འཛུམ་གྱི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 415 བཀླགས་འདུག

བཞུར།
ཁྱོད་རང་ནགས་ནས་བོར་བའི་རི་དྭགས་འདྲ།།
གློ་རྒྱག་བདག་གི་མིག་རྣའི་ཡུལ་ལས་འདས།།
བརྩེ་བ་ཟེར་བའང་ལག་ནང་སྒོར་མོ་བཞིན།།
ད་ལྟ་ཡོད་ཀྱང་ད་ལྟ་གཞན་ལག་ཤོར།།
ཕན་ཚུན་འཁང་ར་བྱེད་པས་ཅི་ཕན་ཏེ།།
ལས་ཀྱི་སྐུད་པ་འདི་ནས་ཆད་པ་ལགས།།
སྔ་མ་འུ་གཉིས་སོང་སའི་རྐང་ལམ་དེ།།
ད་སྐབས་སྡོང་ལོ་སྐམ་པོས་བཟུང་ནས་གདའ།།
མཚན་དེར་ང་རང་དབེན་པའི་ནགས་ལ་སོང་།།
ཟླ་འོད་འོག་ནས་གཅིག་པུར་འཕྲེད་གླིང་བུས།།
ཟླ་བའི་གྲིབ་མ་ང་དང་མཉམ་དུ་འོངས།།
ཤིང་ལོའི་གསེང་ནས་སྐྱོ་འཛུམ་ཡང་ཡང་སྟོན།།
ལག་གིས་རེག་པ་སྡོང་ལོ་ཟུར་གསུམ་དང་།།
སེམས་ལ་ཐོགས་པ་ཁྱོད་ཀྱི་རྒྱབ་གཟུགས་སོ།།
ཡང་ན་ནགས་ཀླུང་འདི་ཀོ་ཚོར་འདུ་དང་།།
གྲང་རླུང་འདི་དག་གདུང་བའི་ཤུགས་གླུ་འོ།།
24/06/2021