དྲན་པ་དབྱངས་ལ་བཏགས་པ།

རྩོམ་ཡིག་འདི་ཐེངས་ 290 བཀླགས་འདུག

དྲན་པ་དབྱངས་ལ་བཏགས་པ།

སྙིང་མིག རྡ་ས།

ད་ལོ་ཨ་མ་ཧ་ཅང་དྲན་པ་ཡིན། །གནམ་ངོ་རྨུག་པ་ཨེ་རེད་གང་རེད་གོ།
ཆར་དུས་ཟད་མཐའ་མེད་པ་ཅི་རེད་གོ །ཁང་པ་གོག་པོས་གློ་བ་ཨན་ཙམ་བརླན།།

ཤེལ་ཕོར་ཆག་རོས་དྲན་པ་ཨན་ཙམ་སྨྱོས། །གངས་ཀྱི་ཡོལ་བ་ད་དུང་གཡོ་བ་འདྲ།།
ད་ལོ་ཨ་ཕ་ཤིན་ཏུ་དྲན་པ་ཡིན། །ན་བུན་རི་ཀླུང་ཡན་པ་ཨེ་རེད་གོ།

སྨུག་པས་ཐང་མཐའ་གཡོག་པ་ཨེ་རེད་གོ །གནའ་གཏམ་ཉན་ན་ཡི་མུག་ཕྱ་ལེ་བོ།།
ས་མཐའི་སྐྱོ་བ་དབྱངས་རྟ་གཉོམ་ལེ་བོ། །མ་གཞི་ལས་དབང་ཞེ་ཤ་གནག་པ་འདྲ།།

དོ་ནུབ་ལྒང་བཞུའི་འོག་ཏུ་ཟླ་འོད་ཡིབ། །དོ་ནུབ་མུན་པའི་ཕང་དུ་རྨི་ལམ་གཞའ།།
ང་ཡི་སེམས་པ་ཀླུང་ལས་ཡང་སེ་འབབ། །ང་ཡི་ལྷུ་དྲུག་རི་རྩེར་ཡང་སེ་ཆས།།

སྒང་གཤོང་མོད་པའི་ས་གཞི་འཇམ་པོ་མ། །སྤྱིར་བཏང་མཚོ་མོའི་རླབས་ཀྱིས་སྐྱོམ་པ་འདྲ།།
སང་ཞག་གངས་རི་དག་གིས་ཉི་འོད་བཞོ། །ད་ཞག་ཉི་འོད་འབབ་པའི་ནམ་གུང་ཡིན།།

ལ་ཆེན་བརྒལ་བའི་གསར་འབྱོར་“ཀར་ཅ„་དག །ཀུ་ཤུ་ཡིན་པའི་མདོག་རོ་མ་ཤོར་ཨོ།།
ང་ཚོས་སྣང་བའི་གཅོང་གླུ་ལེན་དགོས་རེད། །ང་ཚོས་རྐང་ཡ་གནམ་ལ་བཀྱག་དགོས་རེད།།

༢༠༡༦-༨-༢༧

རྒྱ་གར་སྐད་དུ། “ཀར་ཅ་’’ནི་མ་སྨིན་པ་སྟེ། གསར་འབྱོར་ཐུན་མོང་ལ་ཐོབ་པའི་མིང་ཞིག་རེད།