སྤྲིན་དཀར་ལམ་རྙིང་མཇལ་བའི་སྤྲོ་སྣང་།

རྩོམ་ཡིག་འདི་ཐེངས་ 240 བཀླགས་འདུག

༄༅། །སྟོན་པའི་རྣམ་ཐར་སྤྲིན་དཀར་ལམ་རྙིང་མཇལ་བའི་སྤྲོ་སྣང་
བདུད་རྩིའི་ཐིགས་པ་ཞེས་བྱ་བ།

ཐོག་མར་དགེ་བ་མཆོད་བརྗོད།

ན་མོ་བུདྡྷ་ཡ།

རླབས་ཆེན་ཐུགས་ཀྱི་དམ་བཅའ་བརྟན་པོ་ཞིག །འགྱུར་མེད་རྡོ་རྗེའི་བྲག་གི་གཤིས་སུ་གྲུབ། །
ལྷན་སྐྱེས་ཤེས་རབ་མེ་ལྕེ་རྣོན་པོ་ལ། །ཤེས་བྱའི་གནས་ལུགས་འཚོལ་བའི་ཐུགས་སྟོབས་རྒྱས། །

ཕྱི་ནང་དཀའ་སྡུག་ལམ་འཕྲང་རིང་མོ་རུ། །གཅིག་ནས་གཅིག་ཏུ་བརྒྱུད་དེ་བགྲོད་པ་ཡི། །
བརྩོན་པའི་འདུན་པ་ནམ་ཡང་མ་ལྷོད་པས། །ཞི་བསིལ་ཐར་ལམ་དཀར་པོའི་ལམ་སྣེ་རྙེད། །

སྡུག་བསྔལ་གསུམ་གྱིས་མནར་བའི་འགྲོ་བ་ལ། །ཡང་དག་ལམ་གྱི་སྣང་བ་གསལ་མཛད་པ། །
ཐམས་ཅད་མཁྱེན་པ་ཤཱཀྱ་ཐུབ་པ་ཞེས། །གྲགས་པའི་ས་ཆེན་ཁྱབ་ལ་གུས་པས་འདུད། །

གང་གི་རྣམ་ཐར་རྒྱ་མཚོ་ཆེན་པོ་ལས། །ཐུན་མོང་གདུལ་བྱ་མི་ཡི་འགྲོ་བ་ལ། །
ཇི་ལྟར་སྣང་ཚུལ་གསལ་བར་སྟོན་པའི་ངག།།སྤྲིན་དཀར་ལམ་རྙིང་མཇལ་ལ་སྤྲོ་བ་སྐྱེས། །

དུས་ཀྱི་རྒུད་པའི་མུན་པ་འཐིབས་པའི་ཀློང་། །རྣམ་མང་རིག་གནས་རྒྱུ་སྐར་བཀྲ་མོད་ཀྱང་། །
ཐུབ་བསྟན་ཉི་མའི་འོད་དང་འཕྲད་པ་འདི། །སྔོན་བསགས་ལས་འཕྲོ་མ་དམན་སྐལ་བ་བཟང་། །

བར་དུ་དགེ་བ་གཞུང་དོན།

༡༽
དེ་ཡང་སྔ་མ་སྔོན་གྱི་དུས་ཤིག་ལ། །འཕགས་ཡུལ་མ་ག་དྷ་ཡི་ཤར་གྱི་ཕྱོགས། །
འབྱོར་ཞིང་རྒྱས་ལ་ལོ་ཕྱུགས་ལེགས་པ་ཡི། །གྲོང་ཁྱེར་ཆེན་པོ་སེར་སྐྱ་ཞེས་བྱ་བ། །
༢༽
རྒྱལ་ཕྲན་ཆུང་ངུ་ཞིག་གི་མངའ་བདག་སྟེ། །གོའུ་ཏ་མའི་རིགས་རྒྱུད་མ་ནོར་བ། །
དཔའ་མཛངས་རྟུལ་ཕོད་ཅན་གྱི་རྒྱལ་པོ་དེར། །ཟས་གཙང་མ་ཞེས་ཀུན་ཀྱིས་འབོད་པར་གྱུར། །
༣༽
དེ་ཡི་ཟླ་གྲོགས་ལྷས་བསྟན་གྲོང་ཁྱེར་གྱི། །སྒྲ་སྒྲོག་ཅེས་པའི་ཡུལ་ནས་བསུས་པ་ཡི། །
མཛངས་མའི་ཡོན་ཏན་རྒྱན་གྱིས་ཕྱུག་པ་ལ། །སྒྱུ་འཕྲུལ་ཆེན་མོའི་མཚན་གྱི་སྙན་པ་འཕུར། །
༤༽
ཡབ་ཡུམ་ཟུང་གི་ཐབས་ཤེས་རོལ་པ་དང་། །འགྲོ་བའི་བསོད་ནམས་དུས་སུ་སྨིན་པ་ལས། །
ཉམས་དགའ་ཡིད་འོང་ལུམྦིའི་སྐྱེད་ཚལ་དུ། །གང་སྐུ་པདྨའི་འདབ་མ་གསར་དུ་བཞད། །
༥༽
དེ་ཚེ་ཡབ་ཆེན་རྒྱལ་པོ་འཁོར་དང་བཅས། །སྤྲོ་བའི་སེམས་པ་ཁོང་དུ་མ་ཤོང་བར། །
གྲོང་ཁྱེར་ཕྱི་ནང་ཀུན་ཏུ་དགའ་འབོད་ཀྱིས། །གཞོན་ནུའི་བཙས་སྟོན་ཡོ་ལང་རྒྱ་ཆེར་སྤྲོས། །
༦༽
ལོ་མང་དབེན་པའི་རི་ལ་གནས་བཅས་ཤིང་། །བསམ་གཏན་མངོན་ཤེས་གྲུབ་པའི་རི་ཁྲོད་པ། །
དྲང་སྲོང་ཆེན་པོ་མྱ་ངན་མེད་པ་ཡིས། །འགྲོ་བའི་ལམ་སྟོན་ཆེན་པོར་ལུང་དུ་བསྟན། །
༧༽
ཆུང་ནས་བརྩེ་བའི་ཡུམ་དང་བྲལ་གྱུར་ཀྱང་། །གཤིས་བཟང་མ་མ་སྐྱེ་དགུའི་བདག་མོ་ཡིས། །
ལྷད་མེད་བྱམས་པས་སྐྱོང་བའི་བཀའ་དྲིན་གྱིས། །ཡུམ་ཆེན་དངོས་སུ་བཞུགས་དང་ཁྱད་མེད་བྱུང་། །

༨༽
ཅུང་ཟད་ནར་ལ་སོན་པའི་དུས་སྐབས་ནས། །སྒྱུ་རྩལ་འདྲ་མིན་གནས་ལ་སྦྱོང་བརྩོན་བྱས། །
ཤཱཀྱའི་གཞོན་ནུ་ཁེངས་པའི་དྲེགས་པ་ཅན། །ཀུན་ལས་ཁྱད་དུ་འཕགས་པའི་ཡོན་ཏན་ངོམས། །
༩༽
རྒྱལ་སྲས་དོན་གྲུབ་འཇོན་ཐང་ཆེ་བ་དང་། །ཕྱི་ནང་འབངས་མིའི་བརྩི་བཀུར་མང་བ་དེ། །
གཅུང་པོ་ལྷས་སྦྱིན་ཕྲག་པ་དོག་པ་ཡི། །མི་བཟོད་མིག་ལ་གཟན་པའི་ཚེར་མར་གྱུར། །
༡༠༽
གཞོན་ནུའི་ཐུགས་རྒྱུད་ཁྱིམ་ལ་འཁོར་བའི་ཆེད། །ཁུ་བོ་བདུད་རྩི་ཟས་ཀྱི་གྲོས་འདུན་བཞིན། །
ལྷས་བསྟན་གྲོང་གི་སྲས་མོ་གྲགས་འཛིན་མ། །སྐུ་ཡི་དགྱེས་པའི་གྲོགས་སུ་བག་མ་བླངས། །
༡༡༽
གཤིས་འཇམ་གཞུང་དྲང་གཟུགས་ཀྱི་ལང་ཚོ་རྫོགས། །ལྷ་ཡི་སྲས་མོ་འདྲ་བའི་མཛངས་མ་དེས། །
གཞན་ཕན་ལས་ལ་བརྩོན་པའི་བྱ་བ་ཡིས། །རྒྱལ་སྲས་གཞོན་ནུའི་ཐུགས་ཀྱི་བཞེད་པ་བསྐངས། །
༡༢༽
འོན་ཀྱང་རྒྱལ་པོའི་མངའ་ཐང་ལོངས་སྤྱོད་རྣམས། །སྙིང་པོ་མེད་པ་སྒྱུ་མའི་ངང་ཚུལ་དང་། །
འབངས་མི་ཕལ་གྱི་སྡུག་བསྔལ་སྣ་ཚོགས་པ། །མངོན་སུམ་གཟིགས་པས་སྐྱོ་སྣང་གཏིང་ནས་སྐྱེས། །
༡༣༽
དེ་ཚེ་ཤེས་བྱའི་ཆོས་ཀྱི་གནས་ལུགས་གང་། །ཇི་བཞིན་རྟོགས་ཤིང་རང་དང་སེམས་ཅན་ཀུན། །
གཏན་བདེ་ཞི་བར་བགྲོད་པའི་ཐར་ལམ་ཞིག །འཚོལ་བའི་ཐུགས་འདུན་དྲག་པོ་ལྷག་པར་འཕེལ། །
༡༤༽
ཡབ་ཀྱི་རྒྱལ་རྒྱུད་འཛིན་པའི་རེ་བ་དང་། །སྲས་ཀྱི་ཆོས་ལམ་འཚོལ་བའི་འདུན་པ་གཉིས། །
གཞོན་ནུའི་ལང་ཚོ་རིམ་བཞིན་དར་དང་ལྷན། །འགྲན་པའི་ཚུལ་གྱིས་སེར་སྐྱའི་གྲོང་དུ་འཕེལ། །
༡༥༽
ཕྱི་ནང་རྐྱེན་ངན་འཚུབ་པའི་གྲོང་ཁྱེར་ནས། །མི་འདོད་སེམས་ཀྱི་སྐྱོ་གདུང་བྱུང་བའི་དུས། །
ཟླ་འོད་འོག་གི་དབེན་པའི་བས་མཐའ་རུ། །གླིང་བུའི་སྒྲ་ཡིས་སེམས་ཁ་གསོ་བར་མཛད། །

༡༦༽
དུས་ཀྱི་འགྱུར་བ་དབྱར་གྱི་ཆུ་བོ་བཞིན། །སྐད་ཅིག་མི་སྡོད་ལོ་ཟླའི་འགྲོས་ཀྱིས་བསྐྱལ། །
སྟེང་ཞལ་ཟུང་གི་རེ་བའི་སེམས་ཀྱི་རྟེན། །གཅེས་ཕྲུག་སྙིང་གི་ཐིག་ལེ་རུམ་ནས་མཆེད། །
༡༧༽
འོན་ཀྱང་ཐར་ལམ་འཚོལ་བའི་དམ་བཅའ་ལ། །སུས་ཀྱང་བཟློག་ཏུ་མེད་པ་ལེགས་རྟོགས་ཏེ། །
སྨོན་ལམ་ལས་ཀྱིས་འབྲེལ་བའི་སྲས་མོ་དེས། །དོན་གྲུབ་ཆོས་ལ་ཞུགས་པའི་མཐུན་འགྱུར་བསྐྲུན། །
༡༨༽
སྙིང་གྲོགས་སྙིང་གི་དུམ་བུ་རྒྱང་རིང་དུ། །འབྱོན་པར་ངེས་པ་སྟོན་མཚན་ནམ་གུང་དེར། །
གྲོགས་མེད་ཤུལ་དུ་ལུས་པའི་གྲགས་འཛིན་མ། །བདེ་བར་གཉིད་དུ་ཡུར་བ་མི་སྲིད་ཀྱང་། །
༡༩༽
རྒྱལ་སྲས་གཞོན་ནུའི་རིང་ནས་བརྣགས་པའི་དོན། །ཞི་བའི་ཐར་ལམ་འཚོལ་བའི་ཐོག་མ་ལ། །
ཅ་ཅོའི་སྒྲ་ཡིས་བར་ཆད་སྤོང་བའི་ཆེད། །མནལ་བའི་ཟོལ་གྱིས་སྲས་ཆུང་འགྲམ་དུ་ཉལ། །
༢༠༽
དེ་ཚེ་རྒྱལ་སྲས་གཞོན་ནུ་དོན་གྲུབ་ཉིད། །ཡབ་ཡུམ་བཙུན་མོ་སྲས་དང་འབངས་འཁོར་བཅས། །
ཤུལ་དུ་བཞག་སྟེ་དབེན་པའི་ནགས་ཁྲོད་དུ། །ཐར་པའི་ལམ་ཆེན་འཚོལ་ལ་མངོན་པར་ཕྱོགས། །
༢༡༽
ཅང་ཤེས་བསྔགས་ལྡན་མགྱོགས་པའི་བང་རྩལ་གྱིས། །ནམ་ལང་སྐྱ་རེངས་མགྲོན་དུ་མ་ཕེབས་གོང་། །
ཆུ་བོ་ཡིད་འོང་ལྡན་གྱི་འགྲམ་དུ་འབྱོར། །རྒྱལ་སྲས་དགྱེས་པའི་ཞལ་རས་འཛུམ་གྱིས་གང་། །
༢༢༽
གནག་སྣུམ་སྐྲ་ལོ་དབུ་ཡི་རྒྱན་མཆོག་དེ། །རྣོ་ངར་རལ་གྲི་འབར་བའི་ཞལ་དུ་བསྟབས། །
རིན་ཆེན་རྒྱན་ཆ་རིན་ཐང་བྲལ་བ་རྣམས། །རས་ཀྱི་ཐུམ་པོར་བཏུམས་ཏེ་ཕྱིར་ལ་བསྐུར། །
༢༣༽
ཚེ་གཅིག་མཐུན་པར་འགྲོག་པ་ཆུང་ངུའི་གྲོགས། །ཅི་གསུང་བཀའ་བཞིན་སྒྲུབ་པ་བྲན་གྱི་ཕུལ། །
འདུན་པའི་མིག་གཉིས་མཆི་མའི་ཆར་གྱིས་བརླན། །རྟ་མཆོག་སྒ་སྟོང་ཁྲིད་ནས་ཁྱིམ་དུ་འབྱོར། །

༢༤༽
རྒྱལ་སྲས་ཆོས་ལམ་གཉེར་བའི་འཕྲིན་པ་དང་། །ཡབ་ཡུམ་ཟུང་གི་སྐྱོ་བའི་སྤྱན་གྱི་ཆབ། །
གྲགས་འཛིན་མ་ཡི་སྙིང་གི་ན་ཟུག་རྣམས། །ཤུལ་མིའི་སེམས་ལ་གཟན་པའི་དགྲ་རུ་གྱུར། །
༢༥༽
དེ་ནས་རྒྱལ་སྲས་ཞི་བའི་ནགས་སུ་ཕེབས། །ལྷིང་འཇགས་དབེན་པའི་འཚོ་བ་ཉམས་སུ་མྱོང་། །
རིན་ཐང་ཆེ་བའི་རྒྱལ་པོའི་ན་བཟའ་ཉིད། །རྔོན་པའི་ལུས་ཀྱི་ངུར་སྨྲིག་གོས་དང་བརྗེས། །
༢༦༽
ཐར་ལམ་སྟོན་པའི་སློབ་དཔོན་འཚོལ་བའི་ཆེད། །མྱུར་བའི་གོམ་སྟབས་ལྷོ་ཡི་ཕྱོགས་སུ་བསྒྱུར། །
མཐའ་མེད་ནགས་ཀླུང་སྟུག་པོ་བརྒྱུད་པའི་མཐར། །དྲང་སྲོང་རིང་འཕུར་བསྟི་བའི་གནས་སུ་འབྱོར། །
༢༧༽
ལྕང་ལོའི་ཟར་བུ་ཐུར་དུ་འཕྱང་བ་ཡི། །བསམ་གཏན་གྲུབ་པའི་དྲང་སྲོང་རྒན་པོ་དེས། །
རྗེས་སུ་བཟུང་སྟེ་གདམས་པ་ཅི་རིགས་བསྩལ། །རྩེ་གཅིག་འབད་པ་དྲག་པོས་ཉམས་སུ་བླངས། །
༢༨༽
རགས་པའི་རྣམ་རྟོག་ཞི་བའི་སེམས་ཐོབ་ཀྱང་། །དངོས་པོའི་གནས་ལུགས་ཇི་བཞིན་མ་རྟོགས་ན། །
སྲིད་པའི་སྡུག་བསྔལ་འཇོམས་པར་མི་ནུས་པས། །རྒྱལ་སྲས་གཞོན་ནུའི་ཐུགས་འདོད་ཚིམ་མ་གྱུར། །
༢༩༽
སླར་ཡང་ཐར་ལམ་ཟབ་མོ་འཚོལ་བའི་ཕྱིར། །བཀུར་འོས་སློབ་དཔོན་དེ་ལ་གྱེས་ཕྱག་ཕུལ། །
གཏིང་ཟབ་ཆུ་བོ་གངྒཱ་འཕྲེད་དུ་བཅད། །དྲང་སྲོང་ལྷག་སྤྱོད་བཞུགས་པའི་གནས་སུ་ཕྱིན། །
༣༠༽
འཇིག་རྟེན་པ་ཡི་བསམ་གཏན་མཐར་ཐུག་པ། །རིང་པོར་མ་ཐོགས་མངོན་དུ་བྱས་གྱུར་ཀྱང་། །
ད་དུང་ཐར་པའི་གོ་འཕང་མ་རྙེད་པས། །ཞི་བའི་ལམ་ཆེན་འཚོལ་ཕྱིར་གཞན་དུ་བསྐྱོད། །
༣༡༽
ཆུ་བོ་ནཻ་རཉྫ་ནའི་ཕར་འགྲམ་ན། །གདུག་པའི་གཅན་གཟན་རྒྱུ་བའི་ནགས་ཁྲོད་དུ། །
ལུས་ཀྱི་དཀའ་ཐུབ་དྲག་པོའི་བརྟུལ་ཞུགས་ཀྱིས། །ཟླ་དྲུག་དབེན་པའི་རི་ལ་བསྒོམས་པའི་མཐར། །

༣༢༽
དཀའ་སྤྱད་ཁོ་ནས་གྲོལ་བར་མི་འགྱུར་ཞིང་། །ལུས་སེམས་རྟེན་དང་བརྟེན་པ་ཆོས་ཉིད་ཕྱིར། །
ཞི་བའི་ཏིང་འཛིན་སྣང་བརྙན་འཆར་བ་ལ། །བདེ་ཐང་ལུས་ཀྱི་འཚོ་བ་དགོས་པར་གཟིགས། །
༣༣༽
དེ་ཚེ་སྔོན་སྨོན་ལས་ཀྱིས་བསྐུལ་བ་ཡི། །གྲོང་པའི་གསེབ་ནས་བྱུང་བའི་གཞོན་ནུ་མ། །
ལེགས་སྐྱེས་མ་ཡིས་བཅུད་ལྡན་འོ་ཐུག་ཕུལ། །སྐུ་ཡི་ཟུངས་བཅུད་གསོ་བའི་སྨན་དུ་གྱུར། །
༣༤༽
མ་ཧེ་འཚོ་བའི་རྫི་བོ་ཉམས་ཆུང་སྟེ། །བཀྲ་ཤིས་མིང་གིས་མཛེས་པའི་ཁྱེའུ་དེས། །
རྨ་བྱའི་སྒྲོ་མདངས་འདྲ་བ་ཀུ་ཤའི་རྩྭ། །དོན་གྲུབ་ཏིང་འཛིན་བསྒོམ་པའི་སྟན་དུ་ཕུལ། །
༣༥༽
མ་ག་དྷ་ཡི་བྱང་ཆུབ་ཤིང་དྲུང་དུ། །གཡོ་མེད་དམ་བཅའ་བརྟན་པོའི་སྐྱིལ་ཀྲུང་གིས། །
ཞི་བའི་ཏིང་ངེ་འཛིན་ལ་མཉམ་པར་བཞག །ཕྱི་ནང་བར་ཆད་བདུད་ལས་རྣམ་པར་རྒྱལ། །
༣༦༽
ཐོ་རངས་སྐར་ཆེན་དང་པོ་ཤར་བའི་སྐབས། །ཇི་སྙེད་ཤེས་བྱའི་གནས་ལུགས་ཁོང་དུ་ཆུད། །
སྒྲིབ་པའི་མུན་པ་སྟུག་པོ་མཐའ་ནས་སངས། །ཡུན་རིང་བརྩོན་པའི་འབྲས་བུ་མངོན་དུ་གྱུར། །
༣༧༽
ཐར་ལམ་གསལ་བའི་སྒྲོན་མེ་འོད་ཆེན་ཞིག །འཇིག་རྟེན་འདི་ན་སྣང་བའི་སྐལ་བཟང་དེས། །
རྨོངས་པའི་གཞན་དབང་གྱུར་པའི་འགྲོ་བ་རྣམས། །དེ་ནས་བཟུང་སྟེ་མགོན་དང་བཅས་པར་གྱུར། །
༣༨༽
བདུན་ཕྲག་བདུན་གྱི་ཉི་མ་རྫོགས་པའི་རྗེས། །རང་གིས་མངོན་དུ་བརྙེས་པའི་ཡང་དག་ལམ། །
རིས་མེད་འགྲོ་བ་ཀུན་ལ་སྤེལ་བའི་ཕྱིར། །ངེས་མེད་གཞན་དུ་འབྱོན་པའི་ཐུགས་ཐག་བཅད། །
༣༩༽
བྱས་པ་དྲིན་དུ་གཟོ་བའི་ལྷག་བསམ་གྱིས། །སྔར་གྱི་སློབ་དཔོན་རྣམ་གཉིས་འཚོལ་བཞེད་ཀྱང་། །
འཇིག་རྟེན་འདི་ནས་གཞན་དུ་གཤེགས་ཟིན་པས། །ཐོག་མའི་གདུལ་བྱར་རེ་བའི་ཐག་པ་ཆད། །

༤༠༽
ཀཽཎྜི་ནྱ་སོགས་ཆོས་ཀྱི་གྲོགས་པོ་ལྔ། །དམ་ཆོས་བདུད་རྩིའི་སྣོད་དུ་ལེགས་གཟིགས་ནས། །
དྲང་སྲོང་ལྷུང་བའི་ནགས་སུ་ཞབས་ཀྱིས་བཅག །ལྔ་སྡེའི་ནང་ཁྲིམས་ཞིག་སྟེ་གུས་བསུ་ཞུས། །
༤༡༽
སྟོན་པས་ཐོག་མར་བདུད་རྩིའི་སྒོ་དབྱེ་བར། །འདོད་ཡོན་ལོངས་སྤྱོད་སྤྲོས་པས་གཡེང་བ་དང་། །
ངལ་ཞིང་དུབ་པས་ལུས་སེམས་གདུང་བ་ཡི། །མཐའ་གཉིས་སྤང་སྟེ་ཐར་ལམ་གཉེར་ཚུལ་དང་། །
༤༢༽
སྐྱེ་རྒ་ན་འཆིའི་སྡུག་བསྔལ་ཤེས་པར་བྱ། །མ་རིག་ཀུན་འབྱུང་ལས་ཉོན་སྤང་བར་བྱ། །
དེ་དག་བྲལ་བའི་འགོག་པ་འཐོབ་པར་བྱ། །འཕགས་ལམ་ཡན་ལག་བརྒྱད་པོ་བསྒོམ་པར་བྱ། །
༤༣༽
དྲན་ཤེས་བག་ཡོད་གྲོགས་དང་མ་བྲལ་བས། །ཡང་དག་ལམ་འདི་ཚུལ་བཞིན་བསྟེན་པ་ན། །
སྲིད་པའི་སྡུག་བསྔལ་ཟུག་རྔུ་ལས་གྲོལ་ཏེ། །ཞི་བའི་གོ་འཕང་མཆོག་ལ་འཁྲིད་པར་གསུངས། །
༤༤༽
དེ་ཚེ་ཀཽཎྜི་ནྱ་སོགས་འཁོར་རྣམས་ལ། །ཆོས་ཀྱི་གནས་ལུགས་མཐོང་བའི་ཤེས་རབ་སྐྱེས། །
ཐར་ལམ་ཡང་དག་ཡིན་པའི་ངེས་ཤེས་རྙེད། །ཞིང་འདིར་མཆོག་གསུམ་སྣང་བ་དང་པོ་བྱུང་། །
༤༥༽
དེ་ནས་རིམ་བཞིན་ཆོས་ཀྱི་སྣང་བས་ཁྱབ། །གྲགས་པ་ལ་སོགས་རབ་ཏུ་བྱུང་བ་དང་། །
དེ་ཡི་ཡབ་ཡུམ་གཉིས་པོ་ལ་སོགས་པ། །ཁྱིམ་པའི་སློབ་མ་གཅིག་རྗེས་གཉིས་མཐུད་བྱུང་། །
༤༦༽
ཁྱིམ་པའི་རྟེན་ཅན་རྣམས་ཀྱི་བསླབ་གཞི་རུ། །རྩ་བཞི་ཆང་ལྔའི་བསླབ་ཁྲིམས་གསར་དུ་བཅས། །
གང་ལ་གང་འདུལ་ཐབས་མཁས་མཛད་པ་ཡིས། །སྐྱ་སེར་ཡོངས་ལ་ཐར་པའི་ལམ་ཆེན་བསྐྲུན། །
༤༧༽
རིགས་རུས་ཁྱད་མེད་ཕོ་མོའི་དབྱེ་བ་མེད། །ཐམས་ཅད་རྗེས་སུ་འཛིན་པའི་ཆོས་ལུགས་དེས། །
མཆོག་དམན་ཀུན་ཀྱི་ཡིད་དབང་རབ་ཏུ་འཕྲོག །ཉིན་བཞིན་རྗེས་སུ་འཇུག་པ་མང་དུ་འཕེལ། །

༤༨༽
དགེ་སློང་ལྔ་དང་ལྷན་ཅིག་གྲོས་བསྡུར་ཏེ། །སངས་རྒྱས་སྟོན་པ་མཁྱེན་བརྩེའི་བདག་ཉིད་ཆོས། །
ཁྲིམས་ལྡན་དགེ་འདུན་ཚོགས་ལ་སྐྱབས་འགྲོ་བའི། །སློབ་མ་རྗེས་འཛིན་ཆོ་ག་གཏན་ལ་ཕབ། །
༤༩༽
སླར་ཡང་ནཻ་རཉྫ་ནའི་འགྲམ་དུ་ཕེབས། །ལྟེང་རྒྱས་འོད་སྲུང་འདུལ་བའི་དུས་ལ་བབ། །
མེ་ལ་སྐྱབས་སུ་འགྲོ་བའི་རལ་པ་ཅན། །སྤུན་གསུམ་འཁོར་དང་བཅས་པ་ཆོས་ལ་བཙུད། །
༥༠༽
ཡང་དག་རྒྱལ་བ་ཅན་གྱི་སློབ་མའི་ཕུལ། །ཤེས་རབ་མཆོག་གྱུར་བཙུན་པ་ཤཱ་རིའི་བུ། །
གནས་བརྟན་རྟ་ཐུལ་ཞི་བའི་སྤྱོད་ལམ་གྱིས། །དགེ་བའི་ས་བོན་དད་པའི་ཆར་གྱིས་བརླན། །
༥༡༽
རྟེན་འབྲེལ་ཟབ་མོའི་ཚིགས་བཅད་ཐོས་ཙམ་གྱིས། །དངོས་པོའི་གནས་ལུགས་ཇི་བཞིན་ཁོང་དུ་ཆུད། །
རང་གི་བརྩེ་བའི་གྲོགས་ལ་འདུན་གྲོས་བཏབ། །མོའུ་འགལ་བུས་ཀྱང་རྟེན་འབྲེལ་ཆོས་ཉིད་རྟོགས། །
༥༢༽
སློབ་དཔོན་རྒྱལ་བ་ཅན་ལ་བཀའ་འཁྲོལ་ཞུས། །ཉིས་བརྒྱ་ལྔ་བཅུའི་འཁོར་དང་ལྷན་ཅིག་ཏུ། །
མཆོག་ཟུང་གཉིས་པོ་ཐུབ་པའི་རྗེས་སུ་ཞུགས། །བསྟན་པའི་གཞི་རྩ་བརླིང་བའི་རྟེན་འབྲེལ་འགྲིགས། །
༥༣༽
ཡུལ་དབུས་མ་ག་དྷ་ཡི་མངའ་བདག་སྟེ། །དབང་ཐང་ཆེར་ལྡན་གཟུགས་ཅན་སྙིང་པོ་ཡིས། །
གང་སྐུ་བསོད་ནམས་ཞིང་དུ་ཐོབ་པའི་ཚེ། །འོད་མའི་ཚལ་གྱི་དགོན་པ་སྐྱེས་སུ་ཕུལ། །
༥༤༽
ཕྱི་ནང་འདུ་འཛི་བྲལ་བའི་གནས་མཆོག་དེར། །བསླབ་པ་ཡོངས་སྦྱོང་དབྱར་གནས་ཐོག་མར་ཚུགས། །
སྲོག་ཆགས་གནོད་དང་ལུས་སྲོག་གནོད་པ་སྤོང་། །ཐོས་བསམ་བསྒོམ་པ་ཡར་ངོའི་ཟླ་བཞིན་འཕེལ། །
༥༥༽
གཟུགས་ཀྱི་ལང་ཚོ་རྫོགས་པའི་སྙན་གྲགས་ཅན། །ཨ་མྲ་སྐྱོང་མ་སྲས་དང་བཅས་པ་ལ། །
སེམས་ཀྱི་གཅོང་ནད་སེལ་བའི་གདམས་པ་གནང་། །དད་པའི་འདབ་སྟོང་རྒྱས་ཏེ་སྐྱབས་སུ་སོང་། །

༥༦༽
དེ་ཚེ་ཡབ་གཞིས་སེར་སྐྱའི་གྲོང་ཁྱེར་ནས། །གདན་འདྲེན་ཞུ་བའི་འཕྲིན་དང་བང་ཆེན་འབྱོར། །
དོན་གྲུབ་མགྲོན་པོ་རང་ཡུལ་ཕེབས་པ་ཡི། །སྙན་པའི་གཏམ་བཟང་འཕྲིན་ཆ་སྔོན་དུ་བསྐུར། །
༥༧༽
དཔའ་མཛངས་རལ་གྲི་ཅན་གྱི་རྒྱལ་སྲས་དེ། །ལྷུང་བཟེད་ཐོགས་པའི་དགེ་སྦྱོང་རྣམ་པ་ཡིས། །
བགྲང་བྱ་བདུན་གྱི་མུ་ཁྱུད་འཁོར་བའི་རྗེས། །ཡབ་སྲས་ལྷན་དུ་འཛོམས་པའི་སྐལ་བཟང་ཤར། །
༥༨༽
གྲགས་འཛིན་མ་དང་སྐྱེ་དགུའི་བདག་མོ་ཟུང་། །དགའ་སྐྱོ་འདྲེས་མའི་ཚོར་བ་རྣོན་པོ་ཡིས། །
འདྲེན་བྱེད་མཆི་མའི་ཆར་གྱིས་བརླན་བཞིན་དུ། །དོན་གྲུབ་ཕེབས་པའི་སྟ་གོན་ལས་ལ་བྲེལ། །
༥༩༽
ཡབ་ཆེན་རྒྱལ་པོས་སྟོན་པ་འཁོར་བཅས་ལ། །ནྱ་གྲོ་དྷ་ཡི་སྐྱེད་ཚལ་བཞུགས་གནས་ཕུལ། །
དུས་དང་དུས་སུ་ནང་མི་ཡུམ་སྲས་རྣམས། །གསུང་གི་གདམས་པ་ཞུ་བའི་ཆེད་དུ་བཅར། །
༦༠༽
ཤཱཀྱའི་རིགས་ཀྱི་གཞུང་ཞབས་སྐུ་འཁོར་ལ། །རང་གི་ཐར་ལམ་འཚོལ་བའི་རྣམ་ཐར་དང་། །
ཉིན་རེའི་འཚོ་བ་དོན་ལྡན་ཡོང་ཐབས་སོགས། །འདི་དང་ཕྱི་མར་ཕན་པའི་ལམ་སྟོན་གནང་། །
༦༡༽
སྡུག་བསྔལ་ཕལ་ཆེར་རང་གིས་བཟོས་པའི་ཕྱིར། །ལྷ་ལ་གསོལ་བ་བཏབ་པ་ཁོ་ན་ཡིས། །
ཐར་པའི་གོ་འཕང་བགྲོད་པར་མི་ནུས་པས། །ཉོན་མོངས་རྩ་བ་དྲུང་ནས་འབྱིན་དགོས་གསུངས། །
༦༢༽
ཤེས་རབ་གྲོགས་དང་ལྡན་པའི་བརྩེ་བ་ཡིས། །རང་གཞན་ཐམས་ཅད་བདེ་བར་བྱེད་པས་ན། །
རང་སེམས་ཉོན་མོངས་རྒྱ་ལས་གྲོལ་བ་ལ། །བསླབ་པ་གསུམ་གྱི་ཉམས་ལེན་བྱེད་དགོས་གསུངས། །
༦༣༽
བྱམས་ལྡན་གྲགས་འཛིན་མ་ཡི་བཞེད་པ་ལྟར། །གྲོང་པའི་གསེབ་ཀྱི་ཕྲུ་གུ་མང་པོ་ལ། །
སྔོན་བྱུང་ཁྱེའུ་སྤྲིན་གྱི་སྐྱེས་རབས་དང་། །ཤེས་རབ་བྱམས་བརྩེའི་བསླབ་བྱ་ལེགས་པར་གདམས། །

༦༤༽
གཞོན་པའི་ལང་ཚོ་རྒྱས་པའི་གཅུང་དགའ་བོ། །མཛེས་ལྡན་ཆུང་མའི་གཟུགས་ལ་རབ་ཆགས་ནས། །
ངུར་སྨྲིག་འཆང་ལ་སྤྲོ་བ་དབེན་ན་ཡང་། །ཐབས་མཁས་ཐུགས་རྗེའི་ལྕགས་ཀྱུས་རྗེས་སུ་བཟུང་། །
༦༥༽
སྐུ་ན་ཕྲ་བའི་སྲས་ཆུང་སྒྲ་གཅན་འཛིན། །གང་གི་ཐུགས་རྗེའི་སྐྱབས་ཀྱི་གྲིབ་བསིལ་འོག།།
དགེ་ཚུལ་སྡོམ་པའི་བསླབ་པ་ལེགས་ནོས་ཏེ། །བཙུན་པ་ཤཱ་རིའི་བུ་ཡི་སློབ་བུར་གྱུར། །
༦༦༽
ཤཱཀྱ་མིང་ཆེན་དང་ནི་མ་འགགས་པ། །ཀུན་དགའ་བོ་དང་ལྷས་བྱིན་བཟང་ལྡན་སོགས། །
རྒྱལ་སྲས་རྣམས་ཀྱང་བསམ་པ་གཅིག་མཐུན་གྱིས། །རབ་བྱུང་ཞུ་བར་ཕེབས་དང་ལྷན་ཅིག་ཏུ། །
༦༧༽
འདྲེག་མཁན་རིགས་ལས་སྐྱེས་པའི་ཉེ་བ་འཁོར། །རྗེས་སུ་གཟུང་བའི་གསོལ་འདེབས་ཞུས་པའི་མོད། །
རྒྱལ་སྲས་རྣམས་ཀྱི་སྔོན་དུ་བསྙེན་པར་རྫོགས། །རིགས་རུས་མཆོག་འཛིན་དྲེགས་པ་ཟིལ་གྱིས་མནན། །
༦༨༽
ལྷོ་ཕྱོགས་ཀོ་ས་ལ་རུ་ཕེབས་ལམ་དུ། །མགོན་མེད་ཟས་སྦྱིན་དགེ་བའི་བག་ཆགས་སད། །
སངས་རྒྱས་ཞེས་པའི་མཚན་ཙམ་ཐོས་པའི་མོད། །ཡིད་ལ་དད་པའི་དགའ་བ་མཆོག་ཏུ་འཕེལ། །
༦༩༽
གཏོང་སེམས་ཆེན་པོས་རྒྱལ་བུ་རྒྱལ་བྱེད་ཚལ། །ས་གཞི་གསེར་གྱིས་བཀང་ནས་ལེགས་ཉོས་ཏེ། །
སྟོན་པ་འཁོར་དང་བཅས་པའི་བཞུགས་གནས་ཕུལ། །བཤད་སྒྲུབ་ཆོས་ཀྱི་བསྟི་གནས་ཆེན་པོར་གྱུར། །
༧༠༽
ཡངས་པ་ཅན་དུ་ཨ་མྲ་སྐྱོང་མ་ཡིས། །བསྙེན་བཀུར་ཞུས་ཏེ་གསུང་གི་གདམས་པ་ཉན། །
ལི་ཙ་བཱི་ཡི་རྒྱལ་སྲས་མང་པོ་ཡང་། །སྟོན་པའི་རྗེས་སུ་འཇུག་པའི་སློབ་མར་གྱུར། །
༧༡༽
ཁེངས་དྲེགས་ཅན་གྱི་རྒྱལ་པོ་གསལ་རྒྱལ་ཡང་། །ཐུགས་བརྩེ་ཞི་བའི་འོད་ཀྱིས་རེག་པའི་མོད། །
སྲས་དང་བཙུན་མོ་ནང་འཁོར་བཅས་པ་ཡིས། །གང་གི་ཞབས་སེན་རལ་པའི་རྩེ་མོར་བཀུར། །

༧༢༽
ལན་དང་རྣམ་པར་སྨིན་ལ་མི་རེ་ཞིང་། །ཕྱོགས་དང་རིས་ཀྱི་དབྱེ་བ་མི་བྱེད་པའི། །
ཀུན་ལ་སྙོམས་པའི་སྙིང་རྗེ་ཆེན་པོ་དེས། །ཐམས་ཅད་དབང་དུ་བསྡུ་ལ་ཅི་ཞིག་ཚོམ། །
༧༣༽
དེ་ཕྱིར་ཡུལ་མི་མཆོག་དམན་དུ་མ་ཞིག།།ཉིན་བཞིན་སངས་རྒྱས་རྗེས་སུ་ཞུགས་པའི་ཚེ། །
སྲོལ་རྒྱུན་འཛིན་པའི་བྲམ་ཟེ་འགའ་ཞིག་གི། །མི་འདོད་མིག་ལ་གཟན་པའི་རྣམ་པའང་བྱུང་། །
༧༤༽
རེ་ཞིག་དུས་ན་སེར་སྐྱའི་གྲོང་ཁྱེར་ནས། །ཡབ་ཆེན་སྙུན་གྱིས་ཟིན་པའི་འཕྲིན་ཆ་འབྱོར། །
ཤཱཀྱའི་རྒྱལ་སྲས་རྣམས་དང་ལྷན་ཅིག་ཏུ། །སྟོན་པ་མཆོག་ཉིད་རང་ཡུལ་ཕྱོགས་སུ་ཕེབས། །
༧༥༽
རྒྱལ་པོ་ཟས་གཙང་ཕྱི་མའི་ལམ་རྒྱགས་སུ། །ཉམས་ལེན་གདམས་པའི་སྙིང་པོ་བསྩལ་བའི་རྗེས། །
ཡབ་སྲས་མ་བགྲོས་དགོངས་པ་གཅིག་མཐུན་གྱིས། །རྒྱལ་སྲས་མིང་ཆེན་རྒྱལ་པོའི་ཚབ་ཏུ་བསྐོས། །
༧༦༽
ཡབ་ཆེན་རྒྱལ་པོའི་སྐུ་གདུང་ཞུགས་འབུལ་སྐབས། །བྲམ་ཟེ་སྟོང་དང་དགེ་སློང་ལྔ་བརྒྱ་ཡིས། །
ཆོ་ག་སྤེལ་དང་མདོ་སྡེ་བཀླག་པ་སོགས། །སོ་སོའི་ལུགས་ཀྱིས་དགོངས་རྫོགས་མཆོད་འབུལ་ཞུས། །
༧༧༽
སྐྱེ་དགུའི་བདག་མོས་ནན་གྱིས་ཞུས་པའི་ངོར། །ཤཱཀྱའི་རིགས་ཀྱི་བུད་མེད་མང་པོ་ཞིག །
ལྕི་ཆོས་བརྒྱད་པོ་བཅས་ཏེ་བསྙེན་པར་རྫོགས། །རྣམ་བཞིའི་འཁོར་གྱི་ཐོག་མ་དེ་ནས་བྱུང་། །
༧༨༽
ཀོའུ་ཤམྦྷི་ཡི་གདངས་ཅན་གཙུག་ལག་ཏུ། །ལྟ་གྲུབ་རྗེས་སུ་འབྲང་བའི་དགེ་སློང་འགའ། །
ཕན་ཚུན་འཐབ་ཅིང་བརྩད་པར་གྱུར་པ་ལ། །རྩོད་པ་ཞི་བར་བྱེད་པའི་ཆོས་བདུན་བཅས། །
༧༩༽
ཉོན་མོངས་སྤོང་བའི་ཐབས་ལ་མི་བརྩོན་པར། །ལྟ་གྲུབ་འཆར་སྒོ་སྣ་ཚོགས་སྤེལ་བ་ཡིས། །
ཐར་ལམ་བགྲོད་ལ་ཕན་ནུས་མེད་པའི་ཚུལ། །དུག་ཅན་མདའ་ཡི་དཔེ་དང་སྦྱར་ཏེ་གསུངས། །

༨༠༽
ཐོག་མར་དགེ་འདུན་འདུས་སྡེ་ཚུགས་པའི་སྐབས། །བསླབ་ཁྲིམས་གཏན་ལ་ཕབ་པ་མེད་ན་ཡང་། །
བཟང་བྱིན་སོགས་ཀྱིས་ཉེས་པ་འགའ་རེ་བྱས། །དེ་ནས་བཟུང་སྟེ་བཅས་པ་རིམ་བཞིན་གནང་། །
༨༡༽
ཉེས་པའི་གླེང་གཞི་རེ་རེ་བྱུང་བའི་སྐབས། །དེ་ལ་བརྟེན་ནས་བཅས་པ་རེ་རེ་མཛད། །
སྡེ་ལྔའི་བསླབ་གཞི་ཆེ་ཕྲ་དུ་མ་རྣམས། །བརྒྱ་ཕྲག་གྲངས་ལས་བརྒལ་བ་རིམ་པར་བྱུང་། །
༨༢༽
དགྲ་མཐའི་གནས་སུ་དབྱར་གནས་བཞུགས་པའི་ཚེ། །ཐན་པའི་རྐྱེན་གྱིས་འཚོ་བ་ཤིན་ཏུ་དཀོན། །
ཚོང་པ་ཞིག་གི་རྟ་ཆས་ཚགས་རོ་རྣམས། །ཉིན་བཞིན་འཚོ་བའི་རྟེན་དུ་བཞེས་དགོས་བྱུང་། །
༨༣༽
མཁོ་དགུའི་འབྱོར་པ་བྱུང་ཡང་ཁེངས་པ་མེད། །ཉིན་རེའི་འཚོ་བས་ཕོངས་ཀྱང་ཞུམ་པ་མེད། །
མཐའ་གཉིས་བྲལ་བའི་བྱང་ཆུབ་ལམ་བཟང་ལ། །ཞུགས་པའི་དགེ་སློང་དེ་དག་ངོ་མཚར་ཆེ། །
༨༤༽
སྐུ་སྲས་སྒྲ་གཅན་འཛིན་པ་ལོ་ནར་སོན། །རྒྱལ་བྱེད་ཚལ་དུ་བསྙེན་རྫོགས་བསྒྲུབས་པའི་རྗེས། །
ཞི་བའི་ལམ་དུ་བགྲོད་པའི་སྒོ་གཅིག་པུ། །བདག་མེད་རྟོགས་པའི་གདམས་ངག་ཟབ་མོ་གནང་། །
༨༥༽
ནྱ་གྲོ་དྷ་རུ་དབྱར་གནས་བཞུགས་པའི་སྐབས། །རྒྱལ་ཕྲན་གཉིས་པོ་ཆུ་ཡི་དོན་དུ་བརྩད། །
ཚེ་སྲོག་གལ་ཆེན་ཡིན་པའི་གདམས་ངག་གིས། །ནང་མཐུན་ཞི་བའི་གནས་སུ་བདེ་ལ་བཀོད། །
༨༦༽
རེ་ཞིག་དུས་ན་ལོག་པའི་གཞན་དབང་གིས། །སོར་ཕྲེང་ཅན་གྱིས་མི་རྣམས་འཇིགས་ལ་བསྐུལ། །
གང་ཐུགས་བྱམས་པའི་འོད་ཀྱི་གཟི་བརྗིད་དེས། །ཁོང་ཡང་གནོད་མེད་ཞི་བའི་ལམ་དུ་དྲངས། །
༨༧༽
སྐམ་ལ་རིད་པའི་དགེ་སློང་ནད་པ་ཞིག །མགོན་མེད་གྲོགས་ཀྱིས་བོར་བ་གཟིགས་པའི་མོད། །
ནད་གཡོག་མཛད་པའི་རླབས་ཆེན་རྣམ་ཐར་དེས། །ལྷད་མེད་བརྩེ་བའི་རང་མདངས་ལྷག་པར་མངོན། །

༨༨༽
ལང་ཚོ་དགྲར་ལྡང་སེར་སྐྱ་བཟང་མོ་དང་། །སྡུག་བསྔལ་འཕྲང་རིང་བརྒྱུད་པ་ཨུཏྤལ་མདོག །
མི་འདོད་སྣ་དགུ་མྱངས་པའི་སྐེམ་མ་སོགས། །བུད་མེད་མང་པོས་ཞི་བའི་ཐར་ལམ་རྙེད། །
༨༩༽
གྲགས་འཛིན་མ་དང་མཛེས་དགའ་མ་ལ་སོགས། །ཐར་ལམ་འཚོལ་བའི་སྐྱེས་མ་མང་པོ་ཡིས། །
ངུར་སྨྲིག་རྒྱལ་འཛིན་འཆང་བའི་སྐལ་བཟང་ཐོབ། །ཕོ་མོ་མཆོག་དམན་ལྟ་བའི་སྲོལ་ཀ་ནུབ། །
༩༠༽
བསོད་ནམས་ལྡན་པའི་མགོན་མེད་ཟས་སྦྱིན་དང་། །དད་གུས་རབ་ལྡན་ས་ག་མ་ལ་སོགས། །
གཏོང་ལ་དགའ་བའི་སྦྱིན་བདག་མང་པོ་ཡིས། །དགེ་འདུན་སྡེ་གཉིས་ཚོགས་ལ་བསྙེན་བཀུར་ཞུས། །
༩༡༽
ཆོས་ཀྱི་དགོས་པ་གནས་ལུགས་རྟོགས་ཕྱིར་ཏེ། །ཆགས་སྡང་གཉིས་ཀས་འཆིང་བར་མཚུངས་པས་ན། །
ཆུ་བོ་བརྒལ་ནས་གདུང་གྲུ་ཁུར་བ་བཞིན། །ཆོས་ལ་ཞེན་ཅིང་ཆགས་པ་སྤོང་དགོས་གསུངས། །
༩༢༽
མཐོང་ངམ་ཐོས་སམ་དོགས་པ་བཅས་པ་ཡི། །ཤ་ཁྲག་ལོངས་སུ་སྤྱོད་པར་མི་རུང་མོད། །
དེ་ལས་གཞན་ལ་སུན་གཙེར་སྤང་བའི་ཆེད། །བཟང་ངན་ཇི་ལྟར་འབུལ་ཡང་ལེན་དགོས་གསུངས། །
༩༣༽
ཟབ་ཅིང་རྒྱ་ཆེ་སངས་རྒྱས་པ་ཡི་ཆོས། །གཞན་གྱིས་ཕྱི་ཚུལ་ཙམ་ལས་མི་རྟོགས་པས། །
སྐྱོན་ནས་བརྗོད་ཀྱང་ཁྲོ་བར་མི་བྱ་ཞིང་། །བསྟོད་པ་བྱས་ཀྱང་དགའ་བར་མི་བྱ་གསུངས། །
༩༤༽
བྲམ་ཟེ་ཆེན་པོ་སྭརྞ་དཎྜ་དང་། །བགྲོ་བའི་ཚུལ་གྱིས་ཆོས་གཏམ་གླེང་བའི་ཚེ། །
གནད་ཀྱི་དྲི་བ་འགའ་ཞིག་གསུངས་པ་ན། །སྤོབས་པའི་མགོ་བོ་སྨད་ཅིང་གུས་འདུད་ཞུས། །
༩༥༽
དེ་ཚེ་འཁོན་སེམས་འཆང་བའི་བྲམ་ཟེ་འགས། །རྫུན་གྱིས་སྐུར་བའི་གཡོ་ཇུས་བཤམས་ན་ཡང་། །
བདེན་པའི་ཉི་འོད་ལག་པས་ག་ལ་ཁེབས། །སླར་ཡང་མཛད་འཕྲིན་རྒྱས་པའི་གྲོགས་སུ་གྱུར། །

༩༦༽
གཞན་གྱི་ཕུན་ཚོགས་དཔལ་ལ་མི་བཟོད་པ། །སོ་སྐྱེ་ཕལ་གྱི་ཆོས་ཉིད་ཡིན་པས་ན། །
གནས་བརྟན་མཆོག་གྱུར་ཤཱ་རིའི་བུ་ལ་ཡང་། །གཞི་མེད་རྫུན་གྱིས་སྐུར་བ་འགའ་རེ་བྱུང་། །
༩༧༽
ཀེ་ཤ་པུཏྟའི་གཞོན་ནུ་འགའ་ཞིག་གིས། །གྲུབ་མཐའ་བཟང་ངན་བཀའ་འདྲི་ཞུས་པ་ལ། །
ལུང་ཚིག་ཁོ་ནར་སྐྱབས་སུ་འགྲོ་བ་དེ། །ཀུན་མཁྱེན་ཐུབ་པའི་རིང་ལུགས་མ་ཡིན་པས། །
༩༨༽
ལྟ་གྲུབ་འདྲ་མིན་ཇི་ལྟར་བཤད་ཀྱང་རུང་། །རྒྱུ་མཚན་ལྡན་ཞིང་མཁས་པའི་རྒྱབ་སྐྱོར་ཐོབ། །
ཉམས་ལེན་གྲོགས་སུ་གྱུར་ན་དང་དུ་བླང་། །དེ་ལས་ལྡོག་ན་སྤང་བར་བྱ་དགོས་གསུངས། །
༩༩༽
རྒྱལ་བྱེད་ཚལ་དུ་རྟེན་འབྲེལ་གསུང་བའི་སྐབས། །ཀུན་དགའ་བོ་ཡིས་དོགས་འདྲི་ཞུས་པའི་ངོར། །
ཤིན་ཏུ་རྟོགས་དཀའ་རྟེན་འབྲེལ་ཟབ་མོའི་དོན། །དྲིས་ལན་ཚུལ་གྱིས་གནད་དུ་བསྡུས་ནས་བསྟན། །
༡༠༠༽
དེ་ཡང་གང་ཞིག་སྟོང་དང་གང་གིས་སྟོང་། །གཞི་ལ་བརྟེན་ནས་བཞག་ཙམ་ཡིན་པའི་ཕྱིར། །
ཆོས་རྣམས་ཕན་ཚུན་རྟེན་ཅིང་འབྲེལ་བ་སྟེ། །རང་དབང་ཚུགས་ཐུབ་མེད་པ་ལྟོས་གྲུབ་ཙམ། །
༡༠༡༽
འདི་ཡོད་པས་ན་དེ་ཉིད་འབྱུང་བའི་ཕྱིར། །བདག་ཏུ་མ་གྲུབ་ཐམས་ཅད་སྟོང་པ་ཉིད། །
རྟག་ཆད་མཐའ་རུ་ལྷུང་ན་ལོག་རྟོག་སྟེ། །ཡོད་མེད་སྐྱེ་འཇིག་ཐམས་ཅད་རྟོག་པས་བཏགས། །
༡༠༢༽
རྒྱུ་དང་རྐྱེན་ལས་བྱུང་བའི་འདུས་བྱས་རྣམས། །ཀུན་རྫོབ་དབང་དུ་སྐྱེ་འཇིག་ཡོད་ན་ཡང་། །
གནས་ལུགས་དོན་དམ་བདེན་པའི་དབང་དུ་ན། །སྐྱེ་དང་འཇིག་པའི་སྤྲོས་པ་བྲལ་བར་གསུངས། །
༡༠༣༽
གནས་བརྟན་མོའུ་འགལ་བུ་ཡིས་ཞུས་པའི་ངོར། །བྱམས་ལྡན་ཕ་མའི་བཀའ་དྲིན་གཟོ་བའི་ཆེད། །
མི་ཚེ་དོན་ལྡན་བྱེད་པའི་བསླབ་བྱ་དང་། །དགག་དབྱེའི་ཉིན་པར་བསྔོ་སྨོན་མཆོད་འབུལ་གནང་། །

༡༠༤༽
དམ་པའི་ཆོས་ནི་ཉིན་རེའི་འཚོ་བ་དང་། །ཡུལ་གྱི་རིག་གཞུང་དག་དང་འབྲེལ་དགོས་པས། །
ས་གནས་སོ་སོའི་སྐད་ལྟར་བཀོལ་བ་ལས། །སྐད་ཡིག་གཅིག་ལ་བསྒྱུར་ན་མི་ལེགས་གསུངས། །
༡༠༥༽
སྒོམ་སྒྲུབ་ཉམས་སུ་ལེན་ལ་མི་ཕན་པའི། །འཇིག་རྟེན་རྟག་དང་མི་རྟག་ལ་སོགས་པ། །
ལྟ་གྲུབ་དྲྭ་བས་བཅིངས་པའི་དྲི་བ་རྣམས། །དེ་བཞིན་གཤེགས་པས་གང་ཡང་ལུང་མ་བསྟན། །
​༡༠༦༽
མཉན་དུ་ཡོད་པར་དགེ་སློང་སོ་ནཱ་ལ། །རྒྱུད་མངས་དཀྲོལ་བའི་སྐུད་པ་ཇི་བཞིན་དུ། །
དམ་ལྷོད་མཐའ་གཉིས་སྤོང་སྟེ་ཉམས་ལེན་ལ། །བརྩོན་ན་འབྲས་བུ་ཐོབ་པའི་ལམ་སྟོན་གནང་། །
༡༠༧༽
དེ་རྗེས་འོད་མའི་ཚལ་དུ་ལྷས་བྱིན་གྱིས། །བསླབ་གཞི་གསར་པ་ལྔ་པོ་སྙན་སེང་ཞུས། །
སྟོན་པ་མཆོག་གིས་དང་ལེན་མ་གནང་བས། །མི་བཟོད་སྡང་བའི་ཡིད་ཀྱིས་རབ་ཏུ་ཁྲོས། །
༡༠༨༽
རང་དང་ལྟ་སྤྱོད་མཐུན་པའི་དགེ་སློང་གྲངས། །བརྒྱ་ཕྲག་ལྔ་ཡི་ཚོགས་བཅས་དབྱེན་ལ་ཞུགས། །
མ་སྐྱེས་དགྲ་ཡི་མཐུན་རྐྱེན་ཐོབ་པ་ཡིས། །སྤོབས་པའི་ཁེངས་སེམས་བཅས་ཏེ་ལོགས་སུ་གྱེས། །
༡༠༩༽
སློབ་བུས་སྙན་གྲགས་ཆེད་དུ་བླ་མ་དང་། །སྲས་ཀྱིས་རྒྱལ་སྲིད་ཆེད་དུ་ཡབ་ལ་རྒོལ། །
རང་རང་འདོད་པའི་བསྒྲུབ་བྱ་མི་འདྲ་ཡང་། །ལོག་པའི་ལམ་དུ་ཞུགས་ལ་གཅིག་ཏུ་མཚུངས། །
༡༡༠༽
དེ་ཚེ་དགེ་སློང་ཕལ་ཆེར་ཡིད་ཕམ་ཞིང་། །ཅི་བྱ་གཏོལ་མེད་གནས་སུ་གྱུར་པའི་སྐབས། །
རྨད་བྱུང་ཐབས་ལ་མཁས་པའི་ཤེས་རབ་ཅན། །མཆོག་ཟུང་གཉིས་ཀྱིས་དགེ་འདུན་ཕྱེ་བ་བཟླུམས། །
༡༡༡༽
འཁོན་སེམས་དམ་དུ་འཆང་བ་ལྷས་བྱིན་གྱིས། །གོར་མོ་རྡོ་ཡི་ཤེད་མོང་གྲོགས་སུ་སྦྲན། །
གླང་ཆེན་སྨྱོན་པའི་གནོད་པ་མདུན་དུ་བཏང་། །སྟོན་པའི་སྐུ་ལ་འཚེ་བའི་སྦྱོར་བ་བརྩམས། །

༡༡༢༽
དེ་ཚེ་སངས་རྒྱས་ཐུགས་རྗེའི་བདག་ཉིད་དེས། །གནོད་མེད་བཟོད་པའི་གོ་ཆ་ལེགས་བགོས་ཏེ། །
འཚེ་མེད་བྱམས་པའི་མཚོན་ཆ་རྣོན་པོ་ཡིས། །འགལ་རྐྱེན་བར་ཆད་ཆུ་ཡི་རི་མོར་བསྒྱུར། །
༡༡༣༽
ལུས་ཀྱི་གཅོང་ནད་སེལ་ལ་མཁས་པ་ཡི། །གསོ་རིག་འཛིན་པ་འཚོ་བྱེད་གཞོན་ནུ་ཡིས། །
བསམ་པ་དཀར་པོའི་འདུན་གྲོས་སྣ་ཚོགས་དང་། །སྐུ་ཡི་ཟུག་རྔུ་བསལ་བའི་སྨན་བཅོས་ཞུས། །
༡༡༤༽
སྐྱེ་དགུ་བྱམས་པས་སྐྱོང་བའི་མངའ་བདག་སྟེ། །ཆོས་ཀྱི་སློབ་བུ་གཟུགས་ཅན་སྙིང་པོ་ཡི། །
སྐུ་ཕུང་ཞུགས་ལ་འབུལ་བའི་བྱེད་སྒོ་ལ། །སྟོན་པ་འཁོར་བཅས་བྱོན་ནས་ཐུགས་སྨོན་གནང་། །
༡༡༥༽
འདོད་ཡོན་ཡུལ་ལ་བརྟེན་པའི་བདེ་བ་ནི། །མཛེ་ནད་ཅན་གྱིས་མེ་ལ་བརྟེན་པ་བཞིན། །
སྡུག་བསྔལ་ཀུན་ཀྱི་འབྱུང་ཁུངས་ཡིན་པས་ན། །རང་དབང་སེམས་ཀྱི་བདེ་སྐྱིད་བསྐྲུན་དགོས་གསུངས། །
༡༡༦༽
དོན་ཆུང་འཇིག་རྟེན་འཚོ་ཚིས་སྣ་ཚོགས་པས། །རྟག་ཏུ་བྲེལ་བ་ཁྱིམ་པའི་སློབ་བུ་རྣམས། །
ཟླ་རེ་བཞིན་དུ་རྒྱུན་གྱི་ཉམས་ལེན་ལ། །དུས་ཁྲིམས་ཡན་ལག་བརྒྱད་པ་གཏན་ལ་ཕབ། །
༡༡༧༽
རྒྱལ་པོ་གསལ་རྒྱལ་ལེགས་པའི་ལམ་སྟོན་དུ། །སྲོག་ཁྲིམས་ལ་སོགས་འཚེ་བ་སྤོང་ཚུལ་དང་། །
མངའ་འབངས་རང་དབང་བདེ་སྐྱིད་སྒྲུབ་པའི་ཚུལ། །བློ་ཡི་མུན་པ་སེལ་བའི་སྒྲོན་མེ་སྤར། །
༡༡༨༽
མ་རུང་མཚམས་མེད་ལས་ངན་བསགས་པ་ཡིས། །འགྱོད་གདུང་ནད་ཀྱིས་གཟིར་བའི་མ་སྐྱེས་དགྲ། །
སྟོན་པ་མཆོག་གི་ཞལ་གསུང་བདུད་རྩིའི་བཅུད། །སེམས་ཀྱི་གཅོང་ནད་གསོ་བའི་སྨན་དུ་གྱུར། །
༡༡༩༽
འདུས་མཐའ་འབྲལ་བའི་ཆོས་ཉིད་བསླུ་བ་མེད། །སྟོབས་འབྱོར་ལྡན་པའི་རྒྱལ་པོ་གསལ་རྒྱལ་དང་། །
ཡོན་ཏན་མཆོག་ལྡན་བཙུན་པ་མོའུ་འགལ་བུ། །འཇིག་རྟེན་ཕྱི་མའི་ལམ་དུ་རིམ་བཞིན་གཤེགས། །

༡༢༠༽
གཞན་ཡང་ཤེས་རབ་མཆོག་གྱུར་ཤཱ་རིའི་བུ། །ཞི་བར་གཤེགས་པའི་འཕྲིན་ཆ་རྩུབ་མོ་དེས། །
ཨཱ་ནནྡ་ཡི་སེམས་རྩ་འཁྱག་གིས་བཟུང་། །སྟོན་པས་སེམས་གཅོང་གསོ་བའི་གདམས་པ་གནང་། །
༡༢༡༽
ཡངས་པ་ཅན་དུ་ཟླ་བ་དྲུག་ཙམ་བཞུགས། །རྣམ་བཞིའི་འཁོར་སློབ་ཐམས་ཅད་ཡོངས་བསྡུས་ཏེ། །
དྲན་པ་ཉེར་བཞག་ལ་སོགས་བྱང་ཕྱོགས་ཀྱི། །གདམས་དོན་གསུང་གི་ཉིང་ཁུ་སླར་ཡང་བསྩལ། །
༡༢༢༽
སྟོན་པའི་གསུང་གི་བདུད་རྩི་མྱོང་བ་ཡི། །ཐུགས་བསྐྱེད་ཕུན་ཚོགས་བྱང་ཆུབ་སེམས་དཔའ་དང་། །
འབྲས་བུ་བཞི་པོ་མངོན་དུ་བྱས་པ་སོགས། །བརྒྱུད་འཛིན་སློབ་ཚོགས་གྲངས་ལས་འདས་པ་བྱུང་། །
༡༢༣༽
ངུར་སྨྲིག་རྒྱལ་མཚན་འཆང་བའི་དགེ་སློང་ཁྱུ། །ཞི་བའི་གོམ་ཁ་དལ་གྱིས་བསྒྱུར་བའི་ཚེ། །
ཆང་གིས་མྱོས་པའི་གླང་ཆེན་སྨྱོན་པས་ཀྱང་། །གུས་པར་བྱེད་ན་གཞན་གྱིས་སྨོས་ཅི་འཚལ། །
༡༢༤༽
ལྗོངས་ནས་ལྗོངས་སུ་རིམ་པར་བྱོན་པའི་མཐར། །ཙུནྡའི་ཁྱིམ་དུ་གུང་ཚིགས་ཐ་མ་གསོལ། །
ཟས་དུག་ལྟ་བུས་ན་ཟུག་དྲག་པོ་བཞེས། །གཙང་པོ་བརྒལ་ཏེ་རྩྭ་མཆོག་གྲོང་དུ་ཕེབས། །
༡༢༥༽
སཱ་ལའི་ཚལ་དེར་དགོངས་པ་རབ་ལྷོད་ནས། །སྐྱེ་བའི་ཐ་མར་འཆི་བ་ཡོང་ངེས་ཤིང་། །
འདུ་བའི་ཐ་མར་འབྲལ་བ་ཡོང་ངེས་པས། །དགེ་སློང་རྣམས་ཀྱིས་མྱ་ངན་མ་བྱེད་གསུངས། །
༡༢༦༽
བགྲང་བྱ་དུ་མར་ལྷག་བསམ་ཟོལ་མེད་ཀྱིས། །སྐུ་ཡི་ཉེར་གནས་ཞབས་ཕྱི་ལེགས་ཞུས་ཤིང་། །
དྲན་པའི་ཡོན་ཏན་མཆོག་དང་ལྡན་པ་ཡི། །ཀུན་དགའ་བོ་ལ་བསྔགས་པ་རྒྱ་ཆེར་གནང་། །
༡༢༧༽
སྟོན་འཁོར་ལྷན་ཅིག་འདུས་པའི་མཚན་མོ་དེར། །འཁོར་གྱི་ཐ་མ་རབ་བཟང་བསྙེན་པར་རྫོགས། །
ཀུན་ཀྱིས་བརྩོན་འགྲུས་རྩོམ་པར་རྗེས་གདམས་ཏེ། །འཇིག་རྟེན་སྒྲོན་མེ་ཞི་བའི་དབྱིངས་སུ་གཟིམས། །

༡༢༨༽
དེ་ཚེ་སྣོད་བཅུད་རྟེན་གཞི་ས་ཆེན་པོ། །སྐྱོ་བའི་གར་གྱིས་གཡོ་བའི་རྣམ་འགྱུར་ངོམས། །
སཱ་ལའི་ཚལ་གྱི་མེ་ཏོག་འདབ་མ་རྣམས། །སྦྲང་ཆར་བཞིན་དུ་དལ་གྱིས་ཐང་ལ་བབ། །
༡༢༩༽
གནས་དེར་འདུས་པའི་འཁོར་སློབ་མང་པོ་ཞིག །ལུས་སེམས་མྱ་ངན་རླུང་གིས་རབ་གཡོས་ཏེ། །
ཅ་ཅོའི་ཚིག་གི་སྨྲེ་སྔགས་སྣ་ཚོགས་བཏོན། །ཁོར་ཡུག་ཀུན་ཏུ་སྐྱོ་གདུང་མུན་པས་བསྒྲིབས། །
༡༣༠༽
བཙུན་པ་མ་འགགས་པ་ཡིས་ཐོག་དྲངས་ཏེ། །དགེ་འདུན་རྣམ་པས་དབུགས་ཀྱི་འབྱུང་རྔུབ་དང་། །
སྟོན་པའི་གསུང་རབ་མདོ་སྡེ་དུ་མ་ཞིག །སྒྲ་དག་གསལ་བར་བཀླགས་ཏེ་མཚན་མོ་འདས། །
༡༣༡༽
དེ་ནས་ཕྱོགས་མཚམས་ཀུན་ནས་རིམ་བཞིན་དུ། །དད་ལྡན་སློབ་བུ་མང་པོ་ངང་གིས་འདུས། །
མེ་ཏོག་ལ་སོགས་མཆོད་རྫས་སྣ་ཚོགས་ཀྱིས། །སཱ་ལའི་ཚལ་དེར་ཡོངས་སུ་འགེངས་པར་བྱས། །
༡༣༢༽
སྦྱངས་པའི་ཡོན་ཏན་མཆོག་དང་ལྡན་པ་ཡི། །སྟོན་པའི་རྒྱལ་ཚབ་འོད་སྲུང་ཆེན་པོ་ཉིད། །
དགེ་སློང་ལྔ་བརྒྱ་དང་བཅས་རིངས་པར་བྱོན། །སྐུ་གདུང་མེ་ལ་འབུལ་བའི་དཔལ་འབར་བསྒྲོན། །
༡༣༣༽
མཆོད་པའི་རྟེན་མཆོག་སྐུ་ཡི་རིང་བསྲེལ་རྣམས། །དབུས་འགྱུར་འཆང་དང་ཡངས་པ་ཅན་ལ་སོགས། །
རྒྱལ་ཕྲན་སོ་སོའི་བསོད་ནམས་ཞིང་དུ་བགོས། །རྗེས་དྲན་དད་པའི་མཆོད་རྟེན་རེ་རེ་བཞེངས། །
༡༣༤༽
མཛད་པ་ཀུན་ལས་གསུང་གི་མཛད་པ་གཙོ། །དེ་ཕྱིར་མྱ་ངན་འདས་པའི་ཟླ་གཅིག་རྗེས། །
གནས་བརྟན་འོད་སྲུང་དང་ནི་ཉེ་བ་འཁོར། །ཐོས་པའི་མཆོག་གྱུར་ཀུན་དགའ་བོ་ལ་སོགས། །
༡༣༥༽
དགེ་སློང་ལྔ་བརྒྱ་ལྷན་ཅིག་འདུས་པའི་དབུས། །རྒྱལ་པོའི་ཁབ་ཏུ་ཟླ་བ་དྲུག་གི་རིང་། །
སྟོན་པའི་ཞལ་གྱི་གདམས་པ་ཇི་སྙེད་པ། །མི་ཉམས་ཡུན་དུ་གནས་ཕྱིར་བཀའ་བསྡུ་མཛད། །

ཐ་མར་དགེ་བ་སྨོན་ལམ།

སླར་སྨྲས་པ།

མུན་པའི་སྨག་ལ་སྒྲོན་མེ་ཇི་བཞིན་དུ། །ངེས་དོན་ཆོས་ཀྱི་རྒྱལ་པོ་ཉི་མའི་གཉེན། །
ཤཱཀྱའི་སྲས་ཀྱི་ཚུལ་དུ་འཇིག་རྟེན་འདིར། །ཡང་དག་ལམ་གྱི་སྟོན་པ་མཆོག་ཏུ་སྣང་། །

སྡུག་བསྔལ་གསུམ་གྱི་མུན་པར་འཁྱམ་པ་ཡི། །འགྲོ་རྣམས་ཐར་པའི་གྲོང་དུ་འཁྲིད་པའི་ཐབས། །
རྟེན་འབྱུང་འཚེ་མེད་ཞི་བའི་ཆོས་ཚུལ་ཞིག །ས་གསུམ་སྐྱེ་དགུ་ཡོངས་ཀྱི་མགོན་དུ་ཤར། །

འདོད་ཆུང་ཆོག་ཤེས་དབེན་པའི་ནགས་སུ་བསྟེན། །བག་ཡོོད་སྒོ་གསུམ་དགེ་བས་ཞི་ཞིང་དུལ། །
བསླབ་གསུམ་རྒྱན་གྱིས་མཛེས་པའི་དགེ་འདུན་སྡེ། །དད་ལྡན་བསོད་ནམས་བསག་པའི་ཞིང་དུ་གྱུར། །
​
དཀོན་མཆོག་རིན་ཆེན་གསུམ་གྱི་འོད་སྣང་གིས། །ཞིང་འདིའི་སྣོད་བཅུད་མཛེས་པར་བྱས་པའི་ཚུལ། །
སྤྲིན་དཀར་ལམ་རྙིང་ཡི་གེའི་གཟུགས་སུ་སྣང་། །མཇལ་བའི་སྐལ་བཟང་ཐོབ་པས་སྤྲོ་བ་འཕེལ། །

འཛམ་གླིང་ཤར་གྱི་ཕྱོགས་སུ་འཁྲུངས་པ་ཡི། །དྲན་པ་ཉེ་བར་བཞག་པའི་ཡབ་ཆེན་ཏེ། །
ཞི་བའི་གནས་བརྟན་ཆེན་པོ་གང་ཉིད་ལ། །བཀའ་དྲིན་རྗེས་སུ་དྲན་པས་གུས་ཕྱག་བགྱི། །

རང་ཡུལ་གངས་ཅན་ཞིང་ནས་ཕེབས་པ་ཡི། །རིག་གཞུང་ནང་དུ་འདྲེན་པའི་ལྷག་བསམ་ཅན། །
སྐད་གཉིས་སྨྲ་བའི་དབང་པོ་གང་དེ་ལའང་། །ཡི་རངས་དད་པའི་མེ་ཏོག་ལན་བརྒྱར་འབུལ། །

ལྔ་བརྒྱ་ཕྲག་བཅུའི་བསྟན་པ་གནས་པའི་ཚད། །ལོ་རེ་བཞིན་དུ་འགྲིབ་ལ་ཕྱོགས་མོད་ཀྱང་། །
ད་དུང་བསྟན་པའི་སྒྲོན་མེ་མ་ནུབ་པ། །བརྒྱུད་འཛིན་རིམ་བྱོན་རྣམས་ཀྱི་བཀའ་དྲིན་ལགས། །

རླབས་ཆེན་སྟོན་པའི་རྣམ་པར་ཐར་པ་ལ། །དད་པ་ཐོབ་པའི་བསོད་ནམས་ཅི་མཆིས་པ། །
མཐའ་ཡས་འགྲོ་ལ་ཕན་བདེ་འབྱུང་བའི་ཕྱིར། །བསྔོ་བར་བགྱིད་ན་དེ་བཞིན་འགྲུབ་གྱུར་ཅིག །

ཅེས་ཐབས་མཁས་ཐུགས་རྗེ་ཆེན་པོའི་བདག་ཉིད་སྟོན་པ་བཀའ་དྲིན་ཅན་གྱི་རླབས་ཆེན་མཛད་པའི་ཆ་ཤས་གསལ་བར་སྣང་བའི་རྟོགས་བརྗོད། སྤྲིན་དཀར་ལམ་རྙིང་ཞེས་བྱ་བ་དེང་དུས་རྒྱལ་ཕྱི་ནང་ཀུན་ཏུ་ཡོངས་སུ་གྲགས་ཤིང་བློ་གྲོས་མཆོག་དམན་ཐམས་ཅད་ཀྱིས་གོ་བདེ་བ་འདི་ཉིད་སླར་ཡང་ལེགས་པར་མཇལ་བའི་སྐལ་བ་བཟང་པོ་ཐོབ་པའི་སྐབས་སྟོན་པའི་རྣམ་ཐར་རྗེས་སུ་དྲན་པའི་དད་པའི་ས་བོན་ཙམ་དུ། གཞུང་དོན་ཚིགས་སུ་བཅད་པ་བརྒྱ་ཕྲག་གཅིག་དང་བཅུ་ཕྲག་གསུམ་ཉག་མ་ལྔའི་ལམ་དུ་དྲངས་ཏེ། གང་གི་རྗེས་སུ་འཇུག་པའི་རྟགས་ཙམ་འཆང་བ་ཨོ་རྒྱན་བསྟན་འཛིན་གྱིས། འཕགས་ཡུལ་ལྷོ་ཕྱོགས་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་ཆོས་སྡེ་རུ། རབ་གནས་ཤིང་འབྲུག་ལོའི་མགོ་ཟླ་བའི་ཚེས་ ༢༥ ལ་གྲུབ་པར་བྱས་པ་དགེའོ།། །།
​​