དིང་རི་ལ་ཕུལ་བའི་སྙན་ངག

རྩོམ་ཡིག་འདི་ཐེངས་ 2 བཀླགས་འདུག

སྡུག་གོད་ཆགས་ང་ཚོའི་ཐུན་མོང་བྱ།
དིང་རི་བ།
བཙན་ཞགས།

ས་ལ་སྟོད་དིང་རི་ཆ་མེད་ཡིན།།
ཆོས་དིང་རི་བརྒྱ་རྩ་ཆ་ཡོད་ཡིན།།
ས་ཆེན་པོས་བཞག་པའི་མྱ་ངན་འདི།།
ཕ་དམ་པས་སྔོན་ནས་མཁྱེན་ཡོད་འདྲ།།
ཆོས་གདམས་པ་རེ་རེའི་ཚིག་དོན་ལ།།
བློ་འཁོར་ཙམ་བྱུང་ངམ་དིང་རི་བ།།
གངས་དཀར་པོའི་དབུ་རྩེ་མཐོ་ས་དེ།།
ཙག་ལྷག་རླུང་རྒོད་སའི་ས་བབ་དེ།།
སྡེ་རོང་མ་འབྲོག་གི་དིང་རི་བ།།
ཕར་བལྟས་ན་དབུལ་བས་སྐྱོ་དུང་ངེ་།།
དེའི་སྟེང་ལ་མུ་གེར་ཟླ་ལྷག་བྱུང་།།
ཡིད་གདུང་བ་ལོས་ཆེ་དིང་རི་བ།།
ཡུལ་ཨ་མདོ་རྨ་ཆུའི་འབྲོག་ཐང་ནས།།
སྟོད་དིང་རི་ཟེར་ན་གནམ་མཐའི་བར།།
སེམས་གངས་དཀར་ཐོན་ན་སྐྱོ་ལྷིང་ལྷིང་།།
འཕྲིན་བརྙན་ལམ་བརྒྱུད་ན་གྲང་ཤུལ་ཤུལ།།
ས་ཁེམ་གང་ཕོད་སར་མ་ཐོན་མོད།།
འདོན་སྙན་ངག་གཉིས་ཀྱིས་གདུང་སེམས་ཡོད།།
སྤྱིར་འབྱུང་བཞིའི་འཇིགས་པ་དབང་མེད་རེད།།
ལས་གནམ་གྱིས་བསྐོས་ཀྱང་འཁྱོག་ཆེ་སོང་།།
ཡུལ་དབུལ་ཞིང་ཕོངས་བའི་དིང་རི་བའི།།
མགོ་ཁང་ཁྱིམ་ཞིག་སླ་ས་ཁུང་འདྲ།།
མིའི་ཁ་ངན་གོས་སྡུག་དེ་མཐོང་དུས།།
ཡིད་མཆི་མ་གཏིང་ནས་འཐོར་ཡོང་གི།
གྲོང་རེ་རེ་ཁད་ཀྱིས་ས་རྡོས་མནན།།
རྡུལ་གནམ་ལ་འཕྱུར་ནས་གངས་རི་བརྫད།།
ཤི་རྣམ་ཤེས་མང་པོ་གང་དུ་འཁྱམས།།
གསོན་རེ་བའི་མིག་ཟུང་ཇི་ལྟར་གཉོམ།།
སྤུན་མདོ་དབུས་ཁམས་ཀྱི་བུ་རྒོད་ཚོས།།
རོགས་རམ་འདེགས་ལག་པ་དྲོན་མོ་བརྐྱངས།།
ཚེ་འདི་ཕྱིར་བཀར་བའི་དིང་རི་བ།།
ཁྱིམ་བཟའ་ཚང་ཟེར་ན་ཕྱེད་ཀ་རེད།།
རྒྱུ་འབྱོར་བ་ཟེར་ན་ལག་སྟོང་རེད།།
གངས་དཀར་པོ་ཚང་རིགས་གཅིག་སྤུན།།
ཆོས་ཚིག་གཅིག་བཏོན་ན་དེ་སར་སྔོས།།
རྒྱུ་སྒོར་གཅིག་ཡོད་ན་དེ་སར་གཡུག།
ལས་སྐྱིད་སྡུག་གནམ་གྱི་འཁོར་ལོ་འདི།།
སུ་ཡིན་ཡང་སྟེང་ལ་འཁོར་ཉིན་ཡོད།།
སྡུག་སྨྲེ་སྔགས་འདོན་ཉིན་རོགས་ཐུབ་ན།།
ཆོས་དགེ་བ་ཟེར་ན་དེ་ལས་ཅི།།
སེམས་སྐྱོ་བས་མ་ཕམ་དིང་རི་བ།།
སྡུག་གོད་ཆགས་ང་ཚོས་ཐུན་མོང་བྱེད།།
༢༠༢༤/༡༢/༡༡