བྱང་ཆུབ་སེམས་དཔའ་ཆེན་པོའི་གོ་སྟོན་ལ་ཕུལ།

རྩོམ་ཡིག་འདི་ཐེངས་ 154 བཀླགས་འདུག

རྩོམ་པ་པོ། དར་ལྕེ་ཟད་པོ།
ཕུལ་བྱུང་སྙན་པའི་བ་དན་གཡོ་བའི་རླབས།།
རླབས་ཆེན་གསུང་འཕྲིན་དལ་འགྲོས་ཕྱོགས་ལ་ཁྱེར།།
ཁྱེར་བའི་ཡིད་རབ་ངོམས་པའི་བདུད་རྩིའི་གཏམ།།
གཏམ་འདི་གང་གིས་ཐོས་ན་ཞི་བསིལ་ཐོབ།།
དུས་རབས་འགྲོས་ཀྱིས་འགྱུར་བའི་འཛམ་གླིང་ན།།
གནའ་དེང་རིགས་སྨྲ་ཀུན་ལས་བླ་ན་མཐོ།།
ཞི་བདེའི་བདུད་རྩི་འགྱེད་པའི་འོད་དཀར་ཞིག།།
འཛམ་གླིང་ཤར་ནུབ་མཁའ་ལ་ཐོགས་མེད་རྒྱུ།།
སྣ་ཚོགས་ཐབས་ཀྱིས་ཕྱོགས་བཞིའི་དགྲ་བཏུལ་ཏེ།།
ཆོས་སྲིད་གང་ལ་མཁས་པའི་རྒྱལ་སྲིད་ཁྲིར།།
གང་འདོད་གསུང་གི་འཁོར་ལོས་དབང་སྒྱུར་བ།།
ཉེར་གཅིག་ཐུབ་པའི་དབང་པོར་ཕྱག་རྒྱ་ཟུམ།།
འཛམ་གླིང་ཤར་ནུབ་གླིང་ཕྲན་ཕྱོགས་རེ་ལ།།
ལ་རྒྱས་བསྔགས་པའི་རིག་གཞུང་མང་ན་ཡང་།།
ཡང་དག་རིགས་པའི་རྟེན་ནས་འབྱུང་བའི་གསུང་།
གསུང་འདི་གསར་དུ་ཐོས་ཚེ་ཧད་ཀྱིས་གཡེངས།།
མིག་ལྡན་བརྒྱ་ཡིས་དཔྱད་པའི་གྲུབ་དོན་ལ།།
མིག་མེད་ལག་ཉུལ་གཏན་ཚིགས་འགོད་པ་མིན།།
མིག་གིས་མཐོང་བ་མི་བཟོད་ལྐོག་གྱུར་གནས།།
མིག་ཤེས་ཟུར་དུ་བཞག་ནས་རིགས་པས་དཔྱད།།
མཁྱེན་པའི་འོད་ཟེར་ཆོས་ཀུན་ལ་ཁྱབ་ན།།
འཛམ་གླིང་གོ་ལ་འདི་ཡང་སྣོད་དུ་ཆུང་།།
ཐུགས་རྗེའི་སྤྱན་ལ་བཏང་སྙོམས་མི་མངའ་ཡང་།།
གདོང་དམར་གདུལ་བྱའི་རིགས་ལ་རྗེས་སུ་ཆགས།།
གང་ལ་གང་འཚམ་དུས་རབས་དང་མཐུན་པ།།
མ་འདྲེས་གོ་སླའི་གསུང་གིས་འདུལ་བས་ན།།
གྲགས་པའི་རྔ་ཆེན་འཛམ་གླིང་ཁྱོན་ཀུན་ལ།།
མ་བསྐུལ་ན་ཡང་རྒྱུན་མི་འཆད་དུ་གྲགས།།
འཇིག་རྟེན་ཤེས་རིག་རབ་དང་ཕུལ་བྱུང་གིས།།
རང་ཉིད་རྒྱལ་ཐབས་སྣ་ཚོགས་ཆོ་འཕྲུལ་ལ།།
ཕྱི་ནང་གསལ་བའི་བདེན་པའི་མེ་ལོང་ལས།།
གཡོ་སྒྱུའི་རྫུན་གྱི་བཅོམ་མའི་གདོང་རིས་བཤུས།།
གསར་རྙིང་རིག་པའི་ཤན་འབྱེད་གཟུ་བོའི་གཏམ།།
ཀླད་ཆུང་བན་རྒན་མགོ་བོ་འཁོར་ན་ཡང་།།
གཞན་ལུགས་མཁས་པ་མགུ་བས་བསྟོད་པའི་ཚེ།།
མཁྲེགས་འཛིན་ཅན་གྱི་མགོ་བོ་དལ་གྱིས་གུག།།
གཞན་དག་ཕྱོགས་ཞེན་དུག་ཆུ་ཁོག་ཏུ་མིད།།
རྒྱ་ཆེའི་ཁྱོན་ལ་ལྟ་བའི་མིག་ཉམས་པས།།
རང་ཉིད་བགྲོད་པའི་འཁྱོག་ལམ་བཀག་པ་ན།།
བྱིས་པ་ངུས་པས་རང་མཚང་ཀུན་ལ་བསྒྲགས།།
འགྲོ་ཀུན་ཕན་བདེའི་གཞི་རྩ་ཐུབ་བསྟན་ཉིད།།
འདི་ཉིད་མི་འཛིན་རྩ་གཏོར་བཏང་གྱུར་ན།།
མི་རིགས་ཆིག་སྒྲིལ་འཆིང་ཐག་ཆད་འགྱུར་བས།།
མདུན་སྐྱོད་ཡར་རྒྱས་རྡོག་པ་ཇི་ལྟར་སྤོ།།
གནས་ལུགས་སྒྲོ་ཡིས་དབེན་པའི་རྫུན་གྱི་མདའ།།
བཙན་པོའི་དཔུང་གིས་འཕངས་ཀྱང་འབིགས་མི་ནུས།།
དྲང་སྲོང་བདེན་པའི་གསུང་གི་གོ་ཆ་ལ།།
གཡོ་སྒྱུས་རྒོལ་བ་ངལ་བའི་ལམ་དུ་ཟད།།
གངས་ཅན་མེས་པོའི་སྲོལ་བཟང་མི་ཤེས་ཤིང་།།
མཐའ་དག་གཞན་གྱི་གཡམ་ལ་རྒྱུགས་གྱུར་ན།།
གདོང་མར་་བུ་རབས་ཡང་ཚའི་ལག་པ་ལ།།
གཏད་དུ་རི་བའི་ཁྱད་ནོར་ཅི་ཞིག་མཆིས།།
ཕྱི་ནང་རིག་པའི་རྒྱ་མཚོའི་མཇིངས་པ་ནས།།
བླངས་པའི་ཀུན་ལ་ཕན་པའི་དབྱིག་མཆོག་འདི།།
ལྷག་བསམ་སྙིང་ནས་རྡོལ་བའི་བདེན་གཏམ་འདི།།
སྤྲེལ་ཚའི་བུ་རྒྱུད་ཡོངས་ཀྱིས་ཤེས་པར་མཛོད།།
བོད་ཡུལ་ལན་གཅིག་སྐྱེས་པའི་སྐལ་པ་འདི།།
དབང་འབྱོར་གྲགས་པའི་དཔལ་དང་མི་ལྡན་ཡང་།།
གངས་ཀྱི་རྭ་བའི་ཕྱི་རོལ་མངོན་བརྒལ་ཏེ།།
ཁྱོད་ཉིད་མཇལ་བའི་སྐལ་པ་འདི་ཡིས་འཚེངས།།
བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བ་ཐམས་ཅད་མཁྱེན་པ་འགྲོ་བ་སེམས་ཅན་མཐའ་ཡས་པའི་དོན་དུ་སྐུ་ཚེ་བརྟན་པའི་ཕྱིར་དུ་སྨོན་པ་དགེའོ།།