བསྟན་པ་འཛིན་སྐྱོང་དང་ཆབ་སྲིད་ཀྱི་འབྲེལ་བ།

རྩོམ་ཡིག་འདི་ཐེངས་ 843 བཀླགས་འདུག

འཇིག་རྟེན་ཆོས་བརྒྱད་དང་ཆབ་སྲིད་ཀྱི་དབྱེ་འབྱེད།  བྱམས་པ་ལམ་བཟང་།  བསྟན་པ་འཛིན་སྐྱོང་དང་ཆབ་སྲིད་ཀྱི་འབྲེལ་བ་ཞེས་པའི་ཐད།མ་རྟོགས་པ་དང་ལོག་པར་རྟོག་པའི་མཐའ་གཉིས་དང་བྲལ་ན་སྤྱན་ལྡན་སུ་ཞིག་ལ་དོགས་པའི་ཁུར་པོ་ཞིག་འབབ་ག་ལ་སྲིད། དེས་ན་བསྟན་པ་འཛིན་སྐྱོང་དང་ཆབ་སྲིད་ཀྱི་དབར་འབྲེལ་བ་མི་འདུག་སྙམ་པ་ནི།ལྷ་དང་མི་དང་བྱོལ་སོང་ལ་སོགས་པ་འགྲོ་བ་གང་གི་སྤྱི་ཚོགས་སུ་བསྟན་པ་འཛིན་སྐྱོང་བྱེད་ཀྱི་ཡོད་མེད་ལ་གསལ་ཁའི་ངེས་ཤེས་དྲངས་མ་ཐུབ་པ་ལ་བརྟེན་ནས་བསྟན་པ་འཛིན་སྐྱོང་དང་ཆབ་སྲིད་ཀྱི་འབྲེལ་བ་མ་རྟོགས་པ་ཡིན་ལ། དེ་ནི་གཅིག་བྱས་ན་ཡིག་རྨོངས་རྒན་པོའི་ཞལ་རྒྱུན་ལ་ཚད་འཛིན་བྱས་པ་ཞིག་ཀྱང་ཡིན་སྲིད། གནད་དོན་དེའི་ཐད་ལོག་པར་རྟོག་པ་འབྱུང་བའི་གཞི་གཅིག་ནི།ནང་ཆོས་གཤའ་མའི་གནས་སུ་འཆོས་པར་སྤང་བྱའི་ཐོག་མ་འཇིག་རྟེན་ཆོས་བརྒྱད་ཅེས་པ་འདི།གང་ཟག་རང་གཞན་སུ་ཞིག་གི་སྟེང་དུ་སྤང་དགོས་ཀྱི་ཡོད་མེད་ལ་དཔྱད་པ་ཙམ་ཡང་མ་ཞུགས་པར།ཆབ་སྲིད་དང་འཇིག་རྟེན་ཆོས་བརྒྱད་ངོ་བོ་དབྱེར་མེད་དུ་བྱས་པའི་ཟངས་སྐུད་རིང་མོར། ཆོས་དང་འཇིག་རྟེན་ཁག་ཁག་སོ་སོ་ཡིན་ཞེས་པའི་རྣམ་དབྱེ་མེད་པའི་ཞལ་རྒྱུན་གྱི་ལྕགས་གཟེར་བསྒྲོན་ཏེ། ཆོས་དང་ཆབ་སྲིད་འགལ་འདུ་ཚ་གྲང་ལྟར་མཐོང་བའི་ལོག་པར་རྟོག་པའི་ར་བའི་ནང་དུ་ཚུད་དེ། ཆབ་སྲིད་ཀྱིས་བསླད་པའི་བསྟན་པ་འཛིན་སྐྱོང་ནི་དམ་ཆོས་རྣམ་དག་གི་ལམ་བཟང་ལས་ཕྱིར་ཕྱོགས་པར་རློམ་པའི་ལུང་རིགས་གཉིས་འདས་ཀྱི་སྡུག་སྐད་འཆོར་ཞིང་བརྒྱལ་ལ་ཁད་པ་ལྟ་བུར་བྱེད་པའང་ཡོད་ལ། དེ་ལ་རེ་ཞིག་བློ་ཡངས་དྲན་ཚོར་གྱི་ཆབ་ཆུ་(བསིང་)པའི་ཕྱིར། འཇིག་རྟེན་མི་ཡུལ་དུ་བསྟན་པ་འཛིན་སྐྱོང་གི་ཚུལ་ལ་སྟབས་བདེའི་དབྱེ་ཞིབ་འདི་ལྟར་བྱས་སོ། །དེ་ལ་བསྟན་ཞེན་ལ་རྒྱ་ཅན་གྱི་གང་ཟག་གིས་བསྟན་པ་འཛིན་སྐྱོང་སྤེལ་བའི་མདའ་མོ་ལྡིར་བར་འདོད་ན། སྔོན་ལ་མིའམ་ལྷ་ཀླུ་སོགས་འགྲོ་བ་གང་གི་སྤྱི་ཚོགས་སུ་བསྟན་ཞབས་ཀྱི་བྱ་བ་བརྩམ་པར་བྱ་བའི་འབེན་ལེགས་པར་ངོས་མ་ཟིན་ན། ཇི་ལྟར་བསྟན་པའི་ཁུར་ཆེ་བའི་འཕོང་སྐྱེན་པ་ཉིད་དུ་གྱུར། གལ་ཏེ་རང་ཉིད་འགྲོ་བ་མིའི་སྤྱི་ཚོགས་སུ་བསྟན་པ་འཛིན་སྐྱོང་གི་བྱ་གཞག་སྒྲུབ་པ་ལ་ངེས་ཤེས་བྲང་སྟེང་ནས་ཤར་བ་ཞིག་ཡིན་ཚེ། རང་བསྟན་སྤྱི་དང་བྱེ་བྲག་གི་མངའ་ཁོངས་སུ་མིའི་འགྲོ་བ་ཁྱོན་གང་ཆེ་བསྡུས་པའི་འོག་ཐུན་མོང་དང་ཐུན་མིན་གྱི་བསྟན་སྲོལ་སྐབས་སུ་གང་འོས་ཀྱིས་བསྟན་ནས་མི་ནུབ་དར་རྒྱས་སུ་གཏོང་བ་ལས་ལོགས་སུ་བསྟན་པ་འཛིན་སྐྱོང་སྤེལ་བའི་བྱ་བ་ཞིག་མིའི་སྤྱི་ཚོགས་སུ་མཛད་ཐབས་ག་ལ་མཆིས། དེ་ལྟར་ན་མིའི་སྤྱི་ཚོགས་འབོར་ཆེན་ཞིག་རང་བསྟན་མངའ་འོག་ཏུ་བསྡུ་དགོས་ན། སྤྱི་ཚོགས་འཕོ་འགྱུར་གནས་སྟངས་ཤེས་པའི་ཐོག་ནས་དངོས་སུ་ཆབ་སྲིད་ཀྱི་ལས་དོན་ལ་ཞུགས་རུང་མ་ཞུགས་རུང་།ཆབ་སྲིད་ལ་བསྟུན་མཁས་ཀྱི་འབྲེལ་བ་མེད་ཚེ།གང་ཟག་མཐུ་ཅན་དམིགས་ཀྱིས་བསལ་བ་ཞིག་ཡིན་ན་མ་གཏོགས་ཡོང་ཐབས་མེད་པ་ཆེས་གསལ་པོར་གནས་ཏེ། ཇི་ལྟར་མི་རྣམས་སྐྱེས་ནས་མ་ཤི་བར་བདེ་བར་འཚོ་མི་འདོད་པ་སུ་ཡང་མེད་ལ།ཆབ་སྲིད་ཀྱིས་མིའི་འཚོ་གནས་དང་ཁྲིམས་ལུགས་དང་ཟས་གོས་དང་བདེ་འཇགས་སོགས་ལ་དབང་དུ་བསྒྱུར་ནུས་པས།འཇིག་རྟེན་འདིའི་ནང་ཆབ་སྲིད་ཀྱི་ཚོགས་པ་ལས་དབང་ཚད་ཆེ་བ་ཞིག་རྙེད་པར་དཀའ་ལ།དེ་ལ་བསྟུན་མཁས་ཀྱི་སྦྱོར་བས་སྤྱི་ཚོགས་སུ་འགྲོ་ཤེས་པར་བྱས་ནས།བསྟན་པ་འཛིན་སྐྱོང་གི་བྱ་བ་ལ་འཇུག་དགོས་ཏེ། སྔོན་འཇིག་རྟེན་འདིའི་རྒྱལ་རབས་གོང་མའི་དུས་སྐབས་་ཀྱི་དབང་དུ་བྱས་ནའང་། ཆབ་སྲིད་ཀྱི་དབང་ཤུགས་ཀྱིས་ཆབ་འབངས་མི་སེར་དང་བསྟན་པ་འཛིན་སྐྱོང་དབར་གྱི་འབྲེལ་བ་གཅོད་ཀྱང་ནུས་ལ་འབྲེལ་བ་མཐུད་ཀྱང་ནུས་པས། ཆབ་སྲིད་ལ་འབྲེལ་བ་བསྟུན་མཁས་བྱེད་དགོས་པ་ནི། དཔེར་ན། ཆོས་རྒྱལ་སྲོང་བཙན་དང་བཙན་པོ་ཁྲི་སྲོང་སོགས་ཀྱིས་ཆབ་སྲིད་ཀྱིས་དབང་ཚད་ལས།ནང་བསྟན་འདི་ཉིད་བོད་ཡུལ་མགོ་ནག་མིའི་ཁྲོད་དུ་རྒྱ་སྐྱེད་ཤུགས་ཆེན་གནང་བ་རྒྱལ་རབས་རྣམས་ལས་ཡོངས་སུ་གྲགས་པ་ལྟར་ཡིན་ལ།མེས་པོའི་གནའ་སྲོལ་བོན་བསྟན་ཡང་།ཆོས་རྒྱལ་རྣམས་ཀྱིས་ཆབ་སྲིད་དབང་ཚད་ལས་བོད་འབངས་ཕལ་ཆེ་བའི་སྤྱི་ཚོགས་ལས་ཐག་རིང་དུ་གྱུར་པའི་ཉམས་རྒུད་བྱུང་བ་སོགས།གཡུང་དྲུང་བོན་གྱི་བསྟན་བྱུང་ཕྱོགས་བསྡུས་ནང་གསལ་ཞིང་། དེང་རབས་ཀྱི་དམངས་གཙོའི་ཆབ་སྲིད་ལམ་ལུགས་ལྟར་ན།མི་ཚོགས་ཁྱོན་འབོར་ཆེ་བས་དགའ་ཞེན་ཆ་འཇོག་ལས་གྲུབ་ཅིང་སྤྱི་ཚོགས་ཀྱི་བདེ་རྩར་གྱུར་པ་ཡིན་པས། དེ་རྣམས་ལ་བསྟུན་མཁས་ཀྱི་འབྲེལ་བ་ལས་འགལ་ཚེ་མང་ཚོགས་ཁྱོན་འབོར་ཆེ་བའི་བདེ་སྡུག་གི་སྒྲོམ་གཞིར་སྣང་མེད་རྡོག་རོལ་གཏོང་བའི་རྣམ་འགྱུར་འབད་མེད་དུ་མཚོན་པ་ཡིན་ལ།དེ་ལྟར་སྤྱི་ཚོགས་ཁྱོན་ཡོངས་ཀྱིས་དགའ་མོས་དང་བྲལ་བ་དེས།བསྟན་པ་འཛིན་སྐྱོང་གི་མངའ་ཁོངས་རྒྱ་སྐྱེད་ཀྱི་བྱ་གཞག་དེ་སྟེང་ལྷ་ཡུལ་ལ་བསྐྱངས་ན་མ་གཏོགས་ས་སྟེང་མི་ཡུལ་ན་གཞི་མ་གྲུབ་པ་ཆེས་མངོན་གྱུར་ཡིན་ལ།དེས་མཚོན་ནས་དེང་གི་དུས་ན་འཛམ་གླིང་མིའི་ཁྱོན་ཡོངས་ནས།དགའ་མོས་དང་ཡིད་དབང་འཕྲོག་པའི་གཞིར་གྱུར་པའི་ཆབ་སྲིད་ཀྱི་སྒྲིག་འཛུགས་དང་།གང་ཟག་སྒེར་རམ།ཡང་ན་རིག་པའི་གནས་ཚན་རིག་ལ་སོགས་པ་དེ་དག་ལའང་རྒྱུས་མངའ་སློབ་སྦྱོང་དང་འབྲེལ་བ་མི་ལྷོད་པར་བྱ་རྒྱུ་ནི། དེང་འདིར་སྤྱི་ཚོགས་ཁྱོན་ཡོངས་ནས་དོ་སྣང་དང་དགའ་མོས་འཐོབ་པར་བྱེད་པའི་ཐབས་ལམ་གྱི་མཆོག་ཡིན་པས། འཁོར་ཡུག་འདི་འདྲ་ཞིག་བསྐྲུན་པའི་ཐོག་བསྟན་པ་འཛིན་སྐྱོང་གི་གཞི་རྒྱ་འཕེལ་རྒྱས་གཏོང་དགོས་པ་འདིའི་ཐད།མིག་དཔེ་ལྟ་ཡུལ་ཕུལ་དུ་བྱུང་བ་ནི།འཕགས་ཡུལ་དུ་རྒྱལ་བ་ཕྱག་ན་པདྨོ་དང་།བོད་ཡུལ་ན་མཁན་ཆེན་ཚུལ་ཁྲིམས་བློ་གྲོས་ལ་སོགས་པ་ལྟ་བུ་ཡིན་ཞིང་།འབྲོམ་སྟོན་པའི་བསླབ་བྱ་མི་ཆོས་གནད་ཀྱི་ཕྲེང་བ་ལས་ཀྱང་། ཀུན་དང་མཐུན་པ་མི་ཆོས་རྩ་བ་ཡིན། །དེ་ཡི་སྟེང་ནས་འདུན་མ་བཤད་ཀྱིས་ཉོན། །བྱ་བྱེད་ཡོངས་ཀྱི་མགོ་ལྟག་ཕྱེ་ཡིས་ཉོན།།ཆོས་ལ་མི་ཆོས་ཟབ་པ་འདི་ལྟར་ལགས། །ཞེས་གསུངས་པས།ཆོས་ཀྱི་ངོ་བོ་མ་བརླགས་པའི་ཐོག་ནས་རྣམ་པ་དཀར་ནག་ཁྲ་གསུམ་ཇི་ལྟ་བུར་བསྒྱུར་དགོས་ཀྱང་།སྤྱི་ཚོགས་ཀྱི་བསམ་བློའི་མོས་ཁམས་དང་བསྟུན་ཏེ་འཁོར་ཚོགས་རྒྱ་ཆེར་བསྡུ་བའི་ཞིང་ས་འཛུགས་བསྐྲུན་གྱི་ཐོགབསྟན་པ་འཛིན་སྐྱོང་གི་ས་བོན་རྨ་མེད་འདེབས་དགོས་པ་ནི།རྨི་ལམ་དུའང་བརྗེད་མི་ཉན་ཞིང་།དེང་རབས་གསར་པའི་ནང་དུ་རྒྱལ་བསྟན་འཁུར་གྱི་ལྕི་བའི་སྐྱེ་བོ་མཐོ་དམན་ཀུན་གྱི་ཕབ་ཏུ་མི་རུང་བའི་འོས་འགན་ཡིན་པའི་གནད་ཀྱི་དོན་དེ་དག་ནི།བསྟན་པ་འཛིན་སྐྱོང་དང་ཆབ་སྲིད་ཀྱི་འབྲེལ་བ་མ་རྟོགས་པའི་མཐའ་ལས་ཡོངས་སུ་འདས་པའི་གཏམ་མོ།སླར་སྨྲས་པ།

གདུལ་བྱའི་འདོད་པ་དང་ནི་བྱ་སྤྱོད་ལ། །བསྟུན་མཁས་སྦྱིན་ཕོད་ཡངས་ཤིང་སྨྲ་མཁས་ཏེ། །བསྡུ་བ་རྣམ་བཞིས་འཁོར་ཚོགས་བསྐྲུན་པ་ཡིས། །སྲས་བཅས་རྒྱལ་ཀུན་འགྲོ་དོན་ཕྱོགས་མེད་རྒྱས། །མཁས་འཇོན་བཙུན་པའི་བྲོ་གར་འཁྱུག་མོད་ཀྱང་། །སྐྱེ་རྒུ་ཤས་ཆེའི་རོལ་གྲོས་མ་བསྟུན་ན། །རང་ཁྱིམ་ཐབ་ཀའི་འགྲམ་དུ་བྲེལ་བ་ལས། །ལྷན་ཚོགས་འདུ་རའི་སྡིངས་ཆར་སླེབས་དུས་མེད། །ཅེས་པ་ནི་བསྡུ་བའི་ཚིགས་སུ་བཅད་པའོ།།

ཐབས་མཁས་ཀྱི་གཞུང་ལམ་དེ་དག་གི་སྟེང་ནས་འཕྲིན་ལས་ཀྱི་འགྲིམ་འགྲུལ་གཉེར་བར།བརྒལ་དགོས་པའི་ལོག་པར་རྟོག་པའི་འདམ་རྫབ་འདི་བྱ་བ་ཞིག་ཀྱང་ཡོད་དེ།ཆབ་སྲིད་ནི་འཇིག་རྟེན་པའི་ཆོས་དང་།འཇིག་རྟེན་ཆོས་བརྒྱད་ཅེས་བྱ་བ་ནི།མདོ་སྔགས་རིག་པའི་གཞུང་བརྒྱ་ལས་ངེས་པར་དགག་དགོས་པར་གསུངས་པ་ནི་ལན་གྲངས་རེ་གཉིས་ཙམ་མིན་པས། ཆོས་རྣམ་པར་དག་པའི་ངང་དུ་འཁྱོལ་བར་འདོད་པས།འཇིག་རྟེན་ཆབ་སྲིད་ཀྱི་ལས་དོན་དང་འབྲེལ་མེད་རྒྱང་རིང་དུ་བྱེད་དགོས་པ་དེ་གནད་དམ་པའོ་སྙམ་དུ་བསམས་ན།དེ་ནི་ཆོས་ཀྱི་ངོ་བོ་ལེགས་པར་ངོས་མ་ཟིན་པའི་དྲག་ཆར་རླུང་འཚུབ་ལྡང་བ་ལས།ལོག་པར་རྟོག་པའི་བྲག་གསེང་དུ་གབ་པའི་སྡར་མའི་ངང་ཚུལ་ཙམ་དུ་ཟད་པས།དེ་ལ་ལུང་རིགས་ཀྱི་འོད་སྣང་འདི་ལྟ་བུ་ཞིག་སྤྲོ་བར་བྱ་དགོས་ཏེ། དེ་ལ་འཇིག་རྟེན་ཆོས་བརྒྱད་ནི།རྙེད་ན་དགའ་དང་མི་རྙེད་ན་མི་དགའ།སྙན་ན་དགའ་དང་མི་སྙན་ན་མི་དགའ།བསྟོད་ན་དགའ་དང་མི་བསྟོད་ན་མི་དགའ།བདེ་ན་དགའ་དང་མི་བདེ་ན་མི་དགའ།ཞེས་བྱ་བ་རྣམས་ལ་ཡིན་ལ།འདི་རྣམས་ལ་མདོ་ཕྱོགས་ཀྱི་གཞུང་རྣམས་ལས་ཆོས་བརྒྱད་དང་བྲལ་བའམ་སྤང་བར་བྱེད་དགོས་པའི་ཐ་སྙད་མཛད་ཅིང་།གསང་སྔགས་ནས་ཆོས་བརྒྱད་མགོ་སྙོམས་དགོས་པའི་བརྡ་ཆད་ཀྱང་མཛད་ལ།ཐུན་མོང་ཡོངས་གྲགས་སྤང་བྱ་སྤོང་བའི་ཐ་སྙད་བེད་སྤྱད་དེ་བརྗོད་ན།དེ་ལ་རྙེད་ན་དགའ་བ་དང་མ་རྙེད་ན་མི་དགའ་བ་སོགས་འཇིག་རྟེན་ཆོས་བརྒྱད་ཀྱི་བློ་འདི་རྣམས་རྒྱང་རིང་དུ་སྤོང་དགོས་པ་ནི།ཐོས་བསམ་གཏན་འབེབས་ཀྱི་གཞུང་དང་། སྒོམ་པ་ཉམས་ལེན་གཙོར་སྟོན་གྱི་གཞུང་བཤད་ཐམས་ཅད་མགྲིན་དབྱངས་གཅིག་ཏུ་གནས་ཤིང་།དེ་ལྟར་ན་ཆོས་བརྒྱད་པོ་དེ་རྣམས་གང་ཟག་རང་གཞན་སུ་ཞིག་གི་སྟེང་དུ་སྤོང་དགོས་སམ་སྙམ་ན།དེ་ལ་གང་ཟག་གཞན་ལ་བསྟོད་བཀུར་སྙན་གྲགས་དང་།གོ་ས་ལོངས་སྤྱོད་ཕུན་གསུམ་ཚོགས་པ་རྙེད་ཅིང་།བཀྲ་ཤིས་བདེ་ལེགས་སུ་གྱུར་པ་ལ་དགའ་བ་སྤོང་བ་དང་།གང་ཟག་གཞན་ལ་།འཕྱ་སྨོད། གོ་ས་ཤོར་བ།ཟས་ནོར་གྱིས་ཕོངས་པ་དང་།མི་བདེ་བཀྲ་མི་ཤིས་པ་བྱུང་བ་ལ་མི་དགའ་བ་སྤོང་བ་དེ།འཇིིག་རྟེན་ཆོས་བརྒྱད་སྤོང་ལུགས་ཡིན་ན།ཆོས་ཕྱོགས་ནས་དུས་གསུམ་གྱི་རྒྱལ་དང་རྒྱལ་སྲས་བྱང་སེམས་རྣམས་ཀྱིས་ཐ་ན་སྨོན་ལམ་བཏབ་པ་ཙམ་ནའང་། མ་གྱུར་སེམས་ཅན་རྣམས་ལ་གནས་སྐབས་དང་མཐར་ཐུག་ཐམས་ཅད་དུ་བདེ་ཞིང་སྐྱིད་པ་དང་།མི་སྡུག་པ་སྐད་ཅིག་ཙམ་ཡང་མི་འབྱུང་བ་དང་།བདག་གི་བདེ་དགེ་གཞན་ལ་བསྔོས་ཤིང་། གཞན་གྱི་སྡུག་བསྔལ་དང་མི་དགེ་བ་ཐམས་ཅད་རང་ལ་ལེན་པའི་བདག་གཞན་མཉམ་བརྗེའི་ཉམས་ལེན་ཐ་དག་དང་འགལ་ཞིང་།འཇིག་རྟེན་པའི་ཕྱོགས་ནས་ཀྱང་།གང་ཟག་གཞན་ལ་སྐྱིད་པོ་བྱུང་ན་དགའ་བ་མེད་པ།གཞན་ལ་ཡ་ང་མི་སྡུག་པའི་རྐྱེན་ངན་བྱུང་ན་མི་དགའ་བ་མེད་པ་དེ།བསམ་ཤེས་དང་འགན་འཁུར་ལྷག་བསམ་གང་ཡང་མེད་པའི་མི་ངན་གྱི་འཁྱུར་ཚུད་པ་ལས་མ་འདས་པ་ཞིག་ཡིན་པས་ན།འཇིག་རྟེན་ཆོས་བརྒྱད་སྤོང་ཚུལ་ནི།གང་ཟག་རང་ཉིད་ཀྱི་སྟེང་དུ་སྤོང་དགོས་པ་ལས་གཞན་དུ་མེད་པ་ཆེས་གསལ་པོར་གནས་པ་ཡིན་ཞིང་།དེ་ལྟར་གང་ཟག་རང་ཉིད་ལ་མཐོན་པོའི་གོ་ས་ཐོབ་པ་དང་མི་ཐོབ་པ།ནོར་ལོངས་སྤྱོད་རྙེད་པ་དང་མི་རྙེད་པ།གཞན་གྱིས་རང་ལ་འཕྱ་སྨོད་དང་བསྟོད་བཀུར།བཀྲ་ཤིས་བདེ་བ་དང་མི་བདེ་རྐྱེ་ངན་གང་ཞིག་བྱུང་ཡང་ཇི་མི་སྙམ་པར་དགའ་བ་དང་མི་དགའ་གང་ཡང་མེད་པའི་ཁྱད་མེད་དུ་བལྟ་ནུས་ན།གང་ཟག་རང་ཉིད་སྙན་གྲགས་དང་འབྱོར་བ་ཅན་ཡིན་ཡང་རུང་།སྤྲང་ཕྲུག་ཁེར་རྐྱང་པ་ཞིག་ཡིན་ཡང་རུང་།ད་གཟོད་ཆོས་བརྒྱད་མགོ་སྙོམས་པའམ་ཆོས་བརྒྱད་སྤངས་བའི་ཐ་སྙད་དོན་མཐུན་སྦྱར་ཆོག་ལ།འདི་ལ་བློ་སྦྱོང་གི་གཞུང་རྣམས་ལས་ཚེ་འདིའི་ཞེན་པ་སྤངས་པ་ཞེས་པའི་སྡོམ་ཚིག་ཀྱང་བྱས་ཡོད།གང་ཟག་རང་ཉིད་ལ་འཕྱ་སྨོད་དང་བསྟོད་བཀུར།རྙེད་པ་དང་མི་རྙེད་པ་ལ་སོགས་པ་ཅི་འདྲ་བ་ཞིག་བྱུང་ཡང་དེ་དག་ལ་དགའ་བ་དང་མི་དགའ་བ་མེད་པའི་ཁྱད་མེད་དུ་འཛིན་ཤེས་པའི།འཇིག་རྟེན་ཆོས་བརྒྱད་དང་བྲལ་བའི་གང་ཟག་དེས།འགྲོ་ཕན་བསྟན་སྐྱོང་གི་དགོས་མཁོ་ཡོད་ཚེ་ཆབ་སྲིད་སོགས་ལ་འབྲེལ་བ་བསྟུན་མཁས་དང་།དཔལ་འབྱོར་རིག་པ་དང་མཚན་རྩལ་རིག་པའི་སྡེ་ཚན་སོགས་ལ་སློབ་སྦྱོང་དང་མཉམ་འབྲེལ་བྱས་པར།མདོ་རྒྱུད་ཀྱི་གཞུང་གང་གིས་ཀྱང་བཀག་པ་མེད་ལ།གང་ཟག་རང་ཉིད་ལ་སྨད་ན་མི་དགའ་བའི་སྙིང་རླུང་དང་བསྟོད་ཅིང་བཀུར་ན་ཡིད་ཚིམས་པའི་དགའ་བ།ཐ་ན་གདན་ཐོབ་མཐོ་དམན་ཙམ་ལའང་།དགའ་དང་མི་དགའི་ཚོར་བ་དྲག་པོར་འབར་ཞིང་། རང་ཉིད་ལ་མཁན་སྤྲུལ་དགེ་བཤེས། སྐྱོར་དཔོན་སློབ་དཔོན་ཆོས་དཔོན།དབུ་མཛད་དབུ་འཛིན་སོགས་སྙན་པའི་བ་དན་དེ་དག་བྱུང་ན་ཅི་མ་རུང་གི་དགའ་བ་དང་།མ་བྱུང་ན་མི་དགའ་བའི་རྣམ་རྟོག་དང་།རང་ལ་རྙེད་བཀུར་ཐོབ་པའི་ཆེད་བླ་མ་སོགས་ཆེན་པོའི་མདུན་ས་ནས་རང་ཉིད་ལ་ཆེ་མཐོང་རག་ཐབས་སོགས་འཇིག་རྟེན་ཆོས་བརྒྱད་དངོས་གནས་པ་འདི་ལྟ་བུ་དང་ལྡན་ན།ཆབ་སྲིད་དང་དཔལ་འབྱོར་བསྡུ་བཀོད་ཀྱི་ལས་དོན་སོགས་གང་ལ་ཡང་འབྲེལ་མེད་དམ་གཙང་གི་རྟུལ་ཞུགས་མཆོག་འཛིན་དང་ཚུལ་ཆོས་དང་འདྲ་ཆགས་ཇི་ལྟ་བུས་ལེགས་ལེགས་མཛད་ཀྱང་ཆོས་གཤའ་མའི་གྲལ་དུ་ནམ་ཡང་སླེབས་ཐབས་མེད་ལ། དེ་ཉིད་མདོ་རྒྱུད་མན་ངག་ཐམས་ཅད་ནས་མགོ་སྙོམས་དང་སྤང་བྱར་གསུངས་པའི་འཇིག་རྟེན་ཆོས་བརྒྱད་ཅེས་བྱ་བ་ཡིན་གྱི། དེ་ལས་གཞན་དུ་འཇིག་རྟེན་ཆོས་བརྒྱད་ཟེར་བ་ཆབ་སྲིད་ཀྱི་ལས་དོན་དང་ཆབ་སྲིད་མི་སྣ་སོགས་ལ་འབྲེལ་བ་ཡོད་མེད་དང་།དགོན་པ་དང་ཆོས་ཕྱོགས་ཀྱི་ལས་ཀ་ཡིན་མིན་སོགས་ནས་འཚོལ་བ་ལ་རིངས་པ་ནི།རང་མགོ་རུལ་བ་སྣས་མ་ཚོར་བའམ་དགྲ་ཤར་གནས་ལ་གཏོར་མ་ནུབ་གཏོང་གི་དཔེ་ལས་མ་འདས་སོ། །མདོར་ན་འཇིག་རྟེན་ཆོས་བརྒྱད་ཅེས་པ་ནི་གང་ཟག་རང་ཉིད་ཀྱི་སྟེང་དུ་སྤོང་དགོས་ཀྱི།གང་ཟག་གཞན་གྱི་སྟེང་དུ་སྤོང་བའི་ཐབས་མེད་པ་འདི་ལ།སྣང་ལ་མ་ངེས་པ་དང་བྲལ་བའི་ངེས་ཤེས་ལྡན་ན།ཆབ་སྲིད་དང་ཆོས་རྣམ་དག་གཉིས་འགལ་འདུ་ཚ་གྲང་ལྟར་གནས་པའི་ལུང་རིགས་ཤིག་གང་དུ་ཡང་མེད་པ་འབད་མེད་དུ་གྲུབ་པར་གྱུར་པ་དེ་ནི། ཆོས་རྗེ་ས་པན་གྱིས། རིགས་པས་དཔྱད་ན་ཆོས་ལུགས་མི་འགལ་ཞིང་། །འཇིག་རྟེན་བྱ་བ་ཀུན་ནས་ལེགས་སྒྲུབ་པ། །ཞེས་གསུངས་པའི་དགོངས་པར་ཡང་བདེ་བར་འབྱོར་ཟིན་པ་ཞིག་གོ།

ཆོས་ལྟར་འཁྲབ་པའི་གཟུ་ལུམ་ཁྲོད།།

ཆོས་དང་ཆོས་མིན་བཟོ་ལྟས་འབྱེད།།

ཆོས་བཞིན་བྱེད་པའི་ཨ་སྔོན་ན།།

ཆོས་སྲིད་ཤོག་ཟུང་ཅི་སྟེ་འགལ།།