འཛུམ་གྱི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 260 བཀླགས་འདུག

ལམ་ལ་ཆས་པ།
སྒྲ་སྙན་ཁུར་ཏེ་མཐོ་བའི་ལ་ཡང་བརྒལ།།
ལག་པས་དོམ་ར་བྱས་ནས་རྒྱང་ལ་བལྟས།།

མང་མང་རྣ་ལ་བྱང་མིན་མ་བལྟས་པར།།
མི་ཚེའི་གླུ་ཞིག་འདི་ནས་སླར་ཡང་བླངས།།

ལྷོག་ལྷོག་ལྡིང་བའི་ཚོར་བ་དཀར་དམར་ཡང་།།
རྒྱུད་སྐུད་རེ་རེར་བརྒྱུས་ཏེ་དབྱངས་ལ་བསྲེས།།

སྨུག་ལོང་སེམས་ལ་འཁྲིཌ་པའི་ནམ་ཟླ་ལ།།
ཉི་ཟླའི་ཞལ་ངོ་རྗེན་པར་མཐོང་བ་དཀའ།།

རྒྱང་རིང་ལམ་ལ་གསལ་ཆ་མེད་ན་ཡང་།།
རང་གི་ཕྱི་ནང་རང་གིས་སྣང་བར་བྱས།།

ཆུ་འཁྱག་རྡོག་པོ་བྲང་ལ་མ་སྦྱར་ཀྱང་།།
འཚོ་བ་གྲང་མོ་ལགས་པ་ད་གདོད་ཤེས།།

ད་ནི་གློ་མཆིན་བར་ནས་རླུང་བུ་ལྡང་།།
ཚེ་ཡི་བྱང་ཁོག་ནང་དུ་ཐལ་རྡུལ་འཚུབ།།

དོག་པའི་ལམ་བུ་རེ་རེ་བརྒལ་བའི་མཐར།།
རྔུལ་ཆུས་རྐང་རྗེས་བྲིས་པའི་གཏམ་རྒྱུད་ལུས།།

གནམ་ས་གཉིས་ཀ་འཁྱག་ལ་ཚུད་ཀྱང་རུང་།།
རང་གི་སྙིང་ཆུང་རང་གིས་ལག་ཏུ་བསྡམས།།

ཉིན་ཞིག་གནམ་སའི་ཁོད་རྒྱ་ཡངས་ས་ནས།།
འདས་སོང་རྔུབ་པའི་རླུང་རོ་འབྱིན་ན་སྙམ།།

སོང་བའི་ལམ་ལ་ཕ་མཐའ་མ་མཆིས་མོད།།
ད་དུང་ཕར་ལ་འགྲོ་དགོས་བདག་གི་ལས།།

མུན་པ་ནག་པོ་རྡོག་འགོར་མ་བབས་གོང་།།
རྐང་ལམ་གསལ་བའི་འོད་ཅིག་གནང་ན་ཨ།།

16/ 01/ 2024