སྒྲེ་བོའི་ལྷུག་རྩོམ་གསར་པ་ཞིག

རྩོམ་ཡིག་འདི་ཐེངས་ 1424 བཀླགས་འདུག

དགུན་ཁའི་ཀོ་ལྷམ།

སྒྲེ་བོ།

གནམ་གཤིས་ཇེ་འཁྱག་ལ་བུད་སོང་། ཉིན་རེ་རེ་བཞིན་མི་ཚོས་ལྭ་བ་ཇེ་མཐུག་ཏུ་བཏང་ནས་གོས་བརྗེས་བྱེད་པ་དེས། སྟོན་མཇུག་ནས་དགུན་འགོར་མཐུད་ལ་ཉེ་བ་ཡིན་འདུག

ཨར་འདམ་གྱིས་ལས་པའི་ཁང་པ་དང་རྡོ་གཅལ་སྟེང་གི་ཞོགས་པའི་ཉི་ཟེར་ལ་དྲོད་ཅིག་མེད་ཀྱང་། དེའི་ཀློང་དུ་དུ་བ་སྔོ་ལོང་ལོང་གཏོང་བའི་དུ་འཐེན་ཚོའི་ཉམས་དེ་དང་། མི་དག་བྲེལ་སྟབས་ཀྱིས་འགྲོ་ཞིང་ཁ་ནས་ཁ་རླངས་སྐྱ་ཤུར་ཤུར་ཕྱུང་བ་དེ་དྲོད་ཅིག་རེད་འདུག

དགུན་འགོ་འདིར་ང་རང་གྱོན་པའི་བག་སྤྲས་ལ་བྱིངས་ཤིག་སླེབས་བྱུང་། དེའི་ནང་ནས་ཀྱང་ང་ཌོག་ཏྲོར་མ་ཊན་(Dr. Martens)གྱི་ལྷམ་སྐོར་ཞིག་ལ་དགའ་སོང་། ངར་མཚོན་ན་ལྷམ་དེའི་རིན་གོང་ཡང་ཁྱོན་ནས་འཚམ་པོ་མི་འདུག་ཀྱང་། ཁ་སང་ཉིན་ཕྱེད་ཅིག་ལ་ཀོ་ལྷམ་འགར་ནན་ཏན་དང་ཞིབ་མོས་བལྟས་ནས་འགོར། ང་མ་ཟད། ངའི་ཨ་ཕ་ཡང་ཀོ་ལྷམ་འདིའི་རིགས་ལ་དགའ་བོ་ཡོད་པ་ཐག་གིས་ཆོད།

གང་གིས་ཟེར་ན། ཕྱི་ལོ་༢༠༡༧ལོའི་དབྱར་ཁ་ང་རང་རང་ཁྱིམ་ལ་ལོག་ཐེངས་ཤིག་ལ། ངས་ཝོ་ཌི་ལན་ཌི(woodland)ཡི་ཀོ་ལྷམ་ཞིག་གྱོན་ཡོད། སྐབས་ཤིག་ངེད་བཟའ་མི་གང་བོ་སྤང་ཁ་ཞིག་ནས་སྤྲོ་གསེང་དུ་སྡོད་སྐབས་ངས་ལྷམ་དེ་ཕུད་དེ་ཉི་མར་བཞག བར་ཞིག་ལ་ཨ་ཕས་ལྷམ་དེ་ལག་ཏུ་བླངས་ནས་ཧ་ཅང་ནན་ཏན་གྱིས། “ལྷམ་ཟེར་རྒྱུ་འདི་རེད་ཡ།” ཟེར། ཡང་དང་བསྐྱར་དུ་ལྟ། ཚུགས་ཀ་དེ་ནི་ཡིད་དུ་འོང་བ་ཞིག་རེད། ཀོ་ལྷམ་དེ་བྲག་ལྕམ་གྱིས་ང་ལ་ཉོས་པ་ཡིན་ལ་མོས་ཧིན་སྒོར་སུམ་སྟོང་ཐམ་པས་ཉོས་པ་ཡིན་འདུག རྗེས་ནས་ང་རང་རང་ཁྱིམ་ནས་ཐོན་ཁར་ཀོ་ལྷམ་དེ་ཨ་ཕ་ལ་བྱིན་པ་ཡིན་མོད། ཌོག་ཏྲོར་མ་ཊན་ (Dr. Martens)གྱི་ཀོ་ལྷམ་ནི་དེ་ལ་བསྡུར་ས་ཡེ་མི་འདུག་པས། གལ་ཏེ། ཨ་ཕ་ལ་ཌོག་ཏོར་མ་ཊན་(Dr. Martens)གྱི་ཀོ་ལྷམ་ཞིག་བྱུང་ན་དེ་ལས་ཀྱང་མགུ་ཐག་ཆོད་དོ།།

ལར། མི་ཞིག་ལ་རང་གི་སེམས་ངོ་བསྟན་དགོས་ན། ལུས་ཀྱི་རྣམ་འགྱུར། ངག་གི་སྐད་ཆ། དེ་ལས་གཞན་པས་ཐམས་རྣམ་པ་སྣ་ཚོགས་ལས་བསྟན་ཆོག་མོད། སྐབས་རེར། མི་གང་དེའི་སེམས་ཁམས་དང་དགའ་ཕྱོགས་སོགས་རྒྱུས་ལོན་གྱིས། ནང་སེམས་དང་ཉེ་བར་བཅར་ཆོག་པ་ཞིག་རེད་ཨང་། ངའི་ཨ་ཕ་ནི་རྟའི་སྒ་དང་སྟན། ཀོ་ལྷམ་སོགས་ལ་ཅ་དངོས་གཞན་ལས་ཀྱང་མགུ་བོ་ཡོད་པ་ངས་ཆེ་ལོང་ཙམ་ཤེས་ཙ་ན། ཕྱི་ལོ་༢༠༡༩ལོར་དུས་ཆེན་ཞིག་གི་སྐབས། ང་རང་རང་ཡུལ་ལ་འཕྲལ་དུ་འགྲོ་མི་ཐུབ་ནའང་ངས་དོན་ཡོད་བརྒྱུད་ནས་ཨ་ཕ་ལ་ཀོ་ལྷམ་འཚམ་པོ་ཞིག་ཉོས་པ་ཡིན་ནོ།། རྗེས་ནས་ཁ་པར་ནང་ནས་ཀྱང་ལྷམ་དེའི་སྐོར་བཤད་བྱུང་།

འབྲོག་པ་ཚོས་ལྷམ་ལ་ཨ་ཁྱད(ཀྲད)ཅེས་ཟེར་བ་དང་གྱོན་པའི་ནང་ནས་ཐོབ་དམའ་ཤོས་ཤིག་རེད། ཡིན་ཙང་། མི་ཞིག་ལ་ལྷམ་གྱིས་མིང་འདོགས་མི་སྲིད་ཅིང་ལྷམ་ཞིག་ལ་མི་ཞིག་གི་མིང་ཡང་འདོགས་མི་སྲིད་པ་ཞིག་རེད། གལ་ཏེ། མི་དང་ལྷམ་གྱི་མིང་ཕར་ཚུར་བརྗེས་ཏེ་བོས་ན། སྟབས་ཉེས་ན་གྱོད་ཀྱང་ལངས་ངེས། ཡིན་ནའང་། ང་དགའ་སའི་ཀོ་ལྷམ་དེའི་མིང་ལ་ཌོག་ཏྲོར་མ་ཊན་ (Dr. Martens)་ཞེས་ཀྱང་ཟེར། དེ་ཇེ་བདེ་བྱས་ཏེ་བོས་ན། སྨན་པ་མ་ཊན་ཟེར་བ་ཡིན་འདུག དེ་ཡ་མཚན་པོ་ཞིག་རེད། རང་རེས་ལྷམ་ཞིག་གི་མིང་ལ་དགེ་བཤེས་དོན་འགྲུབ་འདྲ་བོ་ལབ་ན་ད་དཔེ་བསགས་པ་མ་རེད་དམ། ཌོག་ཏྲོར་མ་ཊན་ནི་དབྱིན་ཇིའི་རྒ་ཕོ་ཞིག་གི་མིང་རེད། རྒ་ཕོ་དེ་དམག་ཆེན་གཉིས་པའི་སྐབས་སུ་འཇར་མན་གྱི་དམག་གི་སྨན་པ་ཡིན་པ་དང་། ཐོག་མར་ཁོས་དམག་མི་ཚོའི་ལྷམ་ཐེད་འཚེམ་དྲུབ་བྱས་པའི་ཉམས་མྱོང་ལས་ཀོ་ལྷམ་དེ་གསར་བཏོད་བྱ་བའི་གདེངས་ཚོད་ཀྱང་རྙེད་པ་འདྲའོ།།

མ་གཞི། ངའི་ཨ་ཕ་དང་ཨ་ཕའི་ཨ་ཕ་ཡང་ལྷམ་འདེབས་མཁན་ཞིག་ཡིན་པ་ན། ལག་ཤེས་དེའི་ཐད་ནས་ཁོ་ཅག་ལྷམ་ལ་རྣམ་འགྱུར་གཞན་ཞིག་ཡོད། ཨ་ཕ་ལ་མི་གཞན་ལ་མེད་པའི་ལྷམ་འདེབས་བྱེད་ཀྱི་ཤིང་ཆས་སྐོར་ཞིག་ཡོད། རེ་འགའ་བྱིས་པའི་སྣང་བ་ལ་ཤིན་ཏུ་འཕྲོད་པའི་རྩེད་ཆས་རེ་དང་ཧ་ཅང་འདྲ། ཡིན་ཙ་ན། ཆུང་དུས་རྩེད་ཆས་སུ་དེ་དག་བརྐུས་འཁྱེར་གྱིས་ཕྱིན་ཆད་སྤྱོད་ས་མི་འགྲོ་ཞིག་བྱས་པའི་དགོད་བྲོ་བའི་བསྟན་བཤིག་མང་པོ་འཁྲབ་མྱོང་ཡོད། ཡང་། ཨ་ཕས་རང་གི་སྒོར་ཁུག་ནས་དངུལ་བཏོན་ནས་རང་དགའ་སའི་ཀོ་ལྷམ་ཡག་པོ་ཞིག་ཉོས་པ་དྲན་རྒྱུ་མི་འདུག ངས་ཨ་ཕ་ནི་སྲི་ཚགས་ཚ་བ་ལ་དཔེ་རེད་སྙམ་མྱོང་མོད།

ད་ལྟ་འདང་འདྲ་བརྒྱབ་ན། ས་ཀྱོག་གི་འབྲོག་པ་ཚོ་ལ་ལྷམ་ཡག་པོ་ཞིག་ཡོད་པ་ལས་ཀྱང་མེད་ན་དགའ་ལས་ཆེ། རེད་ཀྱང་། སྔར་ལག་ཤེས་དེ་འདྲ་ནི་མེད་དུ་མི་རུང་མོད། ཕྱིས་སུ་ལག་ཤེས་དེ་འདྲ་མེད་ཀྱང་ལྷམ་གྱོམ་པར་དཀའ་ཁག་ཆེར་མེད་པས། ཨ་ཕས་ལག་ཤེས་དེ་ལ་སྣང་བ་མི་བཏང་བ་དེ་འཐུས་ཤོར་ཞིག་ཀྱང་བྱུང་བ་འདྲ།

ད་ལྟ་སོ་སོའང་ལྷམ་ལ་མགུ་བ་ཆེན་པོ་ཞིག་ཡོད་པ་དེ། ཆེ་ས་ནས་རིགས་ཤིག་དང་ཆུང་ས་ནས་བྱིངས་ཚ་བོ་ཡིན་པའི་རྟགས་ཤིག་མིན་འགྲོ མི་ཚོས་ལབ་ན། བྱིངས་ཕུད་སྟངས་འགའ་ཡང་ཡོད་རབས་ཐོས། དེ་ན། ངས་ལྷམ་འབའ་ཞིག་གིས་བྱིངས་ཤིག་ཤིག་ཉིན་འགར་ཕུད་ཀི་ཡིན་ནོ།། ཧུ་ཧུ། གང་ལྟར། ད་ལྟ་ས་གནས་རང་གི་ཁྱད་ཆོས་ཡོད་པའི་ལྷམ་འདེབས་པ་ཡན་ཆད་ཀྱི་ལག་ཤེས་ཤིག་རང་ལ་མི་ལྡན་པ་དེ། སེམས་མི་སྐྱིད་པའི་ནང་ནས་མི་སྐྱིད་པ་ཞིག་གོ། དེ་ནི་ཕ་མེས་རྣམས་དང་ང་ཡི་བར་གྱི་མི་འདྲ་ས་དེ་རེད་འདུག

23/10/21