དིང་རི་ལ་ཕུལ་བའི་སྙན་ངག

རྩོམ་ཡིག་འདི་ཐེངས་ 4 བཀླགས་འདུག

དིང་རིའི་ས་ཡོམ།
སྐྱབས་ཆེན་བདེ་གྲོལ།
གངས་མཐོན་མཐིང་རྒྱལ་མོའི1འདབས་ཀྱི་ཆུ་མ་རྩི2དག་ལག་གདང་ལྷོད
བྱ་དཀར་གདང་ཞུགས3ཞེས་པའི་དཔེའང་རྡོ་རེག་པ་དུག་ཅན4དང་འཕྲད
དེ་སྔོན་རྒོད་ཚང་བྲག་རྒོད5འཇིག་བྱེད་ཀྱི་ལྕགས་ཀྱི་ལག་པ་མཁྲེགས་པོ་དེ
ས་སྐྱོང་བསྟན་མ6སྨྱོ་འབོག་ལངས་པ་དེས་གཡར་ནས་ཤེལ་དཀར་གྲོང་ཚོའི་སྙིང་ལ་བསྙབས
ཉིན་བྱེད་ཀྱི་ཐུ་འོག་ན་དག་ཞིང་ལ་རྒྱང་ལྟ་བྱས་པའི་ཨ་ཕྱི་དེའི་ཕྲེང་ཐག་འཐོར
ཇ་བསྲུབས་མའི་ཞིམ་མངར་གྱིས་ལུས་པོའི་ངལ་བ་སངས་པའི་སྤོ་བོ་དེའི་དཀར་ཡོལ་ཆག
འདི་ནི་མི་རྟག་པའི་ཆ་ཤས་ཤིག་ཡིན་པ་དིང་རི་བརྒྱ་རྩ་བས་ངོ་སྤྲོད་ཀྱང
ད་དུང་འགྲེལ་བཤད་ཅིག་དགོས་སྣང་སྐྱེས་པའི་མི་ནི
ང་དང་ཁྱོད་དེ་ཡིག་དྲུག་གི་བྱིན་རླབས་ལས་པདྨོའི་དྲི་བསུང་འཐུལ་བར་ཡིད་ཆེ་བའི
མགོ་ནག་བོད་པ་དག་ཡིན་ཏེ
བདུད་རྩི་དང་རྡོ་རྗེ་ལྟ་བུའི7ཞི་བྱེད་གཅོད་ཀྱི་གདམས་ངག་ཉིད
ལོ་ངོ་དགུ་བརྒྱའི་སྔོན་གྱི་གྲུབ་ཐོབ་ཅིག་གི་རྐང་གླིང་ལས་མཆེད་དེ
གངས་སུལ་གྱི་ཆབ་རོབ་དག་བརྟོལ་ནས་ལྷང་ལྷང་གྲག་པ
ང་ཚོ་ཁོ་ནས་ཆེད་དུ་རྣ་བ་མ་བླགས་ཀྱང་མངོན་འདོད་ཀྱི་དད་པར་བརྟེན་ཏེ་ཐོས་ཐུབ་བོ
དེ་བས དཔྱིད་ཀ་མ་སླེབ་གོང་ལ་འཆི་བ་སླེབས་ཏེ
གངས་འདབས་ཀྱི་ངོ་གདོང་སྨུག་པོ་དག་ལ་བརྡབ་ཆག་བྱུང་ཞིང
ཨར་འདམ་གྱི་ཞིག་རོའི་ནང་གི་ངུ་སྐད་དེས
གྲང་འཁྱག་གི་མཚན་མོར་ཞི་བའི་སྐར་ཚོགས་ལའང་མིག་ཆུ་ཤོར་དུ་འཇུག་དུས
ལ་དྭགས་ནས་འཇོ་མདའ་དང ཡུལ་ཤུལ་ནས་དར་རྩེ་མདོ་དང
སྤུ་ཧྲེང་ནས་ཁྱུང་མཆུའི་བར་དུ དབྱངས་གསལ་གྱི་སྨྲ་ལྕེས་བསྒྲོན་པའི་མར་མེ་དག
སྡུག་བསྔལ་གྱི་མཁའ་དབྱིངས་མེར་བཏང་བ་བཞིན་ལྷབ་ལྷུབ་གཡོ
དགུན་འཁྱག་གི་གྲང་ངར་ལ་མདས་སྣུན་པ་བཞིན་ལམ་ལམ་འབར
འོད་སྣང་གི་ཐིག་ལེ་དག་བསྔོ་སྨོན་གྱི་མེ་སྟག་ཏུ་གྱུར་ཏེ
ཡུལ་པོར་ལུས་པའི་རྣམ་ཤེས་དག་ལ་སྐབས་ཤིག་གི་དབུགས་དབྱུང་བསྩལ
ཟང་ཟིང་གི་དུས་རབས་འདི་ལ
མི་རྣམས་ནི་འདོད་སྲེད་ཀྱི་གྲིབ་མས་ཁྲིད་པའི་གཅན་གཟན་ཁྱུ་གཅིག་ཏུ་གྱུར
བཟང་པོར་བརྫུས་པའི་ཚུལ་འཆོས་ཀྱིས་སོ་སོའི་ཁ་ཟས་འཚོལ
གཏན་ཚིགས་ཀྱི་ཡལ་ཀ་ཆག་པོར་གྱུར་ཀྱང་ཚིག་རྒྱན་གྱི་ལོ་མ་ཕྱུར་བུར་སྐྱེས་པའི
མུན་ཁྲོད་ཀྱི་ཤིང་སྡོང་དག་གིས་ཆོ་མེད་པའི་ཟློས་གར་འཁྲབ་དུས
མི་གཞན་གྱི་སྡུག་བསྔལ་ལ་གདུང་སེམས་སྐྱེ་རྒྱུ་ནི
ཡི་དྭགས་གཏེར་སྲུང་གི་རུམ་ནས་གསེར་སྒོར་ལེན་པ་ལྟར་དཀའ་ཡང
དིང་རིའི་ས་ཡོམ་གྱི་གསར་འཕྲིན་ཐོས་མ་ཐག
མིག་ཆུ་དབང་མེད་ཤོར་ཞིང་ཡ་ཁོག་སྨྲེང་བས་གང་འགྲོ་བ་འདིས
ཁྱོད་རང་སྔར་བཞིན་རྒྱུད་ལ་སྙིང་རྗེ་ཅན་གྱི་འགྲོ་བ་མི་ཞིག་ཡིན་པ་མཚོན་ཞིང
ཁྱོད་ཀྱི་རྣམ་ཤེས་ཀྱི་འོ་མཚོའི་ཁ་རུ
བོད་སྐད་ཀྱི་སྤྲིས་མ་མཐུག་པོར་ཆགས་ཡོད་པ་ཤེས་ཐུབ
9/1/2025 ཁུང་མེང་།
མཆན་འགྲེལ།
1ཇོ་མོ་གླང་མའི་མིང་གཞན་ནོ།།
2ལོ་མང་སྐྱེ་བའི་ལྕམ་རིགས། རྩ་བ་སེར་པོ་སྦོམ་ལ་རྒྱས་ཤིང་རྩ་ཕྲན་རིང་བ་ཕྱི་ནས་དར་དཀར་རྒྱལ་མཚན་བཙུགས་པ་དང་འདྲ་བ་དེའོ།།
3འདི་ནི་ཟུར་མཁར་པའི《སྨན་ངོ་གསལ་བྱེད་བདུད་རྩིའི་སྒྲོན་མེ》ཡི་ནང་བཀོད་པའི་ཆུ་མ་རྩ་ཡི་དཔེའོ།།
4རྒོད་ཚང་བའི་ཐུགས་སྲས་འདྲ་འདྲ་བརྒྱད་ཀྱི་ཡ་གྱལ་བསམ་གླིང་བས་བཏབ་པའི་བསམ་གླིང་དགོན་ཆགས་ཡུལ་དེར་སྔོན་ཆད་རྡོ་རེག་པ་དུག་ཅན་ཟེར་བའི་ཕ་བོང་ཆེན་པོ་ཞིག་ཡོད་པ་དེེར་འགྲོ་བ་གང་གིས་རེག་ཀྱང་དུག་ཕོག་ནས་ཤི་འགྲོ་བར་གྲགས།
5རྗེ་རྒོད་ཚང་བ་མགོན་པོ་རྡོ་རྗེས་སྤྱི་ལོ་1224ལོར་ཕྱག་བཏབ་པའི་དགོན་པ་ཞིག
6ས་གཞི་སྐྱོང་བའི་ལྷ་མོ་བརྟན་མའི་མིང་།
7ཞི་བྱེད་པའི་དཔེས་མཚོན་གདམས་ངག་ལྔའི་ཡ་གྱལ།