དུར་མིག་གི་ཞར་བཀོད་གསུམ།
རྩོམ་ཡིག་འདི་ཐེངས་ 493 བཀླགས་འདུག
སྟོང་པའི་ནང་གི་གཞས།
དུར་མིག (དཀར་མཛེས། )
ངས་རྟེན་འབྲེལ་གྱི་ཆོས་རྣམ་ཞེ་ལ་དྲན་ཚེ
རྨི་ལམ་དུ་རྒྱུད་སྐད་རེ་ཡོད་སྲིད་ཀྱང
གཙུག་ལག་ཁང་གི་ཐང་ཆེན་ལ་ཆུ་འཁྱིལ
ཞི་བའི་སྤྱན་ཟུང་དུ་རང་བྱུང་གི་མཛེས་སྡུག་ཡིད་དུ་འོང
ནམ་ཞིག་ལྟ་མགུར་གྱི་རྟོགས་བརྗོད་འཆད་དུས
བྱིན་རླབས་གང་རུང་གིས་མར་ཁུ་རང་ས་ནས་ས་རུ་དཀག
ཐམས་ཅད་སོང་ཤུལ་ན
ཁྱེད་ཀྱི་དབུ་སྐྲ་ཉག་མ་ནག་པོ་དེས་ཀྱང་མུན་པ་བསྡམས
འཇིག་རྟེན་འདིའི་ཡོད་ཚད་སེམས་ལ་རག་ལས་འདུག
༢༠༡༩ .༥.༣ ཉིན་བྲིས།
ཞལ་རས་བོར་བ།
_____གྲོགས་འདང་ཆེན་ལྷག་པ་རྒྱལ་གྱི་ཡུམ་ཆེན་འདས་གྲོངས་སུ་ཕྱིན་རྗེས།
ཡུན་རིང་ཞིག་ལ་དགོན་ནང་དུ་ཤིང་རྟ་དྲུད་ནས་ཡོང་མ་ཐུབ
ད་ལྟ་ཉི་ནུབ་ཀྱི་མཛེས་པ་རོལ་ཞོར་ཉིན་སྲིབ་ཉུལ་དུས
ཡོད་ཚད་མི་རྟག་པའི་དབུ་སྐྲ་རླུང་གིས་ཁུར་ཏེ་བུད་སོང
ང་རང
དུས་ཚོད་ཀྱི་དྲུད་དེ་ཁང་ཆུང་ནང་དུ་ཐོན་ཡོད
འདི་འབྲལ་རི་མོའི་ནང་གི་ཚེས་རིས་འཁྱག་འདུག
ཐག་རིང་གི་ཞེན་ཆགས་བུ་ལ་བསྐྱུར་ཡོད
དེའི་རྗེས་སུ
སྐྱོ་བ་དང་མུན་པ་གཉིས་མིག་ལམ་དུ་བསྡད་དེ
གདུང་སེམས་ཀྱི་མ་ཎི་རྡོ་འབུམ་ཞིག་ཏུ་གྱུར
༢༠༡༩.༦.༢༣ ཉིན་བྲིས།
ལས་འཕྲོའི་སྙན་ངག་ལ་དགའ་མཁན་ཞིག
དབྱངས་གསལ་གྱི་མེ་ཏོག་ཏུ་མཛེས་སྡུག་བསྐྲུན་ཅིང
ཉི་མ་དམར་ཐག་ཆོད་དུས་འབྲོག་ས་རུ་བྱ་ཁྱུ་འཕུར
ད་ལྟ
མཆོད་ཀོང་ལ་ཚེ་རབས་ཀྱི་མར་ཁུ་བླུགས
ཐང་སྟོང་དུ་གཞོན་ནུ་མ་ཞིག་གི་སེམས་སུ་བརྩེ་གདུང་ལྷུང
ཞི་ལ་དཀར་པོ་ཁྱོད་ཕ་ཡུལ་དང་ཁ་གྱེས་དུས
ན་ཚོད་ཀྱི་ཚོར་བ་དྲུད་དེ་སྙན་ངག་བྲིས
འཇིག་རྟེན་འདིའི་དམིགས་ཡུལ་ཁ་ཕྱོགས་མེད་པར་རྡོག་པས་མནན
༢༠༡༩.༦.༡༩
བསམ་ཚུལ་ཕྲིས།