རུལ་སུངས་ཀྱི་གཡའ་གོས་པའི་ང་རང་། ཐོད་རྒལ་སློབ་བུ། རྣམ་གྲོལ་གླིང་། ཕྲ་རྒྱས་གདོན་ཆེན་བཞུགས་པའི། །སྨྱོ་སྨན་སྙིང་ལ་འཐིམ་འདྲའི།། སེམས་ཀྱི་འཆར་ཡན་མང་བའི། །དགེ་སློང་ང་རང་ཅི་ཞིག།

ལོ་ཟླ་ནག་པོའི་བཙན་ཤེད། དིང་སྨྱུག རྣམ་གྲོལ་གླིང་། སྐྱོ་གདུང་དམྱལ་བའི་གྲོང་གི་སྲང་ལམ་དུ།། སྡུག་གི་ངུ་སྐད་གནམ་དུ་ཀེར་ན་ཡང་།། དྭངས་གཙང་མིག་ཆུའི་གཙང་པོ་མ་བཞུད་པའི།། ལོ་ཟླ་ནག་པོའི་ནག་ཉེས་གླེང་ན་འདོད།། དཔྱིད་གསུམ་ངེས་སྲེག་དུས་ཀྱི་སྟོན་མོ་རུ།། མ་ཕྱིས་དགུང་གི་བཞིན་ངོ་ཧ་ཅང་དྭངས།། དྲི་བཞོན་བསིལ་བུའི་མགྲིན་གླུ་རྒྱང་ལ་བུད།། མ་བོས་ཚངས་དབང་སྲས་པོ་མགྲོན་དུ་ཕེབས།། ར་ཞོན་བཙན་པོས་འཁྱོག་འབར་དམར་པོ་སྦར།། ཚ་བའི་མེ་རླབས་བར་སྣང་དབྱིངས་སུ་འཕྱུར།། ཚ་བའི་ཟེགས་མ་སྐྱེ་རྒུའི་ལུས་ལ་ཐིམ།། ཉམ་ཐག་འགའ་རེ་ལྔ་པའི་ལམ་དུ་བརྫངས།། ཚ་གདུང་གཟེར་བོས་སྙིང་ལ་རྨ་ཁ་གཏོད།། རྔུལ་ཆུའི་ཐིག་པས་ལུས་ཀྱི་འབྱུང་བ་དཀྲུགས།། མི་བཟོད་སྡུག་སྐད་འཛེར་བོའི་དབྱར་རྔ་སྟེ།། དཔྱིད་དུས་ལོ་ཟླ་ནག་པོའི་རྣམ་ཐར་ལགས།། སྔོ་ལྗང་གཡུ་ཡི་སྤང་ཐང་ཡངས་མོའི་སྟེང་།། ཁྲ་ཆིལ་སྤང་རྒྱན་མེ་ཏོག་ལང་ཚོ་སྨིན།། རྐང་དྲུག་གཞོན་ནུས་ཕྱོགས་བཞིར་མགྲིན་གླུ་གྱེར།། དབྱར་གསུམ་མཛེས་སྡུག་བཀྲ་བའི་དུས་ཚིགས་སུ།། གནམ་རྒན་མ་ཡི་མིག་ཆུའི་གཙང་པོ་བོར།། ལ་དང་ལུང་པའི་གཞོང་པ་ཤག་སྒྲས་བཀང་།། རབ་མཛེས་ནོར་འཛིན་བུ་མོའི་བཞིན་རས་བཤུས།། བགྲོད་བྱ་སྣུམ་ནག་ཅན་པོའི་ལྟོ་བ་གཤགས།། མེ་ཏོག་སད་ཀྱིས་བཅོམ་དང་གཉིས་མེད་པར།། ཞིང་པ་རྒད་པོའི་རྔུལ་ཁྲག་ལས་གྲུབ་པའི།། རེ་སྒུག་སྟོན་ཀའི་ལོ་ཏོག་དམིགས་མེད་བཟོས།། ཉེས་མེད་ཞིང་ཐང་གྲུ་བཞི་གཅེར་བུར་སྟོན།། ཀུན་གྱི་མིག་ཏུ་འོང་བའི་རྩི་ཤིང་དག། ཤག་སེ་རྦ་རླབས་གཅིག་གིས་མེད་པར་བྱས།། ཨ་ཅེ་འབྲོག་མོའི་བག་ཕེབས་སེམས་ཀྱི་ཁམས།། ལོ་ཟླ་ནག་པོའི་དབྱར་གཞུང་འདི་རུ་འཁྲུགས།། ལུས་ཅན་ཀུན་པོ་སྐྱོ་གདུང་ཀློང་ལ་ཐིམ།། མཆི་རྡོག་མཚོ་མོ་འདྲེན་བྱེད་ཀོང་དུ་སྐམ།། སྙིང་ཆུང་དམར་པོར་གཅོང་གི་ནད་འབུ་འཁོར།། ལོ་ནག་འདི་ཡིས་བཅད་པའི་བཙན་ཁྲིམས་ལགས།།

ང་ཡང་བསྐྱར་ཕ་ཡུལ་དུ་ལོག་མི་འདོད། ནགས་གངས་ཞེན།  བོད། ཕ་ཡུལ་ཡ། ཕ་ཡུལ། ངའི་ཡོད་ཚད་ང་དང་ཁ་བྲལ་སའི་ཕ་ཡུལ། ཁྱོད་ཀྱི་སྣང་བརྙན་ངའི་མིག་ལམ་དུ་མཐོང་མ་ཐག་ཏུ་སྐྱོ་ཡོང་གི

ཚེ་བསོད་ཟད་པའི་སྔ་གཞུག ལི་ཐང་དབྱིག་གཉེན། ནོར་གླིང་མཐོ་སློབ། ཚེ་བསོད་ཟད་པའི་སྔ་ནུབ་ཏུ།། ལས་ཀྱི་མཁའ་རླུང་ན་བུན་འཐིབ།། གྲིབ་མ་གཅིག་པུ་འཁོར་ཤུལ་དུ།། ལང་ཚོ་མངས་པོ་དོན་མེད་རུལ།།

ཐོས་པ་དགའ། སྤྲུལ་འཆི་མེད་ཚེ་དབང་། རྣམ་གྲོལ་གླིང་། ཕྱུག་པོའི་བུ་རུ་སྐྱེས་ཀྱང་དབུལ་པོས་འཚོ་བའི།། མང་ཡུལ་གངས་རིའི་འདབས་ཀྱི་གུང་ཐང་མི་ལ།། ལུས་སེམས་རིད་ནས་རིད་དེ་ལྷག་མེད་སོང་བའི།། སྙན་འཇེབས་རྣམ་ཐར་རིང་མོ་ད་དུང་ལྷག་འདུག། མ་རྒན་སྙིང་སྟོབས་ཅན་མོས་ངར་ཆུ་བླུད་བླུད།། བུ་ཕྲུག་སྲི་ཞུ་ཅན་དེས་བརྩོན་པས་འབུངས་འབུངས།། གཙང་རོང་གནུབས་ཀྱི་སྔགས་རྒན་དཔུང་དུ་བསུས་ནས།། ཉེ་བ་དགྲ་རུ་ལངས་པའི་ལྟས་ངན་བཟློག་གོ། ཡུལ་མི་རང་གཤེད་བབས་པའི་དམག་དཔུང་དེ་ཚོ།། ཁྱེད་རང་ཆོས་ལ་འཇུག་པའི་བཀའ་དྲིན་ཅན་ཡིན།། སྲོག་ལ་སྐྲག་ནས་ཁྱིམ་ལས་རིང་དུ་བྲོས་པ།། འཁོར་བར་བྱོལ་བའི་ཐོག་མའི་སྟ་གོན་མིན་ནམ།། སྡུག་ནས་སྡུག་གིས་ཕུད་པའི་ཕ་ཡུལ་དེ་དང་།། ཁྱད་གསོད་སྣ་གཉེར་ཆགས་པའི་ཁྱིམ་མཚེས་དེ་དག། རྒྱང་ཐག་ཇེ་རིང་སོང་བ་སྐྱིད་ཅིག་ཡིན་མོད།། ད་དུང་སུ་ཞིག་ཕྱིར་མིག་ཡུལ་དུ་ལུས་ཡོད།། མ་རྒན་གོས་རུལ་ཅན་དེ་སེམས་ལ་འཕྲེང་བཞིན།། སྲིང་མོ་སྣབས་འཛར་ཅན་ལ་སྙིང་རྗེ་སྐྱེ་བཞིན།། ཆུང་གྲོགས་ཞེ་འདང་ཅན་དེ་ཡིད་ལ་འཁོར་བཞིན།། མིག་ཆུ་སེམས་ལ་ལྷུང་གིན་རང་ཡུལ་བསྐྱུར་འདུག། རྐང་རྗེས་ཤར་ལ་ཕབ་པའི་ཤུལ་ལམ་རིང་མོ།། ལྷོ་བྲག་གྲོ་བོ་ལུང་ལ་ལྷམ་མེར་མཐུད་ཀྱང་།། ལག་པ་སྟོང་པ་ཡིན་པའི་སོར་བཅུའི་ཐལ་མོས།། སྒྲ་སྒྱུར་ཆེན་པོའི་ཐུགས་དམ་ག་ལ་ཁེངས་སྲིད།། མཐའ་མའི་གདམ་ཁ་རང་ལུས་བྲན་དུ་བཀོལ་ཀྱང་།། རྡུང་རྡེག་ཚིག་མཚོན་མང་པོས་ལུས་སེམས་རྨས་པས།། ཉེ་དུ་གང་ཡང་མེད་པའི་གཞན་ཡུལ་དེ་ན།། ཁེར་རྐྱང་རྩིག་པར་ཁེན་ནས་མིག་ཆུ་བཞུར་ཡོད།། བདག་མོ་སྙིང་རྗེ་ཅན་དེའི་བྱམས་སྐྱོང་འོག་ཏུ།། ལུས་སེམས་ངལ་བའི་སྟེགས་བུ་ཡུད་ཙམ་རག་ཀྱང་།། དབང་ཆ་གང་ཡང་མེད་པའི་བདག་མེད་མོ་ལ།། ཅི་ཞིག་བྱེད་པའི་ནུས་པ་ཤིན་ཏུ་ཕྲ་ཨང་།། འུ་ཐུག་བྱ་ཐབས་ཟད་པའི་མཐའ་མའི་རེ་བ།། འཇིག་རྟེན་གཞན་ལ་མ་གཏོགས་ལམ་ཁ་མེད་ཀྱང་།། གཞུང་པ་རྔོག་སྟོན་བླ་མའི་ལྡེམ་པོ་གསུང་གིས།། དོགས་པའི་ཁ་སྣོན་བརྒྱབ་ནས་ཕྱིར་བཤོལ་བྱས་སྐད།། སྡུག་རུས་སྲོག་ཤིང་བྱས་པའི་སྙིང་ཤ་མཁྲེགས་པོས།། བླ་མ་ཕོད་པ་ཅན་ཡང་སྐྱེངས་པར་བྱས་སམ།། སྣོད་ལྡན་སྙིང་གི་བུ་ཞེས་གཅེས་གཅེས་ངང་ནས།། མཐའ་མའི་གདམས་ངག་མ་ལུས་གཅིག་ཏུ་སྤུངས་འདུག། རེ་བ་མཛུབ་གང་མེད་པའི་ཡི་ཆད་ཀློང་ནས།། ཧོབ་དེ་ཐོད་དུ་བརྒལ་ནས་མགྲོན་གྱི་གཙོ་བོ།། ད་ནི་ཁྱེད་རང་མི་དགའ་རང་དབང་མེད་དེ།། མཆི་མ་འཛུམ་ལ་བསྲེས་ནས་ས་མཆོང་གནམ་མཆོང་།། ཚེ་གཅིག་རེ་བ་འགྲུབ་པའི་ཉི་མ་འདི་ནས།། ཁྱེད་རང་སུ་ཡང་མིན་ཏེ་མི་ལ་རས་པ།། ད་ནི་ཐོས་པ་དགའ་དང་ཨ་ཕོ་མཐུ་ཆེན།། …

རེ་བའི་སྐུལ་མ། ཤེས་རབ་མཚོ་མོ། བོད། གངས་དཀར་གཞིས་ཁྱིམ་དུ་འཚར་བའི་མཛེས་སྡུག་གི་ལྷ་མོ།། བག་འཁུམ་དྲྭ་བ་ཡི་འཆིང་ཞགས་ཐག་རྒྱག་གི་སྣེ་མོས།། སྤོབས་པའི་གོམ་འགྲོས་ཀྱི་གཤིས་སྤྱོད་འཇམ་པོ་ཡི་མགོ་བོ།། མ་བཀྱིགས་གུ་ཡངས་ཀྱི་བསམ་བློས་ཡར་བརྩོན་ན་ལོངས་ཤོག།