རེ་བའི་སྐུལ་མ།

རྩོམ་ཡིག་འདི་ཐེངས་ 408 བཀླགས་འདུག

རེ་བའི་སྐུལ་མ།

ཤེས་རབ་མཚོ་མོ། བོད།

གངས་དཀར་གཞིས་ཁྱིམ་དུ་འཚར་བའི་མཛེས་སྡུག་གི་ལྷ་མོ།།
བག་འཁུམ་དྲྭ་བ་ཡི་འཆིང་ཞགས་ཐག་རྒྱག་གི་སྣེ་མོས།།
སྤོབས་པའི་གོམ་འགྲོས་ཀྱི་གཤིས་སྤྱོད་འཇམ་པོ་ཡི་མགོ་བོ།།
མ་བཀྱིགས་གུ་ཡངས་ཀྱི་བསམ་བློས་ཡར་བརྩོན་ན་ལོངས་ཤོག།

སྟོད་ཀྱི་ཡུལ་ལུང་ན་འཛུལ་བའི་ན་མཉམ་གྱི་བོད་མོ།།
གྱོན་གོས་མཛེས་རྒྱན་གྱི་མ་རློམ་མ་འོངས་ཀྱི་མདུན་དུ།།
མགོ་འཐོམ་མགོ་སྐོར་གྱི་རྨོངས་གཉིད་འཚང་ཀ་ཡི་དམག་ལས།།
གཡེང་བའི་གཡུལ་དམག་གི་དཔུང་ལས་རྣམ་པ་རུ་རྒྱལ་ཤོག།

བར་གྱི་དབུས་གཙང་དུ་འཁྲུངས་པའི་ཆོས་ལྡན་གྱི་སྲས་མོ།།
གཡོ་སྒྱུའི་སླུ་ཐབས་ཀྱིས་རང་སེམས་མཛེས་ངོམ་འདི་བོར་ནས།།
ཞེ་འཇམ་ཡ་རབས་ཀྱི་སྲོལ་བཟང་ཁོག་རུམ་ན་ཉར་ཏེ།།
གཞུང་དྲང་བདེ་བ་ཡི་མདོ་ལ་གོམ་གང་རེ་སྤོས་ཤོག།

སྨད་ཡུལ་མདོ་ཁམས་ཀྱི་སྒྲ་དབྱངས་མཚར་སྡུག་གི་སྒེག་མོ།།
རྣམ་བཀྲའི་གཟུགས་སྐད་ཀྱི་ལང་ཚོའི་ཁེངས་སྤོབས་ཀྱི་ང་རྒྱལ།།
དམར་ཆུང་སྙིང་དུམ་གྱི་ཀློང་ནས་ཡེ་སངས་སུ་འདོར་གྱིན།།
ཤེས་བྱའི་མཁའ་དབྱིངས་ཀྱི་ཀླས་ལ་མགྱོགས་རྩལ་རེ་འགྲན་ཤོག།

བྱམས་ལྡན་ཨ་མ་ཡི་གཅེས་ཕྲུག་ཁ་བ་ཡི་སྲས་མོ།།
རྒན་བཀུར་གཞོན་བྱམས་ཀྱི་བརྩེ་དུང་བཅོས་མིན་དུ་ཕྱུངས་ནས།།
ཆོལ་གསུམ་ཕ་ཁྱིམ་ཀྱི་ཕུ་ནུ་དགའ་འཛོམས་ཀྱི་དམ་བཅའི།།
མཐུན་སྒྲིལ་རྡོ་བརྐོས་ཀྱི་རི་མོའི་གཟུགས་བརྙན་དེ་འཚེར་ཤོག།

ཕོ་མཆོག་མོ་དམན་གྱི་གླེང་བའི་གཏམ་བརྗོད་ཀྱི་སྟེགས་བུར།།
ལྕེ་རྩེ་བདེ་མོ་ཡི་རྙོག་བཤད་སྐམ་ཚིག་ཅིག་མིན་པར།།
ཤེས་རིག་ཡོན་ཏན་གྱི་ཐེམ་སྐས་བང་རིམ་གྱི་ལམ་ལ།།
མ་ལྷོད་འབད་བརྩོན་གྱི་སྐུལ་འདེད་དམ་འཛིན་གྱིས་བགྲོད་ཤོག།

ཞིམ་མངར་རྩམ་ཟས་ལ་རོལ་བའི་བསིལ་ལྗོངས་ཀྱི་བོད་མོ།།
ལ་རྒྱའི་རྒྱལ་མཚན་གྱི་རླུང་རྟ་འཇའ་ཚོན་གྱི་སྣ་ལྔས།།
མ་ཡིག་ཕ་སྐད་ཀྱི་སྲོག་ཤིང་དྭངས་མ་ཡི་སྲོལ་རྒྱུན།།
མི་འགྱུར་རྟག་བརྟན་གྱི་གཞི་ལ་ཡུན་རིང་དུ་སྲིངས་ཤོག།
༢༠༡༦-༩-༡