མགར་ཐང་དཀར་གྱི་མུ་འབྲེལ་སྙན་ངག་རིང་མོ།

རྩོམ་ཡིག་འདི་ཐེངས་ 2768 བཀླགས་འདུག

མགར་ཐང་དཀར་རམ་གཅོད་པ་ཐར་ནི་དགུ་བཅུའི་སྨད་ལ་མཚོ་ལྷོ་འབའ་རྫོང་དུ་སྐྱེས་ཤིང་། ཁོ་རང་རྩོམ་འབྲི་དང་ཕ་སྐད་མ་ཡིག་ལ་དུང་བ་ཆེ་རྐྱེན་སྔ་ཕྱིར«སྦྲང་ཆར»དང«གངས་དཀར་རི་བོ»«སྤང་ལྗོངས»«ཁྲི་ཤོར་རྒྱལ་མོ»«བོད་ལྗོངས་ཉིན་རེའི་ཚགས་པར»«མཚོ་སྔོན་བོད་ཡིག་གསར་འགྱུར»«མཚོ་སྔོན་ཁྲིམས་ལུགས་ཚགས་པར»«མཚོ་ལྷོ་བོད་ཡིག་ཚགས་པར»ད་དུང«ཀྲུང་གོ་བོད་ཀྱི་དྲ་བ»«བཙན་པོ་མགར་གྱི་དྲ་བ»སོགས་དྲ་རྒྱ་དང་ཚགས་དེབ་འགའ་རེའི་སྟེང་བརྩམས་ཆོས་སྤེལ་མྱོང་།

ཕ་དམ་པ། མ་མཛངས་མ།

མགར་ཐང་དཀར། མཚོ་ལྷོ།

མི་ཡུལ་གྱི་ལུང་པ
ངས་ཁྱོད་ངོ་ཤེས་པ་ནས་བཟུང
ཁྱོད་ཀྱི་ཆགས་རིམ
ཁྱོད་ཀྱི་གཏམ་རྒྱུད
ཡོད་དོ་ཅོག
སུ་ཞིག་གིས
ཞིབ་ཆ་ལྡན་པའི
སྒྲིག་རིམ་ཡོད་པའི
བདག་ལ་གསུངས་མྱོང
གཞན་མྱི་ཞིག་ག་ལ་ཡིན
ང་ཐོག་དང་པོ་མི་ཡུལ་ལུང་པ་འདིར་ཐོན་དུས
ངས་ངོ་ཤེས་པ་ནི་འཛུམ་འཛུམ་དམུལ་དམུལ་ངང－
དགའ་དགའ་ལྷང་ལྷང་གིས་ང་རང་འཚོས་པའི་ཕ་མ་གཉིས་ཨང
དེ་དུས་ངས་མཐོང་བའི་མིག་མདངས་གཉོམ་པོ་དེའི
ང་ལ་ཆེས་ཞིམ་སྣང་གི་འཚོ་བ་གསར་བ་ཞིག
ཆེས་ཡིད་འོང་གི་ཚེ་སྲོག་རླབས་ཆེན་ཞིག་གི་ཡང་སྙིང་རྟོགས་སུ་བཅུག་སོང
རེ་བས་ཁེངས་པའི་མིག་ཟུང་དེའི
ངས་གཏམ་རྒྱུད་གསར་བ་ཞིག་གི་འགོ་བརྩམས་བྱུང་བ་རྟོགས
འཇིག་རྟེན་ནི་ཇི་འདྲའི་ཟང་ཟིང་ཆེ་ན་ཡང
ངས་དེ་དུས་མཐོང་བའི་ལྷད་མེད་ཀྱི་མིག་ཟུང་གཉོམ་པོ་དེའི
ངས་དེ་དུས་མཐོང་བའི་གཅེས་སེམས་ཀྱི་འཛུམ་མདངས་དེའི
ཏག་ཏག་ང་ལ་སྤོབས་པ་དང་རེ་བས་གཙེས་བྱུང
དུས་དེ་ནས་བཟུང
མི་ལོ་ཉི་ཤུ
མི་ལོ་ཉི་ཤུའི་འགྲུལ་བཞུད་རིང་མོ་དེ
སུ་ཞིག་གི་རྔུལ་ཁྲག་ལ་བརྗེས་ནས་ཡོང་ཟེར་ན
གཞན་གང་ཡང་མ་ཡིན་ལ
བྱམས་བརྩེའི་བདག་ཉིད་ཆེན་པོ་སྟེ
བདག་གི་ཕ་དམ་པ་དང－
མ་མཛངས་མ་ལགས
ངས་འདི་ལྟར་ལབ་བྱུང་ན
སུ་ཞིག་གིས་ཀྱང་རྒྱུས་ལོན་པར་དཀའ་ལ
མཐའ་ན་བདག་གི་མཛའ་གྲོགས་ཀྱིས་ཀྱང་་་ ་་་
དེ་ཡང་ཅི་ཁག
ངའི་ཕ་མའི་དཀའ་སྡུག་གི་འགྲུལ་བཞུད
སྐྱི་སེར་རླུང་ལ་བརྗེས་པའི་ལང་ཚོ་ཡི་གསོན་ཤུགས
ང་ཚོས་ག་ནས་མཐོང་མྱོང
བདག་གི་གཅེས་གྲོགས་ཚོ
དེ་ཡི་ལན་དུ་ང་ལ་ཅི་ཡང་མི་དགོས
ངའི་ཐོག་ཏུ་འདང་རེ་བརྒྱབ་ནས
རང་ཐོག་ཏུ་ཟོན་ཞིག་དེད་དང་ཆོག་གོ
ང་ཚོ་ནི་དུས་རབས༢༡པའི་མྱི་ཡིན་ལ
དཀའ་སྡུག་ཅེས་པ་དངོས་གནས་ག་ལ་ཤེས
རྒྱུ་མཚན－
འུ་ཚོའི་ཕ་མའི་དྲིན་དུ
དཀའ་སྡུག་ཅེས་པའི་ཐ་སྙད་ཚ་བོ་འདིར
འབྲེལ་ཡེ་ནས་རྒྱག་མི་ཐུབ
དེ་བས－
ཕ་དམ་པའི་རུས་པ་གསེར་གྱི་ཤན་མི་ཐུབ་རུང
སྐྲ་དཀར་བོ་སྐྱི་སེར་རླུང་ལ་མི་སྐུར་རོགས
མ་མཛངས་མའི་སྙན་པ་དེབ་དུ་སྐྲུན་མི་ཐུབ་ཀྱང
རྒས་གཉེར་མའི་སྟེང་དུ་གཉེར་མ་མི་བརྩེག་རོགས
དྲིན་ལན
ཕ་མའི་དྲིན་ལན་ཟེར་ན
གོས་འཇམ་པོ་ཞིག་དང
ཇ་ཚ་བོ་ཞིག་གིས་ག་ནས་འཇལ་ཐུབ
ཕ་མའི་དྲིན་ལན་ཟེར་ན
རང་གི་འདུན་ལམ་ཡག་ཤོས་ཤིག་དང
རང་ལ་ཁྱིམ་ཚང་གྲལ་དག་ཅིག་གྲུབ་པའི་ག་ནས་འཇལ་ཐུབ
མི་ཐུབ་སྟེ
མདོར་དེད་ན
དེ་དག་མཐའ་གཅིག་ཏུ་རང་དོན་འབའ་ཞིག་ལས་མ་འདས
འུ་ཚོའི་སྐྱེ་བ་འདིར
དྲིན་ཞིག་ཆད་ཡོད་ན
འུ་ཚོའི་སྐྱེ་བ་འདིར
དོམ་ཞིག་ཆད་ཡོད་ན
དཀའ་སྡུག་གི་ཀློང་ནས
རྔུལ་ཁྲག་གི་ཀློང་ནས
མི་ཆུ་ཁྲོད་ནས
འུ་ཚོ་ནར་སོན་དུ་འཇུག་མཁན་གྱི་ཕ་མ་གཉིས་ལས་མ་འདས
དྲིན་ལ་དྲིན་ལན་ལོས་དགོས
འཇིག་རྟེན་གྱི་ཆོས་ཉིད་ཡིན
དྲིན་ལན་འཇལ་དགོས་ལོས་ཡོད
འཇིག་རྟེན་གྱི་འགྲོ་ལུགས་ཤིག
ཡིན་ཡང་འུ་ཚོའི－
དྲིན་ལན་གཞལ་དུ་དཀའ་བ་འདི
མྱི་ལུས་ཤིག་བླངས་པའི་འགྱོད་གདུང་དང－
ལུས་རྟེན་ཞིག་ཐོབ་པའི་སྡུག་འབྲས་སུ་མི་རྩི་ཐབས་མེད་དུ་ཆགས་སོང
ཤ་དར་རུས་དར་གྱི་གཞོན་པ་ང་ཚོ
ཅིས་ཀྱང་མདུན་དུ་སྐྱོད་དགོས་ལ
འཁང་ར་རྒྱལ་ཁ་རུ་བསྒྱུར་ནས་མདུན་དུ་སྐྱོད་དགོས
འུ་ཚོའི་མྱི་ལུས་ཙམ་ལོན་མ་ལོན་གྱི་དུས་མཚམས་སུ
ཏག་ཏག་སུ་ཞིག་གིས་ལས་བདའ་མེད་པར－
ནོངས་འགྱོད་དང་ཕངས་སེམས་མེད་པར་འུ་ཚོ་བསྐྱངས་སོང་ངམ
གཞན་གང་ཡང་མ་ཡིན་ཏེ
འཇིག་རྟེན་འདིའི་བྱེད་པོ་ཐོག་མ་སྟེ
ཕ་དམ་པ་དང་མ་མཛངས་མའོ
དོ་ནུབ་འུ་ཚོའི་ནུས་པ་ནི
སྐད་གསེང་མཐོན་པོས
ཀྱེ་བདག་གི་ཕ་དམ་པ－
མ་མཛངས་མ
ཁྱེད་ཚོའི་དཀའ་ལས་མྱངས་སོང
བཀའ་དྲིན་ཆེ
དེ་ལས་ཅི་ཡང་མི་ནུས་སོ
སྣང་བའི་སྟོབས་འབར་བའི་ཤ་དར་རུས་དར་གྱི་ན་མཉམ་ཚོ
རང་བཀུར་གྱིས་དང－
རང་བཀུར་ནི་གཞན་བཀུར་ཡིན་ལ
གཞན་བཀུར་ནི་འཇིག་རྟེན་འདིའི་ཆེས་ཡིད་དུ་འོང་བའི་འཚོ་བ་ངོ་མ་དེ་ཡིན་པ་ཤེས་སུ་ཆུགས
མདོར་ན
ཡིད་དུ་འོང་བའི་འཚོ་བ་ནི་འུ་ཚོའི་ཕ་མའི་ཚེ་མཇུག་གི་མ་ཎི་ཡིག་དྲུག་དང
མྱི་ལུས་ཀྱི་མཐར་སྐྱེལ་བྱེད་ཀྱི་བྲོ་ཁ་ཞིམ་པོ་དེ་ཡིན་པ་ཤེས་པར་གྱིས
ད་དུང－
རང་གཞན་ཀུན་གྱི་བདེ་སྐྱིད་དང
སྣང་བའི་སྒོ་འཕར་ཕྱེ་བའི་རིག་ལམ་ཞིག་ཡིན་པ་ཤེས་པར་གྱིས
སྤྱིར་ནས
སྐད་ཆ་ནི་རུས་སྒྲོམ་དུ་བཅུག་པའི་ཐ་སྙད་ཀྱི་ནོམ་པ་ཡིན་གྱི
དེ་ནི་བཤད་ཀྱིན་བཤད་ཀྱིན་མཐར་སྤྲོད་མི་ཐུབ་ལ
མཐའ་ན་རང་ཡིད་ཀྱང་ཚིམ་དུ་འཇུག་མི་ཐུབ་པས
ངས་ཚིག་སྣེ་སྙིང་ལ་བཏེགས་ནས
ངས་ཐ་སྙད་རུས་སུ་བསྒོམས་ནས
སྐད་ཆ་ཞིམ་པོ་ཞིག་ལབ་རྒྱུ་ཡིན
བུ་ཕྲུག་ངའི་བདག་ཉིད་ཆེན་པོ－
ཕ་དམ་པ－མ་མཛངས་མ་ལགས
ཁྱེད་གཉིས་ཀྱི་གཅེས་ཕྲུག་ནར་སོན་བྱུང
མིག་གིས་རྒྱང་ལ་ལྟ་བཞིན
རྒྱང་རིང་བློ་ཡི་ཟབ་ས་རུ་སྦས་ཡོད
གཅེས་ཕྲུག་ངའི་བདག་ཉིད་ཆེན་པོ
ཁྱེད་གཉིས་ཀྱིས་དཀའ་ལས་མྱངས་སོང
བཀའ་དྲིན་ཆེ－
བཀའ་དྲིན་ཆེ－
བཀའ་དྲིན་ཆེ－－－

༠༢༠/༠༡༠/༠༡－༠༢༠/༠༨/༠༡༥དུས་ཆེན་གཉིས་འགྲིག་གི་མཚན་མོར«ཕ་དམ་པ།མ་མཛངས་མ»ཞེས་པའི་རང་མོས་སྙན་ངག་ཁ་གསལ་གོ་བདེ་མ་འདི་ཐོལ་གྱིས་བྱུང་།