ཏཱ་ནི་ལྷ་རྒོད་ཀྱི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 1961 བཀླགས་འདུག

སེམས་ཀྱི་གསོས་སུ་སྨིན་པའི་འབྲུག་གཞས།

-འབྲུག་གི་གཞས་མ་ཕུར་པ་བཟང་མོའི་གཞས་ཤིག་ལ་ཉན་རྗེས།

ཏཱ་ནི་ལྷ་རྒོད།

གངས་དཀར་གཤོག་རླབས་གཡོ་བའི་འཕྲུལ་འདེགས་ཀྱི་ངོགས་སུ། །
མེས་པོ་གདོང་ལྔའི་རིགས་རྒྱུད་འཁྲེང་ཞེན་ངང་འཛིན་པའི། །
དཔལ་ལྡན་འབྲུག་གི་ཁབ་དང་ཐུ་བྷོད་ཀྱི་ཤེས་རིག །
མ་ཡུམ་ཐུགས་དཀྱེལ་གཅིག་གི་མཚེ་ཁྲ་རང་ཡིན་སོང་། །

རེ་དོགས་རླུང་བུ་རྒོད་པའི་མཐོ་གཤོང་གི་ལས་སྐལ། །
དབྱངས་གསལ་མུ་ཏིག་དཀར་པོའི་འོད་ཐིགས་ལ་རེ་དུས། །
རིགས་ཞེན་སྤང་ལ་ཤོར་བའི་སྐྱོ་གདུང་གི་མེ་དཔུང་། །
གཏན་འདུན་རྨི་ལམ་རྟ་ཕོའི་བང་བར་ནས་འབར་ཡོང་། །

དབྱངས་ལ་རྣམ་ཤེས་འཁོར་བའི་འབྲུག་མོ་ཡི་གཞས་སུ། །
དཔལ་ལྡན་སྒང་བ་ཅན་དང་འོ་སྐོལ་གྱི་འཆར་སྒོ། །
སྣ་མང་སེམས་བྱུང་སྟོང་གི་ཡོ་ལང་ལ་སིམ་པས། །
གཉུག་གཤིས་ལྷོད་ཤ་ཆེ་བའི་དག་ཞིང་དེ་དྲན་བྱུང་། །

མཚམས་རེར་ཐབ་ཚང་གཅིག་གི་གཡས་གཡོན་ནས་བཞུགས་འདྲ། །
ལན་རེེར་སྲིད་ཀྱི་ཆུ་བོའི་གདགས་སྲིབ་ནས་གྱེས་དགོས། །
དཀར་འཛིན་ལྷ་ཆོས་བཟང་བོའི་གདུགས་འོག་ཏུ་འདུ་དུས། །
སྔོན་གྱི་བྱུང་རབས་གཏམ་གྱི་དམུ་སྐས་དེ་གཅིག་གོ། །

རབ་མཛེས་གོས་བཟང་བདེ་མོའི་ལང་ཚོ་ཡི་དཔལ་ལ། །
སྙན་འགྱུར་ཡིད་དབང་གསོ་བའི་འགྱུར་ཁུགས་ཀྱིས་བརྒྱན་ན། །
སྲིད་པའི་སྨུག་ལོང་ནང་གི་ཨ་སྐྱོ་བ་ང་རང་། །
ཧི་མ་ལ་ཡའི་གངས་ལ་ཕྱིར་མིག་ཅིག་ཤོར་སོང་། །

འབྲུག་མོའི་སྐྱེ་འབྲས་མཚར་བ་གླིང་དཀར་གྱི་འབྲུག་མོ། །
འཛུམ་པའི་པདྨོ་རྒྱས་པ་སེར་ཆེན་དང་ཨུཏྤལ། །
སྒེག་པའི་སྐྱེ་གཟུགས་དྲང་བ་ཙ་རི་ཏྲའི་འོད་མ། །
བཙན་པོའི་ཕོ་བྲང་ནང་གི་ལྷ་ལྕམ་རྣམས་བྱོན་འདྲ། །

སྐད་ངག་དིང་གླིང་བོས་འདྲའི་འགྱུར་ཁུགས་ཀྱི་ཀློང་ན། །
དབྱངས་གསལ་གཡུ་སྦྲང་འཁོར་གྱི་གཤོག་འགྱུར་ལས་སྐྱེན་པ། །
དམར་པོའི་དཀར་པོ་དྲན་པའི་ཡིད་འགྱུར་གྱི་སྨྲེང་བ། །
ག་ལེར་ཐུགས་ལ་འཇགས་པའི་བསོད་ནམས་ནི་ཆེ་འོ། །

དཔལ་ལྡན་ཕོ་བྲང་དབུས་བཞུགས་སྒེག་ལྡན་གྱི་འབྲུག་མོ། །
བལ་དཀར་ལྷོད་ལ་ཉེ་བའི་འཛུམ་གཤིས་ཀྱིས་བསུས་ནས། །
རྒྱང་རིང་ཁ་བའི་མགྲོན་པོར་འབྲུག་གཞས་རེ་ཕུལ་ན། །
ཡར་ཀླུང་གཙང་བོའི་འགྲམ་གྱི་གཏམ་རྒྱུད་དེ་དྲན་སོང་། །

ཁྱོད་ཀྱི་ནམ་མཁའ་ཡངས་པོའི་དབྱངས་གསལ་གྱི་སྐར་ཚོགས། །
ལས་དམན་སྐྱེ་འགྲོ་གང་གི་ཐོས་འཛིན་གྱིས་ཟིན་ཚེ། །
སྐལ་བའི་བུ་ལོན་འདྲ་བའི་སྟོང་བསམ་གྱི་ཞིང་ལ། །
ཡུན་ནས་ཞེན་ཆགས་འཕེལ་བའི་རྟོག་པ་དེ་འཁྲུངས་ངེས། །