འཛུམ་གྱི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 489 བཀླགས་འདུག

ཀོ་རོ་ན།
འཛུམ།

མ༵་ལུས་རྒྱལ་བ་ཀུན་གྱི་ཡུམ་ཆེན་མ༵།།
མ༵་འདྲིས་འགྲོ་བ་འདྲེན་པའི་རྗེ་བཙུན་མ༵།།
མ༵་གཅིག་ཏཱ་རེ་ལྷ་མོའི་མཚན་འཆང་མ༵།།
མ༵་ཐོཌ་དངོས་གྲུབ་མྱུར་དུ་སྩོལ་མཛད་མ༵།།

ཨ་རིས་རྒྱ་ཡིས་བཟོས་པའི་ནད་རེད་ཟེར།།
རྒྱ་ཡིས་ཨ་རིའི་དམག་གིས་ཁུར་སོང་ཟེར།།
ལ་ལས་དབྱིན་ཇིའི་ཡུལ་ནས་བྱུང་ཞེས་ཟེར།།
གང་ལྟར་བདག་ལ་དེའི་སྐོར་ཇུས་གཏོཌ་མེད།།

ཀོ་༵རོ་ན་ཞེས་བྱ་བའི་ནད་ཡམས་དེས།།
ཁོ༵་བོ་སྡོད་སའི་རྒྱལ་ཁབ་ཙམ་མིན་པར།།
གོ༵་ལ་ཧྲིལ་པོའི་མཆོག་དམན་སྐྱེ་བོ་ཀུན།།
ངོ༵་གདོང་སྟོན་མི་ཕོད་པའི་དུས་ཤིག་བྱུང་།།

ཕལ་ཆེར་ངོ་ལ་ཁ་རས་གོན་ནས་འགྲོ།།
འགའ་ཞིག་མགོ་ལ་འགྱིག་དམ་གྱོན་ཏེ་སྡོད།།
ལ་ལ་ལྷམ་ཀོག་གོན་མཁན་དེ་འདྲའང་འདུག།
མདོར་ན་འདི་དག་ཀོ་རོ་ན་ཡིས་བཟོས།།

ད་ནི་འཛམ་གླིང་ཤར་ནུབ་ཡུལ་གྲུ་ཁག།
ཕྱི་མི་ནང་ལ་འཛུལ་བའི་སྐབས་མེད་ཅིང་།།
ནང་མི་ཕྱི་ལའང་གཏོང་བའི་གོ་མེད་པར།།
རང་ས་རང་ཡུལ་རང་གི་བཙོན་ཁང་གྱུར།།

ཧམ་ཆེན་མི་ཡི་གཡོ་ཧམ་ཚད་མེད་པས།།
མིག་གིས་རིག་ཚད་ལག་ཏུ་རག་དགོས་ལ།།
ལག་ཏུ་རག་ཚད་ཁ་ལ་བསྟབས་དགོས་པས།།
ཐ་མ་ཐ་མའི་མཇུག་འབྲས་འདི་ལྟར་བྱུང་།།

ཁ་རས་གོན་གོན་ངོ་ལ་རྨ་ཤུལ་དོད།།
ལག་པ་བཀྲུས་བཀྲུས་ལྤགས་པའི་ཕྱི་ནང་ཤུས།།
ནང་དུ་བསྡད་བསྡད་མགོ་བོ་འཐོམས་ཤིང་སྦྲིད།།
ཀྱེ་མ་ཀྱེ་ཧུད་ང་ཚོའི་ལས་འདི་ཅི།།

ཟ་ཁང་མང་ཡང་ཡོད་ཚད་སྒོ་མོ་གཏན།།
སྒོར་མོ་ཡོད་རུང་ཚོང་ཁང་ཅ་དངོས་རྫོགས།།
གལ་སྲིད་ནད་ཡམས་འོག་ནས་ཐར་ན་ཡང་།།
ཁ་ལག་ཟད་ནས་མུ་གེས་འཆི་ཉེན་གདའ།།

དགོན་སྡེ་མང་པོའི་ཆོས་ཀྱི་མཛད་སྒོ་འགག།
སློབ་གྲྭ་དུ་མའི་སློབ་ཁྲིད་བྱེད་སྒོ་འགག།
གཞུང་སྒེར་སོ་སོའི་ལས་ཀྱི་སྒོ་མོ་འགག།
ད་ལོ་ལོ་སྟོད་འདི་དང་འདི་འདྲས་འགག།

ནད་འདི་མཆེད་ནས་ཟླ་ཤས་སོང་ན་ཡང་།།
ད་ལྟ་ད་དུང་སྨན་རྫས་ཕར་ལ་ཞོག།
འགོག་ཁབ་ཙམ་ཡང་ཐོན་རྒྱུ་མི་འདུག་ན།།
ས་སྒང་འགྲོ་བ་མི་ཡི་སྟོང་ཉེན་གདའ།།

ལྷ་ཞིག་ཡོད་ན་མདུན་དུ་ཐོན་ལ་ཤོག།
འགྲོ་བ་མི་ཡི་ཚེ་སྲོག་སྐྱབས་ལ་རན།།
འདྲེ་ཞིག་ཡོོད་ན་རྒྱབ་ཏུ་སྒུག་ལ་སྡོད།།
ཀོ་རོ་ན་ཡི་སྲོག་དབུགས་ཁྱེར་ལ་རན།།

23/ 03/ 2020