རྒྱང་རིང་ལྟ་བུའི་ཁྱེད།

རྩོམ་ཡིག་འདི་ཐེངས་ 361 བཀླགས་འདུག

རྒྱང་རིང་ལྟ་བུའི་ཁྱེད།

རས་གཟན་དམར་པོ། རྔ་བ།

ང་ཡིས་གདུང་བའི་གངས་རི་མང་པོ་བརྩིགས།།
སྐྱོ་བའི་ཉི་ཟླ་གཉིས་ཀྱང་མགུལ་དུ་དཔྱངས།།
ཁྱོད་ཉིད་མེད་པའི་མཐའ་མེད་མཚོ་འགྲམ་ན།།
སྨྲེང་བ་དཀྲོལ་བའི་ངང་ཁྱུ་ཚོམས་ཏེ་འགྲོ།།

ནུབ་མཐའི་ཉི་མས་ང་ལ་ག་ལེར་ལྟ།།
སྒེག་པའི་ཉམས་ཀྱིས་ཡང་དང་བསྐྱར་དུ་ལྟ།།
ངས་ཀྱང་ཞེན་པའི་ལག་ཟུང་ཕར་ལ་བརྐྱངས།།
ཁྱོད་རང་ཉི་མའི་འོད་ན་ཨེ་བཞུགས་བལྟས།།

རི་བོའི་སྐེད་དུ་འཚོ་བའི་འདབ་ཆགས་ཚོས།།
ང་ཡི་སྐྱོ་བ་རྟོགས་སམ་ག་རེ་ཡིན།།
གསང་བའི་མིག་གིས་རྒྱང་ལ་ལྟ་ཞོར་དུ།།
དྲན་པའི་མགུར་ཆུང་མགྲིན་པའི་སྦུབས་ནས་བཞེངས།།

ང་རང་རི་སྒང་དག་ལ་མང་དུ་སོང་།།
ས་མཐའི་གངས་རི་མིག་གིས་ཨེ་ཟིན་བལྟས།།
ངས་ནི་ས་སྲོད་མང་པོར་རི་སྐེད་ནས།།
ཉི་ནུབ་ཁྱོད་ལ་འཁྲིལ་ཏེ་མིག་ཆུ་དཀུ།།

གལ་ཏེ་ནམ་ཞིག་སྔོན་གྱི་གནས་དེ་ནས།།
འུ་གཉིས་དགའ་བའི་ངང་ནས་འཕྲད་ཀྱང་རུང་།།
ངས་ནི་ཚེ་རབས་མང་པོའི་སྡིག་སྒྲིབ་ཀྱི།།
སྨྲེང་བའི་མིག་ཆུ་འབྱིན་ཏེ་ཧད་པར་འགྱུར།།

དེ་ལྟར་ལས་ཀྱི་ས་ཚིགས་སོ་སོ་ནས།།
མི་ཚེའི་གདུང་བ་འཐུ་བའི་རླུང་བུ་ཁྱོད།།
ངང་ཙམ་སྡོད་དང་དལ་དང་དལ་གྱིས་མོལ།།
ཨེན་ཙམ་བཞུགས་དང་སེམས་ཀྱི་གཞས་ཆུང་དཀྲོལ།།
༢༠༡༦-༩-༡༩