གཅེར་བུ་པའི་སྙན་ངག་གསར་པ། 

རྩོམ་ཡིག་འདི་ཐེངས་ 284 བཀླགས་འདུག

རྔུལ་ནག་བཞུར་བ།

གཅེར་བུ་པ། 

ཞོགས་པར་ཡིག་སྒམ་སྟོང་པ་བསྐྱར་དུ་སྔོག།
དེ་རུ་ཅི་ཡང་མེད་ཀྱང་ཡོད་སྙམ་ཤར།།
འཕྲིན་ཡིག་འབྲི་འཕྲོ་མ་དེ་སེམས་ལ་ལུས།།
དེ་ནི་ཅི་ཡང་མིན་རུང་བུ་ལོན་འདྲ།།

སྔོན་ནས་ལས་དབང་ཡོད་འདྲ་འཇའ་མཚོན་ཀྱང་།།
ད་ལྟ་གང་ལ་ཤར་བའང་ཚོད་དཔག་དཀའ།།
ཚེ་ཕྱེད་ཡོལ་དུས་འཕྲད་པ་ཅི་ཡིས་ལན།།
འཕྲད་ཀྱང་གྱེས་དགོས་བྱུང་བ་ཅི་ཡིས་ཉེས།།

རྨི་ལམ་ལྟ་བུ་འདུན་མ་རི་ལ་ཞོགས།།
དེ་ནི་སྤྲིན་དཀར་མ་ཡིན་མཛེས་པ་དབེན།།
ཀྱག་ཀྱོག་ལམ་བུ་སྔར་ནས་སྨུག་པས་བཏུམས།།
དེ་ནས་ཁེར་བུར་ཆས་དགོས་ལས་སྐལ་འདྲ།།

ནངས་ནུབ་རེ་བཞིན་ཁྱི་རྐུན་དག་དང་ལྷན།།
ག་ལེར་ཕར་ལ་སྐྱེལ་བར་སུ་ཞིག་ངལ།།
བར་བར་ཁམས་བསང་བཏང་བའི་གླུ་ཆུང་ཡང་།།
སྐད་ངག་འཛེར་བའི་སྒྲ་ལ་ཡང་ཡང་འཐབ།།

སྨིག་རྒྱུ་མཐོང་བའི་སྐོམ་གདུང་མ་འཇགས་བར།།
རི་དྭགས་རི་ལ་ཡན་པའི་ངང་ཚུལ་ལ།།
ཁྱེད་རང་ཞེ་ནས་ཁྲེལ་ལམ་མཛའ་བའི་མི།།
ཉེ་རིང་མོལ་མཆིད་འདི་ཀོ་སུ་ལ་འདེབས།།

གློག་དེ་ཆད་རྗེས་རང་གི་གྲིབ་མ་ཡང་།།
རང་དང་བྲལ་བའི་ཚུལ་ལ་ཅིས་མི་སྐྱོ།།
རྟེན་འབྲེལ་མང་དུ་སྨོས་ན་ཨ་ཐང་ཆད།།
འཁོར་བའི་ལ་མོ་འདི་ཙམ་བརྒལ་དུ་ཆུག།

ད་ལྟ་ཅི་ལའང་ཡི་ག་མེད་འདྲ་བའི།།
རི་གྲོང་འདི་རུ་ང་ཡིས་ག་རེ་བྱས།།
ཡི་གེ་བྲིས་ན་ང་ཡིས་ག་རེ་འཁྱོངས།།
སོ་སོའི་བསོད་ནམས་ཟེར་བ་འདི་ཙམ་ཨེ།།

ཀུ་རེ་ལྟ་བུ་ཞེ་ན་ཁྱེད་ལ་ཕོག།
འཚོ་ཚིས་རྡུལ་ལ་འདྲེས་པར་ང་རང་ཕངས།།
བར་མ་མདོ་རུ་རང་རང་ལུས་ངག་ལྷོད།།
པྲ་ཆལ་གནང་ཡང་ཐུགས་ཕན་སོས་པར་དཀའ།།

ཁར་རྩང་སྒོ་དྲུང་ཞིག་ནས་སོང་ཚར་ཡང་།།
རྐང་རྗེས་གསོན་པོས་མི་སྐད་མི་སྨྲ་བ།།
འུ་ཅག་སེམས་ལ་གསལ་ཡང་ད་དུང་དུབ།།
འོན་ཀྱང་ཁ་འཁྲོ་མི་གཏུག་སེམས་ལ་བསྲན།།

དཀོན་མཆོག་མགོན་དུ་གསོལ་བའི་ལོ་ཟླའི་ནང་།།
དཀར་མེ་ཁ་རོག་གཟིམས་པར་དགོངས་ཡང་གནོངས།།
ས་མཐའ་སྡེ་བས་སྒྲུང་མོ་མི་འདེབས་པས།།
ང་ཡི་ཕ་མེས་ཅུང་ཙམ་བརྗེད་གྲབས་འདུག།

2022.5.1