སྙན་ངག་པར་སྤྲིངས་བ།

རྩོམ་ཡིག་འདི་ཐེངས་ 548 བཀླགས་འདུག

མགར་ཐང་དཀར། མཚོ་ལྷོ།

སྙན་ངག་པ་ལགས།

མཚན་ཉིད་དང་ལྟ་གྲུབ་ཀྱི་ཡུལ་གྲུ་ཞིག།

ཁྱོད་ཀྱི་ཚོར་སྣང་གིས་བཟོ་བསྐྲུན་ཐུབ་པ་ཨེ་བདེན།

མཁས་རློམ་དང་ང་རྒྱལ་གྱི་སྒང་བུ་ཞིག།

ཁྱོད་ཀྱི་རིག་འཕྲུལ་གྱིས་ཚར་གཅོད་ཐུབ་པ་ཨེ་བདེན།

སྙན་ངག་པ་ལགས།

ཨམ་གཙིགས་ཀྱིས་མ་བསྡམས་པའི་གཤིས་ལུགས་ཞིག།

ཁྱོད་ཀྱི་རྟོགས་འགྱུ་ལས་མངོན་ཐུབ་ཟེར་བ་ཨེ་བདེན།

ཞེན་ཆགས་ཀྱི་མེ་ཁ་གདོང་ནས་གསོས་པའི་ཟུག་གཟེར་ཞིག།

ཁྱོད་ཀྱི་གཙང་བོར་བསྲེས་པའི་ཐ་སྙད་ཀྱིས་འགམ་ཐུབ་ཟེར་བ་དེ་ཨེ་བདེན་ནམ།

སྙན་ངག་པ་ལགས།

ཁྱོད་ལ་ཤམ་ཤམ་འབབ་པའི་མིང་བརྡའི་སྦྲང་ཆར་ཡོད་པ་བདེན་ནམ་ཀྱེ།

བདག་གིས་རུས་རྐང་བརྡུངས་པའི་དྲི་བར་ཐེངས་གཅིག་གསན་རོགས།

སྙན་ངག་པ་ལགས།

ཁྱོད་ལ་སྔུར་བའི་ལར་གྱི་རིག་སྒྲུབ་ཀྱི་ལྟ་བ་ཡོད་པ་བདེན་ནམ་ཀྱེ།

བདག་གི་དབང་ཀླུང་གཤགས་པའི་ཐད་འདྲི་ལ་ཐེངས་གཅིག་གསན་རོགས།

མཆན། སྙན་ངག་པའི་མངོན་ནུས་ལས་རྙེད་པའི་ལྟ་གྲུབ་ཀྱི་རིག་པ་ཞིག་གི་སྔོན་འགྲོ་ཙམ་ལབ་པ།

2019/4/28 ཉིན་རྒྱ་ནག་ཀུང་ཞི་ཞིང་ཆེན་ནས།