འཛུམ་གྱི་སྙན་ངག་གསར་པ།

རྩོམ་ཡིག་འདི་ཐེངས་ 86 བཀླགས་འདུག

མཁན་ཆེན་རྫོགས་པ་ཆེན་པོ་རྣམ་གྲོལ་ཚེ་རིང་།

ཞལ་རྒྱང་ནས་འཚོས་པའི་ངག་དབང་གི་ལྷ་མོ།།
སྐུ་ཟླ་བའི་འཁྲི་ཤིང་མཁའ་དབྱིངས་ནས་གཡོ་བཞིན།།
ཕྱག་རིན་ཆེན་སོར་གདུབ་སིལ་སྒྲ་དང་བཅས་ཏེ།།
རྒྱུད་པི་ཝང་སྙན་མོ་རམ་དཀྲོལ་རེ་གྱིས་དང་།།
ངག་མ་བཅོས་རང་བྱུང་ཐོལ་གླུ་ཞིག་ལེན་ནོ།།

ཟས་བཅུད་ལེན་བཟས་ནས་དབྱར་ཟླ་དེ་ཚུར་བསུས།།
སྣོད་སྒྱེ་མོ་གོན་ཞིང་དགུན་ཁ་རེར་ཕར་བསྐྱལ།།
མིའི་འཚོ་བའི་ནང་སྙིང་དབེན་རི་ལ་བསྔོགས་ཏེ།།
ཕ་མཚོ་སྐྱེས་རྒྱལ་བའི་དགོངས་བཅུད་དེ་ལོན་པའི།།
བུ་རྒོད་པོ་བསམ་ཡས་ལུང་མང་བ་གསོན་དང་།།

གོས་ཧྲུལ་པོ་དེ་ཡིས་སྐུ་ལུས་ནི་ཁེབས་ཙམ།།
ཁང་སྤྱིལ་ཆུང་དེ་ཡིས་ལྷགས་རླུང་དེ་ཁོག་ཙམ།།
ནམ་ཉིན་མཚན་ཐུན་བཞིའི་རྣལ་འབྱོར་ལས་མི་འདའ།།
སྐུ་མི་ཚེ་ཧྲིལ་པོ་ཉམས་ལེན་ལ་འབད་འབད།།
དབུའི་འདབ་མ་དཀར་བའི་དགེ་སློང་ཞིག་གླེང་ན།།

སྐུ་སྐྱེ་བ་བོད་ཁམས་ས་དམར་ལ་བཞེས་ཀྱང་།།
ཆུང་ཞབས་སོར་ལྷོ་ཕྱོགས་བེ་ཏའི་གླིང་བཀོད་ནས།།
མགོའི་ཐོར་ཅོག་གྲུབ་དབང་བླ་མ་ལ་ཕུལ་ཏེ།།
ལུས་ངུར་སྨྲིག་ལྷ་ཡི་ན་བཟའ་དེ་བགོས་པས།།
ལས་རྟེན་འབྲེལ་ཡོད་ཚད་མ་བསྒྲིཌ་པར་འགྲིཌ་གདའ།།

རྗེ་གྲུབ་དབང་བླ་མའི་ཐུགས་བཞེད་དང་བསྟུན་ཞིང་།།
ཡུལ་བྱང་ཕྱོགས་སྦས་གནས་འབྲས་མོ་ཡི་ལྗོངས་སུ།།
བོད་རྫོགས་ཆེན་མཁན་པོ་བརྩོན་འགྲུས་ཀྱི་མདུན་དུ།།
གཞུང་སྡེ་སྣོད་ཐོས་པས་ཞུན་ཐར་དེ་བཅད་ནས།།
ལུས་ཨར་ལ་གཏད་པའི་རྣམ་ཐར་དེ་མི་གླེང་།།

རྗེ་བླ་མའི་ཆིབས་ཁ་འཕགས་ཡུལ་ལ་དྲངས་ནས།།
བོད་ཁ་བའི་མགོན་པོར་དབུ་ཐོད་དེ་གཏུགས་ཤིང་།།
ཕ་གྲུབ་པའི་རྒྱལ་པོའི་ཕྱག་ཟུང་དང་སྦྲེལ་ཏེ།།
ལྷ་རིགས་གསུམ་མགོན་པོ་གདན་གཅིག་ལ་བཀོད་པའི།།
སྐུའི་མཛད་ཕྲིན་བསམས་ན་ཁ་རོགས་ཤིག་ཨེ་རེད།།

རྒྱུད་འབུམ་ཕྲག་དྲུག་ཅུའི་དགོངས་དོན་དེ་ཕར་ཞོག།
མཚན་རྣམ་གྲངས་ཙམ་ཡང་གོ་མྱོང་ཞིག་མེད་ཀྱང་།།
ང་གསང་ཆེན་རྙིང་མའི་བསྟན་འཛིན་དེ་ཡིན་ཞེས།།
ཁ་མ་ཎི་བགྲང་བའི་བླ་སྤྲུལ་ནི་འབེལ་ཡང་།།
དེའི་མདུན་ནས་ཁྱོད་རང་རྩ་དགོངས་དེ་ཞུས་འདུག།

རྟ་ཅང་ཤེས་འགྲོས་ལ་ནོར་ཡ་ནི་ཅི་ཡོད།།
སྔགས་རྒྱུད་སྡེ་བཞི་ཡི་ཐང་ཆེན་ནས་རྒྱུགས་ཤིང་།།
ལམ་ཡང་གསང་སྙིང་ཏིག་བར་སྣང་ལ་ལྡིང་ནས།།
རྐང་རྨིག་བཞི་ཉི་ཟླའི་དཀྱིལ་འཁོར་ན་འཁོར་འདུག།
མིག་ལྟད་མོ་འདི་འདྲ་མཐོང་མཁན་རེ་ཨེ་ཡོད།།

ས་ཚིག་པའི་མེ་ཞིག་ཡང་ལེ་ཤོད་བུས་འདུག།
ས་ཚིག་པས་མ་ཚད་སེམས་པ་ཡང་ཚིག་གདའ།།
སེམས་ཚིག་པས་ང་རྒྱལ་རུ་ང་རྣམས་ཞི་ཞིང་།།
ནང་གུ་ཡངས་བློ་བདེའི་དྲོད་ཁོལ་གྱིས་ཁྱབ་ཅིང་།།
ཉམས་རྟོགས་པའི་ཡོན་ཏན་མེ་ལྕེ་བཞིན་འབར་གདའ།།

ལྷ་ཨོ་རྒྱན་པདྨས་སྔུན་ཕྱོགས་ནས་བསུས་ཤིང་།།
རྗེ་བླ་མ་གཉིས་ཀྱིས་གཡས་གཡོན་ནས་སྐྱོར་བཞིན།།
ནོར་ཡིད་བཞིན་དབང་རྒྱལ་ལག་མཐིལ་ལ་སྤྲད་དེ།།
དྲིན་ཕ་མ་ལས་ལྷག་བརྩེ་ཆེན་གྱིས་བསྐྱངས་པའི།།
བུ་སྐལ་བཟང་ལས་ཅན་ཁྱོད་འདྲ་ཞིག་སུ་ཡོད།།

རྒྱུད་གཞུང་ལུགས་འཆད་ལ་ཁྱད་ཆོས་ཤིག་ཡོད་དེ།།
ཁུངས་རྒྱབ་རྟེན་ཀུན་མཁྱེན་ཡིག་ཆ་ལ་བཞག་ཅིང་།།
དེའི་དགོངས་པ་ཁུངས་ཐུབ་རྒྱུད་གཞན་ལ་གཏུཌ་ཏེ།།
དོན་ཟབ་མོའི་གོ་བ་ལྐོག་མར་དུ་འབྱིན་ལས།།
སེམས་ཐ་མལ་རྣམ་རྟོག་སྤྲོས་པ་ཡིས་མི་བསླད།།

ཕྱི་སྒྲུབ་སྡེའི་རྒྱ་ཕིབས་མཐོ་མཐོ་རང་མིན་ཡང་།།
ནང་བླ་མའི་ཐུགས་རྒྱུད་དམའ་དམའ་ཞིག་མ་ཡིན།།
མཆོག་ཐུན་མོང་དངོས་གྲུབ་གང་འདོད་དུ་འཇོ་བས།།
ལས་བསོད་ནམས་སྐལ་བ་སྦོམ་སྦོམ་འདྲ་མིན་ན།།
འདིར་ཞུགས་པའི་གོ་སྐབས་ཉུང་ཉུང་རེ་ཡིན་གདའ།།

ཡར་ཕེབས་དུས་མི་ནག་ཟོག་ནག་ཅིག་ཡིན་ཡང་།།
མར་ཐོན་དུས་མི་ངོ་ལྷ་ངོ་ནི་འཕྲོད་པའི།།
འཁོར་དད་ལྡན་སློབ་མ་ཅི་ཙམ་ཞིག་ཡོད་པ།།
འུར་བརྒྱབ་ནས་གཞན་ལ་འདྲོགས་སློང་ཞིག་མིན་ཏེ།།
ནང་སོ་སོའི་སེམས་ན་ཁྲིག་ཁྲིག་ཅིག་ཡིན་ཨ།།

བུ་རང་གི་དད་བརྩོན་ཤེས་རབ་ཀྱིས་འཇོན་ན།།
ཚེ་གཅིག་ལ་འཇའ་ལུས་འོད་སྐུ་རུ་གྲོལ་བའི།།
ལམ་ཡང་ཟབ་མཁའ་འགྲོ་སྙིང་ཏིག་གི་ཆོས་སྐལ།།
དུས་ད་ནས་རང་གི་བགོ་སྐལ་དུ་ཐོབ་འདུག།
ད་ཡིན་ཨ་སྐལ་ལྡན་མཆེད་ལྕམ་གྱི་ཕོ་མོ།།

མགོན་ཨོ་རྒྱན་པདྨའི་བསྟན་ཞབས་སུ་སྐྱེས་ཤིང་།།
ཆོས་ཟབ་མོ་ཡང་ཏིག་ཚེ་ནོམ་ལ་ཐོབ་པས།།
རྟེན་མི་ལུས་རིན་ཆེན་དོན་ཡོད་དུ་གྱུར་སོང་།།
དྲིན་བརྗེད་པ་མེད་དོ་མགོ་ཐོག་གི་ཉི་མ།།
སེམས་དགའ་སྤྲོས་གང་ཡོད་སྙིང་ནང་གི་ནོར་བུ།།

བརྩི་དགོས་ན་ལོ་གསུམ་རིང་པོ་འདྲ་རེད་དེ་།།
བསམ་བཞག་ན་ཉིན་གསུམ་སྣང་བ་ལས་མ་བྱུང་།།
དུས་དེ་རིང་ཚོགས་འཁོར་དགའ་སྟོན་རེད་ཟེར་ན།།
དགོད་བསམས་ཀྱང་མིག་ཁུང་མཆི་མ་ཡིས་གང་ཞིང་།།
ངུ་འདོད་ཀྱང་ཁ་ནས་དགོད་སྒྲ་ཡང་འཆོར་འགྲོ།།

དྲིན་བརྗེད་པ་མེད་དོ་ཡིད་བཞིན་གྱི་ནོར་བུ།།
ལས་སྐལ་བ་བཟང་ངོ་དམ་ལྡན་གྱི་མཆེད་ལྕམ།།
དུས་ད་ནས་ཁྱོད་ཉིད་མགོན་དཔུང་དུ་ཐོབ་པས།།
ས་གང་དུ་སོང་ཡང་དགའ་མོ་རང་འདུག་ལ།།
ལས་གང་ཞིག་བརྩམས་ཀྱང་སྤྲོ་མོ་འདྲ་ཡོད་གྲགས།།

ངའི་ཕ་རྒན་གྲུབ་མཆོག་པདྨ་ནི་ཀ་རཱའི།།
ཕྱག་འཆི་མེད་ཚེ་ཡི་བུམ་པ་དེ་ཁུར་ནས།།
རྗེ་བཀའ་དྲིན་མཚུངས་མེད་ཁྱོད་ཉིད་ལ་འབུལ་ན།།
སྐུ་འཇའ་ལུས་འཕོ་ཆེན་ངོ་བོ་རུ་བཞུགས་ཏེ།།
དུས་སྙིགས་ལྔའི་མུན་པ་ལྷག་མེད་དུ་སོལ་ཅིག།

ངའི་སྙིང་གི་སྡུག་གུ་དབྱངས་ཅན་གྱི་ལྷ་མོའི།།
ལུས་པང་དུ་བཟུང་བའི་སྒྲ་སྙན་དེ་གཡར་ནས།།
དྲིན་རྩ་བའི་བླ་མ་ཁྱོད་ཉིད་ལ་འབུལ་ན།།
གསུང་མི་འགག་ཚངས་དབྱངས་ལྟ་བུ་ལ་བཞུགས་ཤིང་།།
ཆོས་ཟབ་གསང་དབྱངས་ཀྱི་སྐུད་པ་ལས་སྟོནད་ཅིག།

ངའི་ཨ་ཇོ་འཁྱམ་པོ་དྲི་མེད་ཀྱི་འོད་ཟེར།།
ཐུཌ་དཔལ་བེར་གཏམས་པའི་མཛོད་བདུན་དེ་བླངས་ཏེ།།
སྐྱབས་ཀུན་འདུས་བླ་མ་ཁྱོད་ཉིད་ལ་འབུལ་ན།།
ཐུགས་མི་གཡོ་ཆོས་སྐུའི་ངོ་བོ་རུ་བཞུགས་ནས།།
མ་སེམས་ཅན་འཁོར་བའི་གཡང་ས་ལས་སྒྲོལ་ཅིག།

༢༠༢༣ ནས་དབུ་བཙུགས་ཏེ། རྫོགས་པ་ཆེན་པོ་མཁའ་འགྲོ་སྙིང་ཏིག་གི་ཁྲིད་ཡིག་ཟབ་ལམ་གསལ་བྱེད་ཀྱི་ཞག་བརྒྱའི་ཁྲིད་སྦྱོང་། དེ་རིང་བཀྲ་ཤིས་དགེ་བའི་ངང་མཇུག་ལེགས་པར་གྲུབ་རྗེས། གནས་མཆོག་ཡང་ལེ་ཤོད་ནས་འཛུམ་གྱིས།
31/ 10/ 2025