྱ་ཕྱེས།།
སྤྲུལ་བའི་གཏེར་ཆེན་ཉི་མ་འོད་ཟེར་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

མཛོད་ཆེན་བདུན་གྱི་ལེགས་བཤད་སྣང་བ་ཡིས།།
འཇའ་ལུས་གྲུབ་པའི་གསང་ལམ་གསལ་བར་བྱས།།
སྤྲུལ་བའི་གཏེར་ཆེན་དྲི་མེད་འོད་ཟེར་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

སྨོན་ལམ་གྲུབ་པའི་བདེན་ཚིག་མཐུ་སྟོབས་ཀྱིས།།
སྟོད་ཧོར་ཀླ་ཀློའི་དམག་གི་རུ་སྣ་བཟློག།
སྤྲུལ་པའི་གཏེར་ཆེན་ཐང་སྟོང་རྒྱལ་པོ་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

ཀློང་ཆེན་དགོངས་པའི་གསང་མཛོད་ཡངས་པ་ལས།།
འོད་གསལ་སྙིང་ཐིག་གདམས་པའི་ཉིང་ཁུ་བླངས།།
སྤྲུལ་པའི་གཏེར་ཆེན་འཇིགས་མེད་གླིང་པ་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

དམ་ཅན་བྱེ་བའི་སྤྱན་གྱིས་བསྲུངས་པ
ཡི།།
སྒྲུབ་བརྒྱུད་ཆོས་ཚུལ་ཡོངས་ཀྱི་བཀའ་བསྡུ་བྱས།།
སྤྲུལ་པའི་གཏེར་ཆེན་མདོ་སྔགས་གླིང་པ་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

རབ་དམར་དབང་གི་འཕྲིན་ལས་འོད་ཟེར་གྱིས།།
བསྟན་འགྲོའི་དགེ་མཚན་ཡར་ཟླའི་མཆེད་དུ་སྤེལ།།
སྤྲུལ་བའི་གཏེར་ཆེན་བདག་གི་བླ་མ་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

མཁས་པའི་ཤེས་རབ་མ་སྦྱངས་ཀློང་ནས་བརྡོལ།།
གྲུབ་པའི་ཉམས་རྟོགས་རང་བཞིན་ཤུགས་ཀྱིས་རྫོགས།།
གུ་རུའི་རྣམ་སྤྲུལ་གཏེར་ཆེན་བརྒྱ་རྩ་བྱོན།།
པདྨའི་ཐུགས་ཀྱིས་ང་ཅག་འདོར་མ་མྱོང་།།

མཁྱེན་བརྩེ་ན་བཟའ་དཀར་པོའི་གྲྭ་མཐའ་ནས།།
མོས་གུས་དད་པའི་སྤར་ཁ་མ་ལྷོད་ན།།
ངན་སོང་གསུམ་དུ་སྐྱེས་ཀྱང་བླུ་འོ་ཞེས།།
ཞལ་བཞེས་རྡོ་རྗེའི་ཐ་ཚིག་ནམ་ཡང་བརྟན།།

བསིལ་ལྗོངས་ལུགས་གཉིས་ལྷ་ཡི་སྲོལ་བཟང་དེ།།
དུས་ཀྱི་དབང་གིས་འཇིག་ལ་ཉེ་ན་ཡང་།།
རེ་བའི་མིག་ཟུང་གཏད་ས་གཞན་མེད་པས།།
ད་དུང་ཐུགས་རྗེས་གཟིགས་ཤིག་ཨོ་རྒྱན་རྗེ།།

ནད་རིམས་འཁྲུག་རྩོད་འབྱུང་བཞིའི་གནོད་པ་སོགས།།
མི་མངོན་ལྐོག་ཏུ་བསྒྲུབས་པའི་རལ་གྲིའི་རྩེར།།
བག་མེད་གོམ་ཁ་བསྐྱོད་པ་དུས་མཐའི་འགྲོ།།
འགལ་རྐྱེན་གཡང་ལས་སྐྱོབས་ཤིག་ཨོ་རྒྱན་རྗེ།།

ཕྱི་ཡི་ལོངས་སྤྱོད་ཅི་ཙམ་འཕེལ་ན་ཡང་།།
ནང་གི་བདེ་ལ་ཡར་སྐྱེད་མ་བྱུང་བར།།
ད་དུང་བརྐམ་ཆགས་སྲིད་པས་མི་ཀུན་བྲེལ།།
གཅེས་འཛིན་སྒྲོག་ལས་ཁྲོལ་ཅིག་ཨོ་རྒྱན་རྗེ།།

མུན་པའི་ནང་ནས་ལམ་སྣེ་ཟིན་པ་བཞིན།།
ཐར་པའི་ཕྱོགས་སུ་བློ་རྩེ་འཁོར་ན་ཡང་།།
རིང་པོའི་འཕྲང་ལ་གོལ་ས་མང་བས་ན།།
ཡང་དག་ལམ་དུ་དྲོངས་ཤིག་ཨོ་རྒྱན་རྗེ།།

སྟོན་ཀའི་ཉི་མ་འདྲ་བའི་ཚེ་མཇུག་འདིར།།
ལྷ་དང་བླ་མའི་ཐུགས་རྗེའི་ཁང་བཟང་ནས།།
དམ་ཆོས་སྒྲོན་མེའི་འོད་སྣང་འབར་བ་ལ།།
བར་ཆད་རླུང་གི་ཉེར་འཚེ་མེད་པར་ཤོག།

ནམ་ཞིག་འཇིག་རྟེན་འདི་ཡི་གྲོང་གསེབ་ནས།།
རྣམ་ཤེས་མགྲོན་པོ་གཏན་དུ་འགྲོ་བའི་ཉིན།།
གུ་ཡངས་བག་ཕེབས་ནད་གཅོད་སྡུག་བསྔལ་བྲལ།།
ཞེན་མེད་ཤིང་ཁའི་བྱ་བཞིན་འཕུར་ནུས་ཤོག།

འབྱུང་འདུས་ལུས་ཀྱི་སྦུབས་རྒྱ་ཞིག་པ་ལས།།
སྟོང་གཟུགས་ཞི་ཁྲོའི་འོད་བརྒྱ་མཆེད་པའི་དུས།།
རྨི་ལམ་འཁྲུལ་བའི་རང་ངོ་ཤེས་པ་ལྟར།།
གང་སྣང་རིག་པའི་རྒྱན་དུ་རྟོགས་པར་ཤོག།

འཁོར་འདས་ལམ་སྣེ་གྱེས་པའི་ས་མཚམས་དེར།།
ད་དུང་སྲིད་པའི་གཡང་ཁ་མི་བརྒྱུད་པར།།
བདེ་ལྡན་པདྨའི་ཚལ་ན་བཞུགས་པ་ཡི།།
འདྲེན་མཆོག་བླ་མའི་དྲུང་དུ་སྐྱེ་བར་ཤོག།