སྨུག་པར་རོལ་བ།

རྩོམ་ཡིག་འདི་ཐེངས་ 283 བཀླགས་འདུག

སྨུག་པར་རོལ་བ།

ཨ་འཇམ། ས་རཱ་མཐོ་སློབ།

གསེར་ཏོག་གནམ་ངོ་མོག་པོར་ཟུག །ཁྲོམ་སྲང་བོད་ཀྱི་ཡིན་ཚུལ་བྲིས།།
མི་ལོ་མང་བོའི་རྐང་རྗེས་དག །གཅིག་གིས་སྲུང་ཞིང་གཅིག་གིས་གློད།།

ཕྱི་དྲོའི་བོད་སྐད་ཐར་ཐོར་དག །ཆར་ཤུལ་སྐྱ་བོའི་ངོས་སུ་ཡན།།
ཚགས་པར་དེ་དག་ཡལ་བ་ན། །རྣ་སྐུད་ཅན་གྱི་མགྲོན་པོ་མང་།།

ནུབ་ཀྱི་ལྟག་སྒོ་དོག་མོ་ན། །ངོ་གདོང་ཕྱེད་ཀའི་མྱ་ངན་ཡོད།།
དེ་རིང་ཐུག་པའི་གྲོགས་པོ་འདི། །སང་ཉིན་བོར་སྟོར་འབྱུང་བར་ངེས།།
ཕོ་བྲང་གཅིག་གི་ཀ་བ་ཡིས། །རྒྱལ་སྤྱིའི་སྟེང་ལ་གུར་ཞིག་ཕུབ།།
ང་ཡི་ཐལ་མོ་ཟད་པོ་འདི། །རང་གི་ཡི་གེའི་ཀློང་ལ་བཞག།

སྲིད་ཀྱི་དབུགས་ཁ་དར་ས་ཡང་། །གློ་བུར་ཞུམ་པ་ཅི་ཞིག་གོ།
རྒྱབ་ཁུག་ནང་གི་གློག་ཀླད་ཀྱང་། །ཁུ་སིམ་ངུ་བའི་སྣང་བ་མཆིས།།

ད་ནི་རི་བོ་རྒུད་གྱུར་པས། །རང་གི་མེ་ལོང་ཁོ་ན་བྲིས།།
གྲ་སྒྲིག་ནང་གི་སྐྱ་ཀ་ཨ། །དོ་ནུབ་གནས་ཚང་གང་ན་ཡོད།།

ཐག་རིང་ཞེས་པའི་མངའ་འོག་ན། །གཉེན་གྱི་དྲི་བ་དུ་མ་ལུས།།
རང་གི་རྫུན་གྱི་སྣེ་མོ་ན། །སྒྱིད་ལུག་འདི་ཡང་ཉལ་ནས་ཡོད།།

ད་ལྟ་ཤར་ནུབ་མདུད་སོང་བས། །སྨེ་བ་འདི་ཡང་ཆེ་རུ་སྐྱེད།།
སྙིང་གི་ཐིག་ལེ་ཡིག་ཆ་རུ། །ཟླ་བ་འཆར་ཚུལ་བཀོད་ཁུལ་བྱས།།

ཁྲུས་གཞོང་ནང་གི་གོན་པ་དག །སྲང་གི་རྨ་བྱའི་ཁ་དོག་ཡིན།།
བོད་ཚིག་འགའ་ལ་འདང་བཞག་ནས། །ང་ཡང་འདི་ལྟར་འབོར་བར་ངེས།།
༢༠༡༦-༩-༡༠