ཆང་སྐྱེས་སྙན་ངག་གསར་པ་ཞིག

རྩོམ་ཡིག་འདི་ཐེངས་ 728 བཀླགས་འདུག

ཕ་སྐད་མ་ཡིག
ཕ་སྐད་གཙང་མའི་འགྱུར་ཁུགས་ངག་གི་རྒྱན།།
དབྱངས་གསལ་སོ་བཞི་མི་རིགས་རང་གི་རྒྱན།།
སྐད་དང་ཡི་གེ་དམར་ཆུང་སྲོག་དང་འདྲ།།
རང་སྲོག་རང་གིས་བསྲུང་རྒྱུ་ཧ་ཅང་གལ།།

དུས་ཀྱི་བུ་མོ་འཛུམ་པའི་ཆོ་འཕྲུལ་གྱིས།།
རིགས་ཀྱི་བུ་ཆུང་གཡོ་སྒྱུ་རྫུན་གྱིས་བསླུས།།
སྣང་བ་ཆང་གིས་བཟི་བའི་ཧྲག་བར་ནས།།
ད་དུང་ངོ་གདོང་གཞན་ཞིག་མཐོང་གིན་འདུག།

ཅེ་སྤྱང་རི་ལ་ཤོར་བའི་འཕྲེང་ལམ་ན།།
སྤང་གི་མེ་ཏོག་སྐམ་ཏེ་རླུང་གིས་འཁུར།།
རྩྭ་ཐང་གྲོང་ལ་བསྒྱུར་བའི་ཁྲོམ་ར་ན།།
ཀ་ཁའི་རིན་ཐང་ཇེ་ཆུང་ཇེ་ཆུང་རེད།།

གད་སྙིགས་ཆུ་ལ་བཏབ་པའི་དན་རྟགས་སུ།།
གཙང་བོའི་བཞུར་རྒྱུན་འགག་སྟེ་རྡོ་ལ་ཐུག།
ཡོད་ཚད་སྒོར་གྱིས་བསླུས་པའི་དུས་ཚིགས་ལ།།
ཕ་སྐད་གཙང་མ་བཤད་མཁན་ཇེ་ཉུང་རེད།།

ཕྱི་ན་སྲིད་དང་དབང་གིས་ཡང་ཡང་བཙིར།།
ནང་ན་རང་ཚུགས་ལྕགས་ཀྱི་སྒལ་བ་སྒུར།།
བར་ན་སྐད་དང་ཡི་གེ་གཉི་ག་ཤོར།།
ཡོད་ཚད་འདི་ལྟར་བརླག་ལ་ཉེན་ཁ་ཆེ།།

སྐྱེས་པ་མང་པོ་ཤོ་དང་རྒྱན་ལ་ཆགས།།
བུད་མེད་ཕལ་ཆེར་འདོད་གཏམ་བཤད་ལ་དགའ།།
མེས་པོའི་སྲོལ་བཟང་བོར་བའི་གླེན་རྟགས་ཀྱིས།།
ངུས་ཀྱང་མིག་ཆུ་མེད་པའི་ཚད་ལ་ལྷུང་།།

ཁ་ཏོན་དགེ་སྦྱོར་ཨ་ཁུ་ཁོང་གི་རྒྱན།།
ཀ་ཁ་ག་ང་བུ་ཆུང་ང་ཡིན་རྒྱན།།
དཀོན་མཆོག་གསུམ་པོ་མགོ་ནག་བོད་ཀྱི་རྒྱན།།
ཞེས་པའི་གླུ་ཆུང་འདི་ཉིད་སེམས་ལ་ཟུངས།།