ང་ཚོའི་སྐོར།
རྩོམ་སྒྲིག་པའི་གཏམ།
གདང་ལ་རི་བོ་ནི་བོད་མདོ་དབུས་མཐོ་སྒང་དུ་གནས་པའི་རི་བོ་ཞིག་སྟེ། བོད་ཀྱི་རི་རྒྱུད་ཆེན་པོ་བདུན་གྱི་ཡ་གྱལ་ཞིག
ནུབ་བྱང་ནས་ཤར་ལྷོ་འཕྲེད་དུ་ནར་ཞིང་རྒྱལ་མོ་རྔུལ་ཆུ་དང་འབྲི་ཆུ་གསེར་ལྡན་སོགས་གཞོལ་རྒྱུན་རིང་བའི་ཁམས་ཀྱི་ཆུ་བོ་དེ་གཉིས་དང་ཆུ་ཕྲན་དུ་མའི་མགོ་ཁུངས་སུ་བགྲང་ཆོག འདིས་ནི་རང་ས་ནས་བྱུང་ཞིང་གཞན་ཡུལ་དུ་ཁྱབ་བརྡལ་འགྲོ་བའི་སྐད་ཡིག་དང་རིག་གཞུང་གི་ངོ་བོ་དང་རྣམ་པ་མཚོན་གྱི་ཡོད་ལ། མི་རིགས་འདིའི་སྙིང་སྟོབས་དང་སྤོབས་པའང་མཚོན་ནུས།
སྐུ་ལྷ་དར་མདུང་སོགས་སྲིད་པའི་གངས་རི་མང་པོས་གངས་རིའི་ལྗོངས་ཞེས་འབོད་པའི་མིང་དོན་མཚུངས་པར་བགྱིས་ཡོད། རྐྱང་དང་འབྲོང་སོགས་རི་དྭགས་དུ་མ་བག་ཕེབས་ཀྱིས་འཚོ་ཞིང་རང་བྱུང་ཁམས་ཀྱི་མཛེས་ཉམས་ཀྱིས་མིའི་སེམས་ཁམས་དབང་མེད་དུ་འགུགས་ཐུབ། དྭངས་གཙང་གི་གདང་ལ་རི་བོ་ནི་གནའ་བོའི་བོད་མིའི་སེམས་ཁམས་ཡིན་ལ། བརྗིད་ཉམས་ལྡན་པའི་གདང་ལ་རི་བོ་ནི་དེ་རིང་གི་བོད་མིའི་བློ་གྲོས་ཡིན། ང་ཚོ་ནི་ནམ་ཡང་གདང་ལ་རི་བོ་ཡིན་ལ་གདང་ལ་རི་བོ་ནི་གཏན་གྱི་ང་ཚོ་ཡིན། མི་རིགས་ཤིག་འཚོ་གནས་ཐུབ་མིན་སྐད་ཡིག་ལ་རག་ལས་པ་དང་། སྐད་ཡིག་དར་སྤེལ་ཇི་ཡོང་བཀོལ་སྤྱོད་མང་ཉུང་ལ་བརྟེན་ཡོད།
དེ་ལྟ་བས་ན་ང་ཚོས་(གདང་ལ་རི་བོ) དུས་དེབ་འདོན་པ་དང་དྲྭ་རྒྱ་བཟོ་དགོས་དོན་ཡང་། རྩོམ་པ་པོ་སྐྱེད་སྲིང་དང་། ཀློག་པོར་སྤྲོ་བ་སྐྱེ་ཞིང་དེ་གཉིས་ཀྱི་བར་སྟོང་ཁ་སྐོང་ངམ་འབྲེལ་འཐུད་ཀྱི་ཟམ་པ་ལྟ་བུ་ཞིག་རེ་ནས་ཡོད། མ་གཞི་དེང་སང་དུས་དེབ་དང་སྒེར་དེབ་མང་མ་དྲགས་ཀྱང་ཉུང་མེད་པའི་ལྟ་ཚུལ་དང་ཕན་ནུས་མེད་སྐད་སྨྲ་བར་བདེན་དུ་སྣང་བ་ལྟར་ཡོད་མོད། དེ་ནི་བྱིས་བློ་ཅན་དང་། རང་གི་སྐད་ཡིག་ལ་མཐོང་ཆུང་བྱེད་མཁན་དག་གི་སྐད་སྒྲ་གཅིག་པུ་དེ་ཡིན་པར་ངོས་འཛིན་གྱི་ཡོད། གྲངས་མང་བའི་མི་རིགས་གཞན་དང་། སྤྱི་ཚོགས་གཞན། རྩོམ་དེབ་གཞན་ལ་ལྟོས་ན། སྤྱོད་མཁན་ཆེས་ཉུང་བའི་ངེད་ཚོའི་སྒེར་དེབ་དང་དུས་དེབ་དག གྲངས་ཉུང་ནས་གྲངས་ཀ་ཆེས་ཚད་དམའ་བའི་མཚམས་སུ་སླེབས་ཡོད་ལ་བསམ་གཞིག་ལན་རེ་གྱིས་དང་། སྐད་ཡིག་འདིའི་ལས་དབང་དངངས་འདར་ལང་དགོས་པའི་ཚོད་དུ་གདའ། དེས་ན་མི་རེ་སྒོར་བུད་དེ་རྩོམ་ཡིག་ཅིག་ཕྲིས་དང་རྩོམ་དེབ་རེ་ཉོ་རོགས་ཞེས་རེ་བའི་མིག་ཟུང་ཅེར་ཡོང་བ་འདིས་བསམ་ཡོད་ཅིག་ཡིན་ན་འགྲེལ་བརྗོད་དགོས་ཚོད་མ་རེད་ལ་གང་ཟག་སྒེར་གྱི་འཚོ་བའི་དཀའ་ངལ་སེལ་ཐབས་ཤིག་མིན་པར་རྟོགས་ཡོང་། ང་ཚོ་ལས་དབང་གཅིག ཕུགས་འདུན་གཅིག ཞེས་པའི་ཁ་གཡང་དེ་སྙན་ཡང་ཁེ་མེད་ལས་གཞི་འདི་རིགས་ལ་ཐུག་དུས་དཔོན་པོ་ཚོ་ངོ་ཤ་བརླན་འགྲོ། དབང་ཆེན་དང་ཕྱུག་བདག་ཚོས་གཡོལ་ནས་འགྲོ་བ་མཐོང་སོང་ལ་ཐོས་ཀྱང་མྱོང་། འོན་ཀྱང་མི་ཆེན་དཔོན་ཆེན་ཚོར་ཐུགས་དགྱེས་མིན་ལ་མི་རེ་བར་རང་འདྲའི་སྐད་ཡིག་ལ་དུང་མཁན་དཔུང་སྡེ་ཞིག་གསོ་སྐྱོང་དང་མི་རིགས་ཀྱི་བླ་སྲོག་འདི་འགྱེལ་ས་ནས་སློང་ཐུབ་པའི་རྨི་ལམ་ཞིག་སྙིང་ལ་ཉར་ནས་འདི་ལྟར་མུ་མཐུད་སྐྱོད་བཞིན་ཡོད།
གདང་ལ་རི་བོ་རྩོམ་སྒྲིག་པས།