ཡུལ་གྱར་བའི་གདུང་གླུ།

རྩོམ་ཡིག་འདི་ཐེངས་ 409 བཀླགས་འདུག

ཡུལ་གྱར་བའི་གདུང་གླུ།

གཟི་མིག་གསུམ་པ། བོད།

སྐྱེ་དུས་ལྟེ་ཁྲག་ས་རུ་འཐོར་བའི་གནས།།
རྒ་དུས་རྣམ་ཤེས་ཞི་བར་གཟིམས་པའི་ཞིང་།།
གཞོན་དུས་སྣང་བ་འཁོར་སའི་འཇིག་རྟེན་ཏེ།།
རྣམ་ཀུན་སྙིང་ན་འཕག་པའི་ཕ་ཡུལ་ལགས།།

ང་ཡི་རྨི་ལམ་གངས་རི་དཀར་བོས་བསྒུལ།།
ཁྱེད་ཀྱི་བླ་སྲོག་གངས་ཆབ་དྭངས་མོས་བཀྲུས།།
འུ་ཅག་རེ་སྨོན་གངས་ལྷའི་འབྲས་བུར་སྨིན།།
ཆོལ་གསུམ་ལ་རྒྱ་གངས་སེང་ང་རོ་སྒྲོག།

ནམ་མཁའ་གོས་སུ་གྱོན་པའི་མཐོ་སྒང་མི།།
རྩྭ་ཐང་གདན་དུ་བཏིང་བའི་གནའ་བོའི་མི།།
གཡང་དཀར་སྤྲིན་ལ་བསྲེས་པའི་འབྲོག་པའི་མི།།
འབྲོང་རྒོད་གཡུང་ལ་ཕབས་པའི་དཔའ་བོའི་མི།།

སེམས་ཀྱི་ཁ་དོག་གངས་ཀྱི་མདངས་ལ་འཕོས།།
ནང་གི་ཤེས་རྒྱ་ཡངས་པའི་སྤང་ལ་བཅོལ།།
སྙིང་གི་བརྩེ་བ་འཛད་མེད་གཙང་བོར་འདྲེས།།
བློ་རིག་གསལ་བ་ཉི་ཟླའི་འོད་དང་འགྲོགས།།

ཡུལ་འདིའི་མི་རྣམས་བྱམས་བརྩེའི་བདག་ཉིད་དེ།།
རང་གི་དགྲ་ཡང་འཚེ་མེད་ཞི་བས་སྐྱོང་།།
བདག་གཞན་མཉམ་བརྗེའི་ལྟ་སྤྱོད་གཙང་མ་འདི།།
རང་བདེ་གཞན་སྐྱིད་དགེ་ལེགས་འབྱུང་བའི་གཞི།།

མིག་ཟུང་བཙུམ་དུས་སེམས་ན་ཁྱེད་རང་གསལ།།
སེམས་པ་སྐྱོ་དུས་སྙིང་ནས་ཁྱེད་རང་དྲན།།
གཏན་དུ་བརྗེད་ཐབས་བྲལ་བའི་སེམས་རྟེན་ཁྱེད།།
དུས་རྒྱུན་རྨི་ལམ་ནང་ལ་ཡང་ཡང་འཁོར།།

གསོན་པའི་རེ་བ་འཆང་ས་ཁྱེད་ཉིད་དེ།།
ཤི་བའི་ཕྱི་མིག་ཁྱེད་ཀྱི་ཕང་བར་ལུས།།
ཤི་གསོན་མཚམས་ཀྱི་མཐའ་མའི་ཁ་ཆེམས་ཀྱང་།།
ཕ་ཡུལ་ཕ་ཡུལ་ཞེས་པ་འདི་ལས་ཅི།།
༢༠༡༦-༦-༡ རྭ་རྒྱར་བྲིས།