འཛུམ་གྱི་སྙན་ངག་གསར་པ་ཞིག

རྩོམ་ཡིག་འདི་ཐེངས་ 2059 བཀླགས་འདུག

གླལ་བ།

ཕ་ཡུལ་ནམ་མཁའ་ལ་སྤྲིན་འདྲ་འཁྲིགས་ཨེ་ཡིན།།
མི་ཡུལ་ས་མཐའ་ལ་འབྲུག་ཅིག་གྲགས་ནས་བྱུང་།།

ཐད་ལ་ཉི་མ་ཞིག་ཤར་དང་ཤར་འདུག་སྟེ།།
རྒྱང་གི་གནམ་ས་གཉིས་ད་དུང་མག་མོག་རེད།།

རླུང་བུ་གྲང་མོ་རེ་གཡས་གཡོན་ལྡང་བཞིན་འདུག།
ན་བུན་སྐྱ་བོ་རེ་གང་སར་འཐིབས་བཞིན་འདུག།

འགྲོ་ལམ་སྐྱ་མོ་ལ་དུད་སྨུག་འཚུབ་པའི་ལོ།།
རྒྱབ་ལ་ཕྱི་མིག་ཅིག་གཏན་ནས་སློག་མ་འདོད།།

འདི་ནས་ཕ་རོལ་ལ་ཇི་ཙམ་བལྟས་ན་ཡང་།།
མདུན་གྱི་ལམ་སྣེ་ནི་མཐོང་ཐབས་མ་བྱུང་ངོ་།།

ལྷོ་མཐའི་གནམ་གཤིས་དེ་ཅི་ཙམ་ཚ་ན་ཡང་།།
ཡ་ཁོག་འཁྱགས་རོམ་ནི་ཞུ་ཐབས་མ་མཆིས་སོ།།

སྒོ་ཁའི་ལྷམ་ཆུང་ལ་ཐལ་སྐྱ་བབས་འདུག་ཨ།།
ཁ་པར་པར་མིག་ལ་རྡུལ་དྲེག་ཆགས་འདུག་ཨ།།

རྐང་ལ་ལྷམ་གོག་རེ་གོན་ནས་ལམ་ལ་ཆས།།
ལག་ལ་ཁ་པར་རེ་བཟུང་ནས་མདུན་ལ་ཐོན།།

རྐང་རྗེས་དཀར་པོ་རེ་ད་ནས་འཇོག་རན་སོང་།།
ཟིན་ཐོ་དམར་པོ་འགའ་འདི་ནས་འབྲི་རན་སོང་།།

10/11/ 2020