འཛུམ་གྱི་སྙན་ངག་གསར་པ་ཞིག

རྒྱ་གར་རིག་བྱེད་གཏམ་ལ་སྦྱར་ནས་མི་ཡི་ཡང་རྩེ་མི་གཡང་ཁྱོད་འདྲ་ལྷ་སྒྲུང་བསྲེས་ནས་གླེང་མི་བྲ།།
ཆེན་པོ་རིང་པོའི་མངོན་བརྗོད་བཅིང་ནས་བླ་མའི་ཡང་བླ་བླ་རྒོད་ཁྱོད་འདྲ་འུད་བརྗོད་བྱས་ཏེ་འབྲི་མི་འོས།།
བྱ་དཀའ་སྡེབས་དཀའི་ལུགས་སུ་བྱས་ཤིང་སྤྲུལ་སྐུའི་ཡང་སྤྲུལ་སྤྲུལ་ཕུད་ཁྱོད་འདྲ་ལོང་གཏམ་བྱས་ཏེ་བཤད་མི་ཕོད།།
དེ་དང་དེ་འདྲའི་ལྟ་ཚུལ་འོག་ནས་ང་ལ་མཛའ་ཞིང་ང་ལ་དབང་བའི་ཐ་སྙད་འགའ་ཡིས་ཁྱོད་ཉིད་བཞེངས།།

ང་རང་ཕལ་པའི་མི་ཞིག་ཡིན་པས་ང་ལ་དཔེས་པའི་ཀླད་ཁམས་ནང་དུ་ལྷ་དང་འབྲེལ་བའི་ཤེས་བྱ་མེད།།
དེ་འདྲ་ཡིན་དུས་རིན་པོ་ཆེ་ཁྱོད་ལྷ་ཞིག་རེད་ཟེར་སྐྱེ་བ་མི་ཡི་ལུས་རྟེན་འདི་ལ་བརྗོད་རྩིས་མེད།།
འདི་ན་ཉག་ཉོག་གཏམ་འགའ་ཐལ་བ་ཉེ་མོ་མིག་གིས་མངོན་སུམ་མཐོང་དང་རིང་པོ་རྣ་བས་ཐོས་དག་ལས།།
ཡོད་ལ་སྐུར་འདེབས་མེད་ལ་སྒྲོ་འདོགས་ཤེས་དང་ཤེས་ཏེ་རིན་ཐང་མེད་ཕྱིར་དྲང་པོའི་གཏམ་ཞིག་གླེང་ན་སྙམ།།

གལ་ཏེ་སྐུ་ཉིད་དབུས་ལ་འཁྲུངས་ཤིང་གཙང་ལ་བཞུགས་ན་མཚན་སྙན་གཟི་བརྗིད་བདག་ཁྲི་གོང་མའི་ཡན་ཞིག་ཡིན།།
དེ་འོག་དེ་ནས་ཨ་མདོར་བལྟམས་ཤིང་སྨད་ལ་འཚར་ནའང་སྐུ་བསོད་དབང་ཐང་རོང་ཆེན་སྐྱབས་མགོན་འདྲ་ཚོད་ཡིན།།
འོན་ཀྱང་ད་བར་སེམས་ཀྱི་ཞེ་ལ་འཁོར་མ་མྱོང་ཞིང་གླེང་རྒྱུ་ལུས་པའི་ནོར་འཁྲུལ་ནང་གི་ཉིང་འཁྲུལ་ནི།།
ཁྱོད་རང་མདོ་ཁམས་སྒང་དྲུག་རི་དང་ལྷག་པར་སྨར་ཁམས་སྒང་གི་ཆར་གཏོགས་གོ་འཇོའི་ཡུལ་ལ་སྐྱེས་དེ་རེད།།

སྲིད་པ་གངས་ཀྱི་ལྷུན་པོའི་ཞོལ་ནས་ཀྱ་ཀྱུར་འབབ་པའི་རི་ཆུ་སྔོན་མོས་ཁྱོད་ཀྱི་མགྲིན་པའི་རྩ་སྒོ་ཕྱེས།།
ལང་ལོང་འཐིབས་པའི་སྨུག་སྤྲིན་ཀློང་ནས་མགོ་བོ་དགྱེ་བའི་ཨ་མྱེ་འབོམ་ཀེས་ཁྱོད་ལ་ཞུམ་མེད་སྙིང་སྟོབས་བསྩལ།།
ཉི་ཟེར་སྦྲང་ཆར་ཟམ་ཟིམ་ཁྲོད་ནས་སྙེ་མ་འབུས་པའི་ནས་འབྲུ་སྔོན་མོས་ཁྱོད་ལ་ལང་ཚོའི་གསོན་ཤུགས་སྦྱིན།།
ན་དམར་ཐང་ནས་རྨིག་བཞིའི་ཟེགས་མ་རླུང་ལ་བརྡར་བའི་འདོ་ཆེན་རྟ་ཕོས་ཁྱོད་ལ་ཡངས་པའི་མདུན་ལམ་བསྟན།།

དགེ་ཆོས་འཆལ་པོའི་མི་ཚེའི་ལུས་ཕྱག་དང་པོ་ཤོར་ས་གནས་བརྟན་ཆེ་དེ་ཁྱོད་རང་ངོས་འཛིན་གནང་མཁན་རེད།།
རྒྱ་འདྲེ་འགོང་པོའི་སྙིང་ཁྲག་རྔུབ་ལ་ནུས་མཐུ་ཅན་གྱི་ཧེ་རུ་ཀ་དེ་ཁྱོད་རང་ཁྲི་ལ་འགྱོག་མཁན་རེད།།
པདྨ་ཀ་ར་བོད་ལ་ཕེབས་འདྲ་ཕྲིན་ལས་ཅན་གྱི་རིག་སྔགས་འཆང་དེ་ཁྱོད་རང་རྗེས་སུ་འཛིན་མཁན་རེད།།
ཆེ་བ་གསུམ་གྱི་ཡོན་ཏན་དེ་ཚོ་ང་ཡིས་བལྟས་ན་ཁ་རོགས་མ་རེད་ངོ་མཚར་ནང་གི་ངོ་མཚར་རེད།།

སྤྲུལ་སྐུའི་མིང་གི་ཆོ་ལོ་བསྣམས་ནས་སེར་པོ་གསེར་ཁྲིའི་གོང་ལ་མ་འགྱིང་འོག་སྨིན་གཉིས་པའི་གྲལ་མཐར་ཞུགས།།
ཀ་ཁའི་ཡི་གེ་འབྲི་ཀློག་ནས་བཟུང་བརྡ་དག་སྙན་ངག་རྩིས་རིགས་ཀུན་ལ་མཁས་ཤིང་ཕུལ་དུ་ཕྱིན་པ་བསླབས།།
དེ་ཡིས་མི་ཚད་ཐིག་ཚོན་རི་མོ་གཏོར་བཟོ་དཀར་རྒྱན་རྔ་རོལ་གར་འཆམ་འདོན་དབྱངས་ཆོ་ག་ཕྱག་ལེན་ཚུན།།
རིག་འཛིན་རྒྱལ་བ་གོང་མ་དག་གི་མཐོང་བ་བརྒྱུད་པའི་ཕྱག་བཞེས་མཐའ་དག་ཉིན་ལ་མཚན་མོ་མཐུད་ནས་སྦྱངས།།

གསེར་འོད་འཕྲོ་བའི་དགོན་སྡེ་དེ་ཡི་རྒྱ་ཕིབས་འདབས་ནས་འཇམ་ནེམ་གདན་ལ་རྐང་བརྐྱང་ལག་བརྐྱང་མ་བཞུགས་པར།།
བརྟན་མཁས་འདུལ་བའི་ཡོན་ཏན་ཀུན་ལྡན་སྨིན་གླིང་མཁན་རབས་བརྒྱད་པའི་གམ་དུ་ལུས་ཀྱི་སྨད་ལྔ་ས་ལ་ཕབ།།
ཟབ་རྒྱས་མདོ་སྔགས་གཞུང་ལུགས་མ་ལུས་ལོ་ཡི་སྣེ་མོ་ལོ་ལ་མཐུད་དེ་ཐོས་བསམ་སྒོམ་པས་བདར་ཤ་བཅད།།
མཐོ་སར་འབྱོར་ཡང་དམའ་བའི་ཚུགས་བཟུང་ཕལ་པའི་གྲལ་ནས་དམ་པའི་རྗེས་ཟིན་ཁྱོད་ནི་བསྟན་པའི་རྡོ་རིང་ཞིག།

རིས་མེད་བསྟན་པའི་དབང་ཕྱུག་ཆེན་མོ་འཇམ་དབྱངས་མཚན་གྱི་ཅོད་པན་ཐོགས་དེ་སྤྱི་བོའི་གཙུག་ཏུ་བཀུར་བཀུར་བས།།
བསླུ་མེད་ཐུགས་ཀྱི་དགྱེས་བརྩེས་རྗེས་བཟུང་འཇམ་པའི་ཕྱག་གིས་མགོ་ཐོག་བུམ་པ་ལྕེ་ཐོག་བདུད་རྩི་བཞག་བཞག་གིས།།
མ་ཚོགས་རིག་འཛིན་མཁའ་འགྲོ་བྱེ་བའི་སྙིང་དབུས་སྦས་པའི་སྙིང་གི་ཐིག་ལེ་ཡང་དང་བསྐྱར་དུ་བརྐུས་བརྐུས་པས།།
འཁོར་འདས་གཉིས་ཀྱི་ས་མཚམས་དེ་ན་གཅེར་བུར་ཉལ་བའི་ཨ་མ་མ་རྒན་ཁྱོད་ལ་བསུ་མ་ཨེ་བྱུང་ལགས།།

ཙི་ནའི་དམག་གིས་བོད་ཁམས་བསྐོར་དུས་རང་མགོ་གར་ཐོན་ཝ་བྲོས་མ་བྱས་སྒོ་ཐེམ་སྐྱ་མོར་རྡོག་རྒྱ་གཏད།།
དགོན་སྡེ་གཏོར་དང་དགོན་བདག་བཀྲོངས་ཀྱང་སྙིང་རྩ་མ་འདར་ཨམ་གཙིགས་བསྡམས་ཤིང་དམ་བཅའི་རྟེན་ཕུར་སྙིང་ལ་བཏབ།།
ཁྲི་ཆེན་གོང་མའི་ཕྱག་ནས་འཇུས་ཏེ་སྐུ་ཡི་དཀྱིལ་འཁོར་ཟིལ་པ་ཕྲོམ་མེ་འཕགས་པའི་ཡུལ་དུ་ཆིབས་ཁ་བཏེགས།།
བསྟན་དང་འགྲོ་ལ་མཁོ་གལ་ཆེ་དུས་དཔུང་པའི་ཤ་རྒོད་སྦོམ་ནས་ཡོང་བའི་གོ་འཇོ་ཨ་ལོ་ཇོ་རུག་བུ།།

གྲུབ་པའི་དབང་ཕྱུག་དབང་གི་རྒྱལ་པོ་ཉམས་རྟོགས་མཐོ་ཡང་གཤོག་པ་བརྐྱང་ནས་དྷེ་ར་རྡུན་ལ་འཕུར་མ་རེད།།
འཕགས་ཡུལ་ཨོ་རྒྱན་སྨིན་གྲོལ་གླིང་ཞེས་ཕྱི་ཡི་བཀོད་པ་ལྷ་ཡུལ་འགྲན་ཡང་མ་བཞེངས་ལྷུན་གྱིས་གྲུབ་མ་རེད།།
བསྟན་པའི་གཞི་མ་དགེ་འདུན་འདུས་སྡེ་མཆོད་གནས་ཡིན་ཡང་ཟས་གོས་གནས་མལ་དང་ནས་རང་འགྲིག་མ་རེད་ཨ།།
དེ་ལྟ་དེ་ལྟར་མི་ལོ་དྲུག་ཅུར་ཕྱིར་བལྟས་བསློགས་ན་དད་པ་མིན་ཡང་ཁྱོད་ལ་དགའ་སྤོབས་ངང་གིས་འཕེལ།།

གཞུང་ཆེན་ཁག་གི་སློབ་ཁྲིད་གནང་བ་ཉན་མྱོང་མེད་ཀྱང་ག་རེ་གླེང་ན་ཚིག་དོན་གསལ་ལ་བརྗོད་པ་དག།
ཐལ་མོ་བརྡབས་ནས་ཕྱིར་རྒོལ་འཇོམས་པ་མཇལ་མྱོང་མེད་ཀྱང་སྐད་ཆ་བསྒྲིམས་ན་ཚིག་རྩ་རྣོ་ལ་མཚར་གཏམ་མང་།།
འགྲེལ་པའི་ཡང་འགྲེལ་བརྩམས་ཆོས་བྲིས་པ་བཀླགས་མྱོང་མེད་ཀྱང་ཉིན་ཐོའི་དེབ་དང་ཤིས་བརྗོད་སྨོན་ཚིག་གྲངས་མི་ལངས།།
ཆོས་པའི་མི་ཚེ་སྲིད་ཀྱིས་རུལ་བའི་ཆོས་གོས་ནང་གི་དམག་དཔོན་མ་ཡིན་གསེར་སྦྱང་གཙོ་མའི་སྡོང་པོ་ཡིན།།

ཁྱོད་ཀྱིས་མི་ཤེས་དགོན་པའི་སྦུག་ཏུ་མཁར་ཆེན་བརྩིགས་ཏེ་ཆིབས་གྲུ་ཡག་མོ་ཞབས་ཕྱི་རྫིག་པོ་ཉར་མི་ཤེས།།
ཁྱོད་ཀྱིས་མི་འཇོན་ལྷ་ཁང་དཀྱིལ་ན་ཞབས་ལ་ཁྲི་བརྒྱབ་མགོ་ལ་གདུཌ་ཕུབ་དད་ལྡན་མགོ་སྐོར་བཏང་མི་འཇོན།།
ཁྱོད་ཀྱིས་མི་ནུས་ཆོས་གོས་སེར་པོ་ཕྲག་པར་གཟར་ནས་བདེ་སྐྱོང་དྭངས་སྨན་སྙིང་གི་གྲོགས་སུ་འགུགས་མི་ནུས།།
དེ་དང་དེ་ཚོ་བླ་སྤྲུལ་ཕལ་ལ་རྒྱུན་ཤེས་ཡིན་ཡང་ཁྱོད་ལ་བལྟས་ན་ད་དུང་གསར་འབྱོར་གསར་ནག་རེད།།

ཁྱོད་ཉིད་བཙལ་ན་ཚོགས་ཆེན་ལྷ་ཁང་གྲལ་འགོར་མི་རྙེད་འདུས་མང་ཚོགས་ཟངས་ཚ་ལ་བྱེད་སའི་ས་ནས་རྙེད།།
ཁྱོད་ཉིད་མཇལ་ན་མཐོན་པོ་རྫིག་པོའི་ཁྲི་ཐོག་མི་རིག་ལ་ཁུག་ལུང་ཁུག་དགོན་པའི་རྒྱ་ཕིབས་སློང་སར་མཇལ།།
ཁྱོད་ཉིད་ཐུག་ན་གྲོང་དང་གྲོང་ཁྱེར་གཞུང་ལ་མ་ཡིན་མི་མེད་ཁྱི་མེད་དབེན་ཞིང་དགོན་པའི་གནས་ལ་ཐུག།
ཁྱོད་ཉིད་བཀླགས་ན་གཞུང་སྒེར་སུས་ཀྱང་དེབ་ལས་མི་ཐོན་ཉམས་མྱོང་ཅན་གྱི་མི་རབས་རྒན་པའི་ངག་ལས་ཡོང་།།

རྡོར་གདན་རྙིང་མའི་སྨོན་ལམ་ཆེན་མོ་ལོ་ལྟར་ཚོགས་ཀྱང་སྔ་རྗེས་བར་གསུམ་ཁྱོད་ཀྱི་ཕྱག་རྗེས་མེད་ས་མེད།།
སྐྱབས་རྗེ་རྣམ་པ་དབུ་འཛིན་ཁྲི་ལ་དབུ་འཕང་མཐོ་ཡང་ཕྱི་ནང་གསང་གསུམ་ཁྱོད་ཀྱི་ཕྱག་རོགས་མེད་ས་མེད།།
མདོར་ན་གཞིས་བྱེས་སྨིན་གླིང་བསྟན་པས་ས་ཆེན་ཁྱབ་ཀྱང་ཐོག་མཐའ་བར་གསུམ་ཁྱོད་ཀྱི་གཟིགས་པ་མེད་ས་མེད།།
དེ་དང་དེ་ཡི་མཛད་རྗེས་དེ་ཚོ་འགའ་དང་འགའ་ཡི་སེམས་ན་ཡོད་སྲིད་སུ་དང་གང་གི་ངག་ན་མེད།།

ཁྱོད་ཀྱི་ཁོག་གི་བསམ་རྒྱུ་དེ་ནི་ཉིན་མོ་མི་དགོས་མཚན་ལམ་ནང་དུའང་གཞན་ཕན་རྐྱང་རྐྱང་རེེད་འདུག་རེད།།
ཁྱོད་ཀྱི་ལག་གི་ལས་ཀ་དེ་ནི་གང་ལ་དགོས་ན་དེ་དང་དེ་ལ་རྟེན་བཞེངས་འབའ་ཞིག་རེད་འདུག་རེད།།
ཁྱོད་ཀྱི་མི་ཚེའི་བསྒྲུབ་བྱ་དེ་ནི་སྙིགས་མ་ལྔ་བདོའི་དུས་ཀྱི་མཐར་ཡང་བསྙེན་རྫོགས་ཁོ་ན་རེད་འདུག་རེད།།
ཧོབ་དེ་མཇལ་ན་ཕལ་པ་འདྲ་ཡང་ཞིབ་ཏུ་བསམས་ན་མགོན་པོ་ཁྱོད་ནི་བཀླགས་མི་ཚར་བའི་ལོ་རྒྱུས་རེད།།

༸སྐྱབས་རྗེ་མཁོ་ཆེན་རིན་པོ་ཆེ་མཆོག་ལ་ཡུལ་སྨར་ཤོད་གོ་འཇོ་བའི་བརྟན་བཞུགས་སྐབས་སུ་འཛུམ་གྱི་བླ་དྭགས་པས་དགའ་ཞིང་སྤྲོ་བས་བྲིས་ཏེ་ཕུལ།
5/ 10/ 2024