རྩོམ་པ་པོ་རྫ་ཚེ་རིང་བཀྲ་ཤིས་ཀྱི་འབོལ་རྩོམ་ཞིག

རྩོམ་ཡིག་འདི་ཐེངས་ 2139 བཀླགས་འདུག

དགེ་རྒན་ནི་འོད་དུ་འཚེར་བའི་ཕ་ལམ་གྱི་ཕྲ་རྒྱན་ཞིག་ཡིན།

ཆེད་ལས་དགེ་རྒན་གསོ་སྐྱོང་བྱེད་སྟངས་སྐོར་གྱི་ཆེད་རྩོམ།

གླེང་གཞི།

མ་གཞི་ང་ཚོ་ནི་ཀླ་ཀློ་ནས་ཤེས་ཡོན་ཅན་གྱི་གང་ཟག་ཏུ་རིམ་འགྱུར་བྱུང་ཞིང་། ཉི་མ་རེ་རེའི་དངོས་ཡོད་ཀྱི་དགོས་མཁོའང་ཚད་གཞི་མི་འདྲ་བའི་ཤེས་ཡོན་གྱི་རྩོལ་ཤུགས་དང་འབྲེལ་ཞིང་ཡོད། ཁྱད་པར་དུ། ད་ལྟའི་དུས་རབས་ཀྱི་ངོས་ནས་སྤྱི་ཡོངས་ཀྱི་གནས་སྟངས་དེ་རྩེར་སོན་ཤེས་ཡོན་གྱི་ཕྱོགས་སུ་འཕེལ་བཞིན་ཡོད་ལ། །དེ་ནི་འགྲན་རྩོད་དང་ཤེས་ཡོན་ཕན་ཚུན་གྱི་འབྲེལ་བའི་སྒུལ་ཤུགས་ལས་བྱུང་བའི་ལྷན་འབྱུང་གི་རྒྱུ་འབྲས་རེད། འོན་ཀྱང་ཤེས་ཡོན་གྱི་མི་ལྕེ་དེ་འབར་ཤུགས་ཇི་ལྟར་ཆེ་ཡང་ཕྱོགས་སུ་མ་ལྷུང་བ་ཞིག་བྱུང་མེད་ལ། ངོས་ཁ་ཤས་ལ་ལྡོག་ཕྱོགས་ཀྱི་ཤུགས་རྐྱེན་སྤྲོད་ཀྱིན་ཡོད། དཔེར་ན། སྐད་ཡིག་རྒྱལ་སྤྱི་ཅན་དུ་བསྐྱོད་པའི་བརྒྱུད་རིམ་ཁྲོད་གྲངས་ཉུང་མི་རིགས་ཀྱི་སྐད་ཡིག་ལ་འཕྲད་པའི་གནད་དོན་ལྟ་བུ་རེད།
ང་ཚོ་ཁ་བ་གངས་ཅན་པར་མཚོན་ན་དེ་བས་ཀྱང་དུས་རབས་ཀྱི་ལག་ཆ་ཨང་དང་པོ་ནི་ཤེས་ཡོན་དང་རྣམ་དཔྱོད་ཡིན་ལ། དེ་ནི་སློབ་གསོའི་ཁ་ཕྱོགས་འཁྲིད་སྟོན་བྱེད་པའི་ནུས་ལྡན་དགེ་རྒན་དག་གི་ལམ་སྟོན་ལྟེ་བར་བཞག་པའི་ཤེས་ཡོན་ཁོར་ཡུག་གི་ཐོན་འབྲས་ཁོ་ན་ཡིན་པའི་ངོས་འཛིན་གཞི་ལ་བཞག་ནས་ངས་འདིར་ཆེད་ལས་དགེ་རྒན་ཇི་ལྟར་བྱས་ནས་གསོ་སྐྱོང་བྱེད་དགོས་ཞེས་པའི་བརྗོད་གཞི་འདིའི་ཐོག་ནས་བསམ་ཚུལ་ཙམ་ཞུ་རྒྱུ་ཡིན།

འོན་ཀྱང་འདིའི་སྐོར་ལ་རིགས་པའི་གཞུང་ལགས་ཀྱི་རྒྱུ་ཆ་དང་དམིགས་བཀར་ཞིབ་འཇུག་གི་ཉམས་མྱོང་གང་ཡང་མེད་པས། དུས་རབས་དང་འཚམས་པའི་ལྟར་ཚུལ་ལེགས་པོ་ཞིག་འདོན་ཐུབ་པ་དང་། མཐའ་ཆོད་པའི་སྡོམ་ཚིག་ཅིག་རྒྱག་རྒྱུའི་སྤོབས་པ་གང་ཡང་མེད། ཡིན་ན་ཡང་། ང་ཚོ་ཐུན་མོང་གིས་ཕྱིར་རྟོག་གི་ནུས་པ་ལྡན་པའི་དཔྱད་ཞིབ་བརྒྱུད་ད་ཡོད་མདུན་དུ་ལྷག་པའི་ཤེས་རིག་ཐད་ཀྱི་བློ་ཁ་མ་ཁེངས་པའི་གནས་ཚུལ་ལ་དམིགས་ཡུལ་དང་རེ་བ་ཆེན་པོས་བགྲོ་གླེང་གནང་རྒྱུ་ལས་གལ་ཆེ་བ་གང་ཡང་མེད་པའི་འདི་ཚང་མས་ངོས་ཟིན་ཐུབ་ཡོད། འདི་ནི་ང་ཚོ་ལ་ཉམས་མྱོང་གི་བྱིིན་པའི་བསླབ་བྱ་རེད།

ཅི་ཞིག་ལ་ཆེད་ལས་དང་ཆེད་ལས་དགེ་རྒན་ཟེར།

དེ་ཡང་ཆེད་ནི་དམིགས་བཀལ་གྱི་དོན་དང་། ལས་ནི་བྱ་བའི་དོན་ཡིན་ན་ཡང། ཚིག་གི་རིམ་པ་བསྣོལ་བས་ཆེད་ལས་ཞེས་པའི་མིང་ཚིག་འདི་གྲུབ་པ་སྟེ། མིང་ཚིག་འདི་བོད་ཡིག་ཐོག་ ༡༩༦༤ལོར་བསྒྲིགས་པའི་རྒྱ་བོད་ཚིག་མཛོད་རྙིང་པར་བྱུང་བར་ལྟར་ན། སྐབས་དེ་ལས་་མི་འཕྱི་བ་ཙམ་དུ་བོད་ཡིག་ཐོག་བེད་སྤྱོད་བཏང་བའི་ཐ་སྙད་ཅིག་ཡིན། གོ་དོན་ནི། ལས་དོན་བྱེ་བྲག་པ་ཞིག་སློབ་སྦྱོང་དང་ཉམས་ཞིབ་ལག་ལེན་བཅས་བྱེད་པའི་འཇུག་ཡུལ་ལ་བྱ་ཞིང་། འོན་ཀྱང་ང་ཚོ་བོད་ལའང་སྔ་མོ་ནས་ཆེད་ལས་ཀྱི་ནང་དོན་ལྡན་པའི་འགྲོ་སྟངས་དང་ལུགས་སྲོད་པ་ཡོད་པ་ནི་བརྗོད་མི་དགོས་པ་ཞིག་རེད། གོ་དོན་འདིའི་ཁྱབ་ཁོངས་འོག་གི་ཆེད་ལས་དགེ་རྒན་ཞེས་པའང་ཚུལ་ཁྲིམས་དག་པས་ལུས་གཙང་བ། ཤེས་རབ་དག་པས་ལུང་རིགས་ལ་མཁས་པ། ལྷག་བསམ་དག་པས་གཞན་པ་ཕན་པ་བཅས་ཀྱི་ཐོག །རང་ཉིད་ཀྱིས་སློབ་མ་འཁྲིད་སྟོན་བྱེད་པའི་སྐབས་བབས་ཀྱི་བརྗོད་དང་སློབ་སྟོན་གྱི་ཐབས་ལས་བཅས་ལ་མཁས་པོ་ཡོད་པ་བཅས་མཚན་ཉིད་བཞིན་ལྡན་གྱི་སློབ་དཔོན་ཞིག་ལ་གོ་དགོས། སློབ་ཚན་འཁྲིད་ཐུབ་ཙམ་གྱི་ཤེས་ཡོན་ཡོད་པ་ཙམ་བརྒལ་ཏེ། དེ་ཉིད་དེའི་ཆེད་ལས་སུ་འགྱུར་བ་ལ་རང་ཉིད་ལས་དོན་དེའི་འཇོན་ཐང་དང་རྒྱུན་བསྲིངས་ཀྱི་སྤྲོ་སེམས་ལྡན་པ་ཞིག་དགོས་ཏེ། ཆེད་ལས་དགེ་རྒན་ཞེས་དམིགས་སུ་བཀར་བའི་ཚིག་དེས་རང་ཉིད་དགེ་རྒན་གྱི་ལམ་ཁ་ལ་སྐྱོད་ཐུབ་པའི་ཆོད་སེམས་དང་ཡིད་མོས་ཡོད་ལས་གཞན་པའི་གོ་དོན་གང་ཡང་མེད།

མིག་སྔའི་ཆེད་ལས་དགེ་རྒན་གྱི་གནས་བབ།

རིགས་གཅིག་རྐང་འཛིན་གྱིས་རང་ཉིད་དགེ་རྒན་གྱི་ལམ་ཁར་སྐྱོད་མཁན་མང་པོ་མེད་ལ། གང་ཡོད་པ་དག་གི་སྤུས་ཚད་དེ་ཤིན་ཏུ་སྐྱོ་བོ་ཡིན་པ་རེད། དཔེར་ན། བོད་ཕྱི་ལོགས་ཀྱི་སློབ་གྲྭ་ཁག་གི་ལོ་རེའི་དགེ་རྒན་གྱི་སློབ་ཡོན་དང་ལས་དཀའི་ས་མིག་ཏུ་འཛུལ་ཞུགས་ཕོ་འགོད་བྱེད་མཁན་དེ་ལས་གནས་གཞན་ལས་ཤིན་ཏུ་ཉུང་བ་དང་། གཞི་རིམ་སློབ་ཐོན་གྱི་སྦྱང་འབྲས་ལེགས་ཤོས་བུ་མོ་རྣམས་ཀྱིས་སྨན་ཞབས་སོགས་འདེམས་ཀྱི་ཡོད་པ་ལས་དགེ་རྒན་གྱི་ལམ་ཁ་འདེམས་ཀྱི་མེད་པ་དང་། དེ་དུང་འཕྲལ་སེལ་དགེ་རྒན་བྱེད་མྱོང་མཁན་ཞིག་གིས། སྐབས་དེར་ང་ལ་ལས་དོན་ལྕི་མོ་ཡོད་མིན་ལ་མ་ལྟོས་པར་ངའི་ཟླ་ཕོག་དེ་གད་པ་ཞིག་གི་ཟླ་ཕོག་ལས་ཀྱང་ཞེ་དྲག་ཉུང་བ་ཡོད་པས་ཁུངས་འཁྱོལ་ཐབས་ཀྱི་རེ་བ་གཏན་ནས་མ་བྱུང་བས་དགོངས་པ་ཞུ་དགོས་བྱུང་ཞེས་ཕྱིར་དྲན་བྱས་པ་ལྟ་བུ་རེད། དེའི་ཕྱིར། སྤུས་ཚད་ལ་བསམ་བློའི་ངོས་དང་། ཤེས་ཡོད་གྱི་ངོས། ཀུན་སྤྱོད་ཀྱི་ངོས། ལྷག་བསམ་གྱི་ངོས། སློབ་ཁྲིད་ཀྱི་ཉམས་མྱོང་དང་བྱང་ཚད་ཀྱི་ངོས་བཅས་ཡོད་པའི་ནང་ནས་ཀྱང་ངས་བལྟས་ན་དཀའ་ངལ་ཆེ་ཤོས་དེ་བསམ་བློ་དང་ཀུན་སྤྱོད། སློབ་ཁྲིད་ཉམས་མྱོང་གི་བྱང་ཚད་བཅས་ཀྱི་ཐོག་ནས་མ་འདང་བའི་ཆ་ཆེན་པོ་ཡོད་པ་ཚོར་ན་ཡང་རེ་རེ་བཞིན་རྒྱས་བཤད་བྱ་རྒྱུ་མིན།

གནས་བབ་དེའི་རྒྱུ་རྐྱེན་དང་རྒྱབ་ལྗོངས།

དགེ་རྒན་གྱི་མ་མིག་སྔའི་གནས་བབ་འདི་འདྲ་ཞིག་གྱུར་པའི་རྒྱུ་མཚན་ལ་ཕྱི་ནང་གི་རྒྱུ་རྐྱེན་གཉིས་སུ་དབྱེ་ཆོག་པ་དང་། ནང་གི་རྒྱུ་རྐྱེན། དགེ་རྒན་རང་ཉིད་ཀྱིས་རང་ཉིད་ཀྱི་འགན་འཁྲིའི་འདུ་ཤེས་ལ་འདངས་ངེས་ཀྱི་གོ་རྟོགས་མེད་པ་འདི་ཚབས་ཆེའི་གནད་དོན་གྱི་འབྱུང་ཁུངས་ཞིག་རེད་ལ། ཕྱིའི་རྒྱུ་རྐྱེན། འབྲེལ་ཡོད་འཛིན་སྐྱོང་གཙོས་པའི་གཞུང་དང་མི་མང་གིས་དགེ་རྒན་གྱི་རིང་ཐང་གི་འདུ་ཤེས་ལ་དགོས་ངེས་ཀྱི་རྩི་འཇོག་མ་ཐོབ་པ་དེ་ཡིན། དེ་ཡང་། དགོས་ངེས་ཀྱི་རྩི་འཇོག་ཅེས་པ། ཐོབ་ཐང་དང་། གོ་བབ། མཐུན་སྦྱོར་བཅས་ཀྱི་ཐད་རྩ་ཁྲིམས་རང་བཞིན་དང་། ལག་ལེན་རང་བཞིན་། ལུགས་མཐུན་རང་བཞིན་བཅས་ཀྱི་ཞབས་ཏོག་ཞུ་མ་ཐུབ་པ་དེས་དགེ་རྒན་གྱི་གནས་ཚད་དམའ་རུ་ཕྱིན་པའི་ཚབས་ཆེའི་རྒྱུ་རྐྱེན་བྱེད་ཀྱི་ཡོད་ཅེས་པའི་དོན་ཡིན།

ནོར་འཁྲུལ་དེའི་རྒྱབ་ལྗོངས། མ་གཞི་སྤྱི་ཚོགས་ཀྱི་སློབ་གསོའི་འདུ་ཤེས་དང་། ཡང་ན། སྤྱིར་བཏང་གི་དཔལ་འབྱོར་དཀའ་ངལ་ཚབ་ཆེའི་འོག་དཔལ་འབྱོར་དམིགས་ཚད་དུ་འཛིན་པའི་མུ་གེའི་ལྟ་བ་དང་། སྟོབས་ཤུགས་ལ་ཚད་བཀག་ཐེབས་པའི་གཞུང་གི་ཆེད་སྤྱོད་ལས་དོན་དང་རྟོག་ཞིབ་ལས་དོན་འཐུས་ཚང་མེད་པའི་ཞན་ཆ་སོགས་ཡིན།

ཆེད་ལས་དགེ་རྒན་གྱི་དཔུང་ཁག་ཇི་ལྟར་གསོ་སྐྱོང་བྱེད་པ།

༡ གཞི་རྩའི་ཤེས་ཡོན་གྱི་ངོས།

གཞི་རྩའི་ཤེས་ཡོན་གྱི་ངོས་ནས་དགེ་རྒན་གྱི་སློབ་ཚན་ཟེར་ཞིག་མེད་པར་མདོར་ན་སུས་གང་ཞིག་ལ་བྱང་བར་སྦྱངས་པ་དེ་སྤྱི་ཚོགས་ལ་འཁྲིད་སྟོན་བྱེད་པའི་བསླབ་གཞི་ཞིག་ཡིན་པའི་ཆ་ནས་དམིགས་བསལ་ཆེད་སྦྱོང་གི་རིག་གཞུང་རེ་ངེས་པར་ཡོད་ལ། ཁྱད་པར་ང་ཚོ་ལྟ་བུར་མཚོན་ན་མེད་ཐབས་མེད་པའི་ས་མིག་དག་ལ་ཇི་ལྟར་བསླབ་རྒྱུའི་སྐོར་ལ་ཆ་བགོས་རང་བཞིན་གྱི་སློབ་སྦྱོང་གི་བྱ་ཐབས་སྤྱད་དགོས་པ་ལས། གཙོ་ཕལ་དང་དགོས་འབྲས་ལ་མ་གཟིགས་ན་མི་ཤུགས་དངོས་ཤུགས་གང་གི་ངོས་ནས་ཀྱང་དཀའ་ངལ་འཕྲད་རྒྱུ་ཡིན། དེའི་ཕྱིར། ང་ཚོའི་སྦྱང་འབྲས་ཡག་པོ་ཅན་གྱི་སློབ་ཕྲུག་དག་གི་ཁྲོད་ནས་བདམས་པའི་ཕུལ་བྱུང་གི་སློབ་མ་དག་ལ། གཞུང་དང་ཚོགས་གང་ཞིག་གི་བདག་རྐྱེན་དང། ཡང་ན། མི་སྒེར་གྱིས་རང་གྲོ་ཁུག་མ། རང་རྟ་སྒ་བཟུང་གིས་སློབ་ཆེན་དང་ཆེད་ལས་ཀྱི་ལམ་ཁ་གང་བདམས་ཀྱང་སྤྱི་ཚོགས་འདིའི་རྩ་དོན་དང་དོན་དངོས་ལ་དགོས་ངེས་ཀྱི་ཕྱོགས་དང་། རང་ཉིད་ཀྱི་ལྷན་སྐྱེས་ཀྱི་བསམ་བློ་འཇུག་པོ་ཡོད་པའི་ཕྱོགས་གཉིས་མཐུན་པ་ཞིག་གདམ་རྒྱུ་དེ་ངེས་པར་བརྗེད་མི་རུང་།

༢ ཆེད་གཉེར་དགེ་འོས་སྦྱོར་བརྡར།

ཆེད་གཉེར་དགེ་འོས་སྦྱོང་བརྡར་གྱི་སྐོར་འདི་ངས་བལྟས་ན་རང་ཉིད་ཀྱིས་གང་ཤེས་པ་དེ་གཞན་ལ་འཁྲིད་སྟོན་བྱེད་པའི་བསམ་བློ་དང་ཐབས་ལམ་སྦྱོང་བརྡར་བྱ་རྒྱུ་དེ་རེད་བསམ་གྱི་ཡོད་ན་ཡང་། དོན་དངོས་ཐོག་ང་ཚོའི་དགེ་རྒན་འོས་སྦྱོང་གིས་གཞི་རྩིའི་ཤེས་ཡོན་ལ་ཆད་གསབ་ཀྱི་ནུས་པ་འདོན་དགོས་ཀྱི་ཡོད་པའི་ཚོར་སྣང་སྟེར་བཞིན་འདུག་པ་འདི་ནི་ཉེན་ཁ་ཅན་གྱི་ལམ་འགག་ཏུ་སྐྱོད་པའི་བརླངས་འཁོར་གྱི་སྣ་ལ་བསྒར་བའི་སྐྱོབ་ལྕགས་ལྟ་བུ་སྟེ། སྟབས་མ་ལེགས་ན་ནུས་པ་ཆུང་ཆུང་ཞིག་གམ་ཡང་ན་གཏན་ནས་འདོན་མི་ཐུབ། མ་གཞི་ང་ཚོར་སློབ་མ་སྐྱོང་སྟངས་དུས་རབས་རང་བཞིན་དང་། ཚན་རིག་རང་བཞིན། རིག་གཞུང་གི་འདུ་ཤེས་རང་བཞིན་བཅས་ལ་ཁྱོན་ཡོངས་ནས་ལྟ་རྟོག་དང་བསམ་གཞིགས་ཐུབ་པའི་བསམ་བློའི་ལམ་སྟོན་གྱི་གཞུང་ལུགས་ཡར་ཐོན་ཅན་གཅིག་ཀྱང་མེད། ས་པཎ་མཁས་འཇུག་ཏུ་བསྟན་པའི་འཆད་པ་དང་འབྲེལ་བའི་སློབ་ཁྲིད་བྱ་ཐབས་ཀྱི་སྐོར་ད་ལྟ་ད་དུང་བེད་སྤྱོད་ཀྱི་རིན་ཐང་ཡོད་པ་མང་པོ་ཞིག་ཡོད་པ་དང་། དགེ་རྒན་གྱི་མཚན་ཉིད་སྟོན་པའི་སྐབས་ཀྱི་ཁྱད་ཆོས་གསུམ་ལྟ་བུ་སྒྲ་ཡང་འཇུག་གི་དབང་དུ་བྱས་ན་ད་ལྟའི་དགེ་རྒན་གྱི་གཞི་རྩིའི་མཚན་ཉིད་དུ་རུང་བ་ཡིན་ན་ཡང་། དོན་ངོ་མར། དེ་ཡང་དུས་རབས་དེའི་སྤྱི་ཚོགས་དང་ཤེས་ཡོན་གནས་སྟངས་ཀྱི་རྒྱབ་ལྗོངས་ཅན་ཡིན་པས། དེང་གི་དུས་བབ་ཁྲོད་ཀྱི་དགེ་རྒན་ཞིག་བྱེད་པའི་བསམ་སྦྱོར་ཁག་ཆ་ཚང་བ་དང་ཞིབ་གསལ་གྱི་རྣམ་པས་འགྲེལ་བརྗོད་བྱས་མེད་པ་ནི་དེ་བས་ཀྱང་སྨོས་མེད་རེད།
ང་ཚོས་མིང་གི་གཞི་ལ་འཇུག་པའི་ངེས་ཚིག་བསྟན་དོན་དང་། དོན་ངོ་མའི་གནད་དོན་འགྲེལ་བརྗོད་བྱེད་པའི་རང་དབང་གི་གཞུང་ལུགས་གཉིས་ཀྱི་བར་དུ་དངོས་དང་གཟུགས་བརྙན་གྱི་ཁྱད་པར་ཡོད་པ་འདི་ཤེས་ན་ད་ལྟའང་ང་ཚོར་དགེ་རྒན་གྱི་སྐོར་དང་འབྲེལ་བའི་ཡང་དག་པའི་གཞུང་ལུགས་ཁ་ཚང་ཞིག་ཐོན་མི་འདུག་སྙམ། དེའི་ཕྱིར། བོད་དུ་རྒྱ་གཞུང་གི་དགེ་འོས་སློབ་དེབ་ཁག་དང་། འདི་ཕྱོགས་ནས་ཉེ་དུས་བསྒྱུར་བའི་དྲན་ཤེས་ལྡན་པའི་ཤེས་ཡོན་སོགས་སློབ་ཁྲིད་བྱེད་སྟངས་དང་འབྲེལ་བའི་དེང་དུས་ཅན་གྱི་གཞུང་ལུགས་དག་ནི་ཆེད་དགོས། དཔེར་ན། མཁས་འཇུག་ཏུ། སློབ་མའི་སེམས་ལ་བརྟགས་ནས་སློབ་ཁྲིད་བྱེད་པའི་ཐབས་ལམ་གྱི་དཔེ་མཚོན་ཅི་རིགས་བསྟན་པ་དང་། དྲན་ཤེས་ལྡན་པའི་ཤེས་ཡོན་དུ་དེ་ལས་ཞིབ་ཚོགས་པོས་སློབ་ཚན་འཁྲིད་ཐབས་ཀྱི་སྐོར་ལ་བྱ་ཐབས་མང་དུ་བཏོན་ཡོད་པ་དེ་དག་ཐབས་མཁས་པོས་བེད་སྤྱོད་གཏོང་བའི་བྱང་རྩལ་ཡོད་དགོས། དུས་མཚུངས་འཆད་སྟངས་དང་རྣམ་འགྱུར་ཀུན་སྤྱོད་སོགས་ལ་ནོར་འཁྲུལ་ཡོད་རིགས་སྤོང་བ་ལ་བློ་ཁོག་ཆེན་པོས་རང་རྟོག་གི་ནུས་ལྡན་པའི་གཤིས་རྒྱུད་ཅིག་འཇགས་རྒྱུར་རིགས་པ་སྒྲིམ་དགོས།

༢ སྤྱི་ཚོགས་ཁྲོད་ཀྱི་གོ་བབ་མཐོ་རུ་གཏོང་བ།

དགེ་རྒན་ལ་ཡིག་ཐོག་ནས་ཚད་གཞི་མི་འདྲ་བའི་ཆེ་བསྟོད་སྙན་མོ་མང་པོ་ཡོད་ལ། དཔེར་ན། ས་ཆ་འགའ་ཞིག་གི་གཞི་རིམ་གྱི་ཤེས་ཡོན་སྲིད་བྱུས་སུ། མི་རིགས་དང་སྤྱི་ཚོགས་ཀྱི་འབྱུང་འགྱུར་གནས་བབས་ཤེས་ཡོན་ལ་རག་ལུངས་ཤིང་། ཤེས་ཡོོན་བཟང་ཞན་དགེ་རྒན་ལ་རག་ལས་པས། དགེ་རྒན་ནི་སྤྱི་ཚོགས་ནང་གལ་གནད་ཆེ་ཤོས་ཡིན་ཞེས་ངོས་འཛིན་གནང་ཡོད་ན་ཡང་། ཚད་ངེས་ཅན་གྱི་ཐོག་ནས་སྤྱི་ཚོགས་ཁྲོད་མཐོང་ཆུང་གི་དར་སོ་ངན་པ་ཞིག་དངོས་ཡོད་དུ་གྱུར་པ་འདིར་བསྒྱུར་བཅོས་བཏང་ནས་དགེ་རྒན་ལ་འཛིན་པའི་ལྟ་སྟངས་ལེགས་སུ་གཏོང་དགོས།
འདིའི་ཐད་དཔེ་མཚོན་ཆུང་ས་ནས་ཞུས་ན། སྨན་ཁང་དུ་དགེ་རྒན་ལག་འཁྱེར་ཡོད་མཁན་གྱིས་བང་སྒྲིག་མི་དགོས་པ་བཟོ་རྒྱུ་ཞེས་པ་ལྟ་བུས་མཚོན་པའི་ཆེ་མཐོང་གི་འགྲོ་སྟངས་དང་ལམ་ལུགས་བཟོ་དགོས།
ལར་དགེ་རྒན་གྱི་རང་གི་སློབ་མའི་ལུས་སེམས་ཀྱི་ཐོག་ཏུ་ཕབ་པའི་གཤིས་སྤྱོད་དང་སློབ་སྦྱོང་གི་རྗེས་ཤུལ་དེས་དགེ་རྒན་གྱི་རིན་ཐང་དང་གོང་ཚད་གཅོད་པ་ཡིན་ན་ཡང་། ཁྲིམས་དང་འགྲོ་ལུགས་ངེས་ཅན་གྱི་རྒྱབ་གཉེར་འོག་དགེ་རྒན་ལ་དམིགས་འཛུགས་བྱས་པའི་མཐུན་སྦྱོར་དང་ཆེ་ཐོབ་ཀྱིས་དགེ་རྒན་གྱི་ཆེད་ལས་རང་བཞིན་རྒྱུན་བསྲིངས་བྱ་རྒྱུ་ནུས་པ་ཆེན་པོ་ཡོད་ལ། གཞི་རྩའི་ཤེས་ཡོན་ལེགས་པོ་ཡོད་པའི་དགེ་རྒན་གྱི་ངོས་ནས་དེ་བས་ཀྱང་འདི་ལ་དམིགས་བསལ་དོ་སྣང་བྱ་སྲིད། འདི་ནི་གཏམ་ཟས་སུ་ཟ་ཞིང་གོས་སུ་གྱོན་པའི་འཇིག་རྟེན་འདིའི་འཚོལ་བཞིན་པའི་སྤྱིར་བཏང་གི་གཉེར་བྱ་ཞིག་ཡིན་པས་རེད།

བ་ལང་ལྷ་རུ་འཛིན་པའི་ལུགས་སྲོལ་གོམས་གཤིས་སུ་བསྒྱུར་ཐུབ་ན། སྤྱི་ཚོགས་ཀྱི་མི་རེ་རེ་བཞིན་ལའང་གསེར་དང་མཚུངས་པའི་རྣམས་དཔྱོད་སྦྱིན་པའི་དགེ་རྒན་ལ་སྤྱི་ཚོགས་ཀྱི་དམིགས་བསལ་ཆེ་མཐོང་ཞུ་བའི་ལམ་ལུགས་ཤིག་ཅིའི་ཕྱིར་འཛུགས་མི་ཐུབ་པ་ཡིན།

༣ འཚོ་བའི་མཐུན་རྐྱེན་ལེགས་བཅོས།

ཉིན་རེའི་འཚོ་བའམ། ཡང་ན་མི་ཚེའི་འཚོ་བའི་ངོས་ནས་བཤད་ན་རང་གི་ཆེད་སྦྱོང་ཤེས་ཡོན་གྱི་བསླབ་པ་མཐའ་རུ་སོན་ཏེ། སློབ་རའི་སྒོ་ཐེམ་དང་ཁ་བྲལ་ནས་ཉིན་དེ་ནི་ཡར་འགྲོ་མར་འགྲོའི་ས་མཚམས། རྟ་ཁ་སྲབ་ཀྱིས་སྒྱུར་བ་ལྟ་བུའི་དུས་ཚིགས་ཞིག་ཡིན། མི་སུ་ཡིན་ཡང་རིགས་པ་ཤིན་ཏུ་བསྒྲིམས་ནས་རང་གི་ཡོན་གནས་རྗེས་འབྲེལ་གྱི་ལས་ཀ་ཞིག་འཚོལ་རྒྱུ་ནི་ཚོང་ལས་གྱི་གན་རྒྱུ་འཇོག་པ་ནང་བཞིན་ཏེ། ཐོབ་ཤོར་དང་རྒྱལ་ཕམ་གྱི་གཡུལ་འགྱེད་ཆེན་པོ་ཞིག་ཀྱང་རེད། དུས་མཚམས་འདི་ནས་རྟ་ཤ་ཡོད་ཨ་ཁུས་མི་རག །ཤ་མེད་ཨ་ཁུས་མི་གཞོན། མཐའ་མ་ཨ་ཁུ་རྐང་ཐང་དུ་ལུས་པའང་མི་ཉུང་བ་ཞིག་ཡོད། གང་ལྟར་ཁོ་ཚོའི་དགོས་འདུན་གྱི་ཆ་རྐྱེན་ཁྲོད་དུ་གྲོང་ཁྱེར་ཅན་གྱི་ས་བབ། མིང་གྲགས་ལྡན་པའི་ལས་གནས་སོགས་མང་པོ་ཞིག་ཡོད་སྲིད་ན་ཡང་། གཙོ་བོ་དེ་རིང་ཉིད་དང་འབྱུང་འགྱུར་གྱི་ཁྱིམ་ཚང་གི་འཚོ་ཐབས་དང་འདུན་མ་ལ་དམིགས་པའི་དགོས་ངེས་ཀྱི་ཆ་རྐྱེན་ཏེ། ཕོག་ཐོབ་ཅེས་པའི་ཡིག་འབྲུ་གཉིས་པོ་དེ་རང་རེད། དེ་མིན་སེམས་ཤུགས་དང་ལྷག་བསམ་གྱིས་མི་ཚེ་གང་པོར་ཚེ་གཡོག་བྱེད་སྡོད་མཁན་གྱི་ཚད་ལྡན་གྱི་དགེ་རྒན་འབོར་ཆེན་ཞིག་ཡོང་དགོས་ཟེར་ན་དེ་ནི་འཆར་སྣང་ཙམ་ལས་དངོས་ཡོད་ལ་དེ་ལྟར་ཡོང་མི་སྲིད། འདིའི་གནས་ལུགས་ནི་ལས་བསླ་བོ་ཞིག་སྟེ། ཨ་རིའི་དཔལ་འབྱོར་གྱི་གནས་བབ་ལེགས་ཉེས་སྐབས་ཀྱི་ཆེད་ལས་ལག་རྩལ་དང་ཤེས་ཡོན་མི་སྣའི་འཚང་ཁ་དང་ཕྱིར་གཤིག་གི་གནས་སྟངས་ཀྱི་གསལ་བོར་བསྟན་ཡོད། ད་དུང་རྒྱལ་གཅེས་དཔའ་བོས་ལུག་རྫི་བྱེད་པ་དང་། སྐུ་ངོ་ཟུར་བས་གསང་སྤྱོད་འཁྲུ་བ་སོགས་ཀྱང་གནས་ལུགས་འདིའི་གསལ་བཤད་ཀྱི་དཔེ་མཚོན་ཡག་པོ་ཞིག་རེད།

ད་དུང་ནན་བཤད་ཞུ་འདོད་པ་ཞིག་ལ། ཆེད་ལས་དགེ་རྒན་གྱི་འཁན་འཁྲིའི་འདུ་ཤེས་དང་བསམ་བློའི་རྟོགས་ཚད། ཤེས་ཡོན་གྱི་ཚད་གཞི་ཀུན་སྤྱོད་རང་བཞིན་བཅས་ཀྱི་ངོས་ནས་རྒྱ་མར་བཏེགས་ཏེ་ལྗིད་ཁོག་འཚོལ་བ་དང་། དེ་འདྲའི་དགེ་རྒན་བསྐྱེད་སྲིང་བྱ་སའི་ཁོར་ཡུག་བསྐྲུན་རྒྱུ་དེ་ཆེད་ལས་དགེ་རྒན་གསོ་སྐྱོང་བྱ་རྒྱུའི་གོ་དོན་ཡིན་ནའང་། ངས་བསམ་ན། ང་ཚོར་མཚན་ཉིད་ཚང་བའི་དགེ་རྒན་མེད་པའི་དཀའ་ངལ་ལས་གང་ཡོད་པའི་དགེ་རྒན་དེ་དག་ང་ཚོའི་ཁོར་ཡུག་འདི་ནས་ཉུག་བསྲིངས་ནས་ལས་དོན་བྱེད་བཞིན་གནས་ཐུབ་དང་མི་ཐུབ་འདིི་ཁོ་ན་ལ་བློ་འཚབ་ཆེ་བ་བྱེད་དགོས་པ་ཞིག་ཆགས་ཡོད།

༤ ཆེད་འཛུགས་ཚོགས་ཆུང་དང་དེའི་ལས་དོན།

ང་ཚོས་ཕངས་མེད་དུ་བཏང་བའི་མ་དངུལ་དང་། ཕྱིར་འོང་མེད་པའི་དུས་ཚིགས། མེ་ཏོག་ལྟ་བུའི་གཞོན་སྐྱེས་དག་ཆུད་ཟོས་སུ་མི་འགྲོ་བའི་ཆེད། ཆེས་མཐོའི་དགེ་རྒན་ལས་དོན་རྟོག་ཞིབ་ཚོགས་ཆུང་ཞིག་འཛུགས་དགོས་ཤིང་། དེའི་འོས་འགན་ནི་མཚན་ཉིད་ལྡན་པའི་དགེ་འོས་མི་སྣ་འཚོལ་སྒྲུབ་གྱིས་དགེ་རྒན་གྱི་ས་མིག་ཁག་ཏུ་འོས་སྦྱོར་དང་། ལས་ཐོག་དགེ་རྒན་གྱི་དངོས་ཡོད་དཀའ་ངལ་སེལ་ཐབས་ཀྱི་མགྲིན་ཚབ་བྱེད་པ། དགེ་རྒན་གྱི་རང་འཁྲིའི་ལས་འགན་ལེགས་པར་སྒྲུབ་ཀྱི་ཡོད་མེད་ལྟ་རྟོག་བྱེད་པ། དགེ་རྒན་ཁག་གི་མཉམ་འབྲེལ་རང་བཞིན། ཤེས་རྟོགས་རང་བཞིན། བརྗེ་ལེན་རང་བཞིན་བཅས་ཀྱི་གལ་ཆེའི་བྱ་འགུལ་ཁག་ལ་མཚམས་སྦྱོར་དང་བརྒྱུད་བསྐུལ། གྲོགས་དན་བཅས་བྱེད་པ། ད་དུང་སློབ་གྲྭའི་འཛིན་སྐྱོང་སྡེ་ཚན་ཁག་གིས་སློབ་གྲྭའི་ཆེད་སྤྱོད་དཀའ་ཁྲོལ་དང་དངུལ་རྩིས་གཏོང་ཡུལ་ཐད་དགེ་རྒན་ལྟེ་བར་འཛིན་པ་དང། ཡང་ན་དགོས་ངེས་ཐད་འབྲེལ་ཡོད་ལས་ཁུངས་ལ་སྔོན་རྩིས་ཀྱི་བཀའ་ཁྲོལ་ལོགས་སུ་ཞུ་རྒྱུ་སོགས་ལ་ལྟ་སྐུལ་ལས་དོན་བྱ་རྒྱུ་དང་། དུས་མཚུངས་དགེ་རྒན་དགེ་རྒན་དང་འབྲེལ་བའི་དཀའ་ངལ་སོགས་སློབ་གྲྭ་སོ་སོའི་འཛིན་སྐྱོང་སྡེ་ཁག་ལ་དུས་ཐོག་གསལ་འདེབས་ཞུ་རྒྱུ་སོགས་ལ་འགན་འཁུར་དགོས།

མཇུག་བསྡུའི་གཏམ།

མདོར་ན་མཚན་ལྡན་པའི་དགེ་རྒན་ཞིག་མེད་ན་གཞི་རྒྱ་ཆེ་བའི་སློབ་གཉེར་ཁང་གང་འདྲ་ཞིག་ཡིན་ཡང་མི་བུའི་རྣམ་དཔྱོད་གྱི་ཞིང་ས་ཞིག་ཆགས་ཐབས་མེད་ལ། འགན་འཛིན་དང་འཛིན་སྐྱོང་གི་སློབ་གསོའི་ལྟ་གྲུབ་དང་ལག་ལེན་ཀུན་སྤྱོད་ཀྱིས་ཀྱང་དགེ་རྒན་གྱི་དམིགས་ཚད་ལ་དྲང་ལྡོག་གི་ཤུགས་རྐྱེན་ཅི་རིགས་བྱེད་པ་དང་། ཕྱིའི་ཁོར་ཡུག་གི་ཚད་བཀག་རང་བཞིན་གྱིས་ཀྱང་དགེ་རྒན་གྱི་བསམ་པ་ལམ་དུ་ལྷོངས་པར་དཀའ་ངལ་སྤྲོད་ན་ཡང་། སློབ་མ་ལ་ཤུགས་རྐྱེན་སྤྲོད་པའི་རྩ་བའི་ནུས་ཤུགས་ནི་དགེ་རྒན་ཁོ་ནར་དབང། དེས་ན་སློབ་གླིང་མཆོད་རྟེན་ཞིག་ཡིན་པའི་དབང་དུ་བཏང་ན་ཚད་ལྡན་པའི་དགེ་རྒན་ནི་མཆོད་རྟེན་གྱི་བུམ་སྒོ་ན་འོད་དུ་འཚེར་བའི་ཕ་ལམ་གྱི་ཕྲ་རྒྱན་དེ་རེད། དེའི་ཕྱིར། རིན་ཐང་ལྡན་པའི་ཕ་ལམ་འདི་ཇི་ལྟར་གཅེས་ཉར་བྱ་རྒྱུ་ནི་ཆེད་རྩོམ་འདིའི་དམིགས་ཡུལ་ཡིན། ཤེས་ཡོན་དང་རྣམ་དཔྱོད་རྒྱལ་བར་གྱུར་ཅིག །