གཅེར་བུ་པའི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 1317 བཀླགས་འདུག

ཧེ་བག
མི་ཚེ་དོར་མ་ཕུད་པའི་ཡུན་ཚད་ལ།།
གཅིན་པས་ས་ཁ་གཤགས་པའི་རི་མོ་བྲིས།།
དེ་ཡང་སྟོན་གྱི་ལོ་མ་ཇི་བཞིན་དུ།།
ག་ལེར་ཟགས་ནས་རང་གི་མཛེས་པ་དོར།།
སུ་ཞིག་སེམས་ལ་གབ་པའི་ཡུན་ཚད་དེར།།
ཁྱེད་ཀྱིས་དོར་མ་ཕུད་དོན་ཅི་ཞིག་ཡིན།།
སྨུག་པ་གྱོན་པའི་སྐྱ་མི་སང་འགྲོ་མ།།
ཇག་གླུ་སིང་སིང་འགྲོ་རོགས་འདུག་རོགས་བྱོས།།
ང་ཡིས་གནའ་མཐའ་སྲུང་ནས་ག་ལེར་ངང་།།
ཀུ་རེ་འདི་ཚོ་སྡེ་མཐའ་མི་ལ་བྱས།།
ཕན་ཚུན་ཚོར་བ་མེད་མོད་རང་སེམས་ཀྱི།།
སྟོང་ཆ་བཙལ་ཞིང་ཁང་པ་སྲ་མོ་བྱས།།
བུ་ག་རེ་རེ་ལྷམ་ལ་བུག་ན་ཡང་།།
སྙིང་ལ་ལྷན་པ་བརྒྱབ་པའི་ཉིན་ཞག་དག།
མཁའ་དབུགས་བཙོག་པའི་ནམ་སྩ་དག་ལ་བསྔོས།།
ཁེར་འགྲོ་ཁེར་འདུག་དེ་ཡི་ཆོ་ག་ཡིན།།
འཚོ་བ་ཟེར་ནས་ཚིག་ལ་ནེམ་ཤ་གཏད།།
ཀློག་འདོད་བོར་བའི་སྒྲུང་གི་བརྗོད་བྱར་བཏགས།།
གནམ་ས་དོག་པའི་དགུན་གཞུང་འདི་ག་ནས།།
སྙིང་ལ་འཁྲི་བའི་མི་དེ་ལྷ་ཡིས་སྐྱོབས།།
ང་ལ་སྐད་ཆ་མེད་ནས་མགྲིན་པ་ན།།
ཁྱོད་ནི་ལབ་རྡོལ་འབེལ་དྲག་ཁ་མཆུ་འཁོར།།
ཚད་འདི་ཙམ་ནས་རྒས་གཉེར་དོད་པ་ན།།
ཡང་བསྐྱར་ཉིན་ཐོ་དེ་ལ་ཧེ་བག་ཤོར།།