བཙན་མིའི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 719 བཀླགས་འདུག

སྒྲོལ་མ་ལགས།

བཙན་མི། དཀར་མཛེས།

རྣམ་དག་ཐུགས་ཀྱི་དཀྱིལ་འཁོར་ཡངས་པོ་རུ།།
སྨྲེང་སེམས་མདུད་པ་རེ་རེ་ངེས་མེད་གྲོལ།།
གཟོད་མེད་ངུ་ཤུམ་ཤོར་བའི་དགའ་བ་འདི།།
འདང་བརྩེའི་ཁ་དོག་ཡིན་ནམ་སྒྲོལ་མ་ལགས།།

ཡར་བལྟས་ཟླ་བ་འཛུམ་པའི་ཞལ་དཀྱིལ་དུ།།
ཁེར་རྐྱང་རི་བོང་དེའང་ལྷུག་ལྷུག་དགོད།།
སྐབས་དེར་ང་ཡི་ཡིད་སྣང་སྐྱོམ་མཁན་དེ།།
འདས་པའི་ཁྱོད་གདོང་ཡིན་ནམ་སྒྲོལ་མ་ལགས།།

མཚན་ཞག་རྨི་ལམ་ཡོད་ཚད་རླུང་ལ་སྐུར།།
ལང་ཚོའི་གཤོག་པ་མནར་གཅོད་སྤུ་གྲིས་གཞར།།
ནམ་ཞར་སྐྱོ་བས་གཏམ་པའི་སྣང་བ་འདི།།
ཁྱོད་ཀྱིས་བསྩལ་བ་ཡིན་ནམ་སྒྲོལ་མ་ལགས།།

མཛེས་པ་སྣ་ཚོགས་མིག་མཐའི་ཆུ་བཞིན་ཟགས།།
སྟོང་བ་ཡོད་ཚད་སྲོད་ཁའི་བྱེའུ་ལྟར་འཚུབ།།
མངོན་སུམ་གཡང་ལ་ལྷུང་བའི་གོ་རིམ་འདི།།
ལྕེབས་པའི་སྡུག་བསྔལ་ཡིན་ནམ་སྒྲོལ་མ་ལགས།།

འཚོ་བ་སྟོན་ཁའི་ཐང་ཤིང་སྐམ་པོ་བཞིན།།
སྙིང་པོ་ཡོད་ཀྱང་ལ་འདབ་ཉི་མར་འགྲན།།
མི་ཚེའི་སྲོད་ལ་བབས་པའི་བྱེའུ་ཆུང་གི།
གཤོག་འགྱུར་གཟིམ་པ་ཡིན་ནམ་སྒྲོལ་མ་ལགས།།

ལྷིང་འཇགས་མེ་ལོང་ལག་པས་ཕྱིས་ན་ཡང་།།
ལོ་ཟླའི་གྲིབ་བསིལ་འོག་ཏུ་ཐར་ཡང་རུང་།།
བྲང་གཞུང་བརླན་གྱིས་གཏམ་པའི་སྣང་བ་འདི།།
ཁྱོད་ལས་ལྡོག་ཐབས་མེད་དམ་སྒྲོལ་མ་ལགས།།

ལུས་ཀྱི་ཞིང་ཚིགས་བར་ནས་ཁྱོད་ཉིད་ནི།།
སྒྱུ་འཕྲུལ་འབུམ་གྱིས་ཕྱུག་པའི་མེ་ཏོག་སྟེ།།
ང་ཡི་མིག་ནང་འཁོར་བའི་ཕྱེ་ལེབ་དག།
དབང་མེད་ཁྱོད་སར་སྙེགས་སོང་སྒྲོལ་མ་ལགས།།

འཆི་རྗེས་ང་ནི་གང་དུ་མི་འཁྲེང་ལ།།
བར་དོའི་སྨུག་པར་ཞེན་ཆགས་སྤུང་ནས་ནི།།
ཁྱོད་ཀྱི་སྲིད་པར་རྡོག་པའི་བསྣོན་སྙམ་གྱི།།
སྨོན་པ་སེམས་ཀྱིས་བཏེགས་འོང་སྒྲོལ་མ་ལགས།།

2019 1 31