ན་བུན་གྱི་སྙན་ངག་ཁག་གཉིས།

རྩོམ་ཡིག་འདི་ཐེངས་ 581 བཀླགས་འདུག

གཅེས་ཕྲུག

གཅེས་ཕྲུག
ལྷན་འཛོམ་དེ་སྟེས་དབང་ཡིན་ཡང་།
གྱེས་བྲལ་དེ་ནམ་ཡང་མཐའ་མ་མིན།
དགོད་སྒྲ་ལས་མིག་ཆུ་མང་བའི་ལོ་ཟླ་དེ་དག
བར་ཐག་གི་རི་རབ་ལས་རྒྱང་ནས་རྒྱང་དུ་བཞུད་ཀྱང་།
ཁྱོད་ནི་ངའི་དྲན་སྒུག་གི་མངན་པ་རྒུམ་པའི་བྱེའུ་ཆུང་བཞིན།
འཁྲེང་ཞེན་གྱི་ནགས་ཀློང་ན་ཀྱུར་ཀྱུར་གྲག ཀྱུར་ཀྱུར་གྲག

གཅེས་ཕྲུག
ལྷན་འཛོམ་དེ་སྟེས་དབང་ཡིན་ཡང་།
གྱེས་བྲལ་དེ་ནམ་ཡང་མཐའ་མ་མིན།
སྤྲོ་བ་ལས་སྨྲེང་བ་མོད་པའི་དུས་ཚིགས་དེ་དག
ལས་དབང་གི་དཀྱོག་མཚམས་ལས་རབ་རིབ་ནས་རབ་རིབ་ཏུ་གྱུར་ཡང་།
ཁྱོད་ནི་ངའི་སྨག་ཀློང་གི་ལམ་ཕྲན་འོད་དུ་སྒྲོན་པའི་སྲིན་བུ་བཞིན།
ཁེར་རྐྱང་གི་གོམ་འགྲོས་བར་ན་ཆེམ་ཆེམ་འཕྲོ། ཆེམ་ཆེམ་འཕྲོ།

གཅེས་ཕྲུག
ལྷན་འཛོམ་དེ་སྟེས་དབང་ཡིན་ཡང་།
གྱེས་བྲལ་དེ་ནམ་ཡང་མཐའ་མ་མིན།
ཐུག་འཕྲད་ལས་དུས་ཆད་མང་བའི་ཉིན་མཚན་དེ་དག
སེམས་གཅོང་གི་གཙང་བོ་ལས་ཇེ་རིང་ནས་ཇེ་རིང་དུ་ཕྱིན་ཡང་།
ཁྱོད་ནི་ངའི་འཚོལ་སྙེག་གི་རྨི་ལམ་དུ་སྨིན་པའི་ལྗང་ལོ་བཞིན།
རེ་འདུན་གྱི་ཡལ་གར་ལྡེམ་ལྡེམ་བཞད། ལྡེམ་ལྡེམ་བཞད།
ཆུང་ཆུང་།

ཆུང་ཆུང་། ཆུང་ཆུང་།
མི་ཡུལ་ཆུང་ཆུང་།
འཚོལ་སྙེག་ཆུང་ཆུང་།

གནས་ཚང་ཆུང་ཆུང་།
རེ་སྒུག་ཆུང་ཆུང་།

འཇིག་རྟེན་ཧ་ཅང་ཆུང་འདྲ།
ཁ་བ་མེད།
རྩྭ་ཐང་མེད།
ད་དུང་། ཅི་ཞིག་མེད་པས།
ངས་སྙན་ངག་དྲན།