རྡོ་རྗེ་རྩེ་མོའི་ལྟ་སྒོམ་སྤྱོད་པའི་མགུར་རང་བྱུང་རྫ་རིའི་སྒྲ་བརྙན་ཞེས་བྱ་བ།

རྩོམ་ཡིག་འདི་ཐེངས་ 92 བཀླགས་འདུག

རྡོ་རྗེ་རྩེ་མོའི་ལྟ་སྒོམ་སྤྱོད་པའི་མགུར་རང་བྱུང་རྫ་རིའི་སྒྲ་བརྙན་ཞེས་བྱ་བ།

རྨེ་སྤྲུལ་བསྟན་འཛིན་རྒྱ་མཚོ།

ཀུན་བཟང་ཆོས་སྐུའི་བླ་མ་རང་མལ་ནས་བཞེངས་ཏེ། །ཚངས་གནས་བདེ་ཆེན་འཁོར་ལོའི་ཐོར་ཚུགས་རྩེར་ཕེབས་དང་། །
བཅུ་དྲུག་འདབ་མ་འཛུམ་པའི་མགྲིན་འཁོར་གྱི་ཐོལ་གླུ། །ངག་རིག་འགྱུར་ཁུག་སྟོང་གི་གདངས་དབྱངས་སུ་ངས་འགུགས། །

འཁོར་འདས་བར་ལག་གྱེས་ཁའི་རི་རྩེ་ནས་འགྲེངས་ཏེ། །ཡེ་བབས་སོར་བཞག་ངང་ནས་རྒྱང་སོ་ཞིག་བཙུགས་ཚེ། །
ཀུན་བྱེད་སྒྱུ་མ་མཁན་པོའི་རྩད་གདར་དེ་ཆོད་ནས། །ཕྱི་རོལ་ཡུལ་ནས་རྙེད་པའི་རེ་ཐག་ཅིག་ཆད་འོང་། །

སེམས་རིག་ལ་ཤན་འབྱེད་པའི་ལྷག་མཐོང་གི་རལ་གྲིས། །ཐ་མལ་གནས་འགྱུའི་ཡོལ་བ་ཕྱེད་ཚལ་དུ་གཤགས་ཚེ། །
གསུམ་བྲལ་བཞི་ཆའི་དྭངས་གསལ་སྒེའུ་ཁུང་གི་ངོགས་ནས། །ཟང་ཐལ་མ་མའི་རང་ཞལ་རྗེན་པ་རུ་མཇལ་སྐད། །

ཡེ་སྟོང་གཤིས་ཀྱི་བཞུགས་ཚུལ་ནམ་མཁའ་ཡི་ཀློང་ཆེན། །ཡིད་དཔྱོད་རྒྱས་འདེབས་བློ་ཡིས་ཡང་སྟོང་ཞིག་ཅི་དགོས། །
གཏིང་གསལ་རང་དྭངས་གནས་ལུགས་ཆུ་དྭངས་ཀྱི་ནོར་བུ། །སེམས་འཛིན་བཅོས་མའི་རྩོལ་བས་ཡང་དྭངས་ཤིག་ཅི་དགོས། །

ཆེད་འཛིན་སྒོམ་པའི་རི་བོ་རྨང་བསྒྱེལ་དུ་བཏང་ཞིང་། །ཡངས་པ་ཕུལ་བའི་རྒྱ་མཚོ་གཏིང་སྤྲུགས་སུ་བྱས་ཏེ། །
ད་ནི་ཡེངས་བསྒོམ་གཉིས་མེད་ངང་དྭངས་ཀྱི་རིག་པ། །སྣང་བ་གདོང་འདེད་ངང་ནས་སྐྱོང་སྣང་ཞིག་འདོད་དོ། །

འཇུར་དྲན་ཨོ་ལོས་རིག་པ་རྒྱང་འཚོས་དེ་མི་ཤེས། །སྐྱེ་འགག་གྲངས་ལ་འདེབས་པའི་འུར་ཆ་ཡིས་འདེབས་ཀྱིས། །
ཨ་ཅེ་གཉུག་མའི་དྲན་པའི་ཡིད་འཛིན་གྱི་བུ་མོ། །ཤར་གྲོལ་རྫི་གླུ་ལེན་བཞིན་སྐྱོ་གྲོགས་ལ་ཕེབས་ཤོག །

རྣལ་མ་སོ་མ་ལྷུག་པ་ཐ་མལ་གྱི་ཤེས་པ། །གྱིན་འདའ་ཁ་ཡན་ཆེན་པོར་ཐོག་བབས་སུ་གློད་ཚེ། །
རང་གསལ་རྟོག་མེད་ཉམས་མྱོང་ཤུགས་འབྱུང་དུ་རྡོལ་ཞེས། །གྲུབ་རིགས་རྒན་པོའི་གསུང་སྒྲོས་ཡིད་ཡུལ་ལ་འཁོར་བྱུང་། །

ཡིན་མིན་སྤྲོས་པའི་སྤུ་རིས་གྲུབ་མཐའ་ཡི་ཞེན་འཁྲིས། །བསལ་བཞག་བློ་ཡི་རྩིས་གདབ་གཟུང་འཛིན་གྱི་རྟོད་ཕུར། །
རེ་དོགས་འགྱུ་འཕྲོའི་རིག་པ་ཀུན་རྟོག་གི་སྣོན་མ། །གུ་ཡངས་ཆོས་ཉིད་འཁོར་ལོར་ཕྱམ་གཅིག་ཏུ་སྐྱུར་ཐོང་། །

གནས་ཀྱང་དྲན་མེད་ཧད་པོའི་མུན་བསྒོམ་དུ་མ་སོང་། །འགྱུ་ཡང་རིག་རྩལ་ཕྱིར་ཤོར་འཁྲུལ་ཤེས་སུ་མ་འབྱམས། །
རིག་ཀྱང་ཆེད་འཛིན་ཕུར་ཚུགས་གཟའ་གཏད་དུ་མ་གོལ། །གཤིས་ཀྱི་གནས་ལུགས་སྐྱོང་ན་འདི་བཞིན་དུ་སྐྱོང་མཛོད། །

གཟུང་འཛིན་འཁྲུལ་བའི་མུན་པ་དགུ་བརྩེགས་ཀྱི་ཁྲོད་ནས། །ཆགས་སྡང་སྲིན་བྱའི་གད་མོ་རྣ་བ་རུ་གཟན་ཡང་། །
སྣང་ཤེས་ཐིག་ཕྲད་འཇིག་པའི་རིག་སྟོང་གི་ཁྲི་གདུགས། །རང་བཞག་ཤར་རིའི་རྩེ་ནས་རང་ལམ་དེ་བསྙེགས་འོང་། །

བྱུང་རྒྱལ་ཉམས་ཀྱི་ངང་ནས་ལྟད་མོ་ཞིག་བལྟས་ཚེ། །བར་མེད་ཐོལ་གྱིས་འཕྲོ་བའི་རྣམ་རྟོག་གི་འདུ་འཕྲོ། །
རྒྱ་གྲོལ་ལྷུན་མཉམ་ཡངས་པའི་གཞི་ཀློང་དུ་ཐིམས་ཏེ། །ན་བུན་མཁའ་ལ་ཡལ་བའི་དཔེ་ཟླ་ལ་ཆས་འགྲོ། །

སྣང་བའི་ཡུལ་ཐོག་སེམས་ཀྱི་འཁྲི་བ་དེ་ཆོད་ཅིང་། །སྟོང་པའི་སེམས་ཐོག་ཡུལ་གྱི་རྫུན་ཕུགས་དེ་བརྡིབས་ནས། །
ཡུལ་སེམས་གཉིས་མེད་ཟང་ཐལ་ནམ་མཁའ་ལ་མདུང་བསྐོར། །ཀུན་མཉམ་ཕྱལ་བ་ཆེན་པོའི་དགོངས་ཀློང་དུ་སྐྱེལ་གཏོང་། །

ཚོགས་དྲུག་ལྷུག་པའི་དགོངས་པ་ཉམས་འོག་ཏུ་ཚུད་དེ། །གང་ཤར་རྗེས་མེད་རང་གྲོལ་བར་སྣང་གི་བྱ་རྗེས། །
སྣང་རིག་གཉིས་མེད་ཀློང་ཆེན་ཡེ་རྒྱ་ཡིས་ཐེབས་ན། །ཇི་ལྟར་སྤྱད་ཀྱང་སྒྱུ་མའི་རོལ་པ་ལས་ཅི་ཡོད། །

ཆོས་ལ་འགྲན་ཟླ་མེད་དོ་ཀུན་བཟང་གི་ཐུགས་ཏིག །རྗེ་ལ་དོ་ཟླ་མེད་དོ་བརྒྱུད་གསུམ་གྱི་བླ་མ། །
གྲོགས་ལ་མཚུངས་ཟླ་མེད་དོ་རིག་འཛིན་གྱི་ཚོམ་བུ། །སྐལ་བཟང་ལས་འཕྲོ་བསམ་ཞིང་སྣང་བ་འདི་སྐྱིད་དོ། །

ཀྱེ་ཧོ་རྡོ་རྗེ་སྙིང་པོའི་ལྷུན་པོ་ཡི་ཟོམ་ནས། །ཐེག་བརྒྱད་རི་གླིང་བཀོད་པར་རྒྱང་ལྟ་ཞིག་བྱས་ཤིང་། །
ཀློང་ཆེན་གཡུ་འབྲུག་སྔོན་མོའི་མགྲིན་པ་དེ་གཡར་ཏེ། །སྣང་སྲིད་གཞི་ནས་སློང་བའི་ང་རོ་ཞིག་སྒྲོག་འདོད། །

ཡིད་སྨོན་རྫ་རི་དཀར་པོའི་རྒོད་ཚང་གི་ལྟེབས་ན། །ཉམས་ཞེན་སྒོང་རྒྱའི་སྦུབས་གནས་མདང་སྐྱེས་ཀྱི་བྱེའུ་ཆུང་། །
རྟོགས་པའི་གཤོག་རྩལ་ཞན་ཡང་ཁྱུང་ཆེན་གྱི་རིགས་རྒྱུད། །ད་ལྟ་ཉིད་ནས་གདོད་མའི་ནང་དབྱིངས་ལ་འཕུར་འགྲོ། །

ཞེས་པ་འདི་ནི་རང་ལ་ཉམས་རྟོགས་ཡོན་ཏན་གྱིས་དབུལ་ཡང་རྫོགས་པ་ཆེན་པོའི་ཆོས་ལ་མོས་པ་ལམ་བྱེད་ཀྱི་འདུ་ཤེས་ཀྱིས་ལྟ་སྒོམ་སྤྱོད་གསུམ་གོ་ཡུལ་དུ་བྱས་ཤིང་། དོན་བརྒྱུད་དགོངས་པའི་ཕ་ཕོག་ཡིད་ལ་བརྣགས་ཏེ་རིག་འཛིན་གོང་མ་རྣམས་ཀྱི་གསུང་གི་བྲག་ཆར་བཟློས་ཏེ་རྩེད་འཇོའི་རོལ་པས་ཡི་གེའི་རིས་སུ་ཕབ་པའོ། །བསྟན་རྒྱམ་པས་ཤིང་སྤྲེལ་ཟླ་ཚེས་ལའོ། །